མཛེས་སྡུག་ཡིད་དུ་འོང་བའི་རོང་བྲག

       ཀྲུང་གོའི་སྲོལ་རྒྱུན་རིག་གནས་ཁྲོད། ལུའི་མེ་ཏོག་ནི་དཔྱིད་ཀར་བཞད་པའི་མེ་ཏོག་ཁྲོད་ཆེས་མཛེས་ཤོས་ཀྱི་རིགས་ཤིག་ཡིན་པས། གནའ་སྔ་མོ་ནས་བཟུང་ཤེས་ཡོན་པ་དང་མཁས་པ་རྣམས་ཀྱིས་དེར་ཧ་ཅང་དགའ་མོས་བྱེད་ལ། དེ་བརྗོད་གཞིར་བྱས་པའི་སྙན་ངག་ཀྱང་ཧ་ཅང་མང་པོ་བརྩམས་ཡོད།

       ལུའི་མེ་ཏོག་ནི་སྤྱིར་བཏང་དུ་ཟླ3པ་ནས་ཟླ5པའི་བར་བཞད་ཀྱིན་ཡོད་ལ། བཞད་པའི་དུས་ཡུན་ཉིན20ནས30ཙམ་ཡོད། རང་རྒྱལ་ལྷོ་བྱང་གི་ས་ཕྱོགས་གང་སར་ལུའི་མེ་ཏོག་རབ་ཏུ་བཞད་པའི་ཡུལ་ལྗོངས་མཐོང་ཐུབ་པ་སྟེ། “ཀྲུང་གོའི་ལུའི་མེ་ཏོག་གྲོང་ཁྱེར”ཞེས་པའི་མཚན་སྙན་ཡོད་པའི་ཧྲན་ཞི་ཞིང་ཆེན་ལིན་ཧྥན་གྲོང་ཁྱེར་ཞི་རྫོང་དུ། ཟླ4པ་ཡས་མས་སུ་སླེབས་དུས། ས་ཞིང་མུའུ་ཁྲི་ཡི་སར་ལུའི་མེ་ཏོག་རྣམ་པར་བཞད་པ་མཐོང་རྒྱུ་ཡོད་ལ། དེ་མ་ཟད་རང་རྒྱལ་ལྷོ་ནུབ་ཀྱི་སི་ཁྲོན་ནུབ་རྒྱུད་མཐོ་སྒང་སོགས་སུའང་དེ་ལྟ་བུའི་མཛེས་ལྗོངས་མཐོང་རྒྱུ་ཡོད། ཆུ་ཆེན་དང་རོང་བྲག་སོགས་སུ། ཁྱད་ཆོས་ཟབ་མོ་ལྡན་པའི་བོད་གྲོང་གི་ཁང་པ་རེ་རེའི་ཁྲོད་དུ་ལུའི་མེ་ཏོག་ནི་རྣམ་པར་བཞད་ཡོད། དེས་ཕྱོགས་བཞི་མཚམས་བརྒྱད་ནས་ཡོང་བའི་ཡུལ་སྐོར་བ་ཚོའི་ཡིད་དབང་བཀུགས་འདུག

       སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་རོང་བྲག་རྫོང་ནི་རྒྱལ་མོ་རྔུལ་ཆུའི་སྟོད་རྒྱུད་དུ་གནས་ཤིང་། ས་བབ་དམའ་བའི་ལུང་གཞུང་དུ་ཆགས་ཡོད་པས། དུས་བཞིའི་གནམ་གཤིས་ཚ་གྲང་ཧ་ཅང་སྙོམས་པོ་ཞིག་ཡིན། ཐུན་མོང་མ་ཡིན་པའི་ས་ཁམས་གནས་ཡུལ་དང་གནམ་གཤིས་ཀྱི་ཆ་རྐྱེན་ལས་རོང་བྲག་རྫོང་དུ་ཡིད་དབང་རབ་ཏུ་འཕྲོག་པའི་མཛེས་ལྗོངས་མང་པོ་གྲུབ་ཡོད། རོང་བྲག་འདི་གར་ལོ་གཅིག་དུས་བཞིའི་ནང་དུ་ཐུན་མོང་མ་ཡིན་པའི་མཛེས་པ་ལ་མྱོང་རོལ་བྱེད་ཐུབ།