༄༅༎ཆུ་འགག་ཆུ་ཁོལ་ལམ་ངང་ལའི་ཆུ་ཁོལ།

ཆུ་འགག་ཆུ་ཁོལ་ལམ་ངང་ལའི་ཆུ་ཁོལ་ནི་རྩི་གོར་ཐང་གྲོང་རྡལ་གྱི་ས་བཟང་པོ་ཆུ་འགག་ཡར་སྟོད་ཀྱི་ཆ། ས་ཆུ་གཙང་ཞིང་མཁའ་རླུང་དྭངས་ས། ས་ལ་སྲོ་ལོ་དཀར་དམར་དང་མཁན་པ། མཚེ། བོང་དཀར། ཨ་ཀྲོང། གཟའ་དུག བྱ་རྐང་བ། རྩ་མཁྲིས་པ་མོ་ཁ་ལ་སོགས་པ་དྲི་ཞིམ་པའི་སྨན་གྱི་རིགས་སུ་གྱུར་པས་ས་སྟེང་ཁྱབ་པས་ལུས་སེམས་ལ་སྤྲོ་བ་སྟེར་ས།
ས་འོག་ཏུ་གསེར་དང་དངུལ། ཟངས་དང་ལྕགས།ཞ་ཉེ་ལ་སོགས་པའི་རིན་པོ་ཆེའི་གཏེར་གྱིས་བྱུར་བུར་གཏམ་ས། ཆུ་བྱ་ངང་ངར་དང་འཇོལ་མོ་ཁྲུང་ཁྲུང་སོགས་ཀྱིས་བྱ་སྐད་སྙན་མོ་སྒྲོག་ས། རི་དྭགས་ལ་གླ་བ་དང་ཤྭ་བ། གཉན། གནའ་བ་རྐྱང་ལ་སོགས་པ་བག་ཡངས་སུ་རྩེན་པའི་གནས་བཟང་པོ་ངང་ཡག་གསེར་གྱི་གོང་ཁའི་བྱང་འདབ། གནས་བཟང་པོ་གཡུ་སྒང་ལྷ་རི་འོད་འབར་གྱི་མདུན་ཁར་ཡོད་ལ། རང་བྱུང་ཆུ་ཚན་གྱི་ཁུངས་སུ་གཏོགས་པའི་སྨན་ཆུ་འདི་ལ། ནད་རིགས་དག་ཞི་བར་བྱེད་པའི་ཆུ་མིག་བགྲང་གིས་མི་ལངས་པ་ཡོད།
གཙོ་བོའི་ཆུ་མིག་གསུམ་ཡོད་དེ། སྟོད་དུ་ཅོང་ཞི་དང་རྡོ་སོལ་འདྲེས་པ་ལས་བྱུང་བའི་ཆུ་ཚན་བསིལ་དྲོད་སྙོམས་པ། བཏུང་ན་བད་ཀན་སྐྱ་སེར་དང་མཁྲིས་པའི་ནད། ཕོ་བ་དང་རྒྱུ་ལོང་གི་ནད་དག་ལྷག་མེད་དུ་འཇོམས་ནུས་པ་ཡོད་ལ། དེའི་ཉེ་འཁྲིས་སུ་བཀྲུས་ན་མིག་ནད་སྐམ་ཚག་དང་སྐྱ་འགྲིབས་ལིང་ཐོག་སོགས་ལ་ཕན་པའི་རོ་མི་གསལ་ཞིང་བསིལ་དྲོལ་སྙོམས་པའི་མིག་སྨན་ཆུ་ཚན་ཡོད། སྨད་དུ་རྡོ་སོལ་དང་མི་ཟི་འདྲེས་པ་མྱངས་ན་མི་ཟིའི་དྲི་བྲོ་བ། ཆུར་ཞུགས་པས་དྲེག་གྲུམ་དང་ཆུ་སེར་གྱི་ནད་དང་གླང་ཤུ་སོགས། པགས་ནད་མཐའ་དག་ལྷག་མེད་དུ་འཇོམས་པའི་ཆུ་ཚན་འདིར་དབྱར་སྟོན་གྱི་དུས་ཚིགས་སླེབས་པ་ན་སྟོད་གྱི་མགོ་ལོག་དང་བྱང་གི་སོག་པོ་སྨད་ཀྱི་རྒྱ་དང་ཁ་ཆེ་སོགས་འདུས་པའི་ནད་པ་མང་པོ་ཕྱོགས་སོ་སོ་ནས་འདིར་བདུད་རྩི་ཆུ་ཚན་ལ་ཕེབས་པ་ཡོད་དོ།།