༄༅།།སྟག་བྲག་བསམ་གཏན་གླིང་རི་ཁྲོད།

སྟག་ལུང་བྲག་རི་ཁྲོད་དེ་སྟོད་ལུང་བདེ་ཆེན་རྫོང་གནས་ཆུང་གྲོང་བརྡལ་གྱི་ཁོངས་སུ་ཡོད། རི་ཁྲོད་དེ་དགའ་ལྡན་ཁྲི་ཐོག་བདུན་བཅུ་པ་སྟག་བྲག་སྐུ་ཕྲེང་དང་པོ་ངག་དབང་ཆོས་འཕེལ་མཆོག་གིས་སྤྱི་ལོ་༡༨༢༧ལོར་ཕྱག་བཏབ། སྐབས་དེ་དུས་རྗེ་ཉིད་དགུང་གྲངས་རེ་བརྒྱད་མེ་ཕག་ལོ་པ་ཡིན། རྗེ་དེ་ཉིད་ནི་མདོ་སྔགས་གཞུང་ལུགས་ཀྱིས་ཕྱུག་པའི་དགེ་བའི་བཤེས་གཉེན་དམ་པ་ཞིག་ཡིན་པ་སྟེ། སྐུ་ཉིད་བོད་རབ་བྱུང་བཅུ་གསུམ་པའི་ལྕགས་འབྲུག་སྤྱི་ལོ༡༧༦༠ལོར་འདམ་ཁུལ་མར་རྐྱང་དུ་སྐུ་འཁྲུངས། དགུང་གྲངས་ཉི་ཤུ་པ་ལ་ཏཱ་ལའི་བླ་མ་སྐུ་ཕྲེང་བརྒྱད་པ་འཇམ་དཔལ་རྒྱ་མཚོའི་དྲུང་ནས་དགེ་སློང་གི་སྡོམ་པ་བཞེས། དགུང་གྲངས་རེ་གསུམ་པ་རབ་བྱུང་བཅུ་བཞི་པའི་ཆུ་རྟ་སྤྱི་ལོ༡༨༢༢ལོར་དགའ་ལྡན་ཁྲི་པ་མཛད། ཁྲི་ལོ་བདུན་བར་བཞུགས། སྔ་རྗེས་སུ་ཏཱ་ལའི་བླ་མ་སྐུ་ཕྲེང་བཅུ་པ་ཚུལ་ཁྲིམས་རྒྱ་མཚོ་དང་། ཀུན་བདེ་གླིང་ཧོ་ཐོག་ཐུའི་ཡོངས་འཛིན་གནང་མྱོང་ཡོད། ལྗགས་རྩོམ་དུ《གསང་བ་འདུས་པའི་རྒྱུད་འགྲེལ་ལྡེ་མིག》བྱ་བ་དང་། རྗེ་ཉིད་ཀྱི་རྣམ་ཐར་རང་རྩོམ《དགའ་ལྡན་ཁྲི་ཐོག་བདུན་བཅུ་པ་ངག་དབང་ཆོས་འཕེལ་གྱི་རང་གི་སྤྱོད་ཚུལ་འགའ་ཞིག་བརྗོད་པ་དགེ་ལྡན་རིང་ལུགས་རྒྱས་བྱེད》ཞེས་བྱ་བ་སོགས་ཡོད། དགུང་གྲངས་བརྒྱད་བཅུ་པ་ས་ཕག་སྤྱི་ལོ༡༨༣༩ལོར་སྐུ་གཤེགས།
སྟག་བྲག་སྐུ་ཕྲེང་གསུམ་པ་ངག་དབང་གསུང་རབ་མཆོག་ནི་བོད་ཀྱི་ལོ་རྒྱུས་ཐོག་གྲགས་ཆེ་བའི་བླ་ཆེན་དམ་པ་ཞིག་ཡིན། བོད་རབ་བྱུང་བཅོ་ལྔ་པའི་ཤིང་ཁྱི་སྤྱི་ལོ༡༨༧༤ལོར་སྟོད་ལུང་བདེ་ཆེན་རྫོང་གནས་ཆུང་གྲོང་ཚོའི་ཁོངས་གྲོང་ཆུང་གཞིས་ཀ་ཞེས་པར་སྐུ་འཁྲུངས། དགུང་ལོ་ཆུང་དུས་ནས་འབྲས་སྤུངས་སྒོ་མང་གྲྭ་དུ་བཞུགས་ནས་མདོ་སྔགས་རྒྱ་མཚོ་ལྟ་བུའི་གཞུང་ལུགས་ལ་གསན་སྦྱོང་མཐར་ཕྱིན་མཛད། མཐར་ལྷ་རམས་དགེ་བཤེས་ཨང་དང་པོའི་གོ་མིང་ཐོབ། བོད་རབ་བྱུང་བཅུ་དྲུག་པའི་མེ་ཡོས་སྤྱི་ལོ་༡༩༢༧ལོར་ཏཱ་ལའི་བླ་མ་སྐུ་ཕྲེང་བཅུ་གསུམ་པའི་བཀའ་བཞིན་ལྷ་ས་ཞོལ་པར་ཁང་དུ་བཀའ་འགྱུར་པར་ཤིང་གསར་བསྐོའི་ཞུ་དག་གི་ཐུགས་འགན་བཞེས། རབ་བྱུང་བཅུ་དྲུག་པའི་ཆུ་བྱ་སྤྱི་ལོ༡༩༣༣ལོར་ཏཱ་ལའི་བླ་མ་སྐུ་ཕྲེང་བཅུ་གསུམ་པ་གཤེགས་རྗེས་སྐུ་གདུང་དགེ་ལེགས་འདོད་འཇོའི་ཐིག་ཚད་དང་། ལྡེབས་རིས་སོགས་གསར་བཞེངས་ཀྱི་གཙོ་འགན་བཞེས། སྤྱི་ལོ༡༩༤༡ལོར་རྭ་སྒྲེང་རྒྱལ་ཚབ་དགོངས་ཞུ་མཛད། སྟག་བྲག་སྐུ་ཕྲེང་གསུམ་པ་ངག་དབང་གསུང་རབ་བོད་ཀྱི་རྒྱལ་ཚབ་ཏུ་འཁོད། དུས་མཚུངས་རྭ་སྟག་དོན་རྐྱེན་རྒྱལ་ཚབ་རྭ་སྒྲེང་དང་རྒྱལ་ཚབ་སྟག་བྲག་བར་ལ་འགལ་བ་ཆེན་པོ་བྱུང་། སྟག་བྲག་རྒྱལ་ཚབ་གནང་ནས་ཏཱ་ལའི་བླ་མ་སྐུ་ཕྲེང་བཅུ་བཞིའི་ཡོངས་འཛིན་དང་། སྟག་བྲག་བསམ་གཏན་གླིང་རི་ཁྲོད་དུ་ཉམས་གསོ་རྒྱ་སྐྱེད་ཐེངས་གསུམ་ཙམ་དང་། དགེ་འདུན་ཞལ་གྲངས་བརྒྱ་དང་ཉེར་ལྔ་འཕར་སྣོན་མཛད། སྤྱི་ལོ༡༩༥༠ལོར་སྲིད་སྐྱོང་དགོངས་ཞུས་གནང་ཏེ་སྟག་བྲག་བསམ་གཏན་གླིང་རི་ཁྲོད་དུ་བཞུགས། སྤྱི་ལོ༡༩༥༢ལོར་དགུང་གྲངས་བདུན་བཅུ་དོན་དགུ་བཞེས་པ་ལ་དགོངས་པ་རྫོགས།
རིག་གནས་གསར་བརྗེའི་ལས་འགུལ་ནང་སྟག་ལུང་བྲག་རི་ཁྲོད་ལ་གཏོར་སྐྱོན་ཆེན་པོ་བྱུང་བར་ད་ལྟ་ཉམས་གསོ་ཕྲན་བུ་བྱུང་ཞིང་། སྟག་ལུང་བྲག་སྐུ་ཕྲེང་བཞི་པ་བསྟན་འཛིན་དགེ་ལེགས་མཆོག་ད་ལྟ་ཀྲུང་གོ་ནང་བསྟན་མཐུན་ཚོགས་བོད་ཡན་ལག་མཐུན་ཚོགས་སྐབས་བཞི་པའི་ཚོགས་གཞོན་པའི་ཐུགས་འགན་བཞེས་བཞིན་ཡོད།