ནང་བསྟན་དཔལ་འབྱོར་རིག་པ།༼ག༽
གསུམ། དཔལ་འབྱོར་སྒྲུབ་སྟངས།
དཔལ་འབྱོར་ནི་འཇིག་རྟེན་འདིར་ངེས་པར་བསྒྲུབ་དགོས་པ་ཞིག་ཡིན་མོད།དཔལ་འབྱོར་སྒྲུབ་སྟངས་ནི་ངེས་པར་དཔལ་ཡོན་དང་ལྡན་པ་ཞིག་དགོས་ཏེ་གཅིག་ནས་རང་ཉིད་སྡུག་ལ་བསྐུར་ནས་དཔལ་འབྱོར་བསྒྲུབ་མི་རུང་ལ་གཉིས་སུ་གཞན་གྱི་བདེ་སྡུག་བོར་ནས་དཔལ་འབྱོར་བསྒྲུབ་མི་རུང༌།དཔལ་འབྱོར་རིག་པར་མཚོན་ན་ཆེས་གལ་ཆེ་བ་ནི་དཔལ་འབྱོར་སྒྲུབ་སྟངས་དང་དཔལ་འབྱོར་བཀོལ་སྤྱོད་ཀྱི་གནད་དོན་ཡིན།དཔལ་འབྱོར་གྱིས་འགྲོ་བ་མིའི་རིགས་ལ་བདེ་སྐྱིད་ག་འདྲ་ཞིག་སྐྱེལ་མི་སྐྱེལ་གྱི་གནད་དོན་ཡང་འདི་ལ་ཐུག་ཡོད
དང་བོ། དཔལ་འབྱོར་སྒྲུབ་སྟངས།
དཔལ་འབྱོར་སྒྲུབ་སྟངས་ནི་སྡུག་མཐའ་སྐྱིད་ལ་འགྲོ་དགོས་པ་ལས་སྐྱིད་མཐའ་སྡུག་ལ་འགྲོ་མི་རུང༌།མི་སུ་དང་སུ་ཡིན་རུང་དཔལ་འབྱོར་བསྒྲུབ་པའི་དམིགས་ཡུལ་གཙོ་བོ་ནི་རང་གི་མི་ཚེ་འདིར་བདེ་སྐྱིད་ཅིག་སྐྲུན་རྒྱུ་དེ་ཡིན་པས་བདེ་སྐྱིད་ཀྱི་ཆེད་དུ་དཔལ་འབྱོར་བསྒྲུབ་པ་ལ་རང་གི་བདེ་ཐབས་གཙོ་བོར་འཛིན་དགོས།ལྷག་པར་དུ་རང་གི་བདེ་བ་རློག་པར་བྱེད་པའི་དཔལ་འབྱོར་གྱི་སྒྲུབ་སྟངས་དེ་གཏན་ནས་འཛིན་མི་རུང་ངོ་།།གལ་ཏེ་རང་གི་བདེ་སྐྱིད་ཀྱི་ཆེད་དུ་རང་གི་བདེ་བའང་རློག་པར་བྱེད་པ་ནི་བདེ་ཐབས་དང་སྡུག་བསྔལ་གཉིས་ཀྱི་རྐྱེན་གཉིས་ནོར་བ་ཡིན་ལ་དེ་ལྟར་ནོར་བ་ལ་བརྟེན་ནས་རང་ལ་བདེ་སྐྱིད་ཅིག་གཏན་ནས་བསྒྲུབ་མི་ཐུབ་པའི་ཁར་དོན་གྱིས་ཐབས་དང་རྩོལ་བ་དེ་རིགས་མི་རང་ལ་སྡུག་བསྔལ་སྒྲུབ་བྱེད་ཅིག་ཏུ་སོང་བས་དེ་ལ་དགོས་པ་ལས་ཉེས་པ་ཆེ། དེ་བས་དཔལ་འབྱོར་གལ་ཆེ་བ་ཇི་བཞིན་དུ་དཔལ་འབྱོར་སྒྲུབ་སྟངས་ཀྱང་གལ་ཆེ་བ་ཡིན་ཏེ་ནང་བའི་དཔལ་འབྱོར་སྒྲུབ་སྟངས་ནི་ཐུན་མོང་མ་ཡིན་པ་ཞིག་ཡིན་ཏེ་ནང་བསྟན་གྱི་ཐུན་མོང་མ་ཡིན་པའི་དཔལ་འབྱོར་སྒྲུབ་སྟངས་ཐད་ཀྱི་ལྟ་བ་འགའ་བཤད་པར་བྱ་སྟེ།
༡. བསོད་ནམས་གསོག་པ།
ནང་བའི་དཔལ་འབྱོར་རིག་པ་ལྟར་ན་རྒྱུ་འབྲས་ནི་དཔལ་འབྱོར་གྱི་ལྟ་བའི་གཞི་འཛིན་ས་ཡིན་ལ་དེ་ཡང་རྒྱུ་འབྲས་ཞེས་གླེང་དུས་མི་མང་བོ་ཞིག་གིས་སེམས་ལ་དོགས་པ་ཞིག་སྐྱེས་བཞིན་ཡོད་མོད་དེ་ནི་གུ་དོག་པའི་བསམ་བློ་སྟེ་དཔེར་ན་མི་གང་ཞིག་གིས་རྒྱུ་ཕུན་སུམ་ཚོགས་པ་བསྒྲུབས་ན་འབྲས་བུའང་ཕུན་སུམ་ཚོགས་པ་འབྱུང་ངེས་པ་དེ་ནི་རྒྱུ་འབྲས་ཆོས་ཉིད་ཡིན་ལ་དེ་ཡང་གཞན་དང་མི་འདྲ་ས་ཞིག་ཡོད་པ་ནི་འདི་རྒྱུ་འབྲས་ནི་སྐྱེ་བ་འདི་ཁོ་ན་མ་ཡིན་པར་སྐྱེ་བ་དུ་མ་དང་འབྲེལ་ཡོད་པ་དེ་ཕྱུག་པོ་དང་སྤྲང་བོའི་ལེ་ཚན་ལས་གླེང་བ་ལྟར་མི་གང་ཞིག་གི་དཔལ་འབྱོར་ལག་ཏུ་ཡོང་མིན་དེ་ཡང་ཁོ་རང་གི་རྩོལ་སྒྲུབ་ལ་ཐུག་ཡོད་མོད་ཀྱང་དེ་ཙམ་ཁོ་ན་མ་ཡིན་ཏེ་སྐྱེ་བ་སྔོན་མར་སྦྱིན་པ་བཏང་མ་བཏང་ལའང་འབྲེལ་ཡོད་པ་ཞིག་ཡིན།དེ་ཡང་སྟབས་བདེ་བའི་སྒོ་ནས་བཤད་ན་མི་རང་ཉིད་ཀྱི་བསོད་ནམས་ལ་ཐུག་ཡོད་པ་ཞིག་ཡིན་ལ་བསོད་ནམས་ཞན་པའི་དབང་གིས་རྒྱུ་ནོར་ཡང་ལག་ཏུ་མི་ཡོང་ལ་ཡོང་ནའང་ཆུད་ཟོས་སུ་འགྱུར་འགྲོ་བ་རེད།དེས་ན་ཡོད་ཚད་སྔོན་བསགས་ཀྱི་ལས་ལ་འབྲེལ་ཡོད་པས་སྐྱེ་བ་འདིར་རྒྱུ་ནོར་ལག་ཏུ་ཡོང་བའི་ཐབས་ཡོད་པ་མ་ཡིན་ནམ་ཞེས་ན་མིན་ཏེ་སྐྱེ་བ་སྔོན་མའི་བསོད་ནམས་དེ་ཆེས་དམན་པ་ཞིག་ཡིན་ནའང་སྐྱེ་བ་འདིར་ཁྱོད་ཀྱིས་བསོད་ནམས་གསོག་ན་ཆོག་སྟེ་དེའི་གནད་གཙོ་བོ་ཚོགས་བསགས་སྒྲུབ་སྦྱོང་བྱེད་པ་དེ་ཡིན་ནོ།། སྤྱིར་ཁྱོད་ཀྱིས་སྐྱེ་བ་འདིར་དབུལ་བོར་འགྱུར་བའི་ལས་བསགས་ཡོད་ནའང་ཚོགས་བསག་སྒྲུབ་སྦྱོང་བྱས་ན་ལྡོག་ཐུབ་པ་ཡིན་པས་དེ་ནི་ནང་བའི་དཔལ་འབྱོར་རིག་པ་ལས་ཆེས་གལ་ཆེ་བའི་རིགས་ཡིན་ནོ།།དེང་སང་མི་མང་བོ་ཞིག་ནང་བསྟན་དཔལ་འབྱོར་རིག་པ་ལ་གོ་འཛོལ་བྱུང་བའང་གནད་འདི་ལ་ཐུག་ཡོད་ལ་བོད་མི་མང་བོ་ཞིག་སྒྱིད་ལུག་གི་དབང་དུ་འགྲོ་བའང་གནད་འདི་ལ་ཐུག་ཡོད།
༢. ནོར་ལྷ་སྒྲུབ་པ།
ནང་བ་སངས་རྒྱས་པའི་ལུགས་ལ་ལས་གང་ཞིག་སྒྲུབ་ན་ལས་དེ་ཆེད་དུ་སྒྲུབ་པའི་ལྷ་རེ་ཡོད་པ་བཞིན་ནོར་དང་འབྱོར་བ་སྤེལ་བ་ལ་ནོར་ལྷ་ཞེས་པ་ཞིག་ཡོད་དེ་དེ་ནི་རང་འགའི་རྒྱུ་ནོར་གསག་པའི་ཆེད་དུ་ཁོ་ན་མ་ཡིན་པར་ཆོས་དང་མཐུན་པའི་རྒྱུ་ནོར་གསག་པའི་ཆེད་དུ་སྟེ་དེ་ཡང་སྟབས་བདེ་བར་བཤད་ན་དངོས་པའི་དཔལ་ཡོན་གྱི་ཆེད་དུ་ཡིན་ལ་དངོས་པའི་དཔལ་ཡོན་ཟེར་བ་ནི་ནང་བསྟན་གྱི་གཞུང་ལྟར་ན་ཆོས་དང་མཐུན་པའི་དཔལ་འབྱོར་ཡིན་ལ་ཆོས་དང་མཐུན་ཚུལ་ཡང་གསོག་དུས་སྡིག་པ་དང་མ་འདྲེས་པ་དང་སྤྱོད་དུས་རང་གཞན་གྱི་དགེ་བའི་དོན་དང་ཚོགས་གསག་ཀྱི་ཆེད་དུ་སྤྱོད་པ་ཞིག་ལས་གཞན་ལ་གནོད་ཅིང་མི་དགེ་བའི་སྡིགས་རྐྱེན་དུ་མ་སོང་བ་ཞིག་ནི་ཤིན་ཏུ་གལ་ཆེ།
ལྷ་དེ་དག་ནི་གདུལ་བྱའི་དོན་དུ་བསམ་བཞིན་དུ་ནོར་ལྷའི་ཚུལ་བཟུང་བ་ཞིག་སྟེ་དེ་དག་བསྒྲུབ་ན་ཆོས་མཐུན་ཀྱི་འབྱོར་བ་རྒྱས་པ་དང་གཡང་ཆགས་པ་སོགས་ཀྱི་ཕན་ཡོན་ཡོད་པར་གསུངས་ཤིང་དེ་དག་ལས་མང་ཆེ་བ་གནོད་སྦྱིན་ཕོ་མོའི་རིགས་ཀྱི་རྣམ་པར་བསྟན་པ་ལས་
