༄༅། །ས་བསྟོད་བྱིན་རླབས་ཀྱི་རྒྱ་མཚོ་ཞེས་བྱ་བ་བཞུགས་སོ། །

སྭསྟི། འགྲོ་ཀུན་དགའ་བའི་སྙིང་པོར་ཉེར་སྨིན་བསོད་ནམས་ཡེ་ཤེས་ཚོགས་ཟུང་གི། །རྩེ་མོར་རབ་སོན་གྲགས་པའི་རྒྱལ་མཚན་མངོན་པར་མཐོ་བས་མཁས་པ་ཀུན། །རྟག་ཏུ་དགའ་ཞིང་བདུད་སྡེའི་གཡུལ་ལས་རྣམ་པར་རྒྱལ་བའི་དགེ་མཚན་ཅན། །བློ་གྲོས་རྨད་བྱུང་བསྟན་པའི་རྒྱལ་མཚན་མཚུངས་པ་མེད་རྣམས་ལ་ཕྱག་འཚལ། །དུས་གསུམ་སངས་རྒྱས་ཐམས་ཅད་སྐྱེད་པའི་ཡབ། །རྒྱལ་སྲས་ཚུལ་འཛིན་བཅོམ་ལྡན་འཇམ་པའི་དབྱངས། །སྙིགས་དུས་གངས་ཅན་འགྲོ་བའི་དཔལ་གྱུར་པ། །རྗེ་བཙུན་ས་སྐྱ་པ་ལ་གསོལ་བ་འདེབས། །འགག་མེད་སྤྲོས་བྲལ་རིག་སྟོང་ཟུང་འཇུག་གཞི། །ཟབ་དང་རྒྱ་ཆེའི་ལམ་གྱིས་སྦྱངས་པའི་མཐུས། །སྐུ་གསུམ་མངོན་གྱུར་དོན་གཉིས་མཐར་ཕྱིན་པ། །རྗེ་བཙུན་ས་སྐྱ་པ་ལ་གསོལ་བ་འདེབས། །མི་བཟད་སྲིད་མཚོར་གཡེངས་པའི་འགྲོ་གཟིགས་ནས། །སྙིང་རྗེའི་རླུང་ཤུགས་ཆེན་པོས་རབ་བསྐྱོད་པའི། །རྒྱ་ཆེན་བྱང་ཆུབ་སེམས་ཀྱི་གྲུར་ཞུགས་པ། །རྗེ་བཙུན་ས་སྐྱ་པ་ལ་གསོལ་བ་འདེབས། །ཚོགས་གཉིས་རྒྱ་མཚོར་གྲངས་མེད་གསུམ་རོལ་ཞིང་། །སྒྲིབ་གཉིས་དྲི་བྲལ་ཡོན་ཏན་ནོར་བུའི་གཏེར། །སྲིད་ཞིའི་རྒུད་པ་མ་ལུས་སེལ་མཛད་པ། །རྗེ་བཙུན་ས་སྐྱ་པ་ལ་གསོལ་བ་འདེབས། །གདོད་ནས་རྣམ་དག་སྤྲོས་ཀུན་ཉེར་ཞིའི་དབྱིངས། མཚན་འཛིན་རྟོག་པའི་སྤྲིན་ལས་ངེས་གྲོལ་ཏེ། །ཟག་མེད་ཡེ་ཤེས་བྱེ་བས་ཉེར་བཀྲ་བ། །རྗེ་བཙུན་ས་སྐྱ་པ་ལ་གསོལ་བ་འདེབས། །རྣམ་དག་ཞིང་དུ་འགྱུར་མེད་བདེ་ཆེན་སྐུ། །རྒྱལ་སྲས་ཀླུ་དབང་ཀུན་གྱིས་ཉེར་སྤྱད་གཞི། །ཐེག་མཆོག་བདུད་རྩིའི་ཆུ་གཏེར་མི་ཟད་པ། །རྗེ་བཙུན་ས་སྐྱ་པ་ལ་གསོལ་བ་འདེབས། །སྤྲོས་བྲལ་ངང་ནས་རབ་འབྱམས་ཞིང་ཀུན་ཏུ། །ཡེ་ཤེས་སྒྱུ་མའི་རྣམ་འཕྲུལ་མཐའ་ཡས་ཀྱིས། །བསམ་གྱིས་མི་ཁྱབ་བཀོད་པས་རྣམ་རོལ་བ། །རྗེ་བཙུན་ས་སྐྱ་པ་ལ་གསོལ་བ་འདེབས། །གྲངས་མེད་འགྲོ་བའི་བསམ་པའི་རྗེས་འབྲངས་པས། །ལ་ལར་ཞི་དང་གཞན་དུ་དྲག་ཆེན་སྐུ། །དགྲ་བཅོམ་རང་རྒྱལ་ཚངས་སོགས་དུ་མར་སྟོན། །རྗེ་བཙུན་ས་སྐྱ་པ་ལ་གསོལ་བ་འདེབས། །ཕྱོགས་འདིར་སྙིང་པོ་རྩེ་མོ་རྒྱལ་མཚན་ཞབས། །བཟང་པོའི་ཞབས་སོགས་ཐ་མལ་གཟུགས་འཛིན་པས། །མཐའ་ཡས་འགྲོ་ལ་དྲི་མེད་ལམ་སྟོན་པ། །རྗེ་བཙུན་ས་སྐྱ་པ་ལ་གསོལ་བ་འདེབས། །མགོན་ཁྱོད་ཕལ་ཆེར་བསྐལ་བཟང་འགྲོ་བ་ལ། །གཞོན་ནུ་རྣམ་པར་རོལ་ཞིང་འགྱིངས་པའི་སྐུ། །མཚན་དཔེའི་དཔལ་འབར་མཁྱེན་པའི་གཏེར་ཞེས་གྲགས། །རྗེ་བཙུན་ས་སྐྱ་པ་ལ་གསོལ་བ་འདེབས། །དྲི་མེད་གསེར་བཟང་དྭངས་འབར་བའི་མདངས་ལྡན་ཞིང་། །ཨུཏྤལ་སྟེང་འཛིན་རལ་གྲི་གླེགས་བམ་བསྣམས། །རིན་ཆེན་རྒྱན་སྤྲས་འོད་ཟེར་ཕུང་པོ་ཅན། །རྗེ་བཙུན་ས་སྐྱ་པ་ལ་གསོལ་བ་འདེབས། །དེ་ལྟར་འགྲོ་སེམས་དྭངས་རྙོག་བྱེ་བྲག་གིས། །དཔག་མེད་སྐུ་ཡི་རྣམ་འཕྲུལ་ཉེར་སྟོན་ཀྱང་། །ཟག་མེད་དབྱིངས་དང་ཀུན་ཏུ་རོ་གཅིག་པ། །རྗེ་བཙུན་ས་སྐྱ་པ་ལ་གསོལ་བ་འདེབས། །འཁོར་ཚོགས་རྒྱ་མཚོའི་དབུས་སུ་བསྙེངས་བྲལ་བས། །དྲུག་ཅུའི་དབྱངས་ལྡན་ཐེག་གསུམ་སེངྒེའི་སྒྲ། །རྟག་ཏུ་སྒྲོགས་པའི་ཆོས་ཚུལ་རྒྱ་མཚོའི་གཏེར། །རྗེ་བཙུན་ས་སྐྱ་པ་ལ་གསོལ་བ་འདེབས། །ཉོན་མོངས་བག་ཆགས་བཅས་པའི་རྡུལ་སྤངས་པས། །ཆོས་ཀུན་གསལ་དང་མཉམ་དགོངས་མ་འདྲེས་གཟིགས། །དོན་ཀུན་གྲུབ་པའི་ཡེ་ཤེས་མཆོག་བརྙེས་པ། །རྗེ་བཙུན་ས་སྐྱ་པ་ལ་གསོལ་བ་འདེབས། །ཐུགས་རྗེ་རྒྱ་མཚོས་བསྐྲུན་པའི་སྨོན་ལམ་གྱི། །སྤྲིན་ཆེན་ལས་འོངས་རྣམ་དཀར་ཕྲིན་ལས་ཆར། །རྣམ་གྲོལ་ལོ་ཏོག་རབ་ཏུ་རྒྱས་པའི་དཔལ། །རྗེ་བཙུན་ས་སྐྱ་པ་ལ་གསོལ་བ་འདེབས། །བུམ་བཟང་དཔག་བསམ་ཤིང་དང་ནོར་བུ་ལྟར། །རིགས་གསུམ་འགྲོ་ལ་རང་རང་མོས་པ་བཞིན། །སྣ་ཚོགས་ཐབས་ཀྱིས་འདོད་དགུའི་མཆོག་སྩོལ་བ། །རྗེ་བཙུན་ས་སྐྱ་པ་ལ་གསོལ་བ་འདེབས། །འཇམ་མགོན་བླ་མའི་རྣམ་འཕྲུལ་རྒྱ་མཚོ་བཞིན། །བདག་གི་སྤྲུལ་པ་རྒྱ་མཚོས་སྲིད་པའི་བར། །ཀུན་བཟང་མཆོད་སྤྲིན་རྒྱ་མཚོས་ཁྱོད་མཆོད་ཅིང་། །རྟག་ཏུ་ཁྱོད་ཞབས་བསྟེན་པར་བྱིན་གྱིས་རློབས། །ཚེ་རབས་ཀུན་ཏུ་རྒྱལ་བ་རྒྱ་མཚོ་ཡི། །སྐུ་ཡི་བཀོད་པ་རྒྱ་མཚོ་མངོན་གྱུར་ནས། །གསུང་རབ་རྒྱ་མཚོའི་དཔལ་ལ་དབང་སྒྱུར་ཞིང་། །ཡེ་ཤེས་རྒྱ་མཚོར་འཇུག་པར་ཕྱིན་གྱིས་རློབས། །མཁའ་དང་ཉི་མ་གློག་འོད་རྒྱ་མཚོ་ལྟར། །རྒྱ་ཆེ་གསལ་དང་མྱུར་འཇུག་རབ་ཟབ་པའི། །རྨད་བྱུང་བློ་གྲོས་མཐའ་ཡས་མྱུར་བསྐྱེད་ནས། །ཆོས་ཀུན་ཇི་བཞིན་རྟོགས་པར་བྱིན་གྱིས་རློབས། །ཐོས་དང་མཐོང་དང་རྟོགས་པའི་ཆོས་ཚུལ་ཀུན། །ཚིག་དོན་ཇི་བཞིན་བསྐལ་པ་རྒྱ་མཚོའི་བར། །བདེ་བླག་འཛིན་པའི་རླབས་ཆེན་གཟུངས་ཀྱི་སྒོ། །ཕུལ་བྱུང་མྱུར་དུ་ཐོབ་པར་བྱིན་གྱིས་རློབས། །འཆད་དང་རྩོད་དང་རྩོམ་པའི་ལེགས་བཤད་ཀྱིས། །དད་ལྡན་ཕྱིར་རྒོལ་མཁས་པའི་འགྲོ་མང་ཚོགས། །ཡིད་ཆེས་ཟིལ་གནོན་མགུ་བ་བསྐྱེད་ནུས་པའི། །ངག་གི་དབང་ཕྱུག་འགྲུབ་པར་བྱིན་གྱིས་རློབས། །འདིས་མཚོན་དུས་གསུམ་དགེ་བ་རྒྱ་མཚོས་བདག །སྲས་བཅས་རྒྱལ་བའི་ཕྲིན་ལས་རྒྱ་མཚོ་ལ། །དབང་སྒྱུར་སྒོ་ནས་སྐྱེ་དགུ་རྒྱ་མཚོ་ཡི། །དགེ་ལེགས་རྒྱ་མཚོ་འབྱུང་བའི་གཞིར་གྱུར་ཅིག །སྐྱེ་བ་འདིར་ཡང་ཉེར་འཚེ་ཀུན་བྲལ་ནས། །ཁྱེད་ཞལ་ཟླ་བ་རྟག་ཏུ་མཐོང་བ་དང་། །ཁྱེད་གསུང་ཐོས་ཤིང་ཡེ་ཤེས་གཟིགས་པ་ཡི། །བྱིན་རླབས་རྒྱ་མཚོ་མྱུར་དུ་འཇུག་གྱུར་ཅིག །ཅེས་འཇམ་པའི་དབྱངས་ཀྱི་རྣམ་འཕྲུལ་རྗེ་བཙུན་ས་སྐྱ་པ་ལ་བསྟོད་ཅིང་གསོལ་བ་འདེབས་པའི་ཚུལ་འདི་ནི། བསྟོད་ཡུལ་ལ་མི་ཕྱེད་པའི་དད་པ་དང་ལྡན་པའི་ཚིག་སྦྱོར་སོགས་ལ་བློ་གྲོས་ཀྱི་སྣང་བ་ཅུང་ཟད་སྐྱེས་པ་ཤཱཀྱའི་དགེ་སློང་མང་དུ་ཐོས་པའི་སྨྲ་བ་པོ་ཨཱ་ནནྟ་ཛྙཱ་ནས། དཔལ་ལྡན་ས་སྐྱའི་ཆོས་གྲྭ་ཆེན་པོར་སྦྱར་བའོ། །བྷ་ཝནྟུ། ཚེ་རབས་ཀུན་ཏུ་རྗེ་བཙུན་ས་སྐྱ་པའི། །ལེགས་གསུངས་མདོ་རྒྱུད་ཀུན་གྱི་སྙིང་པོའི་དོན། །ཇི་བཞིན་རྟོགས་ནས་གཞན་ལ་སྤེལ་བ་ཡིས། །བསྟན་འགྲོའི་དོན་ཆེན་འགྲུབ་པར་བྱིན་གྱིས་རློབས། །ཞེས་མགོ་གཤམ་དུ་ཚིགས་བཅད་རེ་རེ་བླ་མ་འགའ་ཞིག་གི་ཕྱག་སྲོལ་ལྟར་ལུང་རྒྱུན་སྤེལ་ཆེད་དུ་སྙན་གྲགས་ལུང་རིགས་ཉི་མས་སྨྲས་པའོ། །དགེའོ། །སརྦ་མངྒ་ལཾ།