མཆོད་རྟེན་གྱི་རྣམ་པའི་ཁྱད་པར།
དེ་ལ་མཆོད་རྟེན་གྱི་རྣམ་པའི་ཁྱད་པར་ནི། འདུལ་བའི་སྡེ་སྣོད་དང་། མདོ་མྱང་འདས་སོགས་ལས་ཉན་རང་བྱང་སེམས་རྣམས་དང་། འཁོར་ལོས་སྒྱུར་བ་ཚུན་ཆད་ཀྱི་མཆོད་རྟེན་རྣམ་པ་ཐ་དད་པར་གསུངས་ལ། དེ་ཡང་སློབ་དཔོན་ཡོན་ཏན་འོད་ཀྱི་གསུང་འདུལ་བ་མདོ་རྩ་བ་༼སྣར་ཐང་བསྟན་འགྱུར། མདོ། ཟུ ༽ ༡༠༡༽ལས། མཆོད་རྟེན་ནི་རྣམ་པ་གཉིས་ཏེ། གཙང་ཁང་ཅན་ཉིད་དང་། ཀ་བ་ལྟ་བུ་ཉིད་དོ། །དེ་རབ་ཏུ་བྱུང་བ་རྣམས་ལ་འོས་པ་ཉིད་དོ། །གལ་ཏེ་དགེ་བ་ཡིན་ནའོ། །སངས་རྒྱས་རྣམས་ཀྱི་ནི་རྣམ་པ་ཐམས་ཅད་དོ། །རྣམ་པ་ནི་བང་རིམ་བཞི་དང་། འདབ་མ་དང་། བུམ་པ་དང་། པུ་ཤུ་དང་། སྲོག་ཤིང་། གདུགས་བཅུ་གསུམ་དང་ཆེ་ཁེབས་དག་གོ །རང་སངས་རྒྱས་རྣམས་ཀྱི་ནི་ཆར་ཁེབས་མེད་པའོ། །ཉན་ཐོས་རྣམས་ཀྱི་ནི་འབྲས་བུའི་ཚད་ཀྱིས་དེའི་གདུགས་གཅིག་ལྷག་པའོ། །སོ་སོ་སྐྱེ་བོ་རྣམས་ཀྱི་ནི་བྱི་བོའོ། །ཞེས་སོགས་གསུངས།
ཡང་སློབ་དཔོན་ཀླུ་སྒྲུབ་ཀྱིས་ལྷུང་བཟེད་ཁ་སྦུབས་པ་ལྟ་བུའི་མཆོད་རྟེན་དང་། ཁང་བུ་བརྩེགས་པའི་མཆོད་རྟེན་དང་། རྒྱལ་མཚན་བསྒྲེངས་པ་ལྟ་བུའི་མཆོད་རྟེན་དང་གསུམ་གསུངས་པ་འདི་རྣམས་ཀྱང་། མདོ་རྩ་བ་ལས། སོ་སོ་སྐྱེ་བོ་རྣམས་ཀྱི་མཆོད་རྟེན་གྱི་རྣམ་པ་ནི་བྱི་བོ་སྟེ་གདུགས་སོགས་མེད་པར་གསུངས་པ་དེ་དང་། ཡང་གཙང་ཁང་ཅན་དང་། ཀ་བ་ལྟ་བུའི་མཆོད་རྟེན་གཉིས་གསུངས་པ་རྣམས་རིམ་བཞིན་ཕྱོགས་མཐུན་དུ་སྣང་། དེ་བཞིན་དུ་རྒྱ་གར་དུ་ཁང་པ་རིམ་པ་མང་པོ་བརྩེགས་པ་ཟུར་བཞི་འམ་བརྒྱད་ཡོད་པ་ཡོངས་གྲགས་གན་ངྷོ་ལའི་བཀོད་པ་ཞེས་ཟེར་བ་དེའང་དེ་གསུམ་གྱི་གྲངས་ཡིན་པར་སྐྱབས་མགོན་རྡོ་རྗེ་འཆང་གིས་གསུངས་ཞེས་གུང་ཐང་རིན་པོ་ཆེས་༼དཀར་ཆག་ལྷའི་རྔ་ཆེན། པོད། ཅ༤༤༧༽གསུངས།
གཞན་ཡང་མཆོད་རྟེན་གྱི་རྣམ་པ་འདྲ་མིན་མང་དུ་ཡོད་པར་གསུངས་པ་ལས། གཙོ་བོ་ཡོངས་གྲགས་ལ་བདག་ཅག་གི་སྟོན་པ་མཆོག་གིས་མཛད་པ་ཁྱད་པར་ཅན་རེ་མཛད་པའི་ཡུལ་ཕྱོགས་རྣམས་སུ། རྗེས་འཇུག་སྐལ་ལྡན་དད་སྟོབས་མཆོག་ཏུ་ཡངས་པ་རྣམས་ཀྱིས་མཆོད་རྟེན་རེ་བཞེངས་པའི་བདེ་གཤེགས་མཆོད་རྟེན་བརྒྱད་ཅེས་གྲགས་པ་དེ་དག་གི་རྣམ་པ་ནི་འདི་ལྟར་གསལ་ཏེ།
༡. པད་སྤུངས་མཆོད་རྟེན་ཞེས་པ་ནི།
གྲོང་ཁྱེར་སེར་སྐྱར་སྐུ་བལྟམས་པའི་ཚེ་ཕྱོགས་སོ་སོར་གོམ་པ་བདུན་སྤོས་པར་པདྨ་རེར་སྐྱེས་པ་དང་ པདྨ་འདམ་ལས་སྐྱེས་ཀྱང་འདམ་གྱིས་མ་གོས་པས། འཁོར་བར་སྐྱེས་ཀྱང་འཁོར་བའི་སྐྱོན་གྱིས་མ་གོས་པ་མཚོན་བྱེད་པདྨ་འདབ་མ་ཅན་གྱི་བང་རིམ་ཟླུམ་པོ་བཞི་པ་ཅན་ཏེ། ལ་ལས་འདི་ལ་བདེ་གཤེགས་མཆོད་རྟེན་ཡང་བརྗོད།
༢. བྱང་ཆུབ་མཆོད་རྟེན་ཞེས་པ་ནི།
ཡུལ་མ་གྷ་ངྷར་སངས་རྒྱས་པའི་ཚེ། ཆོས་ཐམས་ཅད་བདག་མེད་པའི་དེ་ཁོ་ན་ཉིད་ལ་མ་མཉམ་པ་མེད་པར་རོ་མཉམ་ཞིང་གཅིག་པར་མཁྱེན་པའི་སྐད་ཅིག་གཅིག་གིས་ཡང་དག་པར་ཐུགས་སུ་ཆུད་ཅིང་། སྐུ་བཞི་མངོན་པར་རྫོགས་པར་བྱང་ཆུབ་པར་མཚོན་བྱེད་གྲུ་བཞི་ལྷམ་པའི་བང་རིམ་བཞི་པ་ཅན་དེའོ། །
༣ . ཆོས་འཁོར་མཆོད་རྟེན་ཞེས་པ་ནི།
ཡུལ་ཝཱ་ར་ཎཱ་སིར་ཆོས་ཀྱི་འཁོར་ལོ་བསྐོར་བའི་ཚེ་བདེན་པ་བཞི་དང་། རྣམ་ཐར་བརྒྱད་དང་། རྟེན་འབྲེལ་བཅུ་གཉིས་དང་། སྟོང་ཉིད་བཅུ་དྲུག་སོགས་ཆོས་ཀྱི་སྒོ་དུ་མ་སྟོན་པ་མཚོན་བྱེད་སྒོ་བཞི་དང་། བརྒྱད་དང་བཅུ་གཉིས་དང་། བཅུ་དྲུག་ཅན་གྱི་བང་རིམ་བཞི་པ་ཅན་ཏེ། འདི་ལ་བཀྲ་ཤིས་སྒོ་མང་མཆོད་རྟེན་དང་ཡེ་ཤེས་མཆོད་རྟེན་ཡང་ཟེར།
༤ . ཆོ་འཕྲུལ་མཆོད་རྟེན་ཞེས་པ།
མཉན་ཡོད་ཛེ་ཏའི་ཚལ་དུ་ཆོ་འཕྲུལ་ཟླ་བའི་ཚེས་གཅིག་ནས་བཅོ་ལྔའི་བར་ཆོ་འཕྲུལ་སྣ་ཚོགས་བསྟན་ཏེ། མུ་སྟེགས་ཀྱི་སྟོན་པ་དྲུག་འཁོར་དང་བཅས་པ་བཏུལ་བ་དང་། སྐལ་ལྡན་གྱི་གདུལ་བྱ་མཐའ་ཡས་པ་ཡང་དག་པའི་ལམ་ལ་བཀོད་པས། གཞན་ལས་ཁྱད་པར་འཕགས་པ་མཚོན་བྱེད་ཕྱོགས་བཞིར་གློ་འབུར་ཡོད་པའི་བང་རིམ་བཞི་པ་ཅན་ཏེ། ལ་ལས་འདི་བང་རིམ་གསུམ་པ་ཅན་དུའང་བཤད་པ་དང་། མུ་སྟེགས་ཕམ་མཛད་ཀྱི་མཆོད་རྟེན་ཞེས་ཀྱང་བརྗོད།
༥ . ལྷ་བབས་མཆོད་རྟེན་ཞེས་པ།
སྟོན་པ་མཆོག་ཡུམ་སྒྱུ་མ་ལྷ་མཛེས་ལྷ་གནས་སུམ་ཅུ་རྩ་གསུམ་དུ་ལྷའི་སྐྱེ་བ་བཞེས་པར་ཆོས་སྟོན་པར་ཕེབས་ཏེ། སླར་ལྷ་ཡུལ་ནས་ཡུལ་གསལ་ལྡན་དུ་མར་བྱོན་པའི་ཚེ། སྐལ་ལྡན་རྣམས་ཀྱིས་སྟོན་པ་མཆོག་ལྷ་ཡུལ་ནས་རིན་པོ་ཆེའི་ཐེམ་སྐས་ལས་བབས་པར་མཇལ་བ་དང་། བདེ་བར་གཤེགས་པ་འགྲོ་བ་སེམས་ཅན་གྱི་དོན་དུ་བྱོན་པར་མཚོན་བྱེད་ཕྱོགས་རེ་ནས་ཐེམ་སྐས་ཡོད་པའི་བང་རིམ་བཞི་པ་ཅན་ཏེ། གཞན་དག་འདི་ལ་ཆོ་འཕྲུལ་ཆུང་ངུ་དང་། ལྷས་མཆོད་མཆོད་རྟེན་ཡང་ཟེར།
༦ . དབྱེན་ཟླུམ་མཆོད་རྟེན་ཞེས་པ།
རྒྱལ་པོའི་ཁབ་ཏུ་ལྷས་བྱིན་གྱིས་དགེ་འདུན་གྱི་དབྱེན་བྱས་པ། སྟོན་པས་སླར་ཟླུམས་པའི་ཚེ། དབྱེན་གྱི་རྒྱུ་ཉོན་མོངས་པ་འདོད་ཆགས་ཞེ་སྡང་གཏི་མུག་ལྟ་ངན་བཅས་བཞི་བཅད་དེ། རྣམ་ཐར་བརྒྱད་དང་ཟིལ་གནོན་བརྒྱད་ལ་གནས་པར་མཛད་པ་མཚོན་བྱེད། གྲྭ་ཟུར་བཞི་བཅད་པའི་ཟུར་བརྒྱད་ཡོད་པའི་བང་རིམ་བཞི་པ་ཅན་ཏེ། ཁ་ཅིག་འདི་ལ་འོད་ཟེར་ཅན་དང་བྱམས་འོད་མཆོད་རྟེན་ཡང་ཟེར།
༧ . རྣམ་རྒྱལ་མཆོད་རྟེན་ཞེས་པ།
ཡུལ་ཡངས་པ་ཅན་དུ་སྐུ་ཚེའི་འདུ་བྱེད་ཡུན་རིང་དུ་བྱིན་གྱིས་བརླབས་པས་ན། འཆི་བདག་གི་བདུད་ལས་རྣམ་པར་རྒྱལ་བར་མཚོན་བྱེད། གྲྭ་ཟུར་མེད་པ་བང་རིམ་ཟླུམ་པོ་གསུམ་པ་ཅན་ཏེ། འདི་ལ་བྱིན་རླབས་མཆོད་རྟེན་ཡང་བརྗོད།
༨ . མྱང་འདས་མཆོད་རྟེན་ཞེས་པ།
ཡུལ་རྩ་མཆོག་གྲོང་དུ་སྐུ་མྱང་ངན་ལས་འདའ་ཚུལ་བསྟན་པར་འཁོར་བའི་སྤྲོས་པ་ཐམས་ཅད་དང་བྲལ་ཞིང་ཉེ་བར་ཞི་བར་མཚོན་བྱེད། བང་རིམ་སོགས་ཀྱི་སྤྲོས་པ་མེད་པ་བཞུགས་ཁྲིའི་སྟེང་དུ་བུམ་རྟེན་ཡན་ཆད་དྲིལ་བུའི་དབྱིབས་ལྟར་ཡོད་པ་དེ་ཡིན་ནོ།།
