འཛམ་གླིང་གི་ཡང་རྩེའི་ཡང་རྩེར་འབོད་པའི་མངའ་རིས་ཀྱི་སྣོད་བཅུད།

       དེ་ཡང་། སྟོད་མངའ་རིས་ཀྱི་ས་བབ་མཐོ་ལ་གྲོང་དང་གྲོང་རྡལ་ཉུང་ཡང་། གནས་དེར་ཏི་སིའི་རི་རྒྱུད་ཀྱི་གཙོ་རི་གངས་རིན་པོ་ཆེ་དང་། མཚོ་མ་ཕམ་སོགས་ཡུལ་སྐོར་གནས་མཆོག་ཁྱད་དུ་འཕགས་པ་དང་། གནའ་ཤུལ་གྲགས་ཅན་གྱི་ལོ་རྒྱུས་ནོར་བུའི་ཕྲེང་བ་ལུང་རིགས་ཀྱི་སྲད་བུར་བསྟར་བ། འབྲོང་དང་། རྐྱང་སོགས་ནང་བཅུད་ཀྱི་སེམས་ཅན་ཞི་ལྷོད་དུ་འཚོ་ཞིང་གནས་པའི་ཡུལ་ལུང་ཉམས་དགའ་བ་ཞིག་ཡིན་རྐྱེན། སྐྱེ་བོ་དུ་མས་འདུ་འཛི་ཆེ་བའི་གྲོང་ནས་རྒྱང་དུ་གྱེས་ཏེ་སྟོད་མངའ་རིས་ཀྱི་གནས་རི་གནས་མཚོ་དང་ཐུན་མིན་གྱི་ཡུལ་གོམས་གཤིས་ལུགས་མྱོང་རོལ་དང་། འཛམ་གླིང་གི་ཡང་རྩེའི་ཡང་རྩེར་ཆགས་པའི་གནས་མཆོག་འདིས་སྦྱིན་པའི་ཐུན་མོང་མ་ཡིན་པའི་ཚོར་སྣང་ཉམས་སུ་མྱོང་བར་འགྲོ་མུས་རེད།