ནང་བསྟན་གྱི་དཔལ་འབྱོར་རིག་པ།༼ཀ༽
ནང་བསྟན་གྱི་དཔལ་འབྱོར་རིག་པ་ཞེས་གླེང་མ་ཐག་ཏུ་མི་མང་བོ་ཞིག་གི་བསམ་པར་ངོ་མཚར་ཞིག་དང༌།ཧ་ལས་པ་ཞིག་ཏུ་བསམ་ངེས།ཡིན་ནའང་དེ་ནི་གོ་འཛོལ་ཞིག་རེད།ནང་བསྟན་ལ་དཔལ་འབྱོར་རིག་པ་ཡོད་ལ་ནང་བསྟན་གྱི་དཔལ་འབྱོར་རིག་པ་ཞེས་པ་དེ་རྗེས་ཀྱི་མི་སུ་ཞིག་གིས་གསར་བཟོ་བྱས་པ་ཞིག་མིན་པར་སྟོན་པ་སངས་རྒྱས་ཀྱིས་གསལ་བོར་གསུངས་ཡོད།ངས་འདི་ནས་སྟབས་བདེ་བའི་ངང་ནས་བཤད་ན་དཔལ་འབྱོར་རིག་པ་ནི་དཔལ་འབྱོར་སྒྲུབ་སྟངས་དང་དཔལ་འབྱོར་སྤྱོད་སྟངས།དཔལ་འབྱོར་དང་མིའི་བར་གྱི་འབྲེལ་བ་ཇི་ལྟར་ཐག་གཅོད་པའི་གཞུང་ལུགས་ཤིག་རེད།ནང་བསྟན་དུ་དེ་ལྟ་བུའི་གཞུང་ལུགས་ཁ་ཚང་ཞིག་ཡོད་མོད།སུས་ཀྱང་དེ་ལ་དོ་སྣང་མ་བྱས་པར་ད་ལྟའི་ལོག་རྟོག་ཆེན་པོ་ཞིག་སྟེ་ནང་བསྟན་ནི་དཔལ་འབྱོར་གྱི་གེགས་རྡོར་བསམ་པའི་ལྟ་བ་དེ་བྱུང༌།ལྟ་བ་ནི་དངོས་ནས་མི་ཞིག་གི་བསམ་ཚུལ་ཡིན་པས་དེ་ལ་དོན་དངོས་ཡིན་པའི་ངེས་པ་མེད་ནའང་སྤྱི་ཚོགས་ཀྱི་རྨང་གཞི་ངེས་ཅན་ཞིག་ཡོད་ངེས། སྟབས་བདེ་བའི་ངང་ནས་བཤད་ན་ཁོ་ཚོའི་འཁྲུལ་གཞི་དེ་ནི་རབ་བྱུང་བས་རྒྱུ་ནོར་བསོག་མི་རུང་བའི་ལྟ་བ་དེ་ནང་བ་སྤྱི་ལ་སྦྱར་བའི་ནོར་འཁྲུལ་དེ་རིགས་བྱུང༌།དེས་བོད་ཀྱི་སྤྱི་ཚོགས་སུ་རབ་བྱུང་བ་དང་ནང་བ་གཅིག་ཏུ་བསྲེས་ཡོད་པ་དེ་མཚོན་ལ་ནང་བསྟན་དཔལ་འབྱོར་དང་རྒྱབ་འགལ་དུ་བསམ་པའི་ལྟ་བ་དེ་མཚོན་པ་རེད།དེ་བས་ངས་ནང་བའི་གཞུང་གི་དཔལ་འབྱོར་གྱི་ལྟ་བའི་སྐོར་ཕྱོགས་གཅིག་ཏུ་བསྒྲིགས་ནས་ནང་བསྟན་གྱི་དཔལ་འབྱོར་རིག་པ་འདི་ཆེད་དུ་གླེང་དགོས་བྱུང༌།
གཅིག ནང་བའི་དཔལ་འབྱོར་གྱི་ལྟ་ཚུལ།
དཔལ་འབྱོར་དེ་མེ་འབར་བཞིན་པའི་འོབས་ཤིག་ཡིན་ནམ། ཡང་ན་དུག་སྦྲུལ་གྱི་ཚང་ལྟ་བུ་ཞིག་ཡིན། ནང་བའི་དཔལ་འབྱོར་གྱི་ལྟ་བ་ནི་འདི་ལྟ་བུ་ཞིག་མིན་ནམ་ཞེ་ན་མིན་ཏེ་གཏན་ནས་མིན་ནོ།།དེ་ནི་དཔལ་ལྡན་ཟླ་བས་གསལ་བོར་གསུངས་ཡོད་དེ་སྐྱེ་བོ་འདི་ཀུན་བདེ་ལ་མངོན་འདོད་ཅིང་།།མི་རྣམས་བདེ་བའང་ལོངས་སྤྱོད་མེད་མིན་ལ།།ཞེས་མི་ཀུན་གྱི་བདེ་བ་འདོད་ཅིང་བདེ་བ་ནི་ལོངས་སྤྱོད་ལ་བརྟེན་ནས་བྱུང་བ་ཡིན་པར་གསུངས།དེ་ནི་ནང་བསྟན་གྱི་དཔལ་འབྱོར་རིག་པའི་རྩ་བའི་རྨང་གཞི་ཡིན།
དཔལ་འབྱོར་ནི་འགྲོ་བ་མིའི་རིགས་ཀྱི་བདེ་སྐྱིད་འབྱུང་བའི་ཐབས་ལམ་ཞིག་ལས་བདེ་སྐྱིད་ཅིག་གཏན་ནས་མིན། ཐབས་ལམ་དེ་ཡིས་འགྲོ་བ་མིའི་རིགས་ལ་ཕན་པ་ལས་གནོད་པ་འབྱུང་མི་རུང་ལ༌།དེ་ལྟར་བྱུང་ན་དཔལ་འབྱོར་གྱི་དགོས་མཁོ་མ་གྲུབ་པ་ཞིག་སྟེ་དཔལ་འབྱོར་ནི་གནས་སྐབས་ཀྱི་མཐུན་རྐྱེན་ལས་མཐར་ཐུག་གི་དམིགས་ཡུལ་མིན། སྤྱིར་བྱ་བ་གང་ཞིག་བསྒྲུབ་ནའང་མཐུན་རྐྱེན་ཞིག་དགོས་པ་ལས་མཐུན་རྐྱེན་དེ་བྱ་བའི་དམིགས་ཡུལ་དུ་བརྩི་མི་རུང༌།དེ་བཞིན་དུ་མི་ཚེའི་ཆེད་དུ་དཔལ་འབྱོར་བསྒྲུབ་དགོས་མོད།དཔལ་འབྱོར་མི་ཚེའི་སྙིང་བོར་འཛིན་མི་ཉན།
དཔལ་འབྱོར་དེ་སྤྱིར་ན་འཇིག་རྟེན་འདིའི་དངོས་པོ་ཞིག་སྟེ་དེ་ཡང་དངོས་པོ་གཞན་དག་དང་འདྲ་བར་བཟང་ངན་སྣ་ཚོགས་འབྱུང་མོད།དཔལ་འབྱོར་གྱིས་དགེ་བ་བསྒྲུབ་ཐུབ་ལ་མི་དགེ་བའང་བསྒྲུབ་ཐུབ།དགེ་མི་དགེ་བསྒྲུབས་པ་དེ་མཐར་གཏུག་ན་མི་རང་ཉིད་ཀྱི་བསམ་བློར་ཐུག་པ་ལས་དཔལ་འབྱོར་ལ་ཐུག་མེད།ང་ཚོས་དཔལ་འབྱོར་བསྒྲུབ་དགོས་དོན་ནི་འཇིག་རྟེན་ལ་ཞབས་འདེགས་བསྒྲུབ་པའི་ཆེད་དང་རང་ཉིད་དགེ་བའི་ལས་ལ་འཇུག་པའི་མཐུན་རྐྱེན་གྱི་ཆེད་དུ་ཡིན། ཡིན་ནའང་གཞན་དོན་ལ་འཇུག་པའི་སྒོ་མང་བས་ཡིན་གཅིག་མིན་གཉིས་ལ་དཔལ་འབྱོར་གཙོ་བོར་འཛིན་དགོས་པ་ཞིག་གཏན་ནས་མིན་ནའང་མི་ཕལ་བ་དང་འཇིག་རྟེན་འདིར་དཔལ་འབྱོར་གྱི་གཞན་དོན་བསྒྲུབ་པ་ལ་བསྙོན་པར་མི་ནུས་པའི་ནུས་པ་ཆེན་པོ་ཞིག་འདོན་ངེས།
གཞན་ལ་ཕན་འདོགས་པའི་ནུས་པ་དེ་མཐར་གཏུག་ན་བསམ་བློའི་ནུས་པ་ཡིན་པ་སྨོས་མ་དགོས་མོད།བསམ་བློ་ཁོ་ནས་ཕན་ཐོགས་རྒྱུ་ཤིན་ཏུ་དཀའ།མི་ཞིག་ཡིན་ན་གཞན་ལ་ཕན་འདོགས་པའི་ནུས་པ་ཞིག་གཏན་ནས་མེད་པ་མི་སྲིད་ནའང་གཞན་ལ་ཕན་འདོགས་པའི་མི་དེ་འདྲ་མང་བོ་མེད།དེ་ནི་བསམ་བློའི་སྟེང་གི་གནད་དོན་རེད།དེ་བཞིན་གཞན་ལ་ཕན་འདོགས་འདོད་པ་མང་བོ་ཡོད་ནའང་ཕན་ཐོགས་པ་དེ་འདྲ་མང་བོ་མེད།དེ་རྒྱུ་མཚན་ནི་རང་ལ་གཞན་ལ་ཕན་འདོགས་པའི་ནུས་པ་དེ་འདྲ་མེད་པའི་རྐྱེན་གྱིས་རེད།སྤྱིར་ན་མི་ཞིག་ལ་དེ་འདྲའི་སེམས་ཡོད་ཅིང་སེམས་ནས་གཞན་ལ་ཕན་འདོགས་པའི་འདོད་པ་ཡོད་ན་དེ་ནི་ཕན་བཏགས་པ་ལྟ་བུའི་ནུས་པ་ཞིག་ཡོད་དེ་དེའི་རྒྱུ་མཚན་ཡང་དེ་འདྲ་བའི་བསམ་པ་ཞིག་ཡོད་ན་གཞན་ལ་གནོད་མི་སྐྱེལ་བས་སོ།།གཞན་ལ་གནོད་མི་སྐྱེལ་བ་འདི་ཡང་གཞན་ལ་ཕན་ཆེན་པོ་ཞིག་བཏགས་པ་རེད།
སྦྱིར་བཏང་གི་མི་གཞིར་བཞག་ནས་བཤད་ན། ཁོའི་མནར་སྤྱོད་དང་ཁོའི་སྡུག་བསྔལ་མང་ཆེ་བ་ནི་དཔལ་འབྱོར་ལ་བརྟེན་ནས་བྱུང་བས་ཁོའི་དཔལ་འབྱོར་གྱི་གནས་བབས་དེ་རྒྱུ་ནོར་གྱིས་བཅོས་བསྒྱུར་བྱེད་ཐུབ་པ་ལས་བསམ་བློའི་གོ་རྟོགས་དང་གཞན་ཕན་གྱི་བསམ་བློ་ཁོ་ནས་མི་དེར་ཕན་འདོགས་དཀའ་སྟེ་མི་མང་ཆེ་བའི་བསམ་བློའི་གོ་རྟོགས་དམའ་བས་རྒྱུ་ནོར་གྱི་རིན་ཐང་
