༄༅།།དགེ་འཕེལ་རི་ཁྲོད།

དགེ་འཕེལ་རི་ཁྲོད་ནི་ལྷ་སའི་རི་ཆེན་བཞི་ཡི་ཡ་གྱལ་ཡིན་ཞིང་། རི་སྟེང་དུ་དགེ་འཕེལ་རི་ཁྲོད་དང་། རི་གཤམ་དུ་དཔལ་ལྡན་འབྲས་སྤུངས་དགོན་པ། གནས་ཆུང་རྡོ་རྗེ་སྒྲ་དབྱངས་གླིང་། དན་བག་གྲོང་སྡེ་བཅས་རིམ་པ་ལྟར་ཆག་གནས་ཡོད། གནས་དེ་ནི་ཤིན་ཏུ་དབེན་ཞིང་ས་དཔྱད་ལེགས་པ་སོགས་དགེ་མཚན་བརྗོད་ཀྱི་མི་ལངས་པ་ཡོད་དོ། དེ་ཡང་ཐོག་མར་པཎ་ཆེན་སྐུ་ཕྲེང་བཞི་པ་བློ་བཟང་ཆོས་ཀྱི་རྒྱལ་མཚན་མཆོག་ནས་བོད་རབ་བྱུང་བཅུ་པའི་སྤྱི་ལོ་༡༦༡༧ལོའི་གཡས་གཡོན་དུ་ཕྱག་བཏབ། པཎ་ཆེན་སྐུ་ཕྲེང་བཞི་པ་བློ་བཟང་ཆོས་ཀྱི་རྒྱལ་མཚན་མཆོག་གི་འཁྲུངས་ཡུལ་གཙང་སྟོད་ལྷན་དྲུག་བརྒྱ་བའི་སྤིའུ་ཞེས་པའི་ཡུལ་དུ་ཡབ་ཚེ་དབང་ཀུན་དགའ་འོད་ཟེར་དང་། ཡུམ་ཚེ་རྒྱལ་གཉིས་ཀྱི་སྲས་སུ་འཁྲུངས། སྐུ་ཉིད་ཀྱི་མཛད་པ་ཤིན་ཏུ་མང་རུང་འདིར་ཡིག་ཚོགས་ལ་འཇིགས་པས་མི་བརྗོད་དོ། སྐུ་ཉིད་སེ་འབྲས་གཉིས་ཀྱི་མཁན་པོ་གཅིག་ལྕོག་ལོ་དྲུག་གནང་རིང་དགེ་འཕེལ་རི་ཁྲོད་ཕྱག་བཏབ་གནང་ནས་ཆོས་ཀྱི་འཁོར་ལོ་བསྐོར་ཞིང་སངས་རྒྱས་ཀྱི་བསྟན་པ་ཉི་མ་འཆར་བ་ལྟར་སྤེལ་བ་མཛད། གནས་དེའི་གཡས་གཡོན་དུ་བླ་མ་སྐྱེས་ཆེན་དམ་པ་ཀུན་མཁྱེན་དམ་པ་ཀུན་མཁྱེན་འཇམ་དབྱངས་བཞད་པ་ངག་དབང་བརྩོན་འགྲུས་དང་། གྲུབ་ཐོབ་དཔའ་བོ་རྡོ་རྗེ། ཀློང་རྡོལ་བླ་མ་རིན་པོ་ཆེ་སོགས་ཀྱི་སྒྲུབ་ཁང་མང་པོ་མཇལ་རྒྱུ་ཡོད། ལྷག་པར་ཏཱ་ལའི་བླ་མ་སྐུ་ཕྲེང་ལྔ་པ་དང་། སྐུ་ཕྲེང་བདུན་པ་སྐལ་བཟང་རྒྱ་མཚོ་མཆོག་རི་ཁྲོད་འདིར་ཡུན་རིང་བཞུགས་མྱོང་ཡོད་པ་དང་། དགེ་འདུན་ཡང་དྲུག་བཅུ་ལྷག་ཙམ་ཡོད་པར་གྲགས། སྔར་ནས་དེའི་རྟེན་དུ་པཎ་ཆེན་བློ་བཟང་ཆོས་རྒྱན་གྱི་ཐུགས་དམ་རྗེ་གནམ་གཟིགས་མ་གསུང་བྱོན། ཚེ་ལྷ་རྣམ་གསུམ། སྒྲོལ་མ་གསུང་བྱོན། ཀློང་རྡོལ་བླ་མའི་སྐུ་བརྙན་གསུང་བྱོན། གནས་རྟེན་བཅུ་དྲུག གསེར་བྲིས་འབུམ་པོད་དང་བརྒྱད་སྟོང་པ་སོགས་རིན་ཐང་བྲལ་བའི་རྟེན་རྫས་མང་དག་ཡོད་པར་འཁོད།