༄༅། །རྡོར་དྲིལ་སོགས་མཆོད་ཆས་རྣམས་ཀྱི་མཚོན་དོན་སྐོར།

        རྟེན་གསུམ་གྱི་མཚོན་དོན་བཤད་པ་ལ། ཐོག་མར་རྡོ་རྗེའི་མཚོན་དོན་ནི། མཚོན་བྱ་དོན་གྱི་རྡོ་རྗེ་དང་། མཚོན་བྱེད་དཔེ་ཡི་རྡོ་རྗེ་གཉིས་ལས། དང་པོ་ནི། གཟུང་འཛིན་གཉིས་སུ་མེད་པའི་ཡེ་ཤེས་དང་དེའི་རྟོགས་བྱའི་ཆོས་ཐམས་ཅད་ཀྱི་གནས་ལུགས་སྟོང་པ་ཉིད་ལ་དོན་གྱི་རྡོ་རྗེ་ཞེས་བྱ་སྟེ། དཔལ་མཉམ་སྦྱོར་ཆེན་པོའི་རྒྱུད་ལས། རྡོ་རྗེ་སྟོང་པ་ཉིད་དུ་བཤད། །ཅེས་གསུངས་སོ། །
        གཉིས་པ་མཚོན་བྱེད་རྟགས་ཀྱི་རྡོ་རྗེ་ལ། རྒྱུ། དབྱིབས། ཚད། དབྱེ་བ། མཚོན་དོན་དང་ལྔ་ལས། དང་པོ་ནི། གསེར་དང་། དངུལ། ཟངས། རག་ལི། ལྕགས། རྡོ། ཤིང་སོགས་གང་ཡང་རུང་བས་བཟོ་རུང་སྟེ། རྒྱུད་རྡོ་རྗེ་མཁའ་འགྲོ་ལས། ཞི་རྒྱས་དང་ནི་མངོན་སྤྱོད་ཀྱི། །རྡོ་རྗེ་དག་ནི་ཐམས་ཅད་ཀྱང་། །གསེར་ལ་སོགས་པས་ལེགས་པར་བརྡུང་། །ཞེས་གསུངས་སོ། །
        གསུམ་པ་དབྱིབས་ནི། རྡོ་རྗེ་ཀུན་གྱིས་ཡང་དག་བརྒྱན། །ཆ་གསུམ་དུ་ནི་བཟུང་ནས་སུ། །ཆ་བརྒྱད་སྐ་རགས་ལེགས་པར་བརྒྱན། །ཞེས་དང་། རྩེ་མོ་ཀུན་གྱི་དབུས་མ་ཟླུམ། །ཕྱོགས་སོ་རྩེ་མོ་འདུས་པས་གནས། །ཞེས་དང་། རྡོ་རྗེ་གདན་བཞིའི་རྒྱུད་ལས། ཆ་གསུམ་གསལ་བ་བཟུང་བ་ལ། །སྐ་རགས་ཀྱིས་ནི་ཤིན་ཏུ་བརྒྱན། །ཨུཏྤལ་ཀུ་མུ་ད་ལྟར་མཛེས། །རིན་ཆེན་པདྨ་ཡང་དག་གནས། །ཕྱོགས་ལ་སོགས་པ་བརྒྱད་དང་ནི། །དབུ་མའི་སངས་རྒྱས་ཉིད་དང་དགུ། །རྩེ་མོ་དགུ་ཡི་ལྷ་ཉིད་དང་། །ཞེས་གསུངས་སོ། །
        བཞི་པ་རྡོ་རྗེའི་ཚད་ནི། རྒྱུད་རྡོ་རྗེ་མཁའ་འགྲོ་ལས། སྟེང་དང་འོག་དང་དབུས་དག་ནི། །སོ་སོར་ཆ་ནི་གསུམ་གསུམ་འདོད། །སྟེང་གི་པདྨ་ཟླ་བ་ནི། །དྲུག་ཆ་ཀུན་ནས་ཟླུམ་པོར་བྱ། །དེ་དག་ལ་ནི་སེངྒེའི་སྣ། །ནས་ཕྱེད་ཙམ་དུ་མཐོ་བར་བྱ། །མཆེ་བ་ཡི་ནི་མཐར་གནས་པ། །དེ་ནི་དྲུག་ཆ་ཞེས་བྱར་གྲགས། །ཆ་ནི་ཉི་ཤུ་རྩ་བདུན་ལ། །སོ་སོ་རུ་ནི་དགུར་དགུར་འདོད། །ཆ་གསུམ་བླ་མའི་ཐ་མ་ནི། །སྟེང་གི་ཆ་གཉིས་སྤངས་ནས་ནི། །དབུས་ཀྱི་མཐའ་ཡང་དེ་བཞིན་ནོ། །འདབ་མ་ལ་ནི་གང་གནས་པའི། །ཆུ་སྲིན་ཆ་གཅིག་ཉིད་ཡིན་ཏེ། །དེ་ཡི་ཕྱེད་དུ་སྐ་རགས་འདོད། །ཅེས་གསུངས་སོ། །
        ལྔ་པ་དབྱེ་བ་ནི། རྡོ་རྗེ་རྩེ་མོ་གཅིག་པ། རྩེ་གསུམ་པ། རྩེ་ལྔ་པ། རྩེ་དགུ་པ། རྩེ་མོ་བཅུ་པ། རྩེ་མོ་ཉེར་ལྔ་པ་སོགས་ཡོད་པར་མངོན་ཏེ། དཔལ་ནག་པོ་ཆེན་པོ་མགོན་པོ་དངོས་གྲུབ་འབྱུང་བའི་རྒྱུད་ལས། རྡོ་རྗེ་རྩེ་གཅིག་པ་དང་ནི། །རྩེ་གསུམ་ཉི་ཤུ་རྩ་ལྔའི་བར། །དུ་མ་རྣམ་པར་འཕྲོས་ནས་ནི། །ཞེས་གསུངས་སོ། །         དྲིལ་བུའི་མཚོན་དོན་བཤད་པ་ལ། དྲིལ་བུའི་རྒྱུ་དང་། དབྱིབས། ཚད་དང་། དབྱེ་བ། མཚོན་དོན་དང་ལྔ་ལས། དང་པོ་ནི། གསེར་དང་། དངུལ། ཟངས། འཁར་བ། ལྕགས། ལི་སོགས་ཀྱིས་བཟོ་རུང་བ་ཡིན་ཏེ། རྒྱུད་རྡོ་རྗེ་མཁའ་འགྲོ་ལས། ཀུན་ལའང་འཁར་བའམ་ཡང་ན་ནི། །ལྕགས་གསུམ་ལས་བྱུང་དྲིལ་བུ་སྟེ། །ཞེས་གསུངས་སོ། །
        གཉིས་པ་དབྱིབས་ནི། རྒྱུད་རྡོ་རྗེ་མཁའ་འགྲོ་ལས། དེ་ནས་དྲིལ་བུའི་མཚན་ཉིད་ཀྱི། །ཆུ་ཞེང་ལ་སོགས་བཤད་པར་བྱ། །རིན་ཆེན་སྣ་ཚོགས་འབར་བ་དང་། །རྡོ་རྗེའི་སྐ་རགས་ཕྲེང་གཉིས་བྱ། །ཤེལ་སྒོང་དྲི་མ་མེད་པ་ལྟར། །དྲ་བ་དྲ་བ་ཕྱེད་པས་བརྒྱན། །ཆ་གསུམ་མཚན་ཉིད་ལྡན་པ་ལ། །རྡོ་རྗེ་ལ་སོགས་མཚན་མས་བརྒྱན། །དབུས་ཀྱི་ཁོག་པ་ཟབ་པ་དང་། །ཐམས་ཅད་དགའ་བྱེད་བཅུད་ཀྱིས་གནས། །དེ་ནས་པདྨ་རིན་ཆེན་དང་། །ཨུཏྤལ་ཀུ་མུ་ད་ཡིས་བརྒྱན། །ཕྱོགས་དང་ཕྱོགས་མཚམས་ཆ་བརྒྱད་དུ། །ལྷ་མོ་ལ་སོགས་བརྒྱད་དུ་གྲགས། །དེ་ཡི་སྟེང་དུ་ལྷ་མོ་ནི། །ས་བོན་བརྒྱད་ལས་བསམ་པར་བྱ། །ཞེས་གསུང་སོ། །སྟེང་གི་པད་འདབ་ཀྱི་ལྷ་མོ་བརྒྱད་ཀྱི་ས་བོན་རིམ་པ་ནི། །ཤར་དུ་སྒྲོལ་མའི་ས་བོན་ཡི་གེ་ཏཱཾ་དང་། དེ་ནས་གཡོན་བསྐོར་གྱིས་བྱང་དུ་གོས་དཀར་མོའི་ས་བོན་པཱཾ་དང་། ནུབ་ཏུ་མཱ་མ་ཀཱིའི་ས་བོན་མཱཾ་དང་། ལྷོ་རུ་སངས་རྒྱས་སྤྱན་མའི་ས་བོན་ལཱཾ་དང་བཞི་འགོད་པ་དང་། མཚམས་བཞིའི་ཤར་ལྷོ་ནས་གཡས་བསྐོར་གྱིས་དང་པོར། ནོར་འཛིན་མའི་ས་བོན་བཾ་ཡིག་དང་། ལྷོ་ནུབ་ཏུ་ཙནྡ་མའི་ས་བོན་ཙུཾ་དང་། ནུབ་བྱང་དུ་ཁྲོ་གཉེར་ཅན་མའི་ས་བོན་བྷྲིཾ་དང་། བྱང་ཤར་དུ་རྡོ་རྗེ་མཁའ་འགྲོ་མའི་ས་བོན་མཾ་རྣམས་འགོད་དགོས་པ་ཡིན་ཏེ། རྒྱུད་རྡོ་རྗེ་མཁའ་འགྲོ་ལས། ཤར་ཕྱོགས་སུ་ནི་སྒྲོལ་མ་སྟེ། །དེ་བཞིན་བྱང་དུ་གོས་དཀར་མོའོ། །ནུབ་ཏུ་བདག་མོའི་མིང་ཅན་ཏེ། །ལྷོ་རུ་སངས་རྒྱས་སྤྱན་ཞེས་བྱ། །མདོག་མཛེས་སྦྲང་རྩི་ཡིད་འོང་མ། །དེ་བཞིན་རིན་ཆེན་འཁྱིལ་མའོ། །ཞེས་གསུངས་སོ། །
        གསུམ་པ་ཚད་ནི། རྒྱུད་རྡོ་རྗེ་མཁའ་འགྲོ་ལས། སོར་བརྒྱད་དང་ནི་བཅུ་དྲུག་གམ། །ཉི་ཤུ་ལས་ནི་ལྷག་མི་བྱ། །ཇི་ལྟར་ནུས་ཤིང་རྗེས་མཐུན་པར། །བསྒྲུབ་པའི་དབང་པོས་དེ་དག་བྱ། །ཁ་ཡང་ཆོ་གའི་རིམ་པ་ཡིས། །སོར་མོ་ལྔ་ལས་གཞན་པ་སྤང་། །ལྷ་མོ་འདི་ནི་དྲིལ་བུ་ཡི། །སྒྲུབ་ཐབས་རྒྱ་ཆེར་བསྟན་པ་སྟེ། །ཞེས་སོགས་གསུངས་སོ། །
        བཞི་པ་དབྱེ་བ་ནི། རྩེའི་རྣམ་གྲངས་ཀྱི་དབྱེ་བ། རིགས་ཀྱི་དབྱེ་བ། དམ་ཡེའི་དབྱེ་བ། ཞི་དྲག་གི་དབྱེ་བ་བཅས་སོ། །
        ལྔ་པ་མཚོན་དོན་ནི། རྒྱུད་རྡོ་རྗེ་མཁའ་འགྲོ་ལས། ནམ་མཁའི་སོགས་ཀྱི་དབུས་སུ་ནི། །གཟུགས་རྫོགས་བསྐོར་བས་ཡང་དག་གནས། །པདྨ་རྒྱས་པ་ལྟ་བུའི་དབྱིབས། །གཟུགས་མེད་སྲིད་པའི་ཕྱོགས་སུ་ནི། །ཡེ་ཤེས་བདུད་རྩི་བུམ་པ་འདྲ། །ཤེས་རབ་བདུད་རྩིའི་གནས་ཡིན་ཏེ། །ཞེས་དང་། སཾ་པུ་ཊི་ལས། ནང་གི་གཟུགས་ནི་ནམ་མཁའ་སྟེ། །གཟུགས་ཀྱིས་གང་བ་གཟི་བརྗིད་ཅན། །པདྨ་ཁ་ཕྱེ་ལས་བྱུང་བ། །གཟུགས་མེད་སྲིད་པའི་གནས་སུ་ནི། །ཤེས་རབ་བདུད་རྩི་བུམ་པ་ལྟར། །ཡེ་ཤེས་བདུད་རྩིའི་གནས་སུ་ནི། །ཞེས་སོགས་གསུངས་སོ། །         ཌཱ་མ་རུ་བཤད་པ་ལ། ཌཱ་རུའི་རྒྱུ་དང་། དབྱིབས། ཚད། མཚོན་དོན། དགོས་པ་དང་ལྔ་ལས། དང་པོ་ཌཱ་རུའི་རྒྱུ་ནི། ཙནྡན་དཀར་དམར་དང་། སེང་ལྡེང་། མིའི་ཐོད་རུས་རྣམས་དང་། དེ་དག་མ་རྙེད་ན་བ་སོ་སོགས་རྒྱུ་གང་ཡང་རུང་བ་ལས་བྱ་རུང་བ་ཡིན་ཏེ། དཔལ་ཡང་དག་སྦྱོར་བ་སཾ་པུ་ཊའི་རྒྱུད་ལས། དེ་ནས་ཅང་ཏེའུའི་མཚན་ཉིད་བཤད། །བཛྲ་ཤིར་ཤ་རྩ་བ་དང་། །ཙནྡན་དམར་པོ་ལས་བྱུང་བ། །གཞན་རྣམས་གང་རྣམས་དེ་རྣམས་ནི། །ཡིད་ལ་འདོད་པ་རྣམས་ལ་བྱ། །ཞེས་དང་། གཞན་པ་ཡི་ཡང་རྔེ་ཆུང་ནི། །ཐོད་པ་ལས་ནི་བསྐོར་བ་ཉིད། །ཅེས་གསུངས་སོ། །
        གཉིས་པ་དབྱིབས་ནི། ཟླུམ་གོར་ཟུང་ལྟག་སྤྲོད་བྱས་པ་སྐེད་ལ་ཉག་ཡོད་པའི་ངོས་གཉིས་སྤྲེའུའི་པགས་པའམ་མི་པགས་སོགས་ཀྱིས་གཡོགས་པ། སྐེད་པ་གཡས་གཡོན་དུ་སྲད་བུ་དམར་པོ་ལ་རྡུང་བྱེད་ཀྱི་རིལ་བུ་ཆུང་ངུ་མིག་འབྲས་འདྲ་བ་ཟུང་བཏགས་པ་ལ་ཌཱ་རྡོར་འམ། ཌཱ་རུ་ཞེས་འབོད་དོ། །ཌཱ་རུའི་ནང་ངོས་སུ་རྩི་དམར་འཇམ་ལེགས་པར་བྱུགས་ཏེ་ལྷའི་དཀྱིལ་འཁོར་དངོས་སམ་དེའི་སྐུ་གཟུགས་དང་། ཕྱག་མཚན། ཉེ་བསྙེན་དང་། རྩ་སྔགས། སྙིང་པོའི་སྔགས་སོགས་འབྲི་དགོས་ཤིང་། དེ་ཡང་ཐོད་ཌཱ་ལ་སྐྱེས་པ་ལོ་བཅུ་དྲུག་ཅན་དང་། བུ་མོ་ལོ་བཅུ་གཉིས་ཅན་གཉིས་ཀྱི་ཐོད་པ་སྨིན་མཚམས་ནས་སྤྱི་གཙུག་བར་ཟླུམ་པོར་བྲེགས་པ་ལྟག་སྤྲོད་བྱས་ཏེ་ཐོད་མདུན་འོག་ཏུ་འོང་བར་བྱ། དེ་སྤྲེའུའི་པགས་པས་གཡོགས་པའི་ནང་ངོས་སུ་བུ་མོ་གཙང་མ་གྲོང་ཆོས་ཀྱི་མ་གོས་པའི་ཟླ་མཚན་གྱིས་པདྨ་བྲིས་པའི་ལྟེ་བར་ཧྲཱི་དང་མཾཿ་སོགས་འབྲི་བ་དང་། ཁྱེའུ་གཙང་བའི་བྱང་སེམས་དང་བུ་མོའི་མཚལ་གྱིས་དཀྱིལ་འཁོར་འབྲི་ཞིང་བྱུགས་ཏེ། དུར་ཁྲོད་དུ་དོར་བའི་སྐྲ་ཡི་སྐུད་པས་ཐོད་རུས་གཉིས་གཟེར་ཐག་བྱ་ཞིང་། ཆུ་བྱ་མཐིང་རིལ་གྱི་རྐང་པའི་རུས་པས་ཌཱ་རྡོ་བྱས་ཏེ་བརྡུང་དགོས་པ་ཡིན་ཏེ།  རྒྱུད་ཆེན་སཾ་ཊ་ལས། ཐོད་པ་ལས་ནི་བསྐོར་བ་ཉིད། །སྤྲེའུའི་པགས་པས་གཡོགས་པའོ། །དེ་བཞིན་ཁ་སྦྱོར་གཉིས་ལ་ནི། །པདྨ་དག་ནི་བྲི་བར་བྱ། །བུད་མེད་ཁྲག་གིས་མཛེས་པ་དང་། །དུར་ཁྲོད་སྐྱེས་པའི་སྐྲ་ལས་ནི། །བཀལ་བས་རུས་པ་གཉིས་ནི་བཅིང་། །ཁྱིམ་གྱིས་མེ་ཏོག་གཉིས་ཀྱིས་ནི། །པདྨ་ཟེའུ་འབྲུ་གཉིས་པ་ལ། །དཀྱིལ་འཁོར་ཉིད་ནི་བྲི་བར་བྱ། །ཞེས་དང་། ཕྲེཾ་ཧཱུཾ་ཞེས་ནི་བརྗོད་ནས་ནི། །ཆུ་སྐྱར་རྐང་པའི་རུས་པས་གདབ། །ཅེས་གསུངས་སོ། །
        གསུམ་པ་ཚད་ནི། ཆེ་ཚད་ལ་མཆུ་རུའམ་སྲིད་དུ་སོར་བཅུ་གཉིས་དང་ཁའི་ཞེང་ལ་སོར་དྲུག་ཅན་དང་། འབྲིང་ཚད་ལ་སྲིད་དུ་སོར་བཅུ་པ་དང་ཁ་ཞེང་ལ་སོར་ལྔ་ཅན་དང་། ཡང་ན་སྲིད་དུ་སོར་བཅུ་གཅིག་དང་། ཁའི་ཞེང་ལ་སོར་ལྔ་དང་ཕྱེད་ཅན་དང་། ཆུང་ཚད་ལ་སྲིད་དུ་སོར་དགུ་དང་ཁའི་ཞེང་ལ་སོར་བཞི་དང་ཕྱེད་ཅན་དག་དགོས་པར་གསུངས་ཏེ། སཾ་བྷུ་ཊ་ལས། དེ་ཡི་ཚད་འདི་བཀའ་སྩལ་པ། །བཅུ་གཉིས་པ་དང་བཅུ་པ་ཉིད། །ཁ་ལ་སོར་ནི་དྲུག་དང་ལྔ། །དགུ་པ་དང་ནི་བཅུ་གཅིག་ཉིད། །ཁ་ལ་དེ་ཡི་ཕྱེད་ཉིད་དོ། །ཞེས་གསུངས་སོ། །
        བཞི་པ་མཚོན་དོན་ནི། ཌཱ་རུའི་ཁོག་པ་དང་པགས་གཡོག་དང་རྡུང་བྱེད་དང་ལག་པའི་རྩོལ་བ་སོགས་གཅིག་ལ་གཅིག་བརྟེན་ནས་སྒྲ་འབྱུང་བ་ནི་ཆོས་ཐམས་ཅད་རྟེན་ཅིང་འབྲེལ་བར་འབྱུང་བ་ཡིན་པའི་དོན་དང་། སྒྲ་ནི་གྲགས་སྟོང་སྐྱེ་འགགས་མེད་པ་ཆོས་ཉིད་ཀྱི་སྒྲ་མཚོན་བྱེད་ཡིན་པ་དང་། ཀྱེ་རྡོ་རྗེ་ལས། ཁ་ཊྭཱཾ་ག་གཟུགས་ཤེས་རབ་སྟེ། །ཐབས་ཀྱི་གཟུགས་ཀྱི་ཅང་ཏེའུ་ཉིད། །ཅེས་དང་། ཐབས་བདེ་བ་ཆེན་པོའི་ཡེ་ཤེས་མཚོན་བྱེད་ཀྱང་ཡིན་ཏེ། རྣལ་འབྱོར་མ་ཀུན་སྤྱོད་ཀྱི་རྒྱུད་ལས། ཁ་ཊྭཱཾ་ག་ནི་ལྷ་ཡི་སྐུ། །ཤེས་རབ་ཌཱ་མ་རུ་རུ་བརྟག །ཅེས་གསུངས་སོ། །         བགྲང་ཕྲེང་བཤད་པ་ལ། རྒྱུ་དང་། གྲངས་ཚད། བགྲང་ཚུལ། དགོས་ཆེད། ཕན་ཡོན་དང་ལྔ་ལས། དང་པོ་ལ་སྤྱི་དང་བྱེ་བྲག་གཉིས་ལས་དང་པོ་ནི། ཕྲེང་བའི་རྒྱུ་སྤྱི་ལ་ནི། ཤེལ་དང་། ཉ་ཕྱིས། མུ་ཏིག མུ་མེན། བྱུ་རུ། ལུང་ཏང་། དུང་། གསེར། དངུལ། ཟངས་མ། ཞ་ཉེ། འཁར་བ། པདྨའི་སྙིང་པོ། བ་སོ། ཙནྡན། རུ་ཀྵ། མིའི་ཐོད་རུས། རྔ་མོང་དང་། བོང་བུ་མ་ཧེ་རྣམས་ཀྱི་རུས་པ་དང་། འབྲས་བུའི་རིགས་དང་། རིན་པོ་ཆེའི་རིགས་སོགས་ཕལ་ཆེར་གང་འདོད་དམ་གང་འཛོམས་ལ་བྱ་རུང་བ་ཡིན་ཏེ། དུས་འཁོར་བསྡུས་རྒྱུད་ལས། ཤེལ་དང་མུ་ཏིག་དང་ནི་མི་དང་བོང་བུའི་སོ་འམ་རུས་པ་དག་དང་བྷོ་དྷི་ཙི་དང་ནི། །པདྨ་ཞེས་བྱ་དབང་མིག་ལུང་ཏང་བདེ་གཤེགས་རིགས་ཀྱི་དབང་གིས་སྔགས་བཟླས་པ་ལ་ཕྲེང་བར་འགྱུར། །ཞེས་གསུངས་སོ། །
        གཉིས་པ་བྱེ་བྲག་ཞི་རྒྱས་དབང་དྲག་གི་ཕྲེང་བ་སོ་སོར་བཤད་པ་ལ། དང་པོ་ཞི་བའི་ལས་སྒྲུབ་པའི་ཕྲེང་བ་ནི། སཾ་བྷུ་ཊ་ལས། ཤེལ་དང་ཉ་ཕྱིས་མུ་ཏིག་དང་། །ཁམས་ནི་དཀར་པོ་ལ་སོགས་གཞན། །ཞི་བའི་ལས་ལ་ཁྱད་པར་དུ། །ཕྲེང་བ་ཡི་ནི་མཚན་ཉིད་དོ། །ཞེས་དང་། མགོན་པོ་དངོས་གྲུབ་འབྱུང་བའི་རྒྱུད་ལས། ཤེལ་གྱིས་ཞི་བ་ཆེན་པོ་འགྲུབ། །ཅེས་དང་། རྡོ་རྗེ་གདན་བཞི་ལས། ཤེལ་དང་ཉ་ཕྱིས་མུ་ཏིག་དང་། །གཞན་ཡང་ནོར་བུ་དཀར་པོ་སོགས། །ཞི་སོགས་ལས་ལ་ཁྱད་པར་གྱི། །བགྲང་ཕྲེང་གི་ནི་ཁྱད་ཉིད་ནི། །ཞེས་གསུངས་སོ། །
        གཉིས་པ་རྒྱས་པའི་ལས་སྒྲུབ་པའི་ཕྲེང་བ་ནི། སཾ་བྷུ་ཊ་ལས། གསེར་དང་དངུལ་དང་ཟངས་མ་པ། །པདྨའི་ས་བོན་ཁྱད་པར་དུ། །རྒྱས་པ་ལ་ནི་ཕྲེང་བ་ཉིད། །རྣམ་པར་མཁས་པས་བགྲང་བར་བྱ། །ཞེས་དང་། མགོན་པོ་དངོས་གྲུབ་འབྱུང་བའི་རྒྱུད་ལས། མུ་ཏིག་གིས་ནི་རྒྱས་པ་ལ། །ཞེས་དང་། གདན་བཞི་ལས། གསེར་དང་དངུལ་དང་ཟངས་མ་དང་། །པདྨའི་ས་བོན་ཁྱད་པར་དུ། །རྒྱས་པ་ཡིས་ནི་བགྲང་ཕྲེང་སྟེ། །མཁས་པ་རྣམ་ཀྱིས་བགྲང་བར་བྱ། །ཞེས་གསུངས་སོ། །
        གསུམ་པ་དབང་གི་ལས་སྒྲུབ་པའི་ཕྲེང་བ་ནི། སཾ་བྷུ་ཊ་ལས། གུར་གུམ་ལ་སོགས་དྲི་སོགས་ཀྱིས། །དྲི་ནི་ཐམས་ཅད་ཁྱད་པར་དུ། །བསྒྲུབས་ཤིང་རིལ་བུ་བྱས་ནས་ནི། །དབང་ལ་ཡོངས་སུ་རབ་ཏུ་གྲགས། །ཞེས་དང་། བདེ་མཆོག་སྡོམ་འབྱུང་ལས། དབང་དང་དགུག་པའི་རབ་སྦྱོར་ལ། །གུར་གུམ་ལ་སོགས་དྲིའི་རིལ་བུ། །བྱི་རུ་ཙནྡན་དམར་པོའི་འབྲུ། །རྟག་ཏུ་རིལ་བུ་ལྔ་བཅུ་པའོ། །ཞེས་དང་། གདན་བཞི་ལས། གུར་གུམ་ལ་སོགས་དྲི་ཞིམ་པའི། །དྲི་རྣམས་ཀུན་གྱི་ཁྱད་པར་ལས། །རིལ་བུ་བྱས་ཏེ་དམར་པོ་བཙོས། །དབང་དུ་སྡུད་པར་རབ་ཏུ་གྲགས། །ཞེས་གསུངས་སོ། །
        བཞི་པ་དྲག་པོའི་ལས་བསྒྲུབ་པའི་ཕྲེང་བ་ནི། སཾ་བྷུ་ཊ་ལས། རུ་དྲཱ་ཀྵ་དང་ལུང་ཏང་དང་། །དེ་བཞིན་སྐྱེས་པའི་རུས་པ་ཉིད། །དྲག་པོའི་ལས་ལ་སྦྱར་བར་བྱ། །མངོན་སྤྱོད་ལ་ནི་ཡོངས་སུ་གྲགས། །ཞེས་དང་། མགོན་པོ་དངོས་གྲུབ་འབྱུང་བའི་རྒྱུད་ལས། རུ་དྲཱ་ཀྵ་ནི་མངོན་སྤྱོད་ལ། །ཞེས་དང་། གདན་བཞི་ལས། རུ་དྲཱ་ཀྵ་དང་ལུང་ཏང་དང་། །མི་ཡི་རུས་པ་དེ་བཞིན་ཏེ། །དྲག་པོའི་ལས་ལ་སྦྱར་བར་བྱ། །མངོན་སྤྱོད་དུ་ནི་རབ་ཏུ་གྲགས། །ཞེས་དང་། བདེ་མཆོག་སྡོམ་འབྱུང་ལས། རུ་དྲཱ་ཀྵ་དང་ལུང་ཏང་འབྲས། །དེ་བཞིན་མི་རུས་རྔ་མོ་དང་། །བོང་བུ་མ་ཧེའི་རུས་པ་ནི། །དྲག་སྤྱོད་བཀུགས་དང་གནོན་པ་དང་། །དབྱེ་བས་དགྲ་ནི་ཚར་གཅད་དང་། །གསད་དང་བསྐྲད་ལ་སྦྱར་བྱ་སྟེ། །ཞེས་གསུངས་སོ། །
        ཚད་ནི། གྲངས་ཀྱི་ཚད་དང་། ཆེ་ཆུང་གི་ཚད་གཉིས་ལས། དང་པོ་ནི། སྔགས་སྒྲུབ་པས་ཞི་བའི་ཕྲེང་གྲངས་ལྔ་བཅུ་དང་། དབང་གི་ལས་ཀྱི་ཕྲེང་གྲངས་ལ་ཉེར་ལྔ། ཞི་བའི་ལས་ཀྱི་ཕྲེང་གྲངས་ལ་བརྒྱ་ཐམ་པ། རྒྱས་པའི་ལས་ཀྱི་ཕྲེང་གྲངས་ལ་བརྒྱ་རྩ་བརྒྱད། དྲག་པོ་མངོན་སྤྱོད་ཀྱི་ཕྲེང་བ་ལ་དྲུག་ཅུ་ཐམ་པ་དགོས་པ་ཡིན་ཏེ། སཾ་བྷུ་ཊ་ལས། སྔགས་ཀྱི་བསྒྲུབ་པ་ལྔ་བཅུ་སྟེ། །དབང་ལ་དེ་ཡི་ཕྱེད་ཉིད་དོ། །བརྒྱ་ཕྲག་གཅིག་ནི་ཞི་བ་ལ། །དེ་བཞིན་རྒྱས་ལ་ལྷག་པ་བརྒྱད། །མངོན་སྤྱོད་ལ་ནི་དྲུག་ཅུ་ཉིད། །ཁྱད་པར་དུ་ནི་ལས་ལ་སྦྱར། །ཇི་ལྟར་ལས་ཀྱི་བྱེ་བྲག་གིས། །ཕྲེང་བ་ལ་སོགས་བྱ་བའོ། །ཞེས་གསུངས་སོ། །
        ཆེ་ཚུང་གི་ཚད་ནི། ཞི་བ་ལ་རང་གི་འགྲམ་སོ་ཙམ་དང་། རྒྱས་པ་ལ་མཐེའུ་ཆུང་གི་ཚད་ཙམ། དབང་ལ་ནོར་བུའི་ཏོག་ཙམ། དྲག་པོ་ལ་རྐང་པའི་མཐེ་ཆེན་གྱི་ཚད་ཙམ་དགོས་པར་བཤད་དོ། །
        བགྲང་ཚུལ་ནི། རབ་གནས་བྱས་པའི་ཕྲེང་བ་དེ་ཞི་བའི་སྔགས་ལ་མཛུབ་མོའི་སྟེང་དུ་བཞག་སྟེ་སྙིང་གའི་ཐད་དུ་གཟུང་ནས་བགྲང་བར་དང་། རྒྱས་པའི་སྔགས་ལ་གུང་མོའི་སྟེང་དུ་བཞག་སྟེ་ལྟེ་བའི་ཐད་དུ་གཟུང་ནས་བགྲང་བར་དང་། དབང་ལ་སྲིན་ལག་གི་སྟེང་དུ་བཞག་སྟེ་གསང་བའི་ཐད་དུ་གཟུང་ནས་བགྲང་བར་དང་། དྲག་པོའི་ལས་སྔགས་ལ་མཐེའུ་ཆུང་གི་སྟེང་དུ་བཞག་ནས་རྐང་པ་སྐྱིལ་ཀྲུང་བསྣོལ་བའི་པུས་མོའི་ཐད་དུ་གཟུང་ནས་འདྲེན་པ་དང་། སྣ་ཚོགས་ལས་ལ་གང་བདེར་བྱ་བ་དང་། མཐེ་བོང་རྡོ་རྗེ་ལྕགས་ཀྱུས་ལྷ་རྣམས་དབང་དུ་འགུགས་པའི་བསམ་པས་ཕྲེང་རྡོག་རེ་རེ་ནང་འདྲེན་གྱིས་ལྕགས་ཀྱུས་འགུགས་པའི་ཚུལ་དུ་བགྲང་དགོས་ཏེ། བདེ་མཆོག་སྡོམ་འབྱུང་ལས། ཞི་བ་ལ་ནི་མཛུབ་ལ་བཞག །རྒྱས་པ་རྟག་ཏུ་གུང་མོ་ཡིན། །མིང་མེད་ཀྱིས་ནི་དབང་ཞེས་གསུང་། །ཐ་མ་ཡིས་ནི་མངོན་སྤྱོད་ཡིན། །མཐེ་བོང་ལྷ་ཡི་རང་བཞིན་གྱིས། །ལས་ཀུན་ལས་ནི་སྦྱར་བར་བྱ། །ཞེས་དང་། སཾ་བྷུ་ཊ་ལས། ཞི་ལ་ཁྲོ་བོར་འགོད་པར་བྱ། །རྒྱས་ལ་དབུ་མ་དེ་ཉིད་ལ། །སྲིན་ལག་ལ་ནི་དབང་དུ་གསུངས། །ཀུན་གྱི་ཐ་མ་མངོན་སྤྱོད་ལ། །མཐེ་བོང་རྡོ་རྗེ་ལྕགས་ཀྱུ་ལྷ། །དངོས་པོ་ལས་ནི་དགུག་པར་བྱ། །ཞེས་དང་། རྡོ་རྗེ་གདན་བཞི་ལས། ཞི་བ་ལ་ནི་ཁྲོ་བོས་བགྲང་། །རྒྱས་པ་ལ་ནི་གུང་མོ་སྟེ། །སྲིན་ལག་ལ་ནི་དབང་དུ་བལྟ། །ཐ་མས་མངོན་པར་སྤྱོད་པ་སྟེ། །མཐེ་བོང་རྡོ་རྗེ་ལྕགས་ཀྱུ་ནི། །ལྷ་ཉིད་དགུག་པའི་བསམ་པ་ཡིན། །མཉམ་པ་བཞག་སྟེ་བཟླས་སྒོམ་ན། །འགྲུབ་འགྱུར་འདི་ལ་ཐེ་ཚོམ་མེད། །ཅེས་གསུངས་སོ། །
        དགོས་ཆེད་ནི། ཡི་དམ་ལྷ་ཡི་ཕྱག་རྟགས་མི་བརྗེད་པ་དང་། གཉེན་པོའི་ཡེ་ཤེས་སེམས་ལ་འཕྲེང་བ་དང་། ནུས་མཐུ་སྐྱེ་བ་དང་། ཤེས་རབ་ཡུམ་གྱི་རྟེན་དུ་འགྱུར་བ་དང་། བསྐྱེད་རྫོགས་སྐྱེ་བའི་ཐབས་ཀྱི་རྟེན་འབྲེལ་དུ་འགྱུར་བ་དང་། སྔགས་ཀྱི་དམ་ཚིག་གི་རྫས་སུ་འགྱུར་བ་དང་། ཞི་སོགས་ཀྱི་ལས་རྣམས་འགྲུབ་པ་དང་། སྔགས་ཀྱི་གྲང་ཚད་ཟིན་པ་སོགས་ཕན་ཡོན་མང་ངོ་། །         ཕུར་པ་ལ། རྒྱུ། དབྱེ་བ། ཚད། དབྱིབས། ནུས་པ་དང་ལྔ་ལས། དང་པོ་ནི། རྒྱུ་གསེར། དངུལ། ཟངས། ལྕགས། ར་གན། བྱུ་རུ། ཁྲོ། ཙན་དན་དཀར་དམར། སེང་ལྡེང་། མི་རུས། ཚེར་ནག སྐྱེར་བ། སྤྲེའུའི་རུས་པ་སོགས་ཀྱིས་བཟོ་རུང་བར་བཤད་དེ། དེ་ཡང་སྔ་འགྱུར་རྡོ་རྗེ་གཞོན་ནུ་ཐུགས་རྗེ་ཁྲོས་པའི་རྩ་རྒྱུད་ལས། འདུས་བྱས་རྫས་ཀྱི་ཕུར་པ་ནི། །དངུལ་ལམ་འོ་མ་ཅན་གྱི་ཤིང་། །ཟངས་སམ་ཙན་དན་དམར་པོའི་ཤིང་། །ལྕགས་སམ་རྐང་དང་ཚེར་མའི་ཤིང་། །གསེར་རམ་འོ་སེ་སེར་པོའི་ཤིང་། །ཞེས་གསུངས་སོ། །དེ་ལས་དངུལ་དང་། ཤེལ། ཙན་དན་དཀར་པོ་སོགས་ཞི་བའི་ལས་སྒྲུབ་པའི་ཕུར་པ་དང་། གསེར། ར་གན་སོགས་སེར་པོའི་རིགས་རྒྱས་པའི་ལས་སྒྲུབ་པའི་ཕུར་པ་དང་། བྱུ་རུ། ཟངས། ཙན་དན་དམར་པོ། མཛོ་ཤིང་སོགས་དམར་པོའི་རིགས་དབང་གི་ལས་སྒྲུབ་པའི་ཕུར་པ་དང་། ལྕགས་དང་། ཁྲོ། ཚེར་མ། ཡུགས་ས་མོའི་འཕང་ཤིང་སོགས་ནག་ལ་རྩུབ་པའི་རིགས་རྣམས་དྲག་པོའི་ལས་སྒྲུབ་པའི་ཕུར་པ་ལ་ཆེད་དུ་བསྔགས་ཏེ། ཕུར་པ་གསང་རྒྱུད་ལས། དངུལ་ལམ་དཀར་པོ་ཤིང་རྣམས་ནི། །ཞི་བའི་ཕུར་པའི་རྒྱུ་རུ་བཤད། །གསེར་རམ་སེར་པོའི་ཤིང་རྣམས་ནི། །རྒྱས་པའི་ཕུར་པའི་རྒྱུ་རུ་བཤད། །ཟངས་སམ་དམར་པོའི་ཤིང་རྣམས་ནི། །དབང་གི་ཕུར་པའི་རྒྱུ་རུ་བཤད། །ལྕགས་སམ་ནག་པོའི་ཤིང་རྣམས་ནི། །དྲག་པོའི་ཕུར་པའི་རྒྱུ་རུ་བཤད། །ཅེས་གསུངས་སོ། །
        དབྱེ་བ་ནི། ཐུགས་རྗེ་ཆེན་པོ་ཁྲོས་པ་རྩ་རྒྱུད་ལས། ཆོས་ཉིད་དོན་གྱི་ཕུར་པ་དང་། །རིག་པ་ཡེ་ཤེས་ཕུར་པ་དང་། །འདུས་བྱས་རྫས་ཀྱི་ཕུར་པ་དང་། །རྟེན་པ་ལུས་ཀྱི་ཕུར་པའོ། །ཞེས་དང་། ཕུར་པ་གསང་བ་རྩ་རྒྱུད་ལས། དབྱེ་ན་རྣམ་པ་བཞི་ཡིན་ཏེ། །རང་རིག་ཡེ་ཤེས་ཕུར་པ་ཡིས། །ཡུལ་ཆོས་དབྱིངས་ལ་གདབ་པར་བྱ། །ཐུགས་རྗེ་ཆེན་པོའི་ཕུར་པ་དེ། །ཁམས་གསུམ་སེམས་ཅན་གདབ་པ་དང་། །གསང་བ་བྱང་སེམས་ཕུར་པ་ཡིས། །ཡུམ་གྱི་མཁའ་ལ་གདབ་པ་དང་། །མཚན་རྫོགས་རྫས་ཀྱི་ཕུར་པ་ཡིས། །ཉམས་པ་བདུན་ལ་གདབ་པའོ། །ཞེས་གསུངས་སོ། །
        ཚད་ནི། མགོ་བོའི་རྒྱ་མདུད་དམ་ཞལ་ལ་སོར་གཅིག སྐེད་པའི་རྒྱ་མདུད་ལ་ཡང་སོར་གཅིག ལྕམ་གཞོག་ལ་སོར་གསུམ་དང་དབལ་ལ་སོར་གསུམ་སྟེ་སོར་བརྒྱད་དང་། གོང་འོག་གི་རྒྱ་མདུད་ཟུང་ལ་སོར་རེ་རེ་དང་། ལྕམ་གཞོག་ལ་སོར་བཞི། དབལ་ལ་སོར་དྲུག་སྟེ་སོར་བཅུ་གཉིས་སོགས་ཅི་རིགས་ཤིག་མཆིས་ཏེ། ཕུར་པ་བཅུ་གཉིས་ཀྱི་རྒྱུད་ལས། ལྕགས་ནི་སྣ་ལྔ་དག་ལས་ནི། །སྟེང་དུ་སོར་གཅིག་རྒྱ་མདུད་བྱ། །བར་དུ་རིན་ཆེན་ཟུར་བརྒྱད་དེ། །སྐེད་པ་སོར་གཅིག་རྒྱ་མདུད་བྱ། །ཞེས་དང་། ཕུར་པ་གསང་རྒྱུད་ལས། བཅུ་གཉིས་ལྡན་ན་དབུས་དེ་གཙོ། །སོར་རེ་ཡིན་ཞིང་སྐུ་སྟོད་ལ། །སོར་གསུམ་ལྡན་པ་རྫོགས་པར་བྱས། །གཞན་དྲུག་དབལ་དུ་ཤེས་པར་བྱ། །ཞེས་དང་། ཡང་དེ་ཉིད་ལས། སོར་ནི་བཅུ་དྲུག་ལྡན་པ་ལ། །སོར་གཉིས་དབུ་ཡིན་སྐུ་སྟོད་བཞི། །ལྟེ་བར་གཉིས་ལ་མཚན་མ་གཉིས། །དྲུག་ནི་དབལ་དུ་རྫོགས་པ་ཡིན། །ཞེས་གསུངས་སོ། །
        དབྱིབས་ནི། སྟོད་ཞལ་གསུམ་པའམ་ཞལ་གཅིག་པ་ཏོག་ཆུང་ངུ་ཅན། ཕྱག་གཉིས་ཐུགས་ཀར་ཕུར་བུ་བསྒྲིལ་བ། དེའི་འོག་ལྕམ་གཞོག་ཟུར་བརྒྱད་པ། དེའི་འོག་རྒྱ་མདུད་དང་དེའི་འོག་ཏུ་ཆུ་སྲིན་གྱི་མགོ་བོ་ཡོད་པ། ཆུ་སྲིན་གྱི་ཁ་ནས་ཐོན་པའི་དབལ་ཟུར་གསུམ་སོགས་རྩ་བ་སྦོམ་ཞིང་རྩེ་མོ་རྣོ་བ། དབལ་གྱི་ངོས་ལ་སྦྲུལ་ཆུན་འཕྱང་བ་ཞིག་དང་། ཞལ་ཕྱག་མེད་པར་མགོ་བོར་རྒྱ་མདུད་དང་དེའི་འོག་ལྕམ་གཞོག་ཟུར་བརྒྱད་པ། དེའི་འོག་རྒྱ་མདུད་དང་། དེའི་འོག་ཆུ་སྲིན་གྱི་ཞལ་དང་དེའི་ཁ་ནས་དབལ་ཐོན་པ་སོགས་མི་འདྲ་བ་ཁ་ཤས་ཡོད་པར་བཤད་དོ། །དེ་ཡང་ཕུར་པ་མྱང་འདས་ཀྱི་རྒྱུད་ལས། མགོ་དང་རྩ་བ་མ་ནོར་བ། །རྒྱ་མདུད་གཉིས་དང་ཟུར་བརྒྱད་དང་། །ཟུར་གསུམ་པ་རུ་རབ་ཏུ་ཞོག །ཅེས་དང་། སྐེད་པ་རྒྱ་མདུད་དྲག་པོ་ལ། །རྩེ་མོ་ཆུ་སྲིན་ཁ་ནས་དབྱུང་། །ཞེས་སོགས་གསུངས་སོ། །         དགང་གཟར་དང་བླུགས་གཟར་བཤད་པ་ལ། དགང་བླུགས་ཀྱི་རྒྱུ་དང་། དགང་གཟར་གྱི་དབྱིབས་ཚད་དང་། བླུགས་གཟར་གྱི་དབྱིབས་ཚད། དེ་གཉིས་འཛིན་ཚུལ། མཚོན་དོན་དང་བཞི་ལས། དང་པོ་རྒྱུ་ནི། རྡོ་རྗེ་མཁའ་འགྲོ་ལས། གསེར་རམ་དངུལ་ལམ་ཟངས་མ་འམ། །མཆོད་སྦྱིན་གྱི་ནི་ཤིང་ཡང་རུང་། །ཞེས་གསུངས་སོ། །
        དགང་གཟར་གྱི་ཚད་ནི། རྡོ་རྗེ་མཁའ་འགྲོ་ལས། དགང་གཟར་རྒྱུ་དང་དབྱུག་པ་སོགས། །ཚད་དང་དབྱིབས་ལ་སོགས་པར་བཤད། །སྟེང་དུ་སོར་བཞི་དང་ལྡན་པ། །དཀྱུས་ནི་གྲུ་བཞིར་བྱ་བ་སྟེ། །ཟབས་སུ་སོར་གཉིས་བརྐོ་བར་བྱ། །དཀྱིལ་དུ་ཡེ་ཤེས་རྡོ་རྗེས་བརྒྱན། །དེ་ཡི་སྟེང་དུ་མཆུ་སོར་བཞི། །པདྨའི་འདབ་མ་ལྟ་བུར་བྱ། །དེ་དབུས་བཅུད་ནི་འཛག་པ་ཡི། །བུ་ག་མཐེའུ་ཆུང་ཚད་དུ་བྱ། །དེ་ནས་འོག་ཏུ་དབྱུག་པ་སྟེ། །རྡོ་རྗེ་རིན་ཆེན་སོར་དྲུག་བརྒྱན། །ཞེས་དང་། མཁའ་འགྲོ་རྒྱ་མཚོ་ལས། དགང་གཟར་ཁྲུ་གང་དུ་འགྱུར་ཏེ། །རྒྱར་ནི་སོར་མོ་བཞི་པ་ལ། །དེར་ནི་སོར་མོ་གཉིས་བརྐོ་བྱ། །མཆུ་ཡི་སྦུག་མོར་སོར་མོ་ཕྱེད། །དབུས་སུ་རྡོ་རྗེ་པདྨ་དང་། །མཆུ་སྦུག་རྡོ་རྗེ་ལྡན་པ་ཅན། །རྩ་བར་རྡོ་རྗེ་སོར་དྲུག་པ། །ཞེས་སོགས་གསུངས་སོ། །
        འཛིན་ཚུལ་ནི། རྡོ་རྗེ་མཁའ་འགྲོ་ལས། ཞི་བ་བྱང་ཆུབ་མཆོག་གིས་བཟུང་། །ནོར་བུའི་ཁུ་ཚུར་རྒྱས་པ་ལ། །དབང་དང་དགུག་པ་དག་ལ་ནི། །དེ་བཞིན་པདྨའི་ཁུ་ཚུར་གཟུང་། །དྲག་པོའི་ལས་ལ་འབད་པ་ཡིས། །དེ་བཞིན་ཁྲོ་བོའི་ཁུ་ཚུར་བྱ། །ཞེས་དང་། བདེ་མཆོག་སྡོམ་འབྱུང་ལས། ལག་གཉིས་པུས་མོའི་ནང་བཞག་སྟེ། །དགང་གཟར་དང་ནི་བླུག་གཟར་བཟུང་། །ཞེས་དང་། རྡོ་རྗེ་སྙིང་རྒྱན་ལས། ལག་གཉིས་པུས་མོའི་བར་བཞག་སྟེ། །དགང་གཟར་མར་གྱིས་བཀང་ནས་ནི། །བླུག་གཟར་བཀང་སྟེ་དེ་བཞིན་བསྲེག །ཅེས་གསུངས་སོ། །
        མཚོ་དོན་ནི། རྡོ་རྗེ་མཁའ་འགྲོ་ལས། དགང་གཟར་ཆོས་ནི་སྟེར་བའི་མ། །བླུགས་གཟར་རོ་ལྡན་ཐབས་ཡིན་ཏེ། །སེམས་ཅན་ཀུན་ལ་ཕན་བྱེད་པ། །ཞེས་གསུངས་སོ། །