༄༅། །ལེའུ་ལྔ་པ། ཆོས་ལུགས་ཀྱི་རྒྱུ་ནོར།
དོན་ཚན་སུམ་ཅུ་པ། ཆོས་ལུགས་ཚོགས་པ་དང་ཆོས་ལུགས་བྱེད་སྒོ་སྤེལ་ཡུལ་གྱི་ཁྲིམས་མཐུན་ངང་བེད་སྤྱོད་པའི་ས་ཆ་དང་ཁྲིམས་མཐུན་གྱི་དབང་བའམ་ཡང་ན་སྤྱོད་པའི་ཁང་པ་དང༌། འཛུགས་སྐྲུན་དངོས་པོ། སྒྲིག་བཀོད་བཅས་དང་དེ་བཞིན་ཁྲིམས་མཐུན་རྒྱུ་ནོར་དང་ཡོང་སྒོ་གཞན་དག་བཅས་ལ་བཅའ་ཁྲིམས་ཀྱི་སྲུང་སྐྱོབ་ཐོབ་རྒྱུ་ཡིན།
རྩ་འཛུགས་སམ་ཡང་ན་མི་སྒེར་སུ་འདྲ་ཞིག་ཡིན་རུང་ཆོས་ལུགས་ཀྱི་ཚོགས་པ་དང་ཆོས་ལུགས་ཀྱི་བྱེད་སྒོ་སྤེལ་ཡུལ་གྱི་ཁྲིམས་མཐུན་རྒྱུ་ནོར་བཙན་བཟུང་དང༌། ཧམ་འཕྲོག སྒེར་བགོས། གཏོར་སྐྱོན་བཅས་སམ་ཡང་ན་ཁྲིམས་འགལ་གྱིས་སྒོ་ཐེལ་རྒྱག་པ་དང༌། ཉར་འཇོག་བྱེད་པ། བཀག་སྡོམ་བྱེད་པ། གཞུང་བཞེས་གཏོང་བ། ཐག་གཅོད་བྱེད་པ་བཅས་བྱ་མི་ཆོག་པ་དང༌། ཆོས་ལུགས་ཀྱི་ཚོགས་པ་དང་ཆོས་ལུགས་བྱེད་སྒོ་སྤེལ་ཡུལ་གྱིས་བཟུང་བ་དང་སྤྱོད་པའི་རིག་དངོས་ལ་གཏོར་སྐྱོན་གཏོང་མི་ཆོག
དོན་ཚན་སོ་གཅིག་པ། ཆོས་ལུགས་ཀྱི་ཚོགས་པ་དང་ཆོས་ལུགས་བྱེད་སྒོ་སྤེལ་ཡུལ་ལ་དབང་བའི་ཁང་པ་དང་བེད་སྤྱོད་བྱེད་པའི་ས་ཆ་དེ་ཁྲིམས་ལུགས་ལྟར་རྫོང་རིམ་པ་ཡན་གྱི་ས་གནས་མི་དམངས་སྲིད་གཞུང་གི་ས་ཁང་བདག་ཁོངས་དང་ས་ཆ་དོ་དམ་སྡེ་ཚན་དུ་ཐོ་འགོད་བྱེད་པར་བསྐྱོད་ནས་བདག་དབང་དང་སྤྱོད་དབང་གི་ལག་འཁྱེར་ལེན་དགོས་པ་དང༌། བདག་དབང་བསྒྱུར་སྐབས་དུས་ཐོག་ཏུ་འགྲོ་ལུགས་གཉེར་དགོས།
ས་ཆ་དོ་དམ་སྡེ་ཚན་གྱིས་ཆོས་ལུགས་ཀྱི་ཚོགས་པའམ་ཆོས་ལུགས་བྱེད་སྒོ་སྤེལ་ཡུལ་གྱི་ས་དབང་གཏན་འཁེལ་དང་སྒྱུར་སྐབས་རིམ་པ་འདིའི་མི་དམངས་སྲིད་གཞུང་གི་ཆོས་ལུགས་ལས་དོན་སྡེ་ཚན་གྱི་བསམ་འཆར་བསྡུ་ལེན་བྱེད་དགོས།
དོན་ཚན་སོ་གཉིས་པ། ཆོས་ལུགས་བྱེད་སྒོ་སྤེལ་ཡུལ་གྱི་ཆོས་ལུགས་བྱེད་སྒོ་སྤེལ་བའི་ཐད་སྤྱོད་པའི་ཁང་པ་དང་འཛུགས་སྐྲུན་དངོས་པོ་དང་དེའི་ཞོར་གཏོགས་ཀྱི་ཆོས་ལུགས་ལས་རིགས་མི་སྣའི་འཚོ་བའི་ཐད་སྤྱོད་པའི་ཁང་པ་ནང་བཤུགས་གཏོང་བ་དང་གཏའ་མར་འཇོག་པ་ཡང་ན་དངོས་པོར་བརྩིས་ཏེ་མ་འཇོག་བཅས་བྱེད་མི་ཆོག
དོན་ཚན་སོ་གསུམ་པ། གྲོང་ཁྱེར་འཆར་འགོད་དམ་ཡང་ན་གཙོ་གནད་ལས་གྲྭ་འཛུགས་སྐྲུན་གྱིས་རྐྱེན་པས་ཆོས་ལུགས་ཀྱི་ཚོགས་པའམ་ཡང་ན་ཆོས་ལུགས་བྱེད་སྒོ་སྤེལ་ཡུལ་གྱི་ཁང་པ་དང་འཛུགས་སྐྲུན་དངོས་པོ་སྤོ་བཤིག་བྱེད་དགོས་སྐབས་སྤོ་བཤིག་བྱེད་མཁན་གྱིས་ཆོས་ལུགས་ཚོགས་པའམ་ཡང་ན་ཆོས་ལུགས་བྱེད་སྒོ་སྤེལ་ཡུལ་འདི་དང་གྲོས་མོལ་བྱེད་པ་དང་འབྲེལ་ཡོད་ཆོས་ལུགས་ལས་དོན་སྡེ་ཚན་གྱི་བསམ་འཆར་བསྡུ་ལེན་ཡང་བྱེད་དགོས། ཕྱོགས་ཁག་གིས་གྲོས་མོལ་བྱས་པ་བརྒྱུད་སྤོ་རྒྱུའི་མོས་མཐུན་བྱུང་བར་སྤོ་བཤིག་བྱེད་འཇུག་མཁན་གྱིས་སྤོ་བཤིག་བྱེད་དགོས་པའི་ཁང་པ་དང་འཛུགས་སྐྲུན་དངོས་པོ་བསྐྱར་དུ་རྒྱག་པའམ་ཡང་ན་རྒྱལ་ཁབ་ཀྱི་འབྲེལ་ཡོད་གཏན་འབེབས་གཞིར་བཟུང་དང་སྤོ་བཤིག་བྱེད་དགོས་པའི་ཁང་དང་འཛུགས་སྐྲུན་དངོས་པོའི་ཁྲོམ་རའི་དཔྱད་དཔོག་རིན་གོང་གཞིར་བཟུང་ཁ་གསབ་སྤྲོད་དགོས།
དོན་ཚན་སོ་བཞི་པ། ཆོས་ལུགས་ཀྱི་ཚོགས་པ་དང་ཆོས་ལུགས་བྱེད་སྒོ་སྤེལ་ཡུལ་གྱིས་ཁྲིམས་ལུགས་ལྟར་སྤྱི་ཚོགས་ཀྱི་སྤྱི་ཕན་བྱ་གཞག་གཉེར་བ་དང་དེ་ལས་བྱུང་བའི་ཕན་འབྲས་དང་དེ་བཞིན་ཁྲིམས་མཐུན་ཡོང་འབབ་གཞན་དག་ནོར་དོན་དང་རྩིས་པའི་དོ་དམ་ནང་བཅུག་སྟེ་ཆོས་ལུགས་ཚོགས་པའམ་ཡང་ན་ཆོས་ལུགས་བྱེད་སྒོ་སྤེལ་ཡུལ་འདིའི་དམིགས་ཡུལ་དང་འཚམས་པའི་བྱེད་སྒོ་དང་དེ་བཞིན་སྤྱི་ཚོགས་ཀྱི་སྤྱི་ཕན་བྱ་གཞག་ཐད་སྤྱོད་དགོས།
དོན་ཚན་སོ་ལྔ་པ། ཆོས་ལུགས་ཀྱི་ཚོགས་པ་དང་ཆོས་ལུགས་ཀྱི་བྱེད་སྒོ་སྤེལ་ཡུལ་གྱིས་རྒྱལ་ཁབ་ཀྱི་འབྲེལ་ཡོད་གཏན་འབེབས་གཞིར་བཟུང་ས་མཚམས་ཕྱི་ནང་གི་རྩ་འཛུགས་དང་མི་སྒེར་གྱི་ཞལ་འདེབས་དང་ལེན་བྱས་ནས་ཆོས་ལུགས་ཀྱི་ཚོགས་པ་དང་ཆོས་ལུགས་ཀྱི་བྱེད་སྒོ་སྤེལ་ཡུལ་འདིའི་དམིགས་ཡུལ་དང་འཚམས་པའི་བྱེད་སྒོ་སྤེལ་རྒྱུར་སྤྱོད་ཆོག
དོན་ཚན་སོ་དྲུག་པ། ཆོས་ལུགས་ཀྱི་ཚོགས་པ་དང་ཆོས་ལུགས་ཀྱི་བྱེད་སྒོ་སྤེལ་ཡུལ་གྱིས་རྒྱལ་ཁབ་ཀྱི་ནོར་དོན་དང༌། རྩིས་པ། ཁྲལ་བསྡུ་བཅས་དོ་དམ་ལམ་ལུགས་ལག་ལེན་བསྟར་དགོས་པ་དང་རྒྱལ་ཁབ་ཀྱི་འབྲེལ་ཡོད་ཁྲལ་བསྡུའི་གཏན་འབེབས་ལྟར་ཁྲལ་བསྡུ་ཆག་ཡང་དང་རྩ་ཆག་གི་གཏན་འབེབས་ལོང་སུ་སྤྱོད་ཆོག
ཆོས་ལུགས་ཀྱི་ཚོགས་པ་དང་ཆོས་ལུགས་ཀྱི་བྱེད་སྒོ་སྤེལ་ཡུལ་གྱིས་གནས་སའི་རྫོང་རིམ་པ་ཡན་གྱི་མི་དམངས་སྲིད་གཞུང་གི་ཆོས་ལུགས་ལས་དོན་སྡེ་ཚན་ལ་ནོར་དོན་གཏོང་ཡོང་གི་གནས་ཚུལ་དང་ཞལ་འདེབས་དང་ལེན་དང་བེད་སྤྱོད་བྱ་ཚུལ་སྙན་སེང་ཞུ་དགོས་པ་དང་འབྲེལ་བྱེད་ཐབས་འོས་འཚམས་ཀྱི་ཐོག་ནས་དད་ལྡན་སྤྱི་དམངས་ལ་ཡོངས་བསྒྲགས་ཀྱང་བྱེད་དགོས།
དོན་ཚན་སོ་བདུན་པ། ཆོས་ལུགས་ཀྱི་ཚོགས་པ་དང་ཆོས་ལུགས་ཀྱི་བྱེད་སྒོ་སྤེལ་ཡུལ་གྱི་ཐོ་སུབ་པའམ་ཡང་ན་སྤེལ་མཚམས་བཞག་ཚེ་ནོར་དོན་གཙང་རྩིས་རྒྱག་པ་དང་གཙང་རྩིས་བརྒྱབ་རྗེས་ཀྱི་རྒྱུ་ནོར་ལྷག་འཕྲོ་རྣམས་ཆོས་ལུགས་ཚོགས་པའམ་ཡང་ན་ཆོས་ལུགས་བྱེད་སྒོ་སྤེལ་ཡུལ་འདིའི་དམིགས་ཡུལ་དང་འཚམས་པའི་བྱ་གཞག་ལ་སྤྱོད་དགོས།
