“མཚོ་སྔོན་པོ་དྲ་བ”རྟགས་མའི་བྱ་དགའ་ཨང་གཉིས་པ་ཐོབ་པའི་སྒྱུར་རྩོམ་བརྩམས་ཆོས།

---

བརྩམས་ཆོས་གཉིས་པ།
       ས་སྲོས་ནི་ལྐོག་གྱུར་ཞིག་སྟེ། མི་རྣམས་ཀྱི་ཚེ་སྲོག་གི་རྒྱུན་ཉིན་གཅིག་གིས་རིང་དུ་སྲིང་པ་ཡིན་ཚེ། ཉིན་དེའི་མཇུག་ཏུ་ཁོ་ཚོ་ལ་ས་སྲོས་ཤིག་དབང་ངེས། འོན་ཀྱང་། ལོ་ནས་ལོ་དང་ཟླ་ནས་ཟླ་བར། ཁོ་ཚོའི་མི་ཚེའི་ཁྲོད་ཀྱི་བགྲང་ལས་འདས་པའི་ཉིན་མོ་རེ་རེ་ལ་ས་སྲོས་རེ་ཡོད་ཀྱང་། ང་ལ་དྲི་བ་ཞིག་ཡོད་པ་ནི་མི་ག་ཚོད་ཀྱིས་ས་སྲོས་ལ་ཡིད་འཇོག་བྱས་མྱོང་ཨང་།
       ཞོགས་པར། རྨི་ལམ་གྱི་ལྷག་མ་དག་སྔས་འགྲམ་ནས་འཕུར་ནས་འགྲོ་དུས། ཁོ་ཚོ་མལ་ལས་ལངས་ཤིང་ཉིན་གཅིག་གི་ལམ་ག་ལ་ཆས་པར་བྱེད། ཁོ་ཚོ་སོང་ཀྱིན་སོང་ཀྱིན་ཉིན་གུང་དུ་སླེབས་པ་ན། རྐང་འོག་གི་ལམ་སྣེའི་གློ་བུར་བའི་དཀྱོགས་མཚམས་དེ་ནས་གོམ་སྟབས་གཅིག་གིས་ཉིན་གཅིག་གི་མཇུག་ལ་སླེབས་པའི་ཚོར་བ་སྟེར་བར་བྱེད། ཁོ་ཚོས་རྒྱང་རིང་དུ་འཐིབས་པའི་དཀར་ལམ་ལམ་གྱི་དུ་ཞག་དང་། ལྗོན་ཤིང་གི་རྩེ་མོར་བྱུགས་པའི་སེར་ལམ་ལམ་གྱི་འོད་ཟེར། ད་དུང་ནག་རོག་རོག་གི་ཁ་ཏྭའི་ཁྱུ་ཚོགས་རེ་རེ་དགོང་ཁའི་ཉི་འོད་ཀྱི་ཀློང་ནས་ཕྱིར་ལོག་ཡོང་བ་མཐོང་སྐབས། ཁོ་ཚོའི་ནང་སེམས་ཅི་ཞིག་གིས་ཡང་མོར་གནོན་གྱིན་པ་དང་འདྲ། དེ་དུས་ཁོ་ཚོས་མཚན་མོར་སླེབས་པ་རྟོགས་སོང་། ཁོ་ཚོས་ལྷིང་འཇགས་ལ་རེ་ཞིང་། རྨི་ལམ་གྱི་ཞིང་ཁམས་ལ་ལོག་པར་བྲེལ། མི་འགྱངས་པར་མག་མོག་གི་མཚན་སྨག་གིས་ཁོ་ཚོའི་མིག་གཉིས་དང་ནང་སེམས་བསྒྲིབས་པར་བྱས། ཁོ་ཚོས་གུ་དོག་པོའི་ཁང་མིག་གི་ནང་དུ་བྲེལ་བྲེལ་འཚུབ་འཚུབ་བྱེད་བཞིན་ས་སྲོས་སྒོའི་ཕྱི་རོལ་དུ་བཀག གལ་སྲིད་མི་ཞིག་གིས་ཁྱེད་ཀྱིས་ས་སྲོས་མཐོང་བྱུང་ངམ་ཞེས་དྲི་བ་བཏོན་ཚེ། ས་སྲོས་ནི་ཇི་འདྲའི་མཛེས་ཀྱང་ཁོ་ཚོ་ཧད་ནས་འདུག་ངེས།
       ཁོ་ཚོར་ཅི་ཁག་སྟེ། ཁོ་ཚོས་ཁང་ཆུང་ལས་མགོ་བོ་ཕྱིར་བཏོན་ནས་ས་སྲོས་འཚོལ་སྐབས། ས་སྲོས་སྔ་མོ་ནས་དཀར་ལམ་ལམ་གྱི་དུ་ཞག་དང་། ལྗོན་རྩེའི་སེར་ལམ་ལམ་གྱི་འོད་ཟེར། ད་དུང་ཁ་ཏྭའི་ཁྱུ་ཚོགས་ཀྱི་རྒྱབ་ཀྱི་ཉི་ཟེར་དང་འགྲོགས་ནས་རྒྱང་དུ་བཞུད་ཟིན་པས། སྨག་ནག་གི་མཚན་མོ་ལས་ཅི་ཡང་ལྷག་མེད། ས་སྲོས་ནི་དཔྱིད་ཀྱི་མཚན་མོའི་རྨི་ལམ་ཞིག་དང་འདྲ་བར། ག་དུས་སླེབས་པ་མི་ཤེས་པར་ཁོ་ཚོའི་སེམས་ངོར་འཁྱུག་ཙམ་བྱས་རྗེས། ཡང་ག་དུས་སོང་བ་མི་ཤེས་པར་བཞུད་འགྲོ།
       ས་སྲོས་བཞུད་ཚར། གང་ལ་བཞུད་པ་ཡིན་ནམ། མ་རེད། ངས་སྔོན་ལ་འདྲི་འོས་པ་ནི་ས་སྲོས་གང་ནས་ལོག་ཡོང་བ་དེ་རེད། དྲི་བ་འདི་ལ་ངས་ལན་སློག་མི་ཐུབ་ལ། ཡང་སུ་ཡིས་ལན་སློག་ཐུབ་བམ། ངས་ས་སྲོས་དུམ་བུ་གཅིག་བཟུང་ནས་དེ་ལ་གཏིང་འདྲི་བྱེད་ག་ལ་ཐུབ། ས་སྲོས་ཤར་ཕྱོགས་ནས་ཡོང་བ་ཡིན་ནམ། ཤར་ཕྱོགས་ནི་དགོང་ཉི་མའི་འཆར་ལམ་རེད། ནུབ་ཕྱོགས་ཡིན་ནམ། ནུབ་ཕྱོགས་སུ་མཚམས་སྤྲིན་དམར་ལམ་ལམ་བྱེད་པ་མ་ཡིན་ནམ། ལྷོ་ཕྱོགས་ཡིན་ནམ། ལྷོ་ཕྱོགས་སུ་འོད་སྣང་དང་ཚ་བས་ཁེངས་འདུག དེས་ན་བྱང་ཕྱོགས་ནས་ཡོང་བ་རེད་ཟེར་ན་ཆེས་འཚམ་ཤས་དེ་རེད་འདུག བདག་གིས་དྲན་འཆར་གྱི་སྒོ་མོ་ཡངས་པོར་ཕྱེས་ཚེ། གོ་ལའི་བྱང་སྣེའི་བྱང་འཁྱགས་རོམ་རྒྱ་མཚོ་དྲན་ཞིང་། ང་ཚོས་དྲན་པའི་ངོས་སུ་དཀར་ལམ་ལམ་གྱི་གནམ་ས་དང་། དཀར་ལམ་ལམ་གྱི་ཁ་བའི་ཡུལ་ལྗོངས། དཀར་ལམ་ལམ་གྱི་འཁྱགས་དར་གྱི་རི་བོ་སོགས་བྲིས་ཆོག ད་དུང་བྱང་ཕྱོགས་སུ་སོང་བ་ཡིན་ན། དཀར་ལམ་ལམ་གྱི་གནམ་མཐའ་རུ་སྐྱ་ཐིང་དགུ་ཐིང་གི་མག་མོག་ལས་གང་ཞིག་གནམ་དང་གང་ཞིག་ས། གང་ཞིག་འཁྱགས་རོམ་དང་གང་ཞིག་ཁ་བ་ཡིན་པ་གོ་འབྱེད་མི་ཐུབ་པས། མག་མོག་གི་ས་སྲོས་ནི་གནས་འདི་ནས་སྤྲུལ་སྒྱུར་བྱས་པ་ཅི་ལ་མིན།‘’
       ཡིན་ཡང་། སྤྲུལ་སྒྱུར་བྱས་རྗེས་གང་སར་མཆེད་པ་སྟེ། ཁོད་ཡངས་པའི་ཐང་ཆེན་དང་རྩྭ་ཐང་བརྒལ་དུས་གྲིབ་ཆེན་གྱིས་ས་ཆེན་གཡོགས་ཤིང་། རྫུབས་མཐུག་པའི་ནགས་ཚལ་བརྒྱུད་དུས་མུན་ནག་གི་ཡོལ་བ་འཐེན། ཆུ་ཕྲན་བརྒལ་དུས་སྲོད་ཀྱི་སྐྱ་མདངས་ལྷུང་ལྷུང་གི་ཆུ་སྒྲ་ལ་བསྐུར་བས་ཞི་འཇམ་གྱི་ཆུ་ངོས་ནས་གཉོམ་ཞན་གྱི་འོད་མདངས་འཚེར། རི་རྩེ་རེ་རེར་སྐར་ཚོགས་དང་ཟླ་བའི་འོད་སྣང་བསྩལ། གྲོང་སྡེ་ཆུང་ཆུང་ལ་སྐྱ་ཐིང་ཐིང་གི་སྲོད་ཀྱི་དུ་སྤྲིན་བསྩལ། ཐ་ན་རྩིག་ཟུར་རེ་རེ་དང་སྡོམ་རྒྱ་རེ་རེ་ལའང་སྲོད་གྲིབ་དུམ་བུ་རེ་བཞག་རྗེས། ལྷིང་འཇགས་ཀྱི་བྱེ་ཐང་བརྒལ་ནས་ང་ཚོའི་མངའ་ཁོངས་སུ་སླེབས་བྱུང་། གལ་སྲིད་ང་རང་བྱེ་ཐང་དུ་འགྲེང་ནས་ས་སྲོས་ལ་གདོང་ཕྱོགས་པ་ཡིན་ན། བདག་གིས་ས་སྲོས་རྒྱང་རིང་གི་མཁའ་མཐའ་ནས་མྱུར་མོར་ཆས་ཡོང་བ་མཐོང་ཐུབ་ལ། དེ་ནི་ཅི་ཞིག་དང་མཚུངས་ཟེར་ན། སྐྱ་ཐིང་ངེའི་སྨུག་སྤྲིན་ཞིག་གམ། ཡང་ན་ཕྱོགས་སུ་འཐོར་བའི་སྤྲིན་དཀར་གྱི་གྲིབ་གཟུགས་ཤིག་དང་མི་མཚུངས་སམ། ས་སྲོས་མྱུར་མོར་སླེབས་ཡོང་སྟེ་སྲོད་གྲིབ་ཅིག་ཤུལ་དུ་བསྐྱུར་རྗེས་ཡང་བསྐྱར་མྱུར་མོར་ཕེབས་སྟེ་ང་ཚོའི་མངའ་ཁོངས་སུ་ཐོན་ཞིང་། རྒྱང་རིང་དུ་འཐིབས་པའི་དཀར་ལམ་ལམ་གྱི་དུ་ཞག་དང་། ལྗོན་ཤིང་གི་རྩེ་མོར་བྱུགས་པའི་སེར་ལམ་ལམ་གྱི་འོད་ཟེར། ད་དུང་ཁ་ཏྭའི་ཁྱུ་ཚོགས་ཀྱི་རྒྱབ་ཀྱི་ཉི་ཟེར་དང་ལྷན་དུ། འཇམ་ལྷོད་ལྷོད་ཀྱིས་མི་རྣམས་ཀྱི་སེམས་ངོས་སུ་བབས་པ་ན། མི་རྣམས་ཀྱིས་ཡང་བསྐྱར་སྒོའི་ཕྱི་རོལ་དུ་བཀག
       འོན་ཀྱང་། སྒོའི་ཕྱི་རོལ་དུ་ས་སྲོས་ཀྱིས་མི་རྣམས་ཀྱིས་ཡིད་འཇོག་བྱེད་མིན་ལ་དོ་སྣང་མི་བྱེད་པར། ཁེར་རྐྱང་དང་ཁུ་སིམ་ངང་ཁོ་ཚོའི་ཆེད་དུ་ཆོ་འཕྲུལ་གྱིས་ཕྱུག་ཅིང་སྙན་ངག་དང་བྱིས་སྒྲུང་ལྟ་བུའི་འཇིག་རྟེན་ཞིག་བསྐྲུན་པར་བྱེད་ལ། དེ་ནི་ཕྱིར་མེ་ལོང་དུ་ཤར་བའི་གྲིབ་གཟུགས་ཤིག་དང་འདྲ་བར་རབ་རིབ་དང་མག་མོག་ཏུ་སྣང་ཞིང་། བྱ་དངོས་ཡོད་རྒུ་ལ་ཐལ་མདོག་གི་རྨི་ལམ་གྱི་ཁ་དོག་ཅིག་བྱུགས་ཡོང་། འོ་མའི་མདངས་དང་ལྡན་པའི་མཁའ་རླུང་ནི་འབྲི་འོ་བཞིན་དཀག་པ་ལྟར་སྣང་ལ། ཡང་སོབ་སོབ་དང་ལྗན་ལྗིན། རྫབ་རྫུབ་ཀྱིས་བཞུར་གྱིན་པ་དང་ཡང་མཚུངས། དེ་ཡིས་ལྷིང་འཇགས་ཁྱེར་ནས་ཐོན་བྱུང་། ཁྱེད་ཀྱིས་ཉོན་དང་། ཡོད་ཚད་འཇམ་ཅག་གེར་གནས་པ་ནི་ཁ་བ་ཆེན་པོ་འབབ་བཞིན་པའི་མཚན་གུང་ཞིག་དང་ཇི་འདྲའི་མཚུངས་ཨང་། འདི་ནི་སྐྱི་གཡའ་བའི་ལྷིང་འཇགས་ཁྱོན་ནས་མ་ཡིན་མོད། ད་ལྟ་ལས་ཅུང་ཟད་ཁུ་སིམ་དུ་གྱུར་ན་དུར་ས་ལྟ་བུའི་འཇམ་ཅག་གི་གནས་སུ་མི་འགྱུར་གྲང་སྙམ། དེ་བས་མང་མེད་ལ་ཉུང་ཡང་མེད་པའི་ལྷོད་བག་གི་མཛེས་ཉམས་དོད་པའི་ལྷིང་འཇགས་འདི་སོབ་སོབ་དང་ལྗན་ལྗིན། རྫབ་རྫུབ་ཀྱིས་མི་རྣམས་ཀྱི་སེམས་ངོས་སུ་བབས་འདུག སྐྱ་མདོག་གི་མཁའ་དབྱིངས་ནི་ཡོལ་བ་སྲབ་མོ་ཞིག་དང་འདྲ་ཞིང་། ལྗོན་ཤིང་དང་ཁང་པ། དུ་ཞག སྤྲིན་དཀར་གྱི་འདབ་མ་སོགས་ནི་ཡོལ་བ་འདིའི་སྟེང་དུ་སྦྱར་བའི་གཟུགས་རིས་རེ་རེ་དང་གཉིས་སུ་མ་མཆིས། ད་དུང་ག་ས་གང་དུ་མཚམས་སྤྲིན་གྱི་མཚར་སྡུག་དང་སྐར་ཕྲན་གྱི་གཉོམ་འོད་ཀྱིས་རྣམ་པར་བརྒྱན་འདུག ས་སྲོས་ནི་སྙན་ངག་ཅིག་གམ། དམངས་གཞས་ཤིག ཡང་ན་བྱིས་སྒྲུང་ཞིག་དང་མཚུངས། དེ་མིན་ཟླ་འོད་ངོགས་ཀྱི་ཁང་བཟང་ནས་མཆེད་ཡོང་བའི་རྐང་གླིང་ཞིག་གམ། བར་སྣང་དུ་ལྷང་ལྷང་གྲགས་པའི་ཁྲུང་ཁྲུང་གི་གསུང་སྐད་ཅིག བགྲང་བྱ་དུ་མར་བསྙལ་བའི་ལོ་ཆང་ཁམ་པ་ཞིག མདོར་ན་སྨྲ་བསམ་བརྗོད་འདས་ཀྱི་མཛེས་པ་མཐའ་དག་དང་འདྲའོ། བརྗོད་ལས་འདས་པས་མིག་གིས་ལྟ་བ་ལས་ཐབས་མེད་ལ། བལྟས་པས་ཀྱང་མགུ་མི་གང་བས་ཡིད་ཀྱིས་བསྒོམས། ཡིད་ཀྱིས་ཀྱང་བསྒོམ་མི་ཐུབ་པ་དག་ལ་བསྔགས་པ་ལས་འོས་མེད་དོ། ཡིན་ཡང་། མཐར་མི་རྣམས་ཀྱིས་འདི་ཡོད་ཚད་སྒོའི་ཕྱི་རུ་བཀག་འདུག་ཨང་།
       བདག་གིས་མི་རྣམས་ཀྱིས་ས་སྲོས་སྒོའི་ཕྱི་རོལ་དུ་བཀག་འདུག་ཟེར་དུས་གཟབ་གཟབ་བྱེད་དགོས་ཏེ། མི་རྣམས་ཟེར་བ་ནི་མི་ཐམས་ཅད་ལ་ཟེར་བ་མ་ཡིན་ལ་མི་ཐམས་ཅད་ཡིན་ཡང་མི་སྲིད། ང་རང་བྱིས་པ་ཡིན་དུས་རྒྱུན་པར་སྒོ་ར་རུ་བསྡད་དེ་ས་སྲོས་ལ་བསྒུགས་པ་ཡིན། ངས་འདི་ལྟར་ལབ་པ་ནི་ང་རང་གཞན་ལས་མཆོག་ཟེར་བ་རྩ་བ་ནས་མ་ཡིན་པར། ངའི་ནང་དོན་ནི་མི་གཞན་གྱིས་འདི་ལྟར་མི་སྒྲུབ་པའམ་སྒྲུབ་འདོད་མི་འདུག་ཟེར་བ་ཡིན་ལ། ང(མི་གཞན་ཡང་ཡོད་ཤག་ཤག་རེད།)རང་སྟབས་ལེགས་ནས་རྒྱུན་པར་ས་སྲོས་ལ་བསྒུག་རྒྱུར་དགའ། དབྱར་དུས་སུ། ང་རང་རྒྱུན་པར་རྐུབ་སྟེགས་ཆུང་ཆུང་ཞིག་ཏུ་བསྡད་དེ་ཁང་པའི་གྲུ་ཟུར་ལ་གྲིབ་མ་གོན་པ་དང་ཕྱོགས་བཞིའི་གྱང་དཀར་གྱི་ལྡེབས་སུ་སྲོད་གྲིབ་ཀྱིས་གཡོགས་པར་བལྟས་པ་ཡིན། སྲོད་གྲིབ་ཀྱི་ཁྲོད་དུ་མེ་ཏོག་ཡེ་ལའེ་ཞིང་གི་དྲི་བསུང་ངའི་སེམས་ཀྱི་ཟབ་སར་ཡང་ཡང་སིམ་མྱོང། མཁའ་དབྱིངས་སུ་ཕ་ཝང་གིས་འཕུར་ལྡིང་བྱེད་ཅིང་། ཁང་པའི་བྱ་འདབ་འོག་གི་སྡོམ་རྒྱ་ལས་སྐྱ་མདོག་གི་མཁའ་དབྱིངས་མངོན་འདུག་ལ། མག་མོག་ཁྲོད་སྡོམ་རྒྱའི་ཐིག་སྐུད་དང་དེའི་སྟེང་དུ་འབྱར་བའི་དུག་སྦྲང་དང་སྦྲང་ནག་གི་བེམ་པོ་རེ་རེ་བཞིན་བརྩི་ཐུབ། སྣང་ཡན་དུ་སྡོད་སྐབས་གློ་བུར་མགོ་བོ་བཀྱགས་ནས་བལྟས་ཚེ། སྐྱ་ཐིང་ངེའི་མཁའ་དབྱིངས་སུ་སྐར་ཚོགས་ཀྱི་མིག་ཟུང་ཆེམ་ཆེམ་བྱེད། དགུན་དུས་སྒོ་རའི་ནང་ཁ་བ་མཐུག་པོས་གཡོགས་ཤིང་ང་རང་ཁང་པའི་ནང་བསྒོངས་ནས་བསྡད་པ་ཡིན། སྒེའུ་ཁུང་གི་ཤོག་དཀར་རིམ་གྱིས་སྐྱ་མདོག་ཏུ་འགྱུར་པ་དང་། ཐབ་ཀའི་ནང་ཉིན་མོར་མཐོང་མི་ཐུབ་པའི་མེ་ལྕེ་རིམ་གྱིས་ཇེ་དམར་དང་ཇེ་གསལ་དུ་འགྱུར་བ་མཐོང་དུས། ངས་ཀྱང་དེ་ནི་ས་སྲོས་ཡིན་པ་རྟོགས། དེ་དུས་ཕྱི་སྒོའི་ཧྲག་བར་ནས་ཕྱི་ཕྱོགས་སུ་བལྟས་ན་ཐལ་མདོག་གི་ནམ་མཁའ་དང་ཁ་བས་མནན་པའི་ཐལ་མདོག་གི་ཁང་ཀླད་དག་མཐོང་ཐུབ། ཟོར་བའི་དབྱིབས་ཀྱི་ཚེས་རིས་ནམ་མཁའི་ངོས་སུ་ཁེར་ཧྲེང་དུ་གནས་མོད། དེ་ཡིས་ས་སྲོས་ཀྱི་མཛེས་པ་འགོག་ག་ལ་ཐུབ། སྐབས་འདིར། རྒྱུན་པར་སྒོ་རའི་ནང་དུ་ས་སྲོས་ལ་སྒུག་པའི་མི་དག་ཀྱང་ཁང་པའི་ནང་འཛུལ་འགྲོ་བས། འཁྱག་ཤུར་ཤུར་གྱི་ཕྱི་རོལ་དུ་སྐྱ་ཐིང་ཐིང་གི་ཁ་བའི་ཡུལ་ལྗོངས་ལས་ས་སྲོས་ལ་སྡོངས་གྲོགས་མི་འདུག འདི་ལྟ་བུའི་ཆོ་འཕྲུལ་དང་རབ་རིབ་ཀྱི་འཇིག་རྟེན་ནི་སུ་ཞིག་གི་ཆེད་དུ་བསྐྲུན་པ་ཡིན་ནམ། ས་སྲོས་ལ་ཁེར་རྐྱང་གི་ཚོར་བ་ཡོད་སྲིད་དམ།
       ས་སྲོས་མུ་མཐུད་དུ་འགྲོ་དགོས་པས་ཁེར་རྐྱང་གི་ཚོར་བས་ཡུན་རིང་གདུང་མི་སྲིད། ལི་ཧྲང་དབྱིན་གྱི་སྙན་ངག་ཏུ“ལ་ཁའི་ཉི་མ་སྙིང་དུ་སྡུག །སྲོས་ལ་ཉེ་བས་ཡིད་སེམས་ཕངས། །”ཞེས་སྙན་ངག་པས་ས་སྲོས་ཡུན་རིང་མི་གནས་པའི་ཡིད་ཀྱི་ཕངས་བ་བརྗོད་པ་མ་ཡིན་ནམ། ས་སྲོས་དངོས་ནས་ཡུན་རིང་ལ་གནས་མི་སྲིད་པར་སྐད་ཅིག་ཉིད་ལ་རྨི་ལམ་ཞིག་དང་འདྲ་བར་མི་རྣམས་ཀྱི་སེམས་ངོར་འཁྱུག་ཙམ་བྱས་རྗེས། སྨག་ནག་གི་མཚན་མོ་ཞིག་བཞག་སྟེ་རང་ཉིད་ཀྱི་ཁེར་རྐྱང་ཁུར་ནས་བཞུད་སོང་།
       བཞུད་སོང་། དངོས་ནས་བཞུད་སོང་། ད་ལྟ་ཡང་བསྐྱར་ང་ལ་ས་སྲོས་གང་དུ་བཞུད་པ་རེད་ཅེས་འདྲི་རུ་བཅུག་ན། དེ་ནི་ངས་ས་སྲོས་གང་ནས་ཡོང་བ་མི་ཤེས་པ་ཇི་བཞིན་ལན་འདེབས་ཁག་སོང་། བདག་གིས་ས་སྲོས་ཀྱི་མཇུག་མ་ནས་བཟུང་སྟེ་གཏིང་འདྲི་བྱེད་ག་ལ་ཐུབ། འོན་ཀྱང་། ཁོག་འདང་ཞིག་བརྒྱབ་ན། བྱང་ཕྱོགས་ནས་ཡོང་བ་ཡིན་ན་ཕལ་ཆེར་ལྷོ་ཕྱོགས་སུ་སོང་བ་ཡིན་ངེས། སུ་ཞིག་གིས་ལྷོ་ཕྱོགས་སུ་སོང་བ་མིན་ཞེས་ལབ་ཐུབ་བམ། ངས་ས་སྲོས་ཇི་ལྟར་སོང་བ་མཐོང་སོང་སྟེ། ལྷོའི་མཁར་གྱང་དང་། ལྷོ་ཕྱོགས་ཀྱི་རི་བོ་དང་ལྗོན་པའི་ཚོགས་བརྒལ་ཞིང་། མཛེས་སྡུག་གི་ལྷོའི་རྒྱལ་ཁམས་བརྒྱུད་ནས་མཐའ་ཡས་པའི་ཧྥེ་གླིང་དུ་ཆས་སོང་། ཧྥེ་གླིང་དུ་དཀན་གཟར་གྱི་རི་རྒྱུད་ཡོད་ལ། རི་རྒྱུད་ཀྱི་ཁོངས་སུ་རྫུབས་མཐུག་པའི་བསྐལ་བ་སྟོང་གི་ནགས་ཚལ་གནས། མུ་མཐུད་དུ་འཆར་ཡན་གྱི་གཤོག་པ་བརྐྱངས་ན་ནགས་གསེབ་ཏུ་དམར་ཡག་སྟག་ཡོད་ངེས། ས་སྲོས་སླེབས་པ་ན་རྒྱ་སྟག་དེའི་ཉིན་དཀར་གསལ་ལ་མི་གསལ་བའི་ལྗང་སྐྱའི་མིག་ཟུང་ལ་འོད་མདངས་རྒྱས་པ་ནི་གློག་སྒྲོན་གཉིས་དང་འདྲ་བོ་འདུག་གམ། ནགས་ཚལ་དུ་ད་དུང་མིའི་གཟུགས་ཚད་ལས་བརྒལ་བའི་སྐྱེ་སྟོབས་ཀྱི་དཔལ་གྱིས་ཕྱུག་པའི་རྩྭ་ལྡུམ་ཡོད་ངེས། རྩྭ་གསེབ་ཏུ་སེང་གེ་དང་དུག་སྦྲང་ཆེན་པོ། སྡོམ་ཆེན་པོ། ད་དུང་རྒྱུན་ལྡན་གྱི་ཕ་ཝང་ལས་ཆེ་བའི་ཕ་ཝང་ཡོད། ཉི་ནུབ་ཀྱི་འོད་ཟེར་སྡོང་ལོའི་སྲབ་ས་ནས་ཡལ་གའི་སྟེང་གི་སྡོམ་རྒྱ་བརྟོལ་ཏེ་གསེར་མདོག་གི་འོད་ཞགས་རེ་རེས་ལྗོན་གསེབ་ལ་དམར་སྨུག་གི་འོད་སྣང་བསྐྲུན་ཞིང་། རྩྭ་གསེབ་ནས་ལྡང་ཡོང་བའི་དུག་སྦྲུལ་གྱི་ཁ་རླངས་དང་ལྷན་དུ་ཁ་དོག་རྣམ་པར་བཀྲ་བའི་སྨུག་སྤྲིན་ཞིག་ཏུ་གྱུར། ད་དུང་སྲིན་འབུ་མེ་ཁྱེར་གྱི་འོད་མདངས་ཆེམ་ཆེམ་གྱིས་མཆེད་འོས་ལ། ཕྲ་ཚོམ་མེ་ཏོག་ཀྱང་ཡོད་ངེས། འོན་ཀྱང་མེ་ཏོག་ཡེ་ལའེ་ཞིང་དང་བན་ཞིང་ཡུའུ་ཡིན་མི་སྲིད་པ་འདྲ། དེས་ན་ཅི་ཞིག་ཡིན་ནམ་ཟེར་ན། དེ་དག་ཡོད་ཚད་ནི་དུག་གིས་བརླན་པའི་འཚེ་བའི་མེ་ཏོག་ཡིན་ངེས། དུག་རླངས་ཀྱི་ཁྲོད་དུ་འཚེ་བའི་མེ་ཏོག་རྐྱང་རྐྱང་སྐྱེས་སྲིད་པ་མ་ཡིན་ནམ། མེ་ཏོག་འདིའི་དྲི་བསུང་དམར་སྨུག་གི་མཁའ་རླུང་དང་རྣམ་པར་བཀྲ་བའི་སྨུག་སྤྲིན་གྱི་ཁྲོད་དུ་འཐིམ་ཞིང། ཡོད་ཚད་མཉམ་དུ་འདྲེས་ནས་དྲོད་ལམ་ལམ་གྱི་ཚ་རླངས་ཤིག་ཏུ་གྱུར། ཡིན་ཡང་། ཡུན་རིང་མ་འགོར་བར་ཚ་རླངས་དེ་རབ་རིབ་ཀྱི་མུན་པས་ཁྱུར་མུད་བཏང་བྱུང་བས། ད་ལྟ་རིམ་གྱིས་ཇེ་གསལ་དུ་འགྲོ་བཞིན་པའི་སྲིན་འབུ་མེ་ཁྱེར་གྱི་འོད་སྣང་ལས་ཅི་ཡང་ལྷག་མི་འདུག རྒྱ་སྟག་གི་མིག་གཉིས་སྔར་ལས་གློག་སྒྲོན་གཉིས་དང་འདྲ་བར་ལྷིང་འཇགས་ཀྱི་ཁྲོད་དུ་སྐྱ་ཐིང་ཐིང་གི་མཁའ་དབྱིངས་ནས་ཤར་བའི་སྐར་ཚོགས་ལ་ཅེར་འདུག
       ཡིན་ཡང་། གནས་འདི་ནས་ས་སྲོས་མུ་མཐུད་དུ་འགྲོ་ངེས། ད་ནི་ཁ་ཕྱོགས་གང་ལ་འགྲོའམ། འདི་ནི་སུས་ཀྱང་ལན་འདེབས་ཐུབ་པ་ཞིག་མ་རེད། དཀར་གཙང་སླད་མེད་ཀྱི་ཟླ་བའི་འོད་སྣང་དང་འགྲོགས་ནས་རབ་རིབ་ཀྱི་མཁའ་དབྱིངས་སུ་འཛེགས་པ་ཡིན་ནམ། མིག་འབྲས་ཆེམ་ཆེམ་རྡེབ་ཀྱིན་པའི་རྒྱུ་སྐར་དང་བསྡོངས་ནས་དགུ་ཚིགས་ཀྱི་བང་རིམ་བརྒལ་བ་ཡིན་ནམ། ཕ་ཝང་གི་གཤོག་ཟུང་ལ་འབྱར་ནས་ཁང་པའི་བྱ་འདབ་འོག་འཛུལ་བ་ཡིན་ནམ། ཡང་ན་ནུབ་ཕྱོགས་བདེ་བ་ཅན་གྱི་མཚལ་ཁ་དང་ལྷན་དུ་རྒྱང་རིང་གི་རི་བོའི་ཕག་ཏུ་ཡིབ་པ་ཡིན་ནམ། འདི་ཡང་སུ་ཞིག་གིས་གསལ་པོར་ཤེས་ཐུབ་བམ། ང་ཚོས་ཤེས་པ་ནི་ས་སྲོས་ཀྱིས་རང་གི་ཁེར་རྐྱང་དང་མཛེས་སྡུག་ཁུར་ནས་བསིལ་རླུང་ཞིག་གམ། དཔྱིད་ཀྱི་མཚན་མོའི་རྨི་ལམ་ཞིག་དང་འདྲ་བར་བཞུད་སོང་བ་དེ་རེད།
       བཞུད་སོང་། ད་ལྟ། ད་ལྟ་ང་ལ་ཡང་འདྲི་རྒྱུ་ཅི་ཞིག་ཡོད་དམ། སང་ཉིན་ལ་བསྒུག་དགོས་སམ། སང་ཉིན་གྱི་རྗེས་ལ་སང་ཉིན། དེའི་རྗེས་ལ་ད་དུང་སང་ཉིན་རེད། མི་རྣམས་ཀྱིས་རྒྱང་རིང་དུ་འཐིབས་པའི་དཀར་ལམ་ལམ་གྱི་དུ་ཞག་དང་། ལྗོན་ཤིང་གི་རྩེ་མོར་བྱུགས་པའི་སེར་ལམ་ལམ་གྱི་འོད་ཟེར། ད་དུང་ནག་རོག་རོག་གི་ཁ་ཏྭའི་ཁྱུ་ཚོགས་རེ་རེ་དགོང་ཁའི་ཉི་འོད་ཀྱི་ཀློང་ནས་ཕྱིར་ལོག་ཡོང་བ་མཐོང་སྐབས། ཁོ་ཚོའི་ནང་སེམས་ཅི་ཞིག་གིས་ལྗིད་ཏིག་ཏིག་ཏུ་གཏོང་བར་འདྲ་ཞིང་། ཁོ་ཚོས་རྨི་ལམ་ལ་རེ་སྙེག་བྱེད་བཞིན་སྒོ་མོ་གཏན། སྒོའི་ཕྱི་རོལ་དུ་བཀག་པ་ནི་སྔར་བཞིན་ས་སྲོས་ཡིན་ལ། ཁོ་ཚོས་ཡང་བསྐྱར་མགོ་བོ་བཀྱགས་ནས་ས་སྲོས་འཚོལ་སྐབས། ས་སྲོས་སྔ་མོ་ནས་བཞུད་ཚར། བྱང་འཁྱགས་རོམ་རྒྱ་མཚོ་ནས་མགྱོགས་མྱུར་གྱིས་ཆས་ཡོང་སྟེ། ཧྥེ་གླིང་གི་ནགས་ཚལ་གྱི་ཕྱོགས་སུ་སྐད་ཅིག་གིས་བཞུད་སོང་། དེ་ནས་གང་ལ་འགྲོའམ། སུས་ཀྱང་རྟོགས་མི་སྲིད། ཡིན་ཡང་མཚན་མོ་གཞི་ནས་སླེབས་བྱུང་། མུ་མཐའ་མེད་པའི་སྨག་ནག་གི་མཚན་མོ། སྐར་ཚོམ་དང་ཟླ་འོད་ཆེམ་ཆེམ་བྱེད་པའི་མཚན་མོ། བསུང་ཞིམ་ལྷོད་ལྷོད་ལྡང་བའི་མཚན་མོ། མཚན་མོ་ནི་རིང་ལ་རྫོགས་མཐའ་མི་འདུག་མོད། ས་སྲོས་ནི་ནམ་ཡང་མི་རྣམས་ཀྱི་སེམས་ངོར་གནས་མི་སྲིད་པར་འཁྱུག་ཙམ་གྱིས་དཔྱིད་ཀྱི་མཚན་མོའི་རྨི་ལམ་ཞིག་དང་འདྲ་བར་ཆས་འགྲོ།
       འདི་འདྲ་ཞིག་ཡིན་ནམ།