སྐྲ་ལུང་། (སྒྲུང་རིང་མུ་འགོད་ལས་ཁག་སོ་བདུན་པ།)

       དར་རི་གྲོང་ཚོའི་དགུ་བའི་དགུ་ཡི་རི་གླུ་དུས་སྟོན་གྱི་ཉིན་མོ་ཐོན་ལ་ཉེ། ངས་གློ་བུར་དུ་ལོ་གཅིག་སྔོན་ལ་སྡེ་བའི་ལས་བྱེད་པར་པདྨ་རྒྱལ་མོ་གནས་འདིར་གདན་དྲངས་ནས་རི་གླུ་ཞིག་ལེན་རྒྱུ་ཁས་བླངས་པའི་དོན་ དེ་ཡིད་ལ་དྲན། དེ་དུས་ནི་པདྨ་རྒྱལ་མོ་དང་ངེད་གཉིས་བར་གྱི་འབྲེལ་བ་ཆེས་བཟང་དུས་ཡིན་པས། ངས་དོན་དེ་གླེང་མ་ཐག་མོས་དགའ་སྤྲོའི་ངང་ཁས་བླངས་པ་ཡིན། རེད་མོད་ཀྱང་། ད་ལྟ་མོས་ང་ལ་དོགས་པ་ཟོས་ཡོད་ ཅིང་ཁ་ཡ་མི་བྱེད་པས། དོན་འདི་དེ་ལྟར་སྟོང་བར་ལུས་དགོས། ང་ལྐོག་ནས་ཡོས་ལན་སྟེང་ཁོང་ཁྲོ་སྐྱེས་བཞིན་ཡོད་དེ། གལ་ཏེ་མོས་ང་དང་པདྨ་རྒྱལ་མོའི་བར་དོན་མེད་ཀྱི་དོགས་པ་དེ་དག་མ་ཟོས་ཚེ་ངས་ཨུ་ཚུགས་ཀྱིས་པདྨ་རྒྱལ་མོར་ཁ་ཏ་དེ་དག་ཀྱང་བྱེད་མི་སྲིད་ལ། དེ་ལྟར་སློབ་གྲྭས་མོ་ཕྱིར་སྐྲོད་བྱས་ཀྱང་། མོ་ངའི་སྟེང་དུ་དོགས་པ་ཅི་ལ་ཟ།
       ཡོས་ལན་གྱིས་ང་མོའི་སྟེང་དུ་ཁོང་ཁྲོ་ལངས་བཞིན་པ་རྟོགས་པ་འདྲ། མངོན་ལྐོག་གཉིས་ཀྱི་སྒོ་ནས་པདྨ་རྒྱལ་མོ་སློབ་བྱོལ་བྱས་པའི་རྒྱུ་མཚན་འདྲི་གཅོད་བྱེད་བཞིན་འདུག ཉིན་དེའི་ཉིན་གུང་དུ་མོས་ཁ་པར་བཏང་ཡོང་སྟེ་དོན་དེའི་འབྱུང་རྩ་གསལ་བཤད་བྱས་བྱུང་།
       པདྨ་རྒྱལ་མོས་ཉིན་དེར་སློབ་གྲྭ་ནས་རི་གླུ་བླངས་རྗེས་སློབ་གྲོགས་མང་པོས་མོ་ཤེས་པར་གྱུར། དེའི་ནང་གི་སློབ་མ་ཞིག་གིས་མོའི་ལག་པ་དབང་སྐྱོན་ཡིན་ཡང་ཁ་ལོ་བའི་ལག་ཁྱེར་བླང་ཆོག་པ་མཐོང་བས། རང་གི་གཉེན་ཉེ་ལག་པ་ཡ་གཅིག་དབང་སྐྱོན་ཅན་ཞིག་ཀྱང་ཐོ་འགོད་སློབ་སྦྱོང་དུ་ཁྲིད་ཡོང་། སློབ་གྲྭས་མིང་ཐོ་འགོད་དུ་མ་བཅུག་པས། ཁོ་ཚོས་པདྨ་རྒྱལ་མོ་ལྷང་ལ་བུད་པ་རེད།
       ངས་དོན་དེ་འཕྲིན་ཐུང་གི་ལམ་ནས་པདྨ་རྒྱལ་མོར་བསྐུར་བ་ན། པདྨ་རྒྱལ་མོས་གཞི་ནས་འཕྲིན་ལན་བསྐུར་ཡོང་། མོས་བཤད་རྒྱུར། མོས་ཀྱང་སྐབས་ཐོག་དེར་སློབ་གྲྭར་སུས་གཏུགས་བཤེར་བྱས་མིན་དྲིས་མྱོང་མོད། འོན་ཀྱང་སློབ་གྲྭས་གསང་རྒྱ་བྱས་བྱུང་། ཁོ་ཚོས་ཇི་ལྟར་གསང་རྒྱ་བྱས་ན་ངས་དེ་ལྟར་ཁྱོད་ལ་དོགས་པ་ཟོས་
བྱུང་། རྒྱུ་མཚན་ནི་ཁྱོད་ཀྱིས་ད་གཟོད་ངའི་རྒྱུ་མཚན་ཤེས་པས་ཡིན་ཟེར། ངས། སློབ་གྲྭས་ཁྱོད་ལ་གསང་རྒྱ་བྱས་པ་ནི་ལུགས་མཐུན་ཞིག་རེད། སློབ་མ་དེས་ཀྱང་ཁྱོད་དང་སྡུར་བ་ཙམ་ལས་བསམ་གཟས་ནས་ཁྱོད་ལྷང་ལ་བུད་པ་ཡིན་མི་སྲིད། སློབ་གྲྭས་ཁྱོད་ལ་སུ་ཡིན་བཤད་ཚེ་ཁྱོད་ཀྱིས་སྐྱིན་ཚབ་ལེན་པར་སྐྲག་པ་དེ་མ་ཡིན་ནམ་ཞེས་ བཤད།
       དོགས་གཞི་སེལ་བྱུང་། ང་དང་པདྨ་རྒྱལ་མོའི་འབྲེལ་བ་སྔར་བཞིན་རྒྱུན་ལྡན་དུ་གྱུར།        ཚེ་ལོ་གྲོང་ཚོར་སླེབས་རྗེས་ཡུལ་ཚོའི་ཧྲུའུ་ཅིའི་དགོངས་དོན་ཇི་བཞིན་ཡོངས་ལ་བསྒྲགས་ཤིང་། སྒེར་ནས་གྲི་དང་མེ་མདའ་རྫས་མདེལ་སོགས་སྦས་ཡོད་མེད་རྒྱུས་ལོན་བྱས། ལས་བྱེད་པ་དང་དམངས་ཚོགས་ཡོངས་ཀྱིས་བརྒྱ་ཁ་གཅིག་གཅོད་ཀྱིས་མཚོན་ཆ་ན་ནིང་གཞུང་བཞེས་གཙང་དག་བྱས་ཟིན་ཞིང་། ཤུལ་དུ་ཡོད་པ་ནི་
ཟ་མ་གཡོས་སྦྱོར་བྱེད་སྤྱད་ཅ་ལག་ཉུང་ཙམ་ཡིན། ད་ལྟ་ནོར་ཤ་ལུག་ཤ་ལེན་པར་ཡང་དཀའ་ཁག་ལ་འཕྲད་ཡོད་པས། མེ་མདའ་དེ་བས་ཇི་ལྟར་གླེང་རིན་ཡོད་དམ། ཡོད་ན་ང་ཚོས་ན་ནིང་བཀོལ་སྤྱོད་བྱས་ཚར་ཞེས་ཁོ་ཚོ་ནི་སྐྱོན་མེད་གཙང་མ་ཡིན་པའི་རྣམ་འགྱུར་མངོན། དེ་ནས་སྤྱི་བདེ་ལས་ཁུངས་ཀྱི་མི་སྣ་ཡོང་ནས་ཞིབ་བཤེར་བྱས་ཀྱང་ཅང་མ་རྙེད། ཚེ་ལོས་དྲིས་ནས་ཅི་ཡང་མི་ལོན་པ་ཤེས་རྗེས། སྡེ་བའི་ལས་བྱེད་འགོ་ཁྲིད་དང་མཉམ་དུ་རྩོད་གླེང་བྱུང་སར་བརྟག་ཞིབ་ཏུ་ཁྲིད་ཅེས་སྨྲས། སྡེ་བའི་ཀྲི་ཧྲུའུ་ཡིས། སྤྱོད་པ་རི་བོར་སོང་ན་ལམ་མེད། ཡོད་པ་ནི་ར་ལུག་འགྲོ་ཐུབ་པ་ཙམ་གྱི་ར་ལམ་ཙམ་ཡིན་ཟེར། ཚེ་ལོས། དེས་མི་སྐྱོན། ང་ཚོ་རྟར་ཞོན་ནས་སོང་ཆོག་ཅེས་བཤད། ཀྲི་ཧྲུའུ་ཡིས། དེར་སོང་ན་ཉེན་ཁ་ཧ་ཅང་ཆེ། གལ་ཏེ་ཁོ་ཚོའི་མི་སྔོན་ལ་རིར་འགོས་ཡོད་ཚེ་ང་ཚོར་སྐོར་རྡུང་བྱེད་ངེས་ཞེས་ཟེར། ཚེ་ལོས། མི་སྐྲག ཁྱོད་ཀྱིས་འགྲོས་བཟང་བའི་རྟ་མཆོག་གཉིས་གྲ་སྒྲིག་བྱོས། གལ་ཏེ་དངོས་གནས་དོན་དག་དེ་འདྲར་འཕྲད་ཚེ་ང་ཚོ་ཕྱིར་བྲོས་ཡོང་ཆོག་སྟེ། ཁོ་ཚོ་དང་ལག་མི་འགུལ་ཞེས་སྨྲས། ཀྲི་ཧྲུའུ་ཡིས། ང་ཚོས་མི་མང་ཙམ་ཁྲིད་ནས་འགྲོ་ཟེར། ཚེ་ལོས། མི་མང་པོས་ཅི་བྱེད་དམ་ཞེས་པར། ཀྲི་ཧྲུའུ་ཡིས། ཁྱོད་ནི་རྒྱལ་ཁབ་ཀྱི་ལས་བྱེད་པ་རེད། ང་ཚོས་ཁྱོད་ཀྱི་བདེ་འཇགས་སྲུང་སྐྱོང་བྱེད་དགོས་ཟེར། ཚེ་ལོས། མི་མང་ན་ཕ་རོལ་པོར་དོགས་པ་སློང་སྲིད་ལ། གལ་ཏེ་རྐྱེན་ངན་ལ་འཕྲད་ཚེ་ཕྱིར་འཐེན་ཡང་སྟབས་མི་བདེ་ཞེས་སྨྲས།
ཀྲི་ཧྲུའུ་ཡིས་ཚེ་ལོ་འགྲོ་ཁོ་ཐག་ཡིན་པ་དང་། བཤད་པར་ཡང་གནས་ལུགས་མཆིས་པ་ཤེས་རྗེས་དེ་ལྟར་ ཁས་བླངས་པ་རེད།
       ཕྱི་ཉིན་ཞོགས་པར། ཀྲི་ཧྲུའུ་ཡི་ཁྱིམ་གྱི་སྒོ་ཁའི་ཁ་རར་རྟ་རྐྱང་དམར་ཞིག་དང་ནག་པོ་ཞིག་བཏགས་འདུག་ཅིང་། སྒ་ཆས་དང་བཅས་པས་གྲབས་བྱས་ཡོད། སྡེ་མི་འགའ་རེས་ལམ་བྲོ་རྫོངས་ནས་སྐྱེལ་མ་ཞུ་རུ་ཡོང་འདུག་པས། བལྟས་ཚོད་ཀྱིས་དཔའ་བོ་གཡུལ་ལ་ཆས་པ་དང་འདྲ།
       ཚེ་ལོ་དང་ཀྲི་ཧྲུའུ་གཉིས་རི་ཐང་ལ་སྐོར་བ་གཅིག་བརྒྱབ་མོད་ཀྱང་མི་ཕྱུགས་ཀྱི་གྲིབ་གཟུགས་ཙམ་ཡང་མ་མཐོང་། མཐོང་བྱུང་བ་ནི་མཛེས་སྡུག་གི་སྤང་ཐང་དུ་རི་སྤྱང་ཞིག་གིས་གནའ་བ་ཞིག་བདའ་བཞིན་པ་དེ་རེད། གནས་ཚུལ་དེས་ཚེ་ལོའི་སེམས་སུ་བདེ་འཇགས་མིན་པའི་ཚོར་སྣང་ཞིག་བྱིན་ཡོང་། རྩྭ་ས་ནི་འབྲོག་པའི་བླ་སྲོག་རེད། རྒྱ་ལ་མཛེས་སྡུག་དཔལ་གྱིས་ཕྱུག་པའི་རྩྭ་ཐང་འདི་འདི་ལྟར་སུས་ཀྱང་ལོངས་སྤྱོད་མི་ཐུབ་པའི་ཐང་རྒོད་ཅིག་ཏུ་འགྱུར་སྲིད་དམ། ཁོས་ཕྱིའི་ལྷིང་འཇགས་ཀྱི་རྣམ་པ་ལས་བློ་ཡིད་ལས་འདས་པའི་ཉེན་ཁ་ཆེན་པོ་ཞིག་སྐུང་ཡོད་པ་རྟོགས་བྱུང་།
       ཕྱིར་རང་སར་ལོག་དུས་ས་གཞི་ནས་རུབ་འདུག
       གྲོང་ཚོར་བརྒྱུད་དུས། ཚེ་ལོས་ཚོང་ཁང་ཆུང་བར་རྒྱ་ཆང་རྒྱ་མ་དོ་ཉོས་བྱུང་། ཀྲི་ཧྲུའུ་ཡིས། ཁྱོད་ཀྱིས་ཆང་ཉོས་ནས་ཅི་བྱེད་དམ་ཞེས་དྲིས། ཚེ་ལོས་ལན་མ་བཏབ་པར་ཐད་ཀར་ཀྲི་ཧྲུའུ་ཡི་ཁྱིམ་དུ་སོང་། ཁོས་རྟོགས་ཏེ། ཉིན་འདི་འགའི་རིང་ནི་ཤིན་ཏུ་རྣམ་རིག་གཏོད་དགོས་པའི་དུས་རེད། མཉམ་འཇོག་གཟབ་ནན་མ་བྱས་ཚེ་དུས་ངེས་མེད་ནང་ལྡོག་ཐབས་མེད་པའི་ལུས་ཁྲག་བཞུར་བའི་གདོང་ཐུག་འབྱུང་སྲིད་པས། ཁོས་རང་གི་ནུས་ཤུགས་ཡོད་རྒུ་བཏོན་ཏེ་གདོང་ཐུག་ཞི་ཐབས་བྱེད་པར་འབད་བཞིན་ཡོད།
       ཚབ་ཐབ་སྟེང་དུ་བཙོག་རྗེས། ཚེ་ལོས། ཀྲི་ཧྲུའུ། དོ་ནུབ་ང་ཚོས་ཆང་ཙམ་འཐུང་ན་ག་འདྲ་རེད། ཉིན་གང་བོར་སོང་སོང་ནས་ཐང་ཆད་དྲག་སོང་བས། ངེད་གཉིས་ཀྱིས་ངལ་དུབ་སེལ་ནས་ལུས་སྟོབས་རེ་གསོས་ན་ཆོག་གམ་ཟེར།
       ཀྲི་ཧྲུའུ་ཡིས། ངེད་ཁྱིམ་ནས་ཆང་ཡོད་པས། ཁྱེད་ཀྱིས་ངེད་ཚང་གི་ཆང་འཐུང་། ལེགས་སྐྱེས་འབུལ་རེས་ནི་གྲོགས་པོ་ཚོའི་ལུགས་སྲོལ་ཡིན་པས། ཁྱེད་ནས་རྫི་མ་བྱེད་རོགས་ཟེར་བ་དང་དམ་བུའི་ཁ་ཕྱེ་བྱུང་།
       ཁྱིམ་གྱི་སེན་ཐུག་བསྐོལ་ནས་བསྐྱལ་ཡོང་། མི་རེས་དཀར་ཡོལ་གང་རེ་འཐུང་རྗེས་ཆང་འཐུང་མགོ་བརྩམས། ཁྱོད་ཀྱིས་ཆང་ཕོར་གང་དང་ངས་ཆང་ཕོར་གང་བྱས་ནས་ཅུང་ཙམ་འཐུང་རྗེས་ཚེ་ལོས་བལྟས་ཡོང་ན་ཆང་ཚད་ཀྲི་ཧྲུའུ་ལ་མི་དོ་བས་ངེད་གཉིས་མཛུབ་གུ་རྩེ་ན་ཅི་འདྲ་རེད་ཅེས་དྲིས། ཀྲི་ཧྲུའུ་ཡིས། ང་འདི་ནི་རྐང་ལག་ཀླད་པ་ཡོད་ཚད་ཤིན་ཏུ་དལ། རྒྱུན་ལྡན་དུ་ཆང་འཐུང་དུས་མཛུབ་གུ་མི་རྩེ་བ་ཡིན། རྩེ་འདོད་ན་རྩེ་སྲོལ་ཆུང་བ་ཡོང་ཟེར། རྩེ་སྲོལ་ཆུང་བ་ནི་མཛུབ་གུ་ལྔའི་ཆེ་བས་ཆུང་བ་གནོན་པའི་རྩེ་སྲོལ་ཞིག་ཡིན་པས་ཀླད་ཤུགས་བཀོལ་མི་དགོས། ཚེ་ལོས། ཆོག་གི། རེད་མོད་ཀྱང་ང་ཚོས་སྔར་བཞིན་ཀླད་པ་ཅུང་ཙམ་འགུལ་རྒྱུ་བྱེད། ངས་སྒྲིག་ལམ་ཞིག་འཛུགས། མཛུབ་གུ་འཕེན་ཐེངས་རེའི་སྔོན་ནས་ཅིས་ཀྱང་མཐེབ་མཛུབ་ཐེངས་གཅིག་སྲིང་དགོས། དེ་རྗེས་གང་འདོད་ཕུད་ཆོག་མོད། འོན་ཀྱང་མཛུབ་གུ་གཅིག་བསྐྱར་ཟློས་བྱ་མི་རུང་ཞེས་པར། ཀྲི་ཧྲུའུ་ཡིས། ཆོག་གི་ཟེར། ཚེ་ལོ་སྔོན་ཆད་རྩེ་སྲོལ་འདི་རྩེ་མྱོང་བས་ཁོས་ཕ་རོལ་པོའི་མཛུབ་གུ་ཕུད་སྟངས་ལ་གཞིགས་ཏེ་གོ་རིམ་བཞིན་ཕུད།        གལ་ཏེ་ཕ་རོལ་པོས་ཐོག་མར་ཕུད་པའི་མཛུབ་གུ་ནི་དཀྱིལ་མཛུབ་ཡིན་ན་དེ་རྗེས་མར་ཕུད་པ་ནི་ཁོ་ཐག་སྲིན་མཛུབ་ཡིན་པས། འཛིན་སྟངས་དེ་ཡིས་ཕ་རོལ་པོས་གཏན་ནས་ཁོ་ལས་རྒྱལ་མ་ཐུབ། རེད་མོད་ཀྱང་ཕ་རོལ་པོ་མི་བཟི་བའི་ཕྱིར་སྐབས་ལར་རང་ཡང་ཕམ་པའི་ཚུལ་བྱས།
       ཁོ་ཚོས་ཕྱོགས་གཅིག་ནས་ཆང་འཐུང་བ་དང་ཕྱོགས་གཅིག་ནས་ཁ་བརྡ་བྱས། ཁ་བརྡ་མང་ཆེ་བ་ནི་གྲོང་ཚོའི་རྩྭ་ས་རྩོད་གླེང་གི་ཕྱོགས་རེད།
       ཀྲི་ཧྲུའུ་ཡིས། ལས་བྱེད་པ་ཚེ་ལགས། ཁྱེད་ནི་ངས་རིག་མྱོང་བའི་རྫོང་དང་ཡུལ་ཚོའི་ལས་བྱེད་མི་སྣའི་ཁྲོད་ཀྱི་ཆེས་དཀའ་ཁག་མྱོང་ཐུབ་པའི་མི་རེད་ཟེར།
       ཚེ་ལོས། ང་ཡང་ཞིང་ལས་པ་ནས་འཚར་ལོངས་བྱུང་བ་ཡིན། གཙོ་བོ་གྲོང་ཚོར་དོན་དག་འདྲ་མ་བྱུང་ཚེ་དཀའ་ཁག་ཅུང་ཙམ་མྱོང་པས་ཅི་སྐྱོན་ཟེར།
       ཀྲི་ཧྲུའུ་ཡིས། དེ་རིང་ཁྱོད་རྟར་ཞོན་ནས་ང་དང་མཉམ་དུ་ལམ་ཐག་དེ་འདྲའི་རིང་བོ་ཞིག་བརྒྱུད་པས། འདི་ནི་ཁྱེད་ཐང་ཆད་མི་ཆད་དེ་ཁོ་ན་ཙམ་མ་ཡིན་པར། ད་དུང་མིའི་ཚེ་སྲོག་གི་ཉེན་ཁར་མ་འཛེམ་པར་སོང་བ་ཞིག་རེད། དེའི་ཕྱིར། ཁྱེད་ཀྱི་སེམས་སུ་དམངས་ཚོགས་ཡོད་པ་ཐག་ཆོད་ཟེར།
       ཚེ་ལོའི་དབུགས་རིང་ཞིག་ཕྱུངས་རྗེས། ང་ནི་གྲོང་ཚོ་འདིའི་གཏན་སྡོད་ལས་བྱེད་མི་སྣ་ཡིན་པས། མ་མཐའ་ཡང་གྲོང་ཚོའི་མི་ཞིག་ལ་རྩིས་ཆོག ཉིན་འདི་འགར་ང་མཚན་མོར་གཏན་ནས་གཉིད་མི་ཁུགས། ང་ནི་ཡང་བསྐྱར་རྩྭ་ས་རྩོད་གླེང་བྱུང་བར་སེམས་འཁུར་ཆེ་འདུག་ཟེར།
       ཀྲི་ཧྲུའུ་ཡིས། རེད་ཡ། ཐེངས་སྔོན་མར་ཁོ་ཚོར་མེ་མདའ་ཡོད་པས་ང་ཚོའི་མི་གཅིག་བསད་ཅིང་མི་གསུམ་ཙམ་རྨས་པ་རེད། ཡིན་ནའང་རྩྭ་ས་སྔར་གྱི་རང་བཞིན་ལས་མ་འདས་པས་ཕན་ཁེ་ཅི་ཡང་མ་བྱུང་། ངའི་སེམས་ཅི་འདྲའི་སྐྱོ་བ་ལ་ཨང་ཞེས་པ་དང་མཉམ་དུ་མིག་ལ་མཆི་ཞགས་འཁོར་ཡོང་།
       ཚེ་ལོས། ཁོ་ཚོའི་མི་འཛིན་དགོས་པ་བཟུང་ཞིང་། ཁྲིམས་ཆད་གཅོད་དགོས་པར་ཁྲིམས་ཆད་བཅད་དེ་ཁྱོད་ཚོས་ཀྱང་གྱོང་རེག་མི་འདུག་པ་བྱས་ཡོད་ཅེས་པར།
       ཀྲི་ཧྲུའུ་ཡིས། བཟུང་པ་རྣམས་མི་འགྱངས་པར་ཕྱིར་བཏང་མ་ཟད། ཁྲིམས་ཆད་བཅད་པ་ཡང་སྲོག་གཅོད་མ་རེད། དེས་ཚབ་བྱེད་ཐུབ་བམ། ངེད་སྡེ་བའི་གནོད་འཚེ་ཐེབས་པའི་ཁྱིམ་ཚང་གིས་ཇི་ལྟར་ཁས་ལེན་ནམ་ཟེར།
       ཚེ་ལོས། དེས་ན་ཁྱོད་ཀྱིས་ཇི་ལྟར་བྱ་རྩིས་ཡོད་དམ་ཟེར།
       ཀྲི་ཧྲུའུ་ཡིས། བལྟས་ཡོང་ན། ཕ་རོལ་པོའི་མིས་ཕྱུགས་ཟོག་རྩྭ་སར་དེད་ཡོང་ཕོད་ཀྱིན་མེད་པ་འདྲ། ཉིན་འགའི་རྗེས་སུ་ངེད་ཚོས་ཕྱུགས་ཟོག་དེད་ནས་སོང་སྟེ་རྩྭ་མང་ཙམ་སྤྱད་ཆོག དེ་ནི་སྐྱིན་ཚབ་ཡིན་ཚུལ་བྱོས་ཟེར།
       ཚེ་ལོས་ཡང་དབུགས་རིང་ཞིག་ཕྱུངས་རྗེས། གལ་ཏེ་ད་ལོ་ཡང་རྩོད་གླེང་བྱུང་ན་ཇི་ལྟར་བྱེད་དམ། ང་ཚོས་ད་ཡང་ངག་ལྐུགས་པའི་གྱོང་གུད་རག་མི་འོས་ཞེས་བཤད།
       ཀྲི་ཧྲུའུ་ཡིས་ཚེ་ལོར་བལྟས་ཤིང་བལྟས་རྗེས། ཁྱེད་ཀྱི་དེའི་དོན་ཅི་ཡིན་ནམ་ཟེར།
       ཚེ་ལོས་ཀྲི་ཧྲུའུ་ཡི་རྣ་རྩར་གཏུགས་ཏེ་གསང་བའི་ཚུལ་གྱིས། ངས་བསམ་ཚུལ་ཡིན་ན། རྫོང་དང་ཡུལ་ཚོས་སྤྱི་བདེ་ལས་ཀ་བཀོད་དེ་མེ་མདའ་དང་རྫས་མདེལ་ལ་ཞིབ་བཤེར་བྱེད་བཞིན་ཡོད་མོད། འོན་ཀྱང་ངས་བལྟས་ན་མེ་མདའ་སྔར་བཞིན་རེ་འགའ་གྲ་སྒྲིག་བྱེད་དགོས། ད་མི་ཆོག་ན་གལ་ལ་ཐུག་ཚེ་གནམ་ལ་འཕངས་ནས་འཇིགས་སྐུལ་ཙམ་བྱས་ཀྱང་ཆོག་འདུག མ་གཏོགས......
       ཀྲི་ཧྲུའུ་ཡིས་ཚེ་ལོའི་རྣམ་འགྱུར་དེ་མཐོང་བས། སྐད་དམའ་མོས། ཁྱེད་ཀྱི་སེམས་ཁ་བདེ་མོ་བྱོས་དང་ཆོག ང་ཚོས་སྔོན་ནས་མེ་མདའ་གཉིས་དང་མདེལ་ལྔ་བཅུ་ལྷག་གྲ་སྒྲིག་བྱས་ཡོད......
       སྐད་ཆ་དེ་ཐོས་རྗེས། ཚེ་ལོས་ལག་པས་ཅོག་ཙེ་སྟེང་ཅིག་རྡེབ་རྗེས་སྐད་འདྲོགས་ཀྱིས། ཧྲུའུ་ཅི་ལགས། ཁྱོད་གསལ་བོ་དག་པོ་ཞིག་བྱོས། ཁྱོད་ཀྱིས་མང་ཚོགས་ཀྱི་སྣེ་ཁྲིད་དེ་ཅི་ཞིག་སྒྲུབ་བཞིན་ཡོད་དམ། ན་ནིང་གྲོང་ཚོ་གཉིས་བར་རྩོད་གླེང་བྱུང་རྗེས། འདི་ཕྱོགས་ཀྱི་མི་ཤི་བ་ཤི་ཞིང་རྨས་པ་རྨས་ལ། ཕ་རོལ་པོའི་མིའང་བཟུང་བ་བཟུང་ཞིང་བཀག་པ་བཀག་པས། དེས་ད་དུང་མི་ཆོག་པ་ཨེ་ཡིན། རོ་སྐྱིན་ལེན་པ་ལ་རྫོགས་མཐའ་མེད་ཅིང་། ལག་པའི་ཕྱི་ནང་ཤ་ཡིན་པ་ཤེས་དགོས་ལགས། ད་དུང་ཅིག་བཤད་ན། མེ་མདའ་ལྐོག་སྦས་བྱེད་པ་ནི་ཁྲིམས་འགལ་གྱི་བྱ་སྤྱོད་ཡིན་པ་ཁྱོད་ཀྱིས་ཀྱང་ལོས་ཤེས། ཁྱོད་ནང་ཁ་དེ་མུར་སོང་ནས་སྡེ་བའི་མེ་མདའ་རྫས་མདེལ་མ་ལུས་སྤྱི་བདེ་ལ་མ་སྤྲད་ཚེ། ཡུལ་ཚོའི་ལས་བྱེད་པ་ང་ལ་ཁྱོད་སྐྱོབ་པའི་ནུས་པ་ཅི་ཡང་མེད་མ་བསམ་ཟེར།
       ཀྲི་ཧྲུའུ་སྐྲག་ནས་རྔུལ་རླངས་ཤིག་བྱས་ལ། པུས་མོ་སར་བཙུགས་ཤིང་ངུས་པའི་མིག་ཆུ་བཞུར་བཞིན། ངས་ཀྱང་རང་གི་སྡེ་དམངས་ཀྱི་ཁེ་ཕན་བསམ་པ་ཡིན་ལགས......
       ཕྱི་ཉིན་ཞོགས་པར། ཀྲི་ཧྲུའུ་ཡིས་མགོ་ཁྲིད་ནས་སྡེ་བའི་དྲག་ཆས་སྣ་ཚོགས་ཡར་སྤྲད་པ་རེད།        དར་རི་གྲོང་ཚོའི་སྡེ་དཔོན་གྱིས་ཁ་པར་བཏང་ཡོང་སྟེ། ངས་ཁོ་ཚོར་མེ་ཏོག་ལེན་ལུགས་ཀྱི་རི་གླུ་ཞིག་འབུལ་ཟེར་བ་ཇི་འདྲ་ཡིན་ཚུལ་དྲིས་བྱུང་། ངས་དེ་མུར་པདྨ་རྒྱལ་མོར་གནས་ཚུལ་དེ་བཤད་པ་ན། པདྨ་རྒྱལ་མོས། དེར་གནད་དོན་མེད། གཙོ་བོ་གྲོང་ཚོས་ང་ལ་དུས་ཚོད་ངེས་གཏན་ཞིག་བཀོད་སྒྲིག་བྱས་ཚེ་ངས་རང་གི་སློབ་མ་འགའ་ཁྲིད་ཡོང་སྟེ་གར་སྟེགས་སུ་བུད་པས་ཆོག་ཟེར།
       རི་གླུའི་སྤྲོ་ཚོགས་ལ་ཁྱོན་ཉིན་གསུམ་ཡོད་ཅིང་། དེ་ལས་སྔོན་གྱི་ཉིན་གཉིས་ནི་ཏག་ཏག་གཟའ་སྤེན་པ་དང་ཉི་མར་འཁེལ་འདུག སྡེ་དཔོན་གྱིས་པདྨ་རྒྱལ་མོ་ཉིན་དང་པོའི་སྔ་དྲོར་བཀོད་བསྒྲིགས་བྱས་ཡོད། ངས་འཇེམ་འཁོར་བསྐོར་ནས་ཡོས་ལན་དང་། པདྨ་རྒྱལ་མོ། ད་དུང་གཞས་པ་གཞས་མ་གཉིས་བཅས་དྲུད་ནས་ཚོགས་རར་སླེབས་པ་ན། ཚོགས་རར་དེ་མ་ཉིད་ནས་མི་ཚོགས་ནི་མཚོ་རི་བཞིན་དུ་འདུས་ཡོད། ང་དང་ཡོས་ལན་གཉིས་ཀྱིས་པདྨ་རྒྱལ་མོ་མིག་གིས་སྐྱེལ་ནས་གར་སྟེགས་སུ་ཕྱིན་ལ། དེ་ནས་གཞོགས་སུ་ལྟ་ཉན་བྱས། སྐབས་དེར་ངའི་ཁ་པར་དུ་འཕྲིན་ཐུང་ཞིག་འབྱོར་བའི་སྒྲ་གྲག་བྱུང་། ངས་ཁ་ཕྱེས་ནས་ལྟ་དུས་སྒྲོལ་མའི་རེད། དེར་མཐུད་ནས་ངེད་གཉིས་ཀྱི་ཁ་བརྡ་བྱས།
       ཁྱོད་འཚོ་བར་སྤྲོ་ཉམས་ལྡན་འདུག
       ཁྱོད་ཀྱང་གཅིག་འདྲ་མ་ཡིན་ནམ།
       མི་གཅིག
       ཅིའི་ཕྱིར།
       ཁྱོད་ལ་མཛེས་མ་དེ་འདྲ་མང་པོ་ཞིག་གིས་བསྐོར་ཡོད།
       ཁྱོད་གང་དུ་ཡོད།
       ཐག་རིང་ཚུལ་བཤད་ན་ས་མཐའ་རེད། ཐག་ཉེ་ཚུལ་བཤད་ན་མིག་འོག་རེད།
       ཁྱོད་ཅིའི་ཕྱིར་ཡོང་བ་ཡིན་ནམ།
       ཁྱོད་ཡོང་ཆོག་ན་ང་ཅིའི་ཕྱིར་ཡོང་མི་ཆོག་གམ།
       ངའི་དེ་ལྟར་ཟེར་བ་མིན།
       དེས་ན་ཅི་ཞིག་ཟེར་བ་ཡིན་ནམ།
       ངས་དེ་ལྟར་ཟེར་དོན་ནི་ཁྱོད་ཀྱིས་དེ་རིང་གནས་འདིར་རི་གླུའི་ཚོགས་ཆེན་ཡོད་པ་ཇི་ལྟར་ཤེས་པ་ཡིན་ནམ་ཞེས་པ་དེ་ཡིན།
       ན་ནིང་ཁྱོད་ཀྱིས་དགུ་བའི་དགུའི་རི་གླུའི་ཚོགས་ཆེན་སྐོར་གླེང་བ་མིན་ནམ།
       འོ་འོ། ངས་དོན་དེ་བརྗེད་འདུག ཚུར་ཡོང་ནས་ངོ་ཞིག་འཕྲད་ན་ཅི་འདྲ་འདུག་གམ།
       ཡོང་ནས་ཅི་བྱེད། ཁྱོད་ཀྱིས་ང་ལ་དཀའ་ལས་བཟོ་འདོད་པ་ཡིན་ནམ།
       ངས་ད་ཡང་འཕྲིན་ལན་མ་བཏང་། དངོས་གནས། དེ་རིང་གི་གནས་འདི་འདྲ་ནས་འཕྲད་པ་ནི་སུར་མཚོན་ནའང་དོགས་མི་བདེ་བའི་དོན་དག་ཅིག་རེད།
       པདྨ་རྒྱལ་མོ་དག་གར་སྟེགས་སུ་བུད། ང་ལ་གར་སྟེགས་སྟེང་གི་རི་གླུར་ཉན་པའི་སེམས་པ་མི་འདུག སེམས་སུ་དྲན་པ་ནི་མྱུར་དུ་ཁོ་ཚོའི་རི་གླུ་བླངས་ཚར་བར་རེ་བ་དེ་ཡིན་ལ། དེ་འཕྲོར་གནས་འདིའི་སྲིང་མོར་འཕྲད་ཐེངས་གཅིག་བྱས་རྗེས་ཕྱིར་ལོག་འགྲོ་འདོད་པ་དེ་ཡིན། ཏག་ཏག་དུས་དེར་སྲིང་མོའི་མག་པས་ངའི་ཨ་ཁུ་དང་ཨ་ཕ་གཉིས་ཁྲིད་ནས་བློ་རྩེ་གཅིག་བསྒྲིམས་ཀྱིས་རི་གླུའི་འཁྲབ་སྟོན་ལ་ལྟ་བཞིན་པ་རིག ངས་ཁོང་ཚོ་ལོགས་སུ་བོས་ཡོང་། ཨ་ཕས་ཡོས་ལན་ལ་བལྟས་ཤིང་བལྟས་རྗེས་སྒྲོལ་མ་ཅིའི་ཕྱིར་མ་ཡོང་བ་ཡིན་ནམ་ཟེར། ངས། ཡོང་ཡོད། མོ་ཚོགས་རའི་དཀྱིལ་དུ་ཡོད་ཅེས་ལན་བཏབ། ཨ་ཕས། ང་ཚོས་རི་གླུར་མི་ཉན་པར་ཚོགས་རའི་ཕྱི་རུ་སོང་ནས་ངལ་གསོ་ཙམ་བྱེད། མོ་ང་དང་ཐུག་འཕྲད་དུ་བོས་ཟེར། ངས་ཆོག་གི་ཞེས་ལན་བཏབ།
       ངས་མྱུར་དུ་སྒྲོལ་མར་འཕྲིན་ཐུང་ཞིག་བསྐུར། སྒྲོལ་མ། སྡོངས་གྲོགས་མཛོད། ཁྱོད་མྱུར་དུ་ཡོང་ནས་གདོང་གཏུགས་ཤིག་བརྒྱག་རོགས་ཞེས་པར།
       སྒྲོལ་མས། ཤེས་སོང་ཟེར།
       ཅུང་མ་འགོར་བར་སྒྲོལ་མ་ངེད་ཚོའི་མདུན་དུ་སླེབས།
       ཨ་ཕ་སླེབས་པ་ཡིས་ང་དང་སྒྲོལ་མ་གཉིས་ངོ་འཕྲད་པའི་དོན་དེ་ལས་སླ་ཞིང་བདེ་བ་ཞིག་རེད། སྤྱིར་ཡོས་ལན་མདུན་དུ་ཡོད་ཀྱང་ངས་དེ་ལ་ཁ་ཡ་བྱེད་ཁོམ་མེད། ངས་ཡོས་ལན་ལ་བཤད་མྱོང་སྟེ། ཨ་ཕར་འབྲེལ་བ་ཡོད་པའི་རྐྱེན་གྱིས་ང་དང་སྒྲོལ་མ་གཉིས་ཀྱིས་ཚོགས་ཡུལ་གཙོ་བོ་འགའ་རེར་ཅིས་ཀྱང་བཟའ་ཟླའི་འཁྲབ་སྟོན་བྱེད་དགོས། ཡོས་ལན་གྱིས་ཀྱང་ང་ཚོའི་དཀའ་ངལ་དེ་ཡོངས་སུ་རྟོགས་པ་ཡིན།
       ཅུང་མ་འགོར་བར། སྔ་དྲོའི་རི་གླུའི་འཁྲབ་སྟོན་མཇུག་རྫོགས་སོང་། སྡེ་དཔོན་གྱིས་མགྲོན་འབོད་བྱེད་ཀྱིན་འདུག ངས། དེ་རིང་གི་མི་འདི་རྣམས་ངའི་གཞུག་གི་ཡིན་པས། སྔར་བཞིན་ངས་མགྲོན་བྱས་ཆོག ཁྱོད་ཀྱིས་འཁྲབ་སྟོན་པ་རྣམས་དོ་དམ་བྱས་པས་ཆོག་ཅེས་ཟེར་བཞིན་དུ་སྲིང་མོ་བོས་ཡོང་ཞིང་མཉམ་དུ་ཟ་ཁང་ཞིག་ཏུ་འཛུལ། ཟ་མ་ཟོས་རྗེས་ཚང་མ་རང་རང་སར་བུད་སོང་།        དྲག་ཆས་སྤྱི་བདེ་ཅུའུ་ལ་ཡར་སྤྲོད་བྱས་རྗེས། སྤྱི་བདེ་ཅུའུ་ཡིས་གྲོང་ཚོའི་ཀྲི་ཧྲུའུ་དང་མེ་མདའ་རྫས་མདེལ་སྐུང་པའི་གྲོང་མི་འཛིན་རྩིས་བྱེད་བཞིན་འདུག ཚེ་ལོས། དོན་འདི་ཡོད་ཚད་ཧྲུའུ་ཅི་དང་མེ་མདའ་རྫས་མདེལ་སྦས་སྐུང་བྱས་པའི་གྲོང་མི་དང་འབྲེལ་བ་མེད། ང་ཚོའི་སྲིད་ཁྲིམས་ལས་ཁུངས་ཀྱིས་ན་ནིང་རྩྭ་ས་རྩོད་གླེང་ཐག་གཅོད་བྱས་པའང་འདྲ་མཉམ་མ་རེད། འདི་ཕྱོགས་སུ་འཆི་རྨས་གཉིས་ཀ་ཡོད་ལ་མེ་མདའ་རྫས་མདེལ་ཡང་མེད། དེ་ལས་ལྡོག་སྟེ་ཕ་རོལ་པོའི་མེ་མདའ་བཟུང་སྟེ་མིར་བརྒྱབ་པའི་ཁྲིམས་འགལ་གྱི་མི་སྣ་ཉིན་འགའ་ལས་བཀག་ཉར་མ་བྱས་ལ། ལ་ལའི་ཁྲིམས་ཆད་འགོར་འགྱངས་བྱས་པ་སོགས་མིའི་སེམས་ལ་སྐྱོན་མེད་ཁྲིམས་མེད་ཡིན་པའི་སྣང་བ་བྱིན་སོང་། དེའི་ཕྱིར་འདི་ཕྱོགས་ཀྱི་གནོད་འཚེ་ཐེབས་པའི་ཁྱིམ་མིས་དོན་དེ་ཁས་ལེན་མི་འདོད་ཅིང་། ནམ་ཡང་རོ་སྐྱིན་ལེན་པའི་སེམས་ཁམས་ཡོད་པ་ནི་ཁག་མེད་པ་ཞིག་རེད། དེ་བཞིན་དུ་གྲོང་ཚོའི་ཀྲི་ཧྲུའུ་ལ་མཚོན་ནའང་བརྩེ་སེམས་ཡོད་པ་ཞིག་རེད། སྤྱིར་ང་ཚོས་མེ་མདའ་དང་རྫས་མདེལ་མེད་པའི་དབང་དུ་བྱས་ཡོད་མོད་ཀྱང་། ཁོས་རང་འགུལ་གྱིས་ཁ་ཏ་སློབ་གསོ་གནང་སྟེ་གྲོང་ཚོའི་མེ་མདའ་དང་རྫས་མདེལ་མ་ལུས་ཡར་སྤྲོད་དུ་བཅུག་པ་ནི་བྱས་རྗེས་ཀྱི་ངོ་བོར་གྲུབ་པ་ཞིག་ཀྱང་ཅི་ལ་མིན། དོན་འདིར་ང་ཚོས་ནན་ཏན་གྱི་ལྟ་སྟངས་བཟུང་ན་འགྲིག་ཅེས་བཤད།
       སྤྱི་བདེ་ཅུའུ་ཡིས་ཚེ་ལོའི་བསམ་འཆར་ལག་བསྟར་བྱས། མི་མ་བཟུང་བས་ཀྲི་ཧྲུའུ་ཡིས་དབུགས་ལྷོད་ཁམ་གང་བྱས། རེད་མོད་ཀྱང་ཡང་དོན་དག་གསར་བ་ཞིག་བྱུང་སོང་སྟེ། མེ་མདའ་དང་རྫས་མདེལ་གཞུང་བཞེས་བྱས་པའི་ཚེ་ལོའི་སྒྲུབ་སྟངས་ལ་མང་ཚོགས་རྣམས་ལྟ་ཚུལ་བྱུང་བ་རེད། དམངས་ཚོགས་ཀྱི་སེམས་སུ་ཁོ་ནི་གོང་རིམ་གྱིས་ཆེད་དུ་མཐའ་དམར་གྲོང་ཚོའི་གསང་བ་ཕྱིར་འདོན་དུ་མངགས་མི་ཡིན་པ་དང་། མཐའ་དམར་གྲོང་ཚོའི་མགོ་གནོན་མཁན་རེད་སྙམ་ལ། ད་དུང་ཕ་རོལ་པོར་མེ་མདའ་ཡོད་པར་སྐྲག་བཞིན་པ་དེ་རེད། ཚེ་ལོས། ཁྱོད་ཚོའི་སེམས་ཁ་བདེ་མོ་བྱོས། རྫོང་དུ་རྫོང་དཔོན་གྱིས་ལས་བྱེད་ཚན་ཁག་ཁྲིད་ནས་འཕྲལ་དུ་ས་མཚམས་ཚད་འཇལ་དང་ཐག་གཅོད་དུ་ཕེབས་རྒྱུ་རེད། གང་ལྟར་འདྲ་མཉམ་འོས་འཚམ་གྱིས་རྩྭ་ས་བགོས་ཚེ་སུས་ཀྱང་དོན་རྐྱེན་བཟོས་མི་ཆོག ཡང་ཅིག་བཤད་ན། ཕ་རོལ་གྱི་གྲོང་ཚོར་ན་ནིང་མེ་མདའ་གཞུང་བཞེས་ཐེངས་གཅིག་བྱས་མྱོང་བས། ད་ལྟ་མེ་མདའ་མེད་པར་ཡིད་ཆེས་བྱས་ཆོག བཟོད་སྒོམ་གྱི་ཕྱིར་བཀྱེད་སྟེགས་ཡག་བྱས་ནས་བཤད་ན། གལ་ཏེ་ས་མཚམས་དུས་ལྟར་ཐག་གཅོད་མ་ནུས་པ་དང་བགོས་པ་འདྲ་མཉམ་མིན་ཏེ། ཕྱོགས་གཉིས་བར་འཐབ་རེས་བྱས་པའི་མི་ཚད་ཕ་རོལ་པོར་མེ་མདའ་ཡོད་ཚེ། ང་སྔོན་དུ་མཆོངས་ནས་མེ་མདའི་ཁ་བཀག་ཆོག་ཅེས་པར། ད་གཟོད་མང་ཚོགས་ཀྱི་ཐེ་ཚོམ་དང་མི་འཐད་པའི་སེམས་ཁམས་ཡུན་གྱིས་ཞི་བར་གྱུར།
       མཚན་མོར་ཡུལ་དུ་ལོག་རྗེས། ཚེ་ལོས་ཉིན་འདི་འགའི་གནས་ཚུལ་གཡང་སྐྱིད་ལ་བཤད་པ་ན། གཡང་སྐྱིད་ལ་སྐྲག་སྟེ་རྔུལ་རླངས་ཤིག་ཕུད་དུ་བཅུག
       གཡང་སྐྱིད་ཀྱིས་སེམས་ཁུར་ངང་ནས། ཚེ་ལོ། ནང་ཁ་ནས་ཁྱོད་ཁྱིམ་དུ་བསྡད་དེ་གྲོང་ཚོ་དེར་མ་འགྲོ་ཟེར།
       ཚེ་ལོས། ང་ནི་གྲོང་ཚོ་འདིའི་གཞི་རིམ་དུ་བསྐྱོད་པའི་ལས་བྱེད་མི་སྣ་ཡིན་པས། མ་སོང་ན་ཇི་ལྟར་རུང་ངམ་ཞེས་སྨྲས།
       གཡང་སྐྱིད་ཀྱིས། ཁྱོད་ཀྱིས་ད་དུང་གསལ་བོར་མི་ཤེས་སམ། ཁོའུ་ཧའོ་ཡིས་ཁྱོད་རང་ཡུལ་ཚོ་དེར་སྤར་ནས་ད་ལྟའི་བར་ལས་གནས་བཀོད་བསྒྲིགས་མི་བྱེད་པ་ནི་བསམ་གཟས་ནས་ཁྱོད་ལ་བརྙས་བཅོས་བྱས་པས་ཡིན་ཞིང་། གཞན་ཡུལ་ཚོའི་ཧྲུའུ་ཅིས་ཁྱོད་རང་གྲོང་ཚོ་དེར་མངགས་པ་ནི་ཁོའུ་ཧའོ་ཡི་གནོན་ཤུགས་འོག་བཀོད་བསྒྲིགས་བྱས་པའི་ཨ་ལོང་སྦྲེལ་འཐབ་ཀྱི་ལྐོག་ཇུས་ཤིག་རེད་ཟེར།
       ཚེ་ལོས། གནད་དོན་དེ་ཡོད་མེད་ལ་ངས་འདང་མི་བརྒྱག ཐོག་མར་ང་ནི་རྒྱལ་ཁབ་ཀྱི་ལས་བྱེད་པ་ཞིག་ཡིན་པས། གང་ལྟར་ཉིན་གཅིག་གི་ཕོགས་དངུལ་རག་ཚེ་དེ་ལྟར་ཉིན་གཅིག་གི་བྱ་བ་སྒྲུབ་དགོས། དེ་བས་ཀྱང་དམངས་ཚོགས་ཀྱི་སེམས་ཁམས་ཏག་ཏག་མེ་ལྟར་འབར་བཞིན་པའི་སྒང་རེད། མི་ལེགས་པའི་དོན་རྐྱེན་འདྲ་བྱུང་ཚེ། མིའི་ཚེ་སྲོག་ལ་གནོད་པའི་མང་ཚོགས་རང་བཞིན་གྱི་རྩོད་གླེང་བྱུང་སྲིད་པ་རེད། ངས་འཐབ་ར་བསྐྱུར་ནས་འབྲོ་སྲོལ་ཡོད་དམ་ཟེར།
       གཡང་སྐྱིད་ཀྱིས། མི་ཆོག ང་སོང་ནས་ཁོའུ་ཧའོ་ལ་གནས་ཚུལ་གསལ་བོ་ཞིག་དྲིས་ཡོང་ཟེར།
       ཕྱི་ཉིན་ཞོགས་པར། གཡང་སྐྱིད་ཀྱིས་ཚེ་ལོའི་བཀག་འགོག་ལ་མི་ཉན་པར་ཐད་ཀར་ཁོའུ་ཧའོ་ཡི་གཞུང་སྒྲུབ་ཁང་དུ་སོང་། ཁོའུ་ཧའོ་ཡིས་གཡང་སྐྱིད་ཡིན་པ་མཐོང་རྗེས། འཛེམ་དོགས་ཆེན་པོས། ཤོག་ཤོག་ཤོག སྒེག་ལྡན་མ། དེ་རིང་ཅིས་དོན་དུ་ཡིན་ནམ་སྨྲས།
       གཡང་སྐྱིད་ཀྱིས། ཧྲུའུ་ཅི། ངས་སྐད་ཆ་ཡར་དཀྱོགས་མར་དཀྱོགས་མི་བྱེད་པར་བཤད། ང་ངེད་ཚང་གི་ཚེ་ལོའི་དོན་དག་དེ་དོན་ངོ་མར་ཇི་འདྲ་ཞིག་ཡིན་པ་ལྟ་རུ་ཡོང་བ་ཡིན་ཞུས།
       ཁོའུ་ཧའོ་ཡིས། ཁོ་ལས་གནས་སྤར་ནས་དར་ལག་རྫོང་ལ་སོང་བ་མིན་ནམ། ཁྱོད་ཀྱིས་ཁོ་དང་ཨྱོན་མི་མཐུན་པ་ཤེས་སམ། རྫོང་ཨུས་ལེགས་སྒྲིག་ཅིག་བྱས་ན་མི་འགྲིག་པ་ཡིན་ནམ་སྨྲས།
       གཡང་སྐྱིད་ཁྲོས་པའི་ངང་། མགར་ཁྲི་ཡུལ་ཚོའི་ལས་བྱེད་མི་སྣས་བསམ་འཆར་བཤད་བཞིན་པ་ནི་ཨྱོན་རྒྱན་གྱི་དཔལ་འབྱོར་གནད་དོན་རེད། ཁྱོད་ཀྱིས་ཅིའི་ཕྱིར་ཨྱོན་ཐག་གཅོད་མི་བྱེད་པར་ཚེ་ལོ་ཐག་གཅོད་བྱས་པ་ཡིན་ནམ། ད་དུང་ད་ལྟའི་བར་དུ་ལས་གནས་བཀོད་སྒྲིག་མི་བྱེད་པས་ཁོས་ཇི་ལྟར་བྱ་བ་སྒྲུབ་བམ་ཞུས།
       ཁོའུ་ཧའོ་ཅུང་ཙམ་ཁྲོས་པའི་ངང་། དམངས་ཚོགས་ཀྱིས་ཨྱོན་གྱི་དཔལ་འབྱོར་གནད་དོན་ལ་བསམ་འཆར་བཏོན་པ་བདེན། ནོར་ལུག་དེ་དག་གི་རིན་སྒོར་སྐབས་ཐོག་ཏུ་ཚང་མར་གསལ་བོ་མ་བསྒྲགས་མོད་ཀྱང་། འོན་ཀྱང་ཁོས་སྐར་གང་ཡང་རང་གི་ཁུག་མར་མ་བཅུག་པས། དེ་ལྟར་ད་དུང་ཁོ་ལ་བརྐུས་འཛུགས་བྱེད་ཆོག་གམ་ཟེར།
       གཡང་སྐྱིད་ཀྱིས། ཁྱོད་བསམ་གཟས་ནས་ཕྱོགས་གཅིག་ལ་གཟུར་བ་མ་རེད་དམ། སེམས་སུ་གཡོ་ཇུས་ཡོད་ཁོ་ཐག་རེད། ཅེས་བཤད་པ་དང་འགྲོ་རྩིས་བྱས་པར་ཡང་ཁོའུ་ཧའོ་ཡིས། ཤོག་ཤོག་ཤོག ངས་ཁྱོད་ལ་དྲང་མོར་བཤད། ང་ཚོས་ཚེ་ལོར་འདི་ལྟར་བྱེད་པ་ནི་ཁྱོད་ཀྱི་དོན་དུའང་ཡིན་ཏེ... ...
       མཚན་དེར། ཚེ་ལོ་ཡུལ་ལ་ལོག་ཚེ། གཡང་སྐྱིད་ཀྱིས་མི་དགའ་བའི་རྣམ་འགྱུར་ཕྱུངས་འདུག ཚེ་ལོའི་སེམས་སུ། གཡང་སྐྱིད་ཀྱིས་ཁོ་ཐག་ཁོའུ་ཧའོ་ཡི་མདུན་ནས་ཁོང་ཁྲོ་འཁྱེར་ཡོང་སྙམ་ཞིང་། ད་མི་ཆོག་ན་གོ་གནས་དེ་ང་ཚོས་གཡུག་བཞག ཁྱོད་ཅིའི་ཕྱིར་སོང་ནས་སྙིང་རླུང་ཞུགས་པ་ཡིན་ནམ་སྨྲས།
       གཡང་སྐྱིད་ཀྱིས་ངོ་ལོག་ནས། ཁྱོད་ཀྱིས་ཇི་ལྟར་གོ་གནས་ཟིན་ནམ། ཁྱོད་ཀྱིས་དོན་བཟང་བསྒྲུབས་པ་ལ་ལྟོས་དང་། ཁྱོད་ཀྱིས་ཕྱི་རུ་མེ་ཏོག་ལ་གླན་ནས་ཡུ་བར་འཚེ་བའི་དོན་ངན་སྒྲུབ་པས་ད་དུང་ང་གླེན་སར་བཞག་པ་ཡིན་ནམ། གཞན་གྱིས་ཁྱོད་ལ་ཆད་པ་མ་བཅད་ན་དགའ་དགའ་བྱོས། དེར་མཐུད་ནས་ཁོའུ་ཧའོ་ཡིས་བཤད་པའི་མགྲོན་ཁང་ནང་དུ་ཧྭ་ཧྭ་དང་མཉམ་དུ་ཉལ་བའི་གནས་ཚུལ་ཐེངས་གཅིག་བཤད་བྱུང་།
       ཚེ་ལོས་སེམས་སུ་མ་ཉེས་ཁ་གཡོགས་ཐེབས་དྲག་སོང་སྙམ་ཞིང་། ཐེངས་དེའི་བྱུང་རིམ་ཇི་བཞིན་གཡང་སྐྱིད་ལ་བཤད་པ་རེད། ཁོས་སུས་གཏུགས་བཤེར་བྱས་པ་གསལ་པོ་ཡིན། རེད་མོད་ཀྱང་དོན་འདི་བྱུང་བར་འབྱུང་རྩ་ཡོད་ལ། ཧྭ་ཧྭ་དང་ཨྱོན་གྲོགས་བཟང་ཡང་ཡིན་པས། གལ་ཏེ་ཧྭ་ཧྭས་དོན་དག་དྲང་བཤད་མ་བྱས་ཚེ་རང་ཉིད་རྒྱ་མཚོར་མཆོངས་ཀྱང་བཀྲུས་ནས་མི་དག་པ་དེ་རེད།
       ཚེ་ལོའི་སེམས་སུ་དོན་དེ་འདི་འདྲའི་རྙོག་འཛིང་ཅན་ཞིག་ཏུ་འགྲོ་སྲིད་པ་གཏན་ནས་མ་དྲན། ཁོས་གཡང་སྐྱིད་ལ་ཐབས་བརྒྱ་ཇུས་སྟོང་གི་སྒོ་ནས་ཧྭ་ཧྭའི་ཁ་ནས་མཚན་དེའི་གནས་ཚུལ་ངོ་མ་ཕྱིར་དྲངས་ཡོང་བར་སྐུལ་མ་བྱས།