འགྱུར་རྩོམ། མི་རྟག་པ།

༡
མཛེས་སྡུག་རྣམ་བཀྲ་མེ་ཏོག་ཀྱང་། །
དུས་ཀྱིས་ཡོངས་སུ་བསྐམ་པར་འགྱུར། །
དེ་བཞིན་འབྲེལ་ཟབ་ཆོས་རྣམས་ཀྱང་། །
མི་རྟག་དབང་གིས་སོ་སོར་འབྲལ། །

སྲིད་པའི་སྤྲོ་དགའི་ཚད་ཅི་ཙམ། །
ཞེ་ན་མི་སྡུག་མཚན་མོ་རུ། །
གཡོ་བའི་གློག་ཞགས་གར་མཁན་མས། །
སྐད་ཅིག་འཁྲབ་པའི་ལྟད་མོ་བཞིན། །

༢
བརྩེ་ལྡན་གཡོ་མེད་བློ་འགེལ་བའི། །
གྲོགས་ནི་ཉིན་མོའི་སྐར་མ་བཞིན། །
སྙན་སྨྲ་བརྩེ་མེད་གཡོ་ཆས་ཅན། །
ས་ཡི་རྡུལ་དང་གྲངས་མཉམ་མོ། །

དགའ་བའི་རྟེན་དང་བྲལ་བའི་ཁར། །
ཅི་འདོད་ཐམས་ཅད་སྟོང་གྱུར་པ། །
ཇི་ཞིག་ལྟར་ཡང་འུ་བུ་ཅག །
གསོན་པའི་ཁ་དོག་འཚོལ་དགོས་སོ། །

༣
ནམ་མཁའ་དྲི་མ་མེད་པ་དང་། །
རྩི་ཤིང་མེ་ཏོག་ཁྲ་ལམ་མེར། །
མི་སྡུག་མུན་པ་མ་སླེབས་སྔོན། །
མིག་གི་མེ་ལོང་རབ་དྭངས་དུས། །

རྨི་ལམ་ཡིད་ཀྱི་ཞིང་མོ་ཆེར། །
སྲིད་པའི་ཕུན་ཚོགས་ཡོངས་སྤྱད་ལྟའི། །
མར་མེའི་རི་མོ་བྲིས་ཀྱང་རུང་། །
བདེན་དོན་རི་མོས་བསླུ་བ་མེད། །

无常
雪莱