འཇིག་རྟེན་གྱི་ཆེས་རིང་བའི་བར་ཐག

འཇིག་རྟེན་གྱི་ཆེས་རིང་བའི་བར་ཐག་ནི།
ཤི་གསོན་གྱི་བསྐལ་པ་མ་ཡིན་པར།
ང་ཁྱོད་ཀྱི་གམ་ན་ཡོད་ཀྱང་།
ངས་བཅངས་པའི་དུང་སེམས་ཁྱོད་ཀྱིས་རྟོགས་དཀའ་བ་དེ་རེད།

འཇིག་རྟེན་གྱི་ཆེས་རིང་བའི་བར་ཐག་ནི།
ང་ཁྱོད་ཀྱི་གམ་ན་ཡོད་ཀྱང་།
ངས་བཅངས་པའི་དུང་སེམས་ཁྱོད་ཀྱིས་རྟོགས་དཀའ་བ་དེ་མ་ཡིན་པར།
དགའ་བ་ཐལ་དྲགས་ཀྱང་དུངས་པ་ངག་ནས་བརྗོད་ཐབས་བྲལ་བ་དེ་རེད།

འཇིག་རྟེན་གྱི་ཆེས་རིང་བའི་བར་ཐག་ནི།
དུངས་པ་ངག་ནས་བརྗོད་ཐབས་བྲལ་བ་དེ་མ་ཡིན་པར།
དྲན་པ་རུས་རྐང་ལ་ཐིམ་ཡང་ཡིད་མཚོའི་གཏིང་རིམ་ལ་སྦ་དགོས་པ་དེ་རེད།

འཇིག་རྟེན་གྱི་ཆེས་རིང་བའི་བར་ཐག་ནི།
དྲན་པ་ངག་ནས་བརྗོད་ཐབས་བྲལ་བ་དེ་མ་ཡིན་པར།
སེམས་པ་འོ་ཆུ་བཞིན་འདྲེས་ཀྱང་འགྲོགས་པའི་བསྐལ་བ་ཕྲ་བ་དེ་རེད།

འཇིག་རྟེན་གྱི་ཆེས་རིང་བའི་བར་ཐག་ནི།
སེམས་པ་འོ་ཆུ་བཞིན་འདྲེས་ཀྱང་འགྲོགས་པའི་བསྐལ་བ་ཕྲ་བ་དེ་མ་ཡིན་པར།
བརྩེ་བ་རུས་རྐང་ལ་ཐིམ་ཡང་དུངས་སེམས་ཕྲན་བུ་མེད་པའི་སྤམ་རྫུ་སྟོན་པ་དེ་རེད།

འཇིག་རྟེན་གྱི་ཆེས་རིང་བའི་བར་ཐག་ནི།
ཤིང་དང་ཤིང་གི་བསྐལ་བ་མིན་པར།
རྩ་བ་གཅིག་ནས་མཆེད་པའི་ལོ་མ་དག་འཐོར་རླུང་ཁྲོད་ཕན་ཚུན་བརྟེན་མི་ཐུབ་པ་དེ་རེད།

འཇིག་རྟེན་གྱི་ཆེས་རིང་བའི་བར་ཐག་ནི།
རྩ་བ་གཅིག་ནས་མཆེད་པའི་ལོ་མ་དག་འཐོར་རླུང་ཁྲོད་ཕན་ཚུན་བརྟེན་མི་ཐུབ་པ་དེ་མ་ཡིན་པར།
གཅིག་གིས་གཅིག་ལ་ཅེར་བའི་སྐར་ཚོགས་དག་བསྣོལ་སའི་འཁོར་ལམ་མེད་པ་དེ་རེད།

འཇིག་རྟེན་གྱི་ཆེས་རིང་བའི་བར་ཐག་ནི།
སྐར་ཚོགས་དག་བསྣོལ་སའི་འཁོར་ལམ་མེད་པ་དེ་མ་ཡིན་པར།
བསྣོལ་བའི་དབང་དུ་བཏང་རུང་ལོང་མེད་པར་ཡལ་འགྲོ་བ་དེ་རེད།

འཇིག་རྟེན་གྱི་ཆེས་རིང་བའི་བར་ཐག་ནི།
ལོང་མེད་པར་ཡལ་འགྲོ་བ་དེ་མ་ཡིན་པར།
མ་འཕྲད་གོང་ནས་འཕྲད་པའི་བསྐལ་བས་དབེན་པ་དེ་རེད།

འཇིག་རྟེན་གྱི་ཆེས་རིང་བའི་བར་ཐག་ནི།
བྱ་དང་ཉ་ཡི་བར་ཐག་ཡིན་ཏེ།
གཅིག་ནི་མཐོ་བ་གནམ་དང་གཅིག་ནི་རྒྱ་མཚོའི་གཏིང་ན་གནས།

སྙིང་ཉེ་ལགས།
མིག་སྔར། ང་ཁྱེད་ཀྱི་གམ་ན་ཡོད་ཀྱང་།
ཉི་ཟླའི་སྣང་བའི་ཁྲོད་མཚོ་དང་ཉ་མོ་བཞིན་དུ་གཤིབས་ནས་བརྩེ་བའི་འོ་སྤྲི་མངར་མོ་མྱོང་ཐབས་བྲལ་ལོ། །