༄༅།།དཔལ་ལྡན་ལྷ་མོའི་བསང་མཆོད་བཞུགས་སོ། །

༄༅།།བྷྱོཿརབ་འབྱམས་རྒྱལ་བ་ཀུན་གྱི་འཕྲིན་ལས་ལ། ། དམག་ཟོར་རྒྱལ་མོ་ཞེས་བྱར་མཚན་གསོལ་བ། ། རྩེ་གཅིག་མོས་པའི་དབང་གིས་སྤྱན་འདྲེན་ན། ། ཐོགས་པ་མེད་པར་མྱུར་ཏུ་གཤེགས་སུ་གསོལ། ། མདུན་གྱི་ནམ་ཁར་རླུང་ནག་ཚུབ་མའི་དབུས། ། བེ་ཅོན་ཐོད་ཁྲག་འཛིན་པ་སྲིན་མོའི་གཟུགས། ། དྲེའུ་སྟེང་བཞུགས་གདུག་པ་ཚར་གཅོད་སྐུ། ། ཇི་སྲིད་དྲན་པ་དེ་སྲིད་རྟག་ཏུ་བཞུགས། ། ཚེ་རིང་མཆེད་ལྔ་བསྟན་མ་བཅུ་གཉིས་དང་། ། ཁྱད་པར་མ་ལུས་རབ་འབྱམས་དྲག་མོ་རྒྱལ། ། འཁོར་བཅས་རྣམས་དང་འགོ་བའི་ལྷ་ཚོགས་རྣམས། ། མ་ལུས་འདིར་གཤེགས་དགྱེས་པའི་གདན་ལ་བཞུགས། ། ཕྱི་ཡི་སྤྱན་གཟིགས་ནམ་མཁའི་ཁྱོན་གང་ཞིང་། ། ནང་གི་དམ་རྫས་ས་གཞི་མ་ལུས་ཁྱབ། ། ཡིད་ཀྱིས་སྤྲུལ་བའི་མཆོད་སྤྲིན་ཞིང་ཁམས་ཀུན། ། རྒྱས་པར་འགེངས་པ་འཁོར་དང་བཅས་ལ་འབུལ། ། ཤ་ཁྲག་ལ་སོགས་བདུད་རྩི་ལྔ་དང་བཅས། ། འབྲུ་སྣ་ལྔ་དང་བཅས་པའི་བསང་མཆོད་འདི། ། དཔལ་ལྡན་དམག་ཟོར་རྒྱལ་མོ་ལ་འབུལ་གྱི། ། རྒྱལ་བའི་བསྟན་པ་བསྲུང་ཕྱིར་བཞེས་སུ་གསོལ། ། དཔལ་ལྡན་ཐུབ་པའི་བཀའ་སྲུང་མཐུ་རྩལ་ཅན། ། ཁྱོད་ཉིད་བསྟེན་ཞིང་བསྒྲུབ་ལ་རྩེ་གཅིག་ཏུ། ། གསོལ་བ་འདེབས་པའི་རྣལ་འབྱོར་དཔོན་སློབ་བཅས། ། འགལ་རྐྱེན་ཀུན་སོལ་མཐུན་རྐྱེན་མ་ལུས་སྒྲུབས། ། སྐུ་གསུམ་ལྷུན་གྲུབ་ཐུགས་རྗེའི་མཐར་ཕྱིན་ཡང་། ། སྲིད་གསུམ་གདུག་པ་འདུལ་ཕྱིར་ཁྲོ་མོའི་སྐུ། ། དུས་གསུམ་རྒྱལ་བའི་བསྟན་སྲུང་ཆེན་མོ་ལ། ། སྒོ་གསུམ་གུས་པ་ཆེན་མོའི་ཕྱག་འཚལ་ལོ། ། དཔལ་ལྡན་འདོད་ཁམས་དབང་ཕྱུག་འཁོར་བཅས་ཀྱིས། ། དགོན་གནས(ཁྱིམ་གནས)འདི་ཉིད་སྲུང་ཞིང་སྐྱོང་བ་དང་། ། བླ་མེད་བཤད་སྒྲུབ་ལོངས་སྤྱོད་སྤེལ་བ་དང་། ། གཡེལ་མེད་རྟག་ཏུ་མགོན་སྐྱོབ་དཔུང་གཉེན་མཛོད། ། བདག་སོགས་དེང་ནས་ཚེ་རབས་ཐམས་ཅད་དུ། ། གསང་བའི་ལྷ་མོ་ཁྱེད་དང་མི་འབྲལ་ཞིང་། ། བར་ཆད་བགེགས་ཀྱི་མཚན་མ་ཅི་བྱུང་ཡང་། ། དེ་ཀུན་ལྷ་མོ་ཁྱོད་ཀྱིས་བཟློག་པར་མཛོད། ། ལྷག་བསམ་དག་པས་ཚུལ་འདིར་བརྩོན་པ་དང་། ། ཚངས་དང་དབང་བོ་འཇིག་རྟེན་སྐྱོང་བ་དང་། ། དམག་ཟོར་རྒྱལ་མོ་ལ་སོགས་སྲུང་མས་ཀྱང་། ། གཡེལ་བ་མེད་པར་རྟག་ཏུ་གྲོགས་བྱེད་ཤོག །