༄༅།།ཡུལ་ལྷའི་བསང་འབོད་བཞུགས་སོ།།

༄༅།།ཀྱེ་མཐུ་སྟོབས་འོད་འཕྲེང་མཆོག་ཏུ་འབར་བ་ཡིས། །མ་རུང་དགྲ་སྡེའི་དཔུང་ཚོགས་མཐར་བྱེད་ཅིང་། །དགོས་འདོད་མ་ལུས་ཡིད་བཞིན་སྩོལ་མཛད་པ།།ཁྲི་ཀའི་ཡུལ་ལྷ་གཉན་པོ་སྤྱན་འདྲེན་ནོ། །འཇིགས་རུང་ཁྲག་ཞག་འཁྱིལ་བའི་སྐུ་མཁར་ནས། །ཀླུ་བཙན་ཡོངས་ཀྱི་རྗེ་བོ་སྐུར་བཞེངས་ཤིག།རྣལ་འབྱོར་གདུང་བའི་ཡིད་ཀྱིས་སྤྱན་འདྲེན་ན། །དུས་མཐའི་རླུང་གི་ཤུགས་ལྟར་གནས་འདིར་གཤེགས། །མདུན་དུ་དབང་པོའི་གཞུ་ལྟར་རྣམ་བཀྲ་བའི།།སྣ་ཚོགས་དར་ཟབ་བརྩེགས་པའི་གདན་སྟེང་དུ། །དགྱེས་པའི་ཚུལ་གྱིས་དེང་འདིར་ལེགས་བཞུགས་ནས། །བཅོལ་བའི་འཕྲིན་ལས་མ་ལུས་བསྒྲུབ་པར་མཛོད།།དངོས་སུ་བཤམས་དང་ཡིད་སྤྲུལ་མཆོད་པའི་ཚོགས། །རྫོགས་ལྡན་སྤྲིན་ལྟར་གཡོ་བའི་རོལ་རྩེད་འདི། །སྟོབས་ལྡན་ཡུལ་ལྷ་གཉན་པོ་འཁོར་བཅས་ལ།།འབུལ་ལོ་བཞེས་ལ་བཅོལ་བའི་འཕྲིན་ལས་མཛོད། །མེ་ཏོག་བདུག་སྤོས་མར་མེ་དྲི་ཆབ་དང་། །ཞལ་ཟས་རོལ་མོའི་སྒྲ་དབྱངས་འབྲུག་ལྟར་སྒྲོགས།།གཟུགས་སྒྲ་དྲི་རོ་རེག་བྱ་མཆེད་པའི་ཚོགས། །ཡུལ་ལྷ་གཉན་པོ་འཁོར་དང་བཅས་ལ་འབུལ། །རྟ་དྲེའུ་ར་ལུག་སྲོག་ཆགས་ཚོགས་རྣམས་དང་།།གཡུལ་ལས་རྣམ་རྒྱལ་རྡོ་རྗེའི་གོ་མཚོན་དང་། །ཕྱག་མཚན་རྒྱན་དང་བགོ་བའི་གོས་ཀྱི་རིགས། །ཡུལ་ལྷ་གཉན་པོ་འཁོར་དང་བཅས་ལ་འབུལ།།གསེར་དངུལ་དར་ཟབ་སྣ་ཚོགས་འབྲུ་ཟན་དང་། །ཁང་བཟང་སྐྱེད་ཚལ་ཁྲུས་ཀྱི་རྫིང་བུ་སོགས། །ཡིད་འོང་མཁོ་དགུའི་འབྱོར་བ་ཅི་མཆིས་པས།།ཡུལ་ལྷ་གཉན་པོ་འཁོར་བཅས་མཆོད་པར་བགྱི། །དྲི་འཛིན་དབང་བོ་སིམ་བྱེད་སྨན་སྣ་དང་། །སྟག་ཤུག་མཁན་པ་བ་ལུ་སུ་ལུ་སོགས།།ཁྲག་ཆང་ཤ་ཚིལ་སྦྱར་བའི་བསང་རྫས་སོགས། །རབ་འབར་མེ་ལ་བསྲེགས་པའི་དུད་སྤྲིན་གྱིས། །ཁྲི་ཀའི་ཡུལ་ལྷ་གཉན་པོ་འཁོར་བཅས་བསང་།།བསང་ངོ་ཉམས་གྲིབ་མ་ལུས་དག་གྱུར་ཅིག །བདག་བློའི་མཁའ་དབྱིངས་རྨོངས་པའི་ཆུ་འཛིན་གྱིས། །ཉེ་བར་བསྒྲིབས་ཏེ་ལྷ་ཁྱོད་གསང་གསུམ་དང་།།འགལ་བའི་ཕོག་ཐུག་ནོངས་པ་གང་བགྱིས་པ། །བཟོད་པར་བཞེས་ལ་ཚངས་པའི་དངོས་གྲུབ་སྩོལ། །སྔོན་སྨོན་ཐུགས་བསྐྱེད་དབང་གིས་བསྟན་འགྲོ་ཀུན།།བསྲུང་ཕྱིར་རྒྱ་བོད་ས་མཚམས་ཁྲི་ཀ་རུ། །འཇིག་རྟེན་དྲེགས་པའི་ཚུལ་བཟུང་ལྷ་ཁྱོད་ལ། །རྣལ་འབྱོར་བདག་ཅག་དང་པའི་ཡིད་ཀྱིས་བསྟོད།། དེ་ལྟར་གུས་བས་ལེགས་སྦྱར་མཆོད་སྤྲིན་འདི། །ལྷ་གཉན་ཆེན་པོས་དགྱེས་བཞིན་ལེགས་བཞེས་ནས། །བདག་ཅག་གཞི་བྱེས་གང་དུ་གནས་ཀྱང་རུང་།།ཉིན་གྱི་བྱ་ར་མཚན་གྱི་མེལ་ཚེ་མཛོད། །ནད་རིམས་འཐབ་རྩོད་ཁ་སྨྲས་གླེང་གཞི་སོགས། །མི་མཐུན་རྐྱེན་ངན་བར་ཆད་ཀུན་ཞི་ཞིང་།།ཚེ་བསོད་སྟོབས་འབྱོར་ལོངས་སྤྱོད་སྙན་གྲགས་དང་། །རྣམ་དཀར་ལེགས་ཚོགས་མཚོ་ལྟར་རྒྱས་པར་མཛོད། །མི་བསྲུན་དགྲ་བོའི་དཔུང་དང་འཕྲད་པའི་ཚེ།།ལྷ་ཁྱོད་མཐུ་དང་རྫུ་འཕྲུལ་སྟོབས་བསྐྱེད་ལ། །ཕ་རོལ་དགྲ་སྡེའི་དཔུང་ཚོགས་ཉེར་བཅོམ་ནས། །རང་ཕྱོགས་ཕྱོགས་ལས་རྒྱལ་བའི་འཕྲིན་ལས་མཛོད།།རྣལ་འབྱོར་བདག་ཅག་རྒྱུ་སྦྱོར་འཁོར་བཅས་ཀྱི། །ལྷ་ཁྱོད་ཡང་ཡང་དྲན་པས་གསོལ་འདེབས་ན། །རྩེ་གཅིག་དགོངས་ལ་ཐོགས་མེད་རྫུ་འཕྲུལ་གྱིས།།རྟག་ཏུ་འབྲལ་མེད་བུ་བཞིན་སྐྱོངས་པར་མཛོད། །ཅེས་པ་འདི་ནི་དཀོན་མཆོག་གསུམ་བླ་མར་འཛིན་པའི་ས་ཡི་བཱ་ཐུར་ཏའི་ཆིང་གིས་བསྐུལ་བ་ལ་བརྟེན་ནས།དཀོན་མཆོག་འཇིགས་མེད་དབང་བོའི་སྡེས་རྩེ་འགྲམ་དུ་སྦྱར་བའི་ཡི་གེ་བ་ནི་བློ་བཟང་དོན་གྲུབ་བོ། །ཀྱེ་མཐུ་སྟོབས་དྲེགས་པའི་དབང་ཕྱུག་ལྷ་གཉན་ཆེ།།ཁྲི་ཀའི་ཡུལ་ལྷ་གཉན་པོ་འཁོར་བཅས་རྣམས། །མ་ཐོགས་འདིར་སྤྱོན་དམ་རྫས་མཆོད་གཏོར་བཞེས། །བཅོལ་བའི་ལས་རྣམས་མྱུར་དུ་འགྲུབ་པར་མཛོད།།