༄༅།།ཡར་ཀླུང་རྟེན་གསུམ་གང་དག་ཡིན་པ་དང་དེའི་ཕན་ནུས་ཤེས་སམ།

རྟེན་མཆོག་རྟག་སྤྱན་འབུམ་པ།
རྟག་སྤྱན་འབུམ་པ་ནི་ནད་རིགས་སྤྱི་དང་ཁྱད་པར་དུ་མིག་ནད་ལ་ཤིན་ཏུ་ཕན་པའི་འབུམ་པ་ཞིག་ཡིན། དེའི་རྒྱུ་མཚན་ནི། འབུམ་པ་དེའི་གཟུངས་ཀྱི་གཙོ་བོར་བྱང་ཆུབ་སེམས་དཔའ་རྟག་ཏུ་ངུའི་སྤྱན་གཅིག་ཡོད་པས་ཡིན།
དེ་ཡང་བྱང་ཆུབ་སེམས་དཔའ་རྟག་ཏུ་ངུ་ཞེས་པས་ག་དུས་ཡིན་ན་ཡང་འགྲོ་བ་རིགས་དྲུག་གི་སྡུག་བསྔལ་ལ་དགོངས་པ་དང་། འཁོར་བར་སེམས་གཏིང་ནས་ངེས་འབྱུང་སྐྱེས་ཏེ་སྤྱན་ཆབ་ཤོར་གྱི་ཡོད་པས་ཁོང་གི་མཚན་ལའང་རྟག་ཏུ་ངུ་ཞེས་ཐོགས་པ་དང་། ཁོང་གིས་རྟག་ཏུ་ངུས་ཀྱང་བདེན་པ་ཆེན་པོའི་མཐུས་སྤྱན་ལ་སྐྱོན་ཤོར་བའམ་སྤྱན་ཤེད་ཉམས་རྒྱུ་མེད་པས་དེའི་བྱིན་རླབས་ཀྱིས་མིག་ནད་ཅན་མཐའ་དག་ལ་ཤིན་ཏུ་ཕན་པ་གྱུར། 
ད་དུང་འབུམ་པའི་ངོས་སུ་སྤྱན་ཡ་གཅིག་བྲིས་ཡོད་པ་དེ་ནི་གནས་མཇལ་བ་ཚོས་སྤྱན་དེ་བྱང་ཆུབ་སེམས་དཔའ་རྟག་ཏུ་ངུའི་སྤྱན་ངོས་ལ་བརྩིས་ནས་དད་པ་བྱས་ན་སྤྱན་དངོས་དང་འདྲ་བའི་བྱིན་རླབས་འབེབས་པའི་ཆེད་དུ་ཡིན།
གཞན་ཡང་སྦྲུམ་མ་ཚོས་ཡར་ཀླུང་རྟེན་གསུམ་གང་ལ་བསྐོར་བ་མང་དུ་བསགས་ན་མ་བུ་བདེ་གྲོལ་ཡོང་རྒྱུ་ཕན་ཐོགས་ཤིན་ཏུ་ཆེ་བར་གྲགས།
རྟེན་མཆོག་ཚེ་ཆུ་འབུམ་པ།
འབུམ་པ་འདིའི་མཚན་ལ་ཚེ་ཆུ་འབུམ་པ་དང་། ཚེ་བཅུད་འབུམ་པ་སོགས་བྲིས་ཡོད་ཀྱང་དོན་དངོས་ཐོག་ཚེ་ཆུ་འབུམ་པ་ཟེར། དེའི་རྒྱུ་མཚན་ནི། འབུམ་པ་འདིའི་ངོས་ཐུན་མོང་མ་ཡིན་པའི( གཞན་མི་འདྲ་བ) རྡོ་སྒོར་མོ་རབ་ཏུ་འཇམ་པ་ཞིག་ཡོད་པ་དེ་ནི་སློབ་དཔོན་པད་མས་དངོས་སུ་བྱིན་གྱིས་བརླབས་པ་ཞིག་ཡིན་པས་སྔར་རྡོ་དེའི་ངོས་ནས་ཚེ་རིང་དུ་བསྲིངས་པའི་ཆུ་སྟེ། ཚེ་ཆུ་ཆད་མེད་དུ་བབས་ཀྱི་ཡོད་པ་ཀུན་གྱི་མཐོང་ཆོས་སུ་གྱུར་བ་རང་ཡིན། དེ་ཡང་རང་རེའི་བོད་ཀྱི་གནས་མཆོག་མང་པོ་ཆུ་མིག་ནས་སྐྱེས་པའམ། ཡང་ན་བྲག་གསེབ་ནས་བབས་པའི་ཚེ་ཆུ་སོགས་སྣ་ཚོགས་ཡོད་ཀྱང་རྡོ་སྒོར་མོ་ཞིག་གི་ངོས་ནས་ཆུ་རྩ་གང་ཡང་མེད་པར་ཚེ་ཆུ་འཁྲུངས་པ་ནི་བོད་ཁོ་ནར་འདི་གཅིག་པུ་ལས་མེད་པས་ཚང་མ་ངོ་མཚར་ཞིང་ཧང་སང་ནས་དད་པ་རྩེ་གཅིག་གིས་ཚེ་ཆུ་འཐུང་གི་ཡོད།
དུས་ཕྱིས་ཚེ་ཆུ་འབུམ་པར་གཏོར་སྐྱོན་ཕོག་སྐབས་གྲོང་མི་གཅིག་གིས་རྡོ་དེ་ཁྱིམ་ལ་འཁྱེར་ནས་སྣ་ཐ་དབུར་རྒྱུའི་དབུར་གཞོང་བྱས་པས་རྡོ་ངོས་ནས་ཆུ་སྐྱེས་ཏེ་སྣ་ཐ་འདམ་བག་ཆགས་པ་ནི་ཉེ་དུས་ཀྱི་ལོ་རྒྱུས་དངོས་ཡིན། ད་ཆ་རྡོ་དེ་རང་གནས་སུ་བསྐྱལ་ཡང་སྐབས་འགར་མ་གཏོགས་ཚེ་ཆུ་བབས་ཀྱི་མེད་ཀྱང་གང་ལྟར་ཚེ་ཆུ་འབུམ་པར་བསྐོར་བ་བསགས་ན་མི་ཚེ་རིང་དུ་འགྲོ་ངེས་རེད་ཅེས་གང་སར་རླུང་ལྟར་གྲགས་པས་རྒྱུན་དུ་བསྐར་བ་བསགས་མཁན་ས་ཕྱོགས་ག་ས་གང་ནས་ཡོང་དང་ཡོང་བཞིན་ཡོད།
རྟེན་མཆོག་དགོན་ཐང་འབུམ་པ།
དགོན་ཐང་འབུམ་པའི་སྔ་མིང་ལ་སྒྲིབ་སེལ་འབུམ་པ་ཟེར་ཞིང་། འབུམ་པ་འདི་གནས་སའི་ས་ཆར་བྱང་ན་སེམས་དཔའ་སྒྲིབ་པ་རྣམ་སེལ་གྱི་ཕྱག་གནས་ཕོག་ཡོད་པས་འབུམ་པ་འདིར་བསྐོར་བ་བསགས་ན་ལས་ཀྱི་སྒྲིབ་པ་དང་། ཤེས་བྱའི་སྒྲིབ་པ། ཉོན་མོངས་ཀྱི་སྒྲིབ་པ་མ་ལུས་སེལ་བར་གྲགས་པས་བྱིན་རླབས་ཆེ་བའི་ཚད་དུ་འཇོག ད་དུང་རྒྱ་ཆེའི་དད་ལྡན་མང་ཚོགས་ཚོས་རང་ལ་ནད་སྒྲིབ་བྱུང་དུས་འབུམ་པ་འདེར་བསྐོར་བ་བསགས་ན་བླ་མ་རྩ་ཆེན་ཞིག་ལ་བྱབས་ཁྲུས་ཞུས་པ་དང་ཁྱད་པར་མི་འདུག་ཅེས་གླེང་མཁན་མང་།ད་དུང་སྦྲུམ་མས་བསྐོར་བ་བསགས་ན་མ་བུ་བདེ་གྲོལ་ཡོང་བ་དང་རྒན་རྒོན་ཚོས་བསྐོར་བ་བསགས་ན་གཞོན་བཟོ་དོད་དུ་འགྲོ་བ། ཕོ་གཞོན་ཚོས་བསྐོར་བ་བསགས་ན་དཔའ་སྟོབས་ཆེ་རུ་འགྲོ་བ། མོ་གཞོན་ཚོས་བསྐོར་བ་བསགས་ན་རྣམ་པ་མཛེས་སུ་འགྲོ་བ་སོགས་ཤོད་སྲོལ་མང་པོ་ཡོད་པ་དེ་དག་ཐམས་ཅད་སྒྲིབ་པ་སེལ་བའ་ནུས་པ་ལས་བྱུང་བ་ཤ་སྟག་ལགས།
ཡང་དགོན་ཐང་འབུམ་པའི་མཚན་འབྲི་སྲོལ་གཞན་ཞིག་ཡོད་པ་ནི། རྒོད་ཐང་འབུམ་པ་ཞེས་པ་དེ་ཡིན། རྒོད་ཐང་འབུམ་པ་ཞེས་པའི་མཚན་འགྲེལ་ནི། རྒོད་ཐང་ཞེས་པ་ནི་སྔོན་ཚོང་དཔོན་ནོར་བུ་བཟང་པོ་ས་འདིར་ཕེབས་ནས་ཆིབས་རྟ་ཆད་དེ་ངལ་གསོ་བཞིན་བཞུགས་པའི་སྐབས་ཆིབས་རྟའི་སྟེང་ན་རྒོད་གཅིག་བབས་པར་ཚོང་དཔོན་རྣམ་རྟོག་འཁྲུངས་ནས་དེ་མར་མདའ་ཞིག་འཕངས་པས་རྒོད་ལ་ཕོགལ་ཕོག་རྒོད་ཀྱིས་མདའ་འཁུར་ནས་ཤེལ་བྲག་རྒོད་ཚང་དུ་སོང་ཡང་མདའ་འཁར་ནས་རྒོད་ཚང་ནང་འཛུལ་མ་ཐུབ་པར་བསྡད་ཡོད་པ་ཤེལ་བག་དཀོན་གཉེར་གྱིས་གཟིགས་ནས་མདའ་ཚུར་འཐེན་གནང་མཛད་པས་རྒོད་ནང་དུ་ཐར། དཀོན་གཉེར་གྱི་མདའ་དེ་ཤེལ་བྲག་ཕུགགི་སྒོ་སྟེང་དུ་གཟེར་ནས་བཞག
དུས་ནམ་ཞིག་སོང་རྗེས་ཚོང་དཔོན་ནོར་བུ་བཟང་པོ་ཤེལ་བྲག་ཏུ་ཕེབས་སྐབས་རང་ཉིད་ཀྱི་མདའ་དེ་གཟིགས་པས་ངེས་འབྱུང་དྲུག་པོ་སྐྱེས་ཏེ་སྡིག་བཤགས་ཀྱི་ཆེད་དུ་རྒོད་ཐང་འབུམ་པ་བཞེངས། ཚོང་དཔོན་གྱི་བླ་གཡུ་ཤིན་ཏུ་ཆེ་བ་བྱ་ནེ་ཙོའི་གཟུགས་ཕུང་ཙམ་ཡོད་པ་དེའང་འབུམ་པའི་གཟུངས་སུ་ཕུལ་བས་ད་ནས་བཟུང་རྒོད་ཐང་འབུམ་པ་ཞེས་ཟེར།
མདོར་ན་རྟག་སྤྱན་འབུམ་པས་མིག་ལ་ཕན་པ་དང་། ཚེ་ཆུ་འབུམ་པས་ཚ་ཚད་འཕེལ་བ། དགོན་ཐང་འབུམ་པས་སྒྲིབ་པ་སེལ་བ་བཅས་འབུམ་པ་གཞན་དང་མི་འདྲ་བའི་དམིགས་བསལ་གྱི་ཕན་ཡོན་ནམ་ཁྱད་ཆོས་རེ་ཡོད་པས་འབུམ་པ་དེ་གསུམ་ལ་ཡར་ཀླུང་རྟེན་གསུམ་ཞེས་གྲགས་སོ། །