༄༅།།གནས་ཆུང་སྒྲ་དབྱངས་གླིང་དང་དན་བག་རིན་ཆེན་སྒང་།

འབྲས་སྤུངས་དགོན་པའི་གཤམ་ཙམ་ན་གནས་ཆུང་སྒྲ་དབྱངས་གླིང་གནས་ཡོད། དེ་ཡང་བོད་རབ་བྱུང་བཅུ་གཅིག་པའི་ལྕགས་བྱི་སྤྱི་ལོ་༡༦༦༠ལོར་ཐོག་མར་སྡེ་སྲིད་འཕྲིན་ལས་རྒྱ་མཚོའི་སྐུ་དུས་སུ་ཕྱག་བཏབ། དགོན་དེར་ལོ་རྒྱུས་ཡུན་རིང་ལྡན་པ་དང་། སྐུ་གསུང་ཐུགས་རྟེན་མང་པོ་མཇལ་རྒྱུ་ཡོད། གཙོ་བོ་དེ་གར་གནས་ཆུང་ཆོས་སྐྱོང་ངམ་དགྲ་ལྷ་འོད་ལྡན་དཀར་པོའམ་རྡོ་རྗེ་གྲགས་ལྡན་བཞུགས་ཡོད་ཅིང་། དེ་ནི་བོད་ཀྱི་རྟེན་སྲོལ་བྱེད་པའི་སྲུང་མའི་གཙོ་བོ་ཡིན་པ་དང་། དོན་ཆེན་བྱུང་ཚེ་ཆོས་སྐྱོང་ཕེབས་ནས་བཀའ་ལུང་ཞུ་སྲོལ་ཡོད། གནས་ཆུང་གི་འོག་ཙམ་ན་དན་བག་རིན་ཆེན་སྒང་གི་གྲོང་སྡེ་ཡོད་པ་དང་། གྲོང་སྡེ་དེའི་ནང་སྐད་གྲགས་ཆེ་ཤོས་ནི་བསྟན་མའི་གཟིམ་ཁང་ཞེས་ལྷ་ཕེབས་མཁན་གྱི་གཟིམ་ཤག་ཅིག་ཡོད་པས་དེ་སྔ་བཀའ་ཤག་སྲིད་གཞུང་གི་རིམ་བཞིའི་གོ་གནས་ཡོད་པ་དང་། གཙོ་བོ་འབྲས་སྤུངས་དགོན་པའི་བསྟན་སྲུང་བསྟན་མ་རྡོ་རྗེ་དྲག་མ་དང་། བསྟན་མ་རྡོ་རྗེ་གཡུ་སྒྲོན་མ་སོགས་ཕེབས་ཀྱི་ཡོད། སྐུ་རྟེན་བུད་མེད་ཡིན་པ་དང་། ཏཱ་ལའི་བླ་མ་འབྲས་སྤུངས་དགེ་འཕེལ་རི་ཁྲོད་དུ་ཕེབས་སྐབས་བསྟན་མའི་སྐུ་མདུན་དུ་བཅར་ནས་མཇལ་དར་དང་ལྷ་རྫས་སོགས་གནང་སྲོལ་ཡོད། དེའི་ཤར་དུ་བཙན་ཁང་ཞིག་ཀྱང་ཡོད།