སྡོམ་བརྩོན་དམ་པའི་རི་མོ་བཤད་པ།

        སྡོམ་བརྩོན་དམ་པ་ནི་མཁན་ཆེན་ཞི་བ་འཚོའི་མཚན་ཡིན་ཞིང་། བོད་ལ་སངས་རྒྱས་བསྟན་པའི་གཞི་ཚུགས་པ་ཁོང་གི་བཀའ་དྲིན་ཡིན་པས་ནམ་ཡང་མི་བརྗེད་ཅིང་དྲིན་དྲན་ཞིང་ཡོད་པ་དང་། དར་མ་འུ་དུམ་བཙན་གྱིས་ཆོས་བསྣུབས་ནས་དད་མོས་ཀྱི་རིགས་གང་ཡང་བྱས་མི་ཆོག་པའི་སྐབས། རྣམ་དཔྱོད་ཁྱད་པར་ཅནཞིག་གིས་སྡོམ་བརྩོན་དམ་པའི་རི་མོ་འདི་གསར་སྤེལ་མཛད་ནས་མཁན་སློབ་ཆོས་གསུམ་ལ་གསང་དད་དང་རྗེས་དྲན་བྱས་ཞེས་དེབ་ཐེར་ཆོས་འབྱུང་རྣམས་སུ་གསལ་བ་དང་། ཐབས་ཚུལ་དེའི་རིགས་ནི་དུས་འཁྲུག་དང་ཆབ་སྲིད་ཕྱིན་ཅི་ལོག་པས་བདེན་པ་དང་རང་དབང་རྨེག་མེད་དུ་གཅིལ་བའི་སྐབས་གང་ཡིན་ལ་སྤྱོད་པའི་ཐབས་འཕྲུལ་ངོ་མཚར་བ་ཞིག་ཡིན་པ་དང་། དེའི་ཕན་ཡོན་ནི་སྔར་ཡོད་ཀྱི་ཁྱད་རྟགས་མངོན་གསལ་ཅན་རྣམས་སྐུང་ཞིང་སྦས་པ་དང་། སྔར་གྱི་ཁྱད་ཆོས་དེ་དག་གི་ལུས་སམ་སྣོད་དུ་ཡོད་པའི་ཤེས་རིག་དང་བླ་སྲོག་གི་གྲ་ཟུར་མ་ཉམས་པར་མུ་མཐུད་དུ་དར་སྤེལ་གཏོང་ཚུལ་སྙན་ངག་གཞུང་གི་གབ་ཚིག་ལྟ་བུའི་བརྡ་སྤྲོད་ལུགས་དང་། དེ་བཞིན་བྱས་ན་བར་ཆད་ཀྱིས་མི་ཚུགས་པར་མུ་མཐུད་དུ་རང་གི་འདོད་མོས་བཞིན་ཡོང་ཐུབ་པ་གཞན་དབང་རང་དབང་ཅན་ལ་བསྒྱུར་བའི་འཚོ་ཐབས་རིན་པོ་ཆེ་ཞིག་ཡིན་མཆི།
        དཔེར་ན་ལོ་ཆེན་བེ་རོ་ཙ་ནས་ལེགས་སྦྱར་གྱི་བསྟན་བཅོས་མང་བོ་གདན་དྲངས་ཏེ་རྒྱ་བོད་ས་མཚམས་སུ་སླེབས་པ་དང་། རྒྱ་གར་བའི་སོ་སྲུང་གིས་ཁྱེར་མ་བཅུག་པར། བེ་རོས་ཡི་གེའི་གཟུགས་འཕྲུལ་ཡིག་ཏུ་བཏབ་ཅིང་ཕེབས་པས་བོད་ལ་བདེ་བླག་ཏུ་འབྱོར་བར་བཤད།
        དེ་བཞིན་རིག་གནས་གསར་བརྗེའི་སྐབས་བོད་ཡིག་ལ་གསར་བརྗེ་བྱས་ནས་བརྡ་སྤྲོད་པའི་ཆ་ལག་དང་བཅས་པ་བརླགས་པར་བརྩམས་པ་དང་། ཁོང་མཁས་པའི་དབང་པོ་དམུ་དགེ་བསམ་གཏན་མཆོག་གིས་མི་འཇིགས་སེང་གེའི་སྐད་ཀྱིས་དགག་ཕྱོགས་ནས་བློ་སྒོ་འབྱེད་པའི་ཕྱིར་མཐའ་དཔྱད་པ་ཞེས་པའི་རྩོམ་ཡིག་ཕྱག་རྩོམ་མཛད་ནས་སུན་ཕྱུངས་པ་དང་། སྒྲུབ་ཕྱོགས་ནས་བརྡ་སྤྲོད་བློ་གསལ་འཇུག་ངོགས་གཉིས་མཛད་དེ་བོད་ཀྱི་སྐད་ཡིག་གཉན་འཕྲང་ལས་སྐྱོབ་པར་མཛད་ཅིང་།དེ་གཉིས་ལྷན་དུ་སི་ཁྲོན་ནས་དཔེ་བསྐྲུན་བྱེད་རྩིས་ལ་དགག་ཕྱོགས་ཀྱི་རྩོམ་ཡིག་དེ་ཡུལ་དུས་ཀྱི་དབང་གིས་རྩོམ་སྒྲིག་པས་བློ་གསལ་འཇུག་ངོགས་དང་ལྷན་དུམ་དཔར་བ་དང་། དཔེ་ཆའི་རྒྱབ་ཤོག་ལ་མཚན་སྨག་ཏུ་བོད་མི་འགའ་གཉའ་སྒུར་སྒུར་དང་ཉ་ཞུམ་ཞུམ་གྱིས་འཇབ་ཀྱིན་འགྲོ་བ་ལྟར་གྱི་རི་མོ་ཞིག་ཇུས་འགོད་བྱས་ཡོད་པ་ནི་སྐབས་དེར་ད་རུང་རིག་གནས་ཀྱི་བྱ་བ་གང་ཡང་སེམས་ཆུང་བྱ་དགོས་པའི་མཚོན་བྱེད་ཡིན་ཞེས་རྩོམ་སྒྲིག་པས་ཁོང་ལ་ཞུས་པ་དང་། ཁོང་གིས་ཀྱང་སྔར་གྱི་བསྟན་བཅོས་རྩོམ་ལུགས་ལྟར་ཤིས་བརྗོད་ཕྱག་བྱ་སོགས་དགོས་ངེས་ཀྱི་ཕྱག་སྲོལ་རྣམས་དགག་བྱ་ཆེ་བར་མཁྱེན་ནས། བཅུ་ཕྲག་འདབ་ལྡན་གེ་སར་རེག་ཙམ་གྱིས། །ཟུང་ལྡན་འདབ་མའི་སྙན་འགྱུར་འདོད་དགུ་རུ། །འབྱུང་བའི་དཔལ་ལྡན་དྲི་བསུང་ངར་བོ་ཡིས། །ཡངས་པའི་སྐྱེད་ཚལ་ཁྱོན་དེ་མཛེས་གྱུར་ཅིག །ཅེས་པ་ལྟར་བསྡུས་བརྗོད་ཀྱི་རྒྱན་ནམ་གབ་ཚིག་གི་ཚུལ་དང་འདྲ་བར་བསྟན་བཅོས་ལ་འཇུག་པའི་སྒོ་ཕྱེས་པ་ནི་མི་ལོ་སྟོང་ཕྲག་རིང་གི་རྩོམ་ལུགས་དང་གཏན་ནས་མི་འདྲ་བར་བྱུང་བ་ཡང་སྡོམ་བརྩོན་དམ་པའི་ཐབས་འཕྲུལ་ཇི་བཞིན་གངས་ཅན་སྐད་ཡིག་གི་སྲོག་དབུགས་དབྱུང་བ་དང་། མཁས་པའི་དབང་པོ་དུང་དཀར་བློ་བཟང་འཕྲིན་ལས་མཆོག་གིས་ཀྱང་དེ་བཞིན་མཛད་མྱོང་བ་སོགས་ཉམ་ཆུང་བའི་ཡུལ་དུས་གང་ལ་ཡང་ཁོར་ཡུག་ལ་མཐུན་འགྱུར་གྱི་འཕྲུལ་བསྒྱུར་ལ་བརྟེན་ནས་རང་ཉིད་འཚོ་ཞིང་གནས་པའི་ཐབས་བྱེད་པ་ནི་སྡོམ་བརྩོན་དམ་པའི་རི་མོ་འདིས་ཉིང་དགོས་ཀྱི་བསླབ་བྱ་ཡིན་ནོ་སྙམ།