༄༅། །ཀླུ་སྒུག་གཞུང་།

ཀླུ་སྒུག་ལ་སྒྲ་འགྱུར་ནས་ཀླུ་སྦུག་ཟེར། ཀླུ་སྦུག་ནི་ལྷ་ས་གཙུག་ལག་ཁང་ནས་བྲག་ལྷ་ཀླུ་སྒུག་བར་གྱི་ཐང་ཆེན་ལ་ཟེར། བརྗོད་སྲོལ་ལ་མ་འོངས་པ་ན་བྲག་ལྷ་ཀླུ་སྒུག་གི་བྲག་ལྡེབས་སུ་ཡོད་པའི་ཇོ་བོ་དེ་འབུར་གཟུགས་ཆ་ཚང་མངོན་སྐབས། ལྷ་ས་ཆུས་འཇིགས་ནས་བྲག་ལྷ་ཀླུ་སྒུག་ཏུ་ཀླུའི་གཟུགས་ལག་པ་གཡས་པ་མགོ་སྦར་མོས་བཀབ་ནས་གཙུག་ལག་ཁང་ལ་ཁ་གཏད་ཡོད་པ་ཞིག་ཡོད་པས། ཇོ་བོ་ཤཱཀྱ་མུ་ནེ་ཀླུ་ཡུལ་དུ་གདན་འདྲེན་ཞུ་རྒྱུར་བྱ་ར་བྱས་ནས་སྒུག་བསྡད་ཡོད་པར་གྲགས། དུས་རབས་བཅུ་བདུན་པའི་ནང་བཞེངས་པའི་ཀླུ་སྒུག་ནོར་འཛིན་སྐྱེད་ཚལ་ཞེས་པ་དེ་ནི་པཎ་ཆེན་རིན་པོ་ཆེ་སྐུ་ཕྲེང་བཞི་པ་བློ་བཟང་ཆོས་རྒྱན་མཆོག་ལྷ་སར་ཕེབས་སྐབས་ཀྱི་བཞུགས་གནས་ཡིན། ཀླུ་སྒུག་གཞུང་གི་སྤྲང་ཚང་ནི་ད་ལྟ་གློག་བརྙན་ཁང་བརྒྱབ་དེ་རང་ལ་ཡོད། འདིར་ལྷ་སའི་སྤྲང་པོ་ཉམས་ཐག་མ་ཉུང་བ་ཞིག་བསྡོད་པ་དང་། ཁོ་ཚོར་ཁང་པ་སོགས་གང་ཡང་མེད་སྟབས་རས་གུར་ཐེབ་ཆག་གམ་ས་རྡོ་གང་རུང་གི་སྐྱོར་སྐྱོར་བཏང་ནས་ཉིན་མོ་སློང་མོ་དང་མཚན་མོ་འདིར་འཚོ་སྡོད་བྱེད་ཀྱི་ཡོད། ཀླུ་སྒུག་གཞུང་རྡོ་སེང་གེ་ཡོད་ས་དེར་སྔར་བོད་ས་གནས་སྲིད་གཞུང་གི་རྒྱལ་རྩེ་དམག་སྒར་ཟེར་བ་དེ་ཡོད། ངེད་རང་ཕྲུ་གུའི་སྐབས་བོད་དམག་སྒོ་སྲུང་བས་མེ་མདའ་དབྱིན་ཇི་ཁ་དུམ་ཟེར་བ་སྒོ་ལ་སྐྱལ་ནས་ཁོ་པ་སྒོ་འགྲམ་དུ་ལྷམ་ཟོམ་པ་བཏབ་ནས་བསྡད་པ་ཡང་མཐོང་མྱོང་། ཀླུ་སྒུག་གྱི་ལྷོ་ངོས་སུ་ཆིང་རྒྱལ་རབས་སྐབས་ཀྱི་བོད་སྡོད་ཨམ་བན་སོགས་ཞི་དྲག་དཔོན་རིགས་ཀྱི་ལས་ཁུངས་ཡ་མོན་སོགས་ཡོད། བྱང་རྒྱུད་དུ་སྨན་རྩིས་ཀྱི་སློབ་གྲྭ་འགྲོ་ཕན་གླིང་བྱ་བ་ཡོད། དེ་ཡང་ཐོག་མར་་ཏཱ་ལའི་བླ་མ་སྐུ་ཕྲེང་བཅུ་གསུམ་པའི་སྐབས། རྒྱལ་མཆོག་ཉིད་ཀྱི་བླ་སྨན་དངོས་གཞི་བྱམས་པ་ཐུབ་དབང་གིས་གཙོ་བོ་གནང་བ་དང་། མཁས་དབང་མཁྱེན་རབ་ནོར་བུས་གཙོ་གནད་བཞེས་ཤིང་། རབ་བྱུང་བཅུ་ལྔའི་མེ་འབྲུག་སྤྱི་ལོ་༡༩༡༦ལོར་གསར་འཛུགས་མཛད། བོད་ལྗོངས་ཀྱི་དབུས་གཙང་དྭགས་ཀོང་སྟོད་སྨད་ཀྱི་རྫོང་གཞིས་དང་། དགོན་སྡེ་ཁག་སོགས་ནས་ཤེས་ལྡན་གྲྭ་གཞོན་སྐོང་བསྡུ་བྱས་ནས། འདིར་གཙོ་བོ་སྨན་དང་། རྩིས། སྒྲ་རིག་པ། ཀུན་སྤྱོད་ལ་སོགས་ལེགས་པར་སྦྱང་ནས། སློབ་འབྲས་ཐོན་རྗེས་རང་གནས་སུ་ལོག་ཏེ། རྐང་འཛིན་གྱི་སྨན་པ་གནང་ཐུབ་པ་མ་ཟད། སློབ་གྲྭ་འདི་དང་ལྕགས་པོ་རི་བོད་སྨན་སློབ་གྲྭ་ཆེན་མོ་ནས་བོད་ཀྱི་གསོ་བ་རིག་པ་མཁས་ཅན་གྲངས་ལས་འདས་པ་ཐོན་ནས་གངས་ལྗོངས་ཀྱི་གསོ་བ་རིག་པའི་ལོ་རྒྱུས་ཐོག་མཛད་རྗེས་བླ་ན་མེད་པ་འཇོག་པ་གནང་ཡོད། དེ་སྔ་སློབ་གྲྭ་དེར་བོད་ཁང་ཐོག་གཉིས་པ་དང་། ཤག་ཁོར་ཐོག་གཅིག་མ། སྔོ་སྨན་འདེབས་འཛུགས་བྱེད་སའི་རྭ་བ། སྨན་དང་། རྩིས། སྒྲ་རིག་པ་སོགས་ཀྱི་ཕྱག་དཔེ་དང་། པར་ཤིང་སྨན་ཐང་སོགས་གསོ་བ་རིག་པའི་མཁོ་ཆས་ཕུན་སུམ་ཚོགས་ལ་ཐུན་མོང་མ་ཡིན་པ་ཡོད། སྨན་རྩིས་ཁང་གི་མདུན་དུ་བོད་ཀྱི་ལོ་རྒྱུས་ཐོག་གློག་བརྙན་ཁང་དང་པོ་བདེ་སྐྱིད་འོད་སྣང་ཟེར་བ་དེ་ཡོད།