༄༅།ཡང་དགོན་གུ་རུའི་སྒྲུབ་གནས་བྲག་དཀར་ཤེལ་གྱི་ཡོངས་རྫོང་གི་གནས་ཡིག་མཐོང་བ་དོན་ཡོད་བཞུགས་སོ།།

ན་མོ་གུ་རུ་པད་མ་ཀ་ར་ཡེ།　བརྒྱུད་གསུམ་རིག་འཛིན་བླ་མ་ཀུན་གྱི་དངོས།　།

རྒྱུད་སྡེ་བཞི་དྲུག་ཡི་དམ་རྒྱ་མཚོའི་གཙོ།　།གནས་གསུམ་མཁའ་འགྲོའི་ཚོགས་རྗེ་རིན་པོ་ཆེ།　།

གུ་རུ་སྤྲུལ་པའི་སྐུ་ལ་གུས་ཕྱག་འཚལ།　།ལྔ་ལྡན་ཞིང་གི་སྟོན་པ་གངས་ཆེན་མཚོའི།　།

ཕྱག་གི་པད་མོ་བརྩེགས་པའི་བཅུ་གསུམ་པ།　།མི་མཇེད་འཛམ་གླིང་རྒྱལ་བསྟན་བསྲུང་བའི་གནས།　།

རྣམ་འདྲེན་བཞི་པ་པད་མ་དཀར་པོ་ཡི།　།བསྟན་འདིར་ཁྱད་པར་སྔགས་ཀྱི་བསྟན་པ་ནི།　།

སྤེལ་མཛད་རང་འཁྲུངས་གུ་རུ་མཚོ་སྐྱེས་རྗེ།　།གངས་ཅན་བཙད་པོ་ཁྲི་སྲོང་ལྡེའུ་བཙན་གྱིས།　།

གདུལ་དཀའ་འདུལ་མཛད་སྤྱན་དྲངས་ཕྲིན་ལས་སྐང༌།　།བསམ་འདས་མཛད་དང་ཁྱད་པར་མདོ་ཁམས་སུ།　།

གནས་ཆེན་ཉེར་ལྔ་གཙོ་གྱུར་གནས་ཕྲན་སོགས།　།ཞབས་བཅག་བྱིན་གྱིས་རླབས་པ་ཡོངས་ཀྱི་མཆོག　།

སྨར་ཤོད་སྒང་གི་གཡས་རྒྱུད་སྦས་པའི་ཡུལ།　།བྲག་དཀར་ཤེལ་གྱི་ཡོངས་རྫོང་ཞེས་བྱ་བ།　།

ངོ་མཚར་བཀོད་པ་མིག་གི་བདུད་རྩི་ཆེ།　།ཕྱི་ལྟར་པད་མ་འོད་ཀྱི་གཞལ་ཡས་ཁང༌།　།
རྟེན་དང་བརྟེན་པ་རང་བཞིན་ལྷུན་གྱིས་གྲུབ།　།ནང་ལྟར་སྐུ་གསུམ་འདུས་པའི་ཕོ་བྲང་ཆེ།　།
ཀུན་གསུང་ཐུགས་ཀྱི་རྟེན་མཆོག་གྲངས་མེད་བཞུགས།　།ཁྱད་པར་རིགས་འདུས་དཔལ་གྱི་ཕོ་བྲང་ཞེས།　།
ཐབས་ཤེས་ཉི་ཟླའི་མཚོན་པའི་སྒྲུབ་ཕུག་ནི།　།གུ་རུ་ཡབ་ཡུམ་ཟླ་གསུམ་བཞུགས་པའི་བྲག　།
སྐུ་ཡི་ཕྱག་མཚན་རིག་འཛིན་རྣམ་བརྒྱད་ཀྱི།　།སྒྲུབ་ཕུག་གྲུབ་ཆེན་རྗེ་འབངས་ཉེར་ལྔ་ཡི།　།
ཕྱག་ཞབས་སྐུ་རྗེས་ལ་སོགས་གྲངས་མེད་བཞུགས།　།གཡས་སུ་པད་མ་དབང་ཆེན་ཡབ་ཡུམ་ལ།　།
གསུང་མཆོག་པད་མ་རིགས་ཀྱིས་ཚོགས་བསྐོར།　།གཡོན་དུ་མཁའ་འགྲོའི་གཙོ་མོ་རྣལ་འབྱོར་མར།　།
གནས་གསུམ་མ་མོ་མཁའ་འགྲོ་འཁོར་དང་བཅས།　།དབུས་ཕྱོགས་བདེ་གཤེགས་འདུས་པ་ཧེ་རུ་ཀ　།
ཡེ་ཤེས་ཀློང་དགུ་གཙོ་དང་འཁོར་དུ་བཅས།　།མངོན་གསུམ་གསལ་དང་གཏེར་སྲུང་དུར་ཁྲོད་བདག　།
ཡབ་ཡུམ་ཟུང་བཅས་བྱིན་རླབས་གཡང་ཆགས་པ།　།དུས་བཟང་རྣམས་སུ་འཇའ་འོད་རོལ་མོ་འཁྲོལ།　།
མཁའ་འགྲོས་བརྡ་སྟོན་དག་པའི་ཞིང་སྣང་འཆར།　།སྒྲུབ་པ་བྱས་ཚད་མི་འགྲུབ་གང་ཡང་མེད།　།
གཞན་དུ་ལོ་སྒྲུབ་ལས་ཀྱང་འདིར་ཞག་མྱུར།　།བཟླས་པ་འབུམ་འགྱུར་མཐོང་ཚད་དོན་ལྡན་འགྱུར།　།
གཡོན་ཟུར་སྐུ་གསུམ་འདུས་པའི་ཕོ་བྲང་ཆེ།　།ནང་དུ་ངོ་མཚར་ཞིང་གི་བཀོད་པ་རྫོགས།　།
འོག་ཏུ་བདེ་གཤེགས་ཞི་ཁྲོ་དཀྱིལ་འཁོར་དང༌།　།དབང་ཆེན་འབར་བའི་གར་གྱིས་རུ་ཏྲ་རྣམས།　།
བཏུལ་བའི་དོན་སྙིང་སྲ་མཁྲེགས་རྡོ་རུ་བརླབས།　།དེ་ལ་ཞི་དང་ཁྲོ་སྐུ་དཔག་མེད་བཞུགས།　།
ཀླད་ཁྲག་དང་ནི་སྙིང་ཁྲག་གིས་བྲིས་པའི།　།དཔའ་བོ་འབྲུ་ལྔ་སྐུ་གསུང་ཐུགས་ཀྱི་སྲོག　།
སྒོ་བཞིའི་ས་བོན་ལ་སོགས་གྲངས་མེད་ཡོད།　།དེ་སྟེང་ལོངས་སྐུ་རིགས་ལྔའི་ཕོ་བྲང་ཆེ།　།
ངོ་མཚར་ཁྱད་འཕགས་ཤེལ་གྱི་ཁང་བུ་བརྩེགས།　།རང་བྱུང་གུ་རུ་ཡབ་ཡུམ་མཚན་བརྒྱད་དང༌།　།
པད་མ་དྲག་པོ་ཀརྨ་ཀི་ལ་ཡ།　།མངོན་བཞུགས་གཡས་དངོས་མཁའ་འགྲོའི་སྒྲུབ་པའི་རྫས།　།
སིན་དྷཱུ་ར་དང་འཆི་མེད་སྒྲུབ་ཆུ་ཡོད།　།སྟེང་ན་མངོན་སྤྱོད་གྲུབ་རྟགས་བཞག་པའི་རྗེས།　།
ཕུར་པའི་ལྷ་ཚོགས་པད་མ་དབང་ཆེན་དང༌།　།དཀྱིལ་འཁོར་ལྷུན་གྲུབ་བྱང་ཆུབ་མཆོད་རྟེན་སོགས།　།
ངོ་མཚར་རྟེན་མཆོག་བརྗོད་ལས་འདས་པ་བཞུགས།　།དེ་སྟེང་ཆོས་སྐུའི་ཕོ་བྲང་ཉམ་དགའ་བར།　།
བདེ་ཆེན་ཞིང་གི་བཀོད་པ་ལྷུན་གྱིས་གྲུབ།　།སྣང་མཐའི་གཙོ་འཁོར་གསུམ་དང་སངས་སྟོང༌།　།　
ཉེ་སྲས་བརྒྱད་སོགས་སངས་རྒྱས་བྱང་སེམས་རྣམས།　།མངོན་གསལ་ངོ་མཚར་སྒྱུ་མའི་ལྟད་མོ་ཆེ།　།
གཡས་ངོས་རྡོ་རྗེ་ཚེ་ཡི་རིལ་བུ་དང༌།　།འཆི་མེད་བུམ་བཟང་འཛད་མེད་བདུད་རྩི་བབ།　།
མྱོང་བས་རྒྱུད་ལ་བདེ་སྟོང་ཡེ་ཤེས་འཆར།　།བྱིན་རླབས་དཔལ་འཛིན་བྱང་སེམས་དཀར་དམར་གྱི།　།
དམ་རྫས་བཅུད་ལྡན་མངར་བའི་རོ་མཆོག་ཅན།　།གཞན་ཡང་སྐུ་གསུམ་སོ་སོའི་ཕོ་བྲང་སུ།　།
སྐལ་ལྡན་ལས་ཅན་རེ་རེའི་སྣང་ངོ་རུ།　།མཐོང་གྲོལ་རྟེན་གསུམ་དཔག་མེད་སྣང་བར་བྱེད།　།
ཕོ་བྲང་སོ་སོའི་མཚམས་འཛིན་སྒོ་སྲུང་ཚུལ།　།ཛམ་ལྷ་དཀར་ནག་སྒྲོལ་མ་དཀར་སྔོན་དང༌།　།
པད་མ་དབང་ཆེན་བདུད་རྩི་འཁྱིལ་པ་སོགས།　།ཕྱི་ནང་ལས་མཛད་ཡེ་ཤེས་འཁོར་ལོ་གསལ།　།
སྐུ་གསུམ་ཕོ་བྲང་རེ་་རེར་ཐུན་མོང་དང༌།　།ཐུན་མིན་ཡང་གསང་སྒྲུབ་ཕུག་རེ་རེ་ཡོད།　།
ལོངས་སྤྲུལ་སྐལ་ལྡན་བསྒྲོད་ཅིང་སྐལ་དམན་གྱི།　།ཡུལ་མིན་ཆོས་སྐུའི་ངོ་བོ་ཉིད་ཀྱི་ཞིང༌།　།
རབ་འབྱམས་འོད་གསལ་སྣང་བའི་རྒྱན་དུ་ཆེ།　།ཐབས་ཀྱི་གནས་ཡིན་གཡས་ཕྱོགས་ཤེས་རབ་ཀྱི།　།
རང་བཞིན་བདེ་ཆེན་མཁའ་འགྲོའི་གསང་བའི་དབྱིབས།　།མཚོ་རྒྱལ་སྒྲུབ་ཕུག་མི་རིང་སྐལ་ལྡན་གྱིས།　།
སྒོ་འབྱེད་ངོ་མཚར་སྣང་བའི་བཀོད་པ་སྟོན།　།དཀར་ནག་རྒྱ་དང་ཁྱད་པར་བོད་ཡུལ་གྱི།　།
དཔལ་གྱི་མཆིམས་ཕུ་ཡོངས་རྫོང་ཤེལ་བྲག་གི།　།གནས་དང་དངོས་མཉམ་ཡར་མར་དུས་ཆེན་ལ།　།
གནས་ཡུལ་ཞིང་གི་རྩ་གསུམ་ཆོས་སྐྱོང་རྣམས།　།མངོན་ཞུགས་དགེ་བས་འབྲེལ་ཐོགས་འབུམ་འགྱུར་ཡིན།　།
གཞན་དུས་བརྒྱ་འགྱུར་དེ་ནི་སྐལ་ལྡན་རྣམས།