སྐུ་སྐྱེའི་ལམ་ལུགས་ལ་དཔྱད་པ།
འདིར་བོད་སོག་གི་སྐུ་སྐྱེའི་ལམ་ལུགས་སྐོར་ལ་སྔོན་བྱོན་དམ་པའི་གསུང་སྒྲོས་དང་འབྲེལ་བར་བདག་གི་རྗེས་སུ་འཇུག་པ་དག་ལ་ཕན་པའི་དོན་དུ་དཔྱད་པ་ཅུང་ཟད་བགྱིད་ན། རྒྱལ་བ་དགེ་འདུན་རྒྱ་མཚོ་ཡབ་ཀྱི་བང་ཐོགས་སྐབས་ནམ་མཁའི་དབྱིངས་ནས་འབྲུག་གྲགས་པ་གསན་ནས་ཡབ་ལ། ཕ་བློ་བཟང་གྲགས་པས་ཆོས་གསུངས་པ་འདྲ་བའི་སྒྲ་ཞིག་གོ་གསུངས་པར། ཡབ་ཀྱིས་ཕ་བློ་བཟང་གྲགས་པས་ཆོས་ཇི་ལྟར་གསུངས་དྲིས་པར། འོ་ལགས་སོ། །བཤེས་གཉེན་དུལ་བ་ཞི་བ་ཉེར་ཞི་བ། །ཡོན་ཏན་ལྷག་པ་བརྩོན་བཅས་ལུང་གིས་ཕྱུག །དེ་ཉིད་རབ་ཏུ་རྟོགས་པ་སྨྲ་མཁན་ལྡན། །བརྩེ་བའི་བདག་ཉིད་སྐྱོ་བ་སྤངས་ལ་བརྟེན། །ཞེས་གསུངས་པ་རེད་ཅེས་རྗེ་དགེ་འདུན་གྲུབ་པས་རྗེ་ཙོང་ཁ་བ་ལས་ཆོས་གསན་པ་རྗེས་དྲན་པ་དང༌། ཡང་དགུང་ལོ་གསུམ་གྱི་དུས་ཡུམ་གྱིས་སྡིགས་མོ་བྱས་པར། ཁྱེད་རང་ང་ལ་འཐབ་སྡིག་ཡོང་གསོལ་བ་ཐོབས་གསུངས། ཇི་ལྟར་འདེབས་ཞུས་པར། དགོས་འདོད་ཀུན་འབྱུང་ནོར་བུ་བསམ་འཕེལ་ཁྱོད། །ཡོན་ཏན་ཐམས་ཅད་མ་བསླབས་ཐུགས་སུ་ཆུད། །ཐོས་བསམ་སྒོམ་པ་མཐར་ཕྱིན་གྲུབ་པ་བསྙེས། །འཕྲིན་ལས་རྒྱུན་མི་འཆད་ལ་གསོལ་བ་འདེབས། ། འདི་ཐོན་གསུངས་ཏེ་སྐུ་ཚེ་དེ་ལ་ཚིགས་བཅད་རྩོམ་པའི་ཐོག་མ་ཡིན་ཞིང༌། སྐུ་སྐྱེ་ཟེར་བ་འདི་འདྲའི་མཛད་པ་སྟོན་དགོས་པ་ཀུན་མཁྱེན་འཇམ་དབྱངས་བཞད་པར་མཇལ་ཁ་ཞུས་པར། ཁྱོད་སུ་ཡིན་ཞེས་དྲིས་པས་ང་བླ་མ་སེམས་པ་ཡིན་ཞེས་ལན་བཏབ། གང་ནས་འོངས་དྲིས་པས་རྒྱ་ནག་ནས་འོངས། རྐང་ཐང་ངམ་རྟ་ལ་ཞོན་གསུངས་པས་དེ་གང་ཡང་མ་ཡིན་པའི་འོང་ལུགས་སྣང་ཞུས་པ་ན། བར་དོ་བ་ཡིན་པས་དེ་བདེན་གསུངས་ནས་ཕྱག་མཛུབ་གཅིག་མནན། ཡང་བླ་མ་ཡིན་ན་སློག་པ་ཅི་ལ་གོན་ཞེས་པ་ན། འོ་ན་ཁྱོད་ཀྱིས་པགས་ཐུལ་ཅི་ལ་གྱོན་ཞུས་ཚེ་ཕྱག་མཛུབ་གཉིས་མནན། ཡང་བླ་མ་ཡིན་ན་ཆོས་ཤོད་ཆོས་ཐོན་གསུངས་ཚེ་བརྗེད་པ་མེད་དམ་ཞུས་པས་ཕྱག་མཛུབ་གསུམ་མནན་ནས་ང་ལ་འཁོར་གསུམ་སོང་བས་བྱིས་པ་ཤེས་རབ་ཅན་ཞིག་འོང་ཨ་ཙ་མ་གསུངས་ནས་མགོ་ལ་བྱུག་པ་མཛད། ཅེས་སུམ་པའི་རང་རྣམ་དུ་གསུངས་ཏེ་ལས་སྣང་མ་དག་པ་རྣམས་གོང་དུ་འདྲེན་པའི་སྐུ་སྐྱེ་འདི་འདྲ་བ་ཞིག་ཡིན་ན་སུ་ལ་ཡང་དད་པ་མི་སྐྱེ་བའི་རང་དབང་མེད་དོ། །འཇམ་དབྱངས་བཞད་པ་འཇིགས་མེད་རྒྱ་མཚོ་དགུང་ལོ་བཅུ་གཅིག་གི་དུས་སྨོན་ལམ་ཚོགས་དབུས་སུ་སྡེ་ཁྲི་རིན་པོ་ཆེ་ནས་མཎྜལ་བཤད་པ་ཞུས། དེའི་རྗེས་གསུང་འཕྲོས་སུ། ཁྱེད་ཀྱི། ཀཱ་ལ་ཙཀྲ་མི་འགྱུར་བདེ་བའི་མཁར། །སོགས་དྲངས་ནས་ཤོམ་ཆེན་པོ་བྱེད་ཀྱི་ཨང་གསུངས། ཤོམ་ལོས་ཡོད། ངེད་ཚོ་མཛོད་དཀའ་རམས་ཀྱི་དགེ་བཤེས་རེད་མོད་ཅེས་རྩེད་མོ་ཞུས་པའི་ལན་དུ། ཆོག་གི་ཡ། ཅིག་ཉན་ཨེ་ཡོད་བསམས་ཀྱང་ད་ཅིག་ཉན་སོང་བ་རེད་གསུངས། གནས་ཚུལ་དེ་གུང་ཐང་རིན་པོ་ཆེར་ཞུས་པས། ཁོང་གིས་དེ་འདྲ་ཞིག་རེད། ངེད་ལན་གཅིག་སྐུ་མདུན་དུ་ཕྱིན་པར་དཔེ་སྣ་ཐུང་ཞིག་གཟིགས་ཀྱིན་འདུག་ཅི་རེད་ཞུས་པར། ངེད་ཀྱི་སྐུ་གོང་མའི་གསང་རྣམ་ཁྱེད་ཀྱིས་བརྩམས་པ་དེ་རེད་གསུངས། རང་ཤུགས་ཕུད་ནས་བརྩམས་པ་ཡིན་ག་འདྲ་འདུག་ཞུས་པར། ད་དུང་གྱོང་གྱོང་བོར་ཡོད་ཀི་མོད་གསུངས། སྐྱབས་རྗེ་གོང་མས་ངེད་ཀྱི་རྩོམ་པ་ཁ་དམ་ཞིང་གྱོང་ཉམས་ཆེ་ཚུལ་གྱིས་མི་ལེགས་པའི་ཚུལ་ཡང་ཡང་གསུང་གི་ཡོད་ཅེས་རྣམ་གཉིས་ཐུགས་དད་ལྷག་པར་འཁྲུངས། ཞེས་ཀུན་མཁྱེན་འཇིགས་མེད་རྒྱ་མཚོའི་རྣམ་ཐར་སྟོད་ཆ་ཧོར་གཙང་ཁྲི་ཆེན་འཇིགས་མེད་བསྟན་པའི་ཉི་མས་བརྩམས་པ་ལས་འབྱུང་སྟེ། སྤྲུལ་བའི་སྐུ་ཟེར་བ་ནི་འདི་འདྲ་ཞིག་ཡིན་དགོས་པར་སྣང་ངོ༌།
རྒྱལ་དབང་ལྔ་བའི་རང་རྣམ་དུ་ཀཱུ་ལའི་གོས་བཟང་དུ། བོད་ཡུལ་འདིར་རྒྱ་གར་དང་མི་འདྲ་བའི་བླ་མ་ལ་གདུང་རྒྱུད་ཀྱིས་འཛིན་པ་དང་སྐྱེ་བས་འཛིན་པ་གཉིས་ཡོད་པ་ལས། དང་པོ་ནི་ས་སྐྱ་ཚང་གི་བདག་ཆེན་རིམ་བྱོན་ལྟར་ལུགས་གཉིས་ཀྱི་ཡོན་ཏན་རྣམས་ཕ་ཤུལ་བུ་འཇགས་ལྟ་བུས་བར་གསེང་མེད་ཅིང་བུ་སློབ་འཁོར་འབངས་རྣམས་བག་ཕེབས་པ་དང༌། སྐྱེ་བས་འཛིན་པ་ནི་དེ་ལས་ལྡོག་སྟེ་བླ་མ་གྲོངས་པ་ལ་སེམས་ངལ་ཆེ་ཞིང་ཡལ་གྲུ་ཆེ་གེ་མོ་ན་བྱིས་པ་ལ་ཕ་མ་སོགས་ཀྱིས་གཡོ་སྒྱུས་བཟོས་པ་འདྲ་ལ་ཚམ་ཚོམ་མེད་པར་བདག་ཏུ་བཟུང་བའི་བཞུགས་གྲལ་ལ་ཆུད་ངེས་དང་སྐྱེ་བོ་དུ་མས་རི་བོང་གི་ཅལ་འདྲོགས་ལ་བརྟེན་ཝ་སྐྱེས་སེང་གེར་བརྫུ་བའི་སྣང་ཚུལ་ཁོ་ནའོ། །ཞེས་གསུངས་པ་དང༌། སུམ་པའི་རང་རྣམ་ལས། སྔོན་བྱོན་ཤཱཀྱ་ཐུབ་པ་རྒྱན་དྲུག་མཆོག་གཉིས་གྲུབ་ཆེན་བརྒྱད་ཅུ་ཁ་ཆེ་བལ་བོད་ཀྱི་པཎ་གྲུབ་མར་མི་བུ་སྟོན་ཙོང་ཁ་བ་ལྟ་བུ་ལ་སྐུའི་སྐྱེ་ཕྲེང་རྒྱ་མཚོའི་རླབས་ལྟར་ཡོལ་མེད་དུ་ཡོད་པ་གཞིར་བཅས་ཀྱང༌། ཡུལ་དུས་དེར་སྤྲུལ་སྐུ་སྐུ་སྐྱེས་དར་སོ་མེད་པས་སམ་ཞིང་གཞན་དུ་བྱོན་པ་ཅི་རིགས་ཀྱིས་སྔ་མའི་འཁྲུངས་ཡུལ་ཁོ་ནར་སྐུ་སྐྱེ་བྱོན་པའི་གཏན་ཙམ་ཡང་མེད། &
