༄༅། །ཕུན་ཚོགས་ལྔ་ལྡན་གྱི་བཤད་པ།

༄༅། །ན་མོ་གུ་རུ་མཉྫུ་གྷོ་ཥཱ་ཡ། འོ་ལེགས་སོ། །དེང་གནས་ཕུན་སུམ་ཚོགས་པ་སྟོན་མཆོག་ཐུབ་པའི་དབང་པོའི་ཞིང་ཁམས་མི་མཇེད་འཇིག་རྟེན་གྱི་ཁམས་ཀྱི་ནང་གསེས་ཐུགས་རྗེ་ཆེན་པོ་འཕགས་པ་སྤྱན་རས་གཟིགས་ཀྱི་གདུལ་ཞིང་བྱང་ཕྱོགས་ཁ་བ་ཅན་གྱི་ལྗོངས་འདིར་བོད་དང་བོད་ཆེན་པོ་གཉིས་སུ་གྲགས་པའི་ཡ་གྱལ་བོད་ཆེན་མདོ་ཁམས་ཀྱི་ནང་ཚན་སྒ་ར་ཉག་ཐེག་ཆེན་གླིང་གི་གཙུག་ལག་ཁང་ཆེན་པོར། སྟོན་པ་ཕུན་སུམ་ཚོགས་པ་ནི་བསིལ་ལྡན་གྱི་ལྗོངས་འདིར་མཉམ་མེད་ཤཱཀྱའི་རྒྱལ་པོའི་བསྟན་པ་རིན་པོ་ཆེ་དར་ཞིང་རྒྱས་པར་མཛད་པའི་བསྟན་འཛིན་གྱི་སྐྱེས་བུ་མང་དུ་བྱོན་པའི་ནང་ནས། ས་འཛིན་བྱེ་བའི་དབུས་ན་རི་རྒྱལ་ལྷུན་པོ་དང་། རྒྱུ་སྐར་བྱེ་བའི་དབུས་ན་ཟླ་བའི་དཀྱིལ་འཁོར་ལྟར་འགྲན་ཟླ་ཐམས་ཅད་དང་བྲལ་བ་ནི་རྗེ་བཙུན་བརྟན་པའི་འཁོར་ལོ་ངུར་སྨྲིག་འཆང་བའི་སྒྱུ་འཕྲུལ་རྒྱལ་བ་བློ་བཟང་གྲགས་པ་སྟེ། དེ་ཉིད་ཀྱི་ལུང་རྟོགས་ཀྱི་བསྟན་པ་རིན་པོ་ཆེ་འཛིན་པ་ལ་སྔོན་གྱི་ཐུགས་བསྐྱེད་དང་ལེགས་སྨོན་ཕུལ་དུ་བྱུང་བས་མངོན་པར་བསྐྲུན་པ། ལྷར་བཅས་འགྲོ་བའི་འདྲེན་པ་མཆོག་སྤྲུལ་ཐམས་ཅད་མཁྱེན་པ་བློ་བཟང་གང་ཉིད། དུས་ཕུན་སུམ་ཚོགས་པ་ཐུབ་པའི་བསྟན་པ་ལྔ་བརྒྱ་པ་ཕྲག་བཅུ་གནས་པ་ལས་འདིར་ལུང་གི་དུས་ཀྱི་ནང་གསེས་འདུལ་བའི་དུས་ཀྱི་ལྔ་བརྒྱ་པ་ཕྲག་གཅིག་གི་སྐབས་སུ། ཆོས་ཕུན་སུམ་ཚོགས་པ་སྡེ་སྣོད་གསུམ་དང་རྒྱུད་སྡེ་བཞིས་བསྡུས་པའི་མདོ་སྔགས་ཀྱི་གཞུང་ལུགས་རབ་འབྱམས་ལ། འཆད་པ་ཆོས་ཀྱི་འཁོར་ལོས་སྐལ་ལྡན་གྱི་གདུལ་བྱ་རྗེས་སུ་འཛིན། རྩོད་པ་ལུང་རིགས་ཀྱི་འཁོར་ལོས་ཕས་ཀྱི་རྒོལ་བ་ཚར་བཅད། རྩོམ་པ་ལེགས་བཤད་ཀྱི་འཁོར་ལོས་ཐུབ་པའི་བསྟན་པ་ཡུན་རིང་དུ་གནས་པར་མཛད་པ་ལ་མངོན་དུ་ཕྱོགས་ཅིང་། འཁོར་ཕུན་སུམ་ཚོགས་པ་ནི་ལུང་སྡེ་སྣོད་གསུམ་འཆད་ཤེས། མངོན་རྟོགས་བསླབ་པ་གསུམ་གྱིས་རྒྱུད་ཕྱུག་པའི་འཕགས་ཚོགས་འདུས་པ་རྒྱ་མཚོས་ཡོངས་སུ་བསྐོར་བའི་དབུས་འདིར་མཆོག་སྤྲུལ་རྡོ་རྗེ་འཆང་ཆེན་པོ་གང་ཉིད་གདོང་ལྔའི་དབང་པོ་བརྒྱད་ཀྱིས་མངོན་པར་བཏེགས་པའི་ཆོས་ཀྱི་ཁྲི་མཐོན་པོ་ལ་མངའ་གསོལ་བའི་དགའ་སྟོན་མཎྜལ་གྱི་མཚོན་བྱེད་ཙམ་དུ་གུས་ཞབས་པ་ཨེ་ཝྃ་བསམ་འགྲུབ་དགོན་པའི་འདུས་ཚོགས་སྤྱི་ནས་སྐུ་ཚེ་བསྐལ་པའི་བར་དུ་རྡོ་རྗེའི་ཆོས་བདུན་གྱི་ངོ་བོར་འཚོ་ཞིང་གཞེས་པའི་རྟེན་འབྲེལ་དུ་རྒྱལ་བ་ཚེ་མཐའ་ཡས་པའི་སྣང་བརྙན། གསུང་རྟེན་འཕགས་པ་ཚེ་དང་ཡེ་ཤེས་དཔག་ཏུ་མེད་པའི་མདོ། ཐུགས་རྟེན་རྣམ་རྒྱལ་མཆོད་རྟེན་བྱིན་ལྡན། ཡོན་ཏན་གྱི་རྟེན་དུ་དངུལ་སྲང་བཅུ། ཕྲིན་ལས་གྱི་རྟེན་དུ་ཇ་སྒམ་གཅིག་བཅས་བསམ་པ་དག་ཅིང་སྦྱོར་བ་གུས་པའི་སྒོ་ནས་ཕུལ་བ་ལགས་ན། སྐྱབས་མགོན་དམ་པ་གང་ཉིད་སྐུ་ཚེ་དང་ཕྲིན་ལས་ཆར་ལྡན་དུས་ཀྱི་བདེ་འབྱུང་རལ་ཀླུང་གི་རྗེས་སུ་མངོན་པར་ཕྱོགས་ཅིང་། གང་གི་ཐུགས་རྗེའི་གདུགས་དཀར་གྱི་གྲིབ་མལ་དུ་ངལ་འཚོ་བའི་བསྐལ་བཟང་གདུལ་བྱའི་ཚོགས་ཀྱང་ཕན་བདེའི་དགའ་སྟོན་མི་ཟད་པའི་གཏེར་ལ་ཡུན་དུ་སྤྱོད་པའི་རྟེན་འབྱུང་ཡང་ངེས་པར་ཞུ་བ་ལགས་ན། དེ་བཞིན་འགྲུབ་པའི་ལྗགས་བསྔོ་རྡོ་རྗེའི་བདེན་ཚིག་གི་རྗེས་འདེབས་པ་བཅས་བཀའ་དྲིན་མི་ཆུང་བ་མཁྱེན་མཁྱེན་ཞེས་པ་འདི་ནི་མཛོ་ཉག་བསམ་འགྲུབ་དགོན་གྱི་དབུ་མཛད་བསྟན་པ་ཡར་འཕེལ་གྱིས་བསྐུལ་བའི་ངོར་ཤཱཀྱའི་དགེ་སློང་ངག་དབང་ལེགས་པས་དབེན་གནས་དམ་པ་དགའ་ལྡན་ས་བཟང་དུ་སྦྱར་བའོ། །