༄༅།།ཁུ་ནུ་རི་བོ་ལ་རྒྱུས་ལོན་ཅུང་ཙམ་གནང་རོགས།

ཁུ་ནུ་རི་བོ་ནི་རང་རྒྱལ་ནུབ་རྒྱུད་ཀྱི་བོད་རང་སྐྱོང་ལྗོངས་དང་ཞིན་ཅང་ཡུ་གུར་རང་སྐྱོང་ལྗོངས་གཉིས་ཀྱི་བར་མཚམས་ན་ཡོད་ཅིང་། རི་བོ་འདིའི་རི་རྒྱུད་ནུབ་ནས་ཤར་དུ་བསྲིངས་ཏེ་མཚོ་སྔོན་ཞིང་ཆེན་གྱི་ཁོངས་གཏོགས་སུ་རིང་ཚད་ལ་སྟོང་སྨི2500ཙམ་ཟིན་པ་དང་། དེ་ལ་ཤར་དང་དབུས། ནུབ་བཅས་དུམ་མཚམས་གསུམ་དུ་དབྱེ་ཡོད།
མཚོ་སྔོན་ཞིང་ཆེན་ནུབ་རྒྱུད་ཀྱི་ཁུ་ནུ་རི་བོ་ནི་ཤར་ཁུ་ནུ་དང་དབུས་ཁུ་ནུ་གཉིས་ཀྱི་འབྲེལ་མཚམས་ཡིན་ལ། དེའི་ཤར་ཕྱོགས་ནི་ཤར་ཁུ་ནུ་ཡིན་ཞིང་། ཨ་མྱེས་རྨ་ཆེན་རི་བོ་དང་བ་ཡན་ཧ་རི་སོགས་ཡོད་པ་ལས། མཚོ་སྔོན་ཞིང་ཆེན་ལྷོ་བྱང་གཉིས་སུ་བགོས་ཡོད། ཤར་རྒྱུད་ཀྱི་ས་བབ་མཐོ་ཚད་ལ་ཆ་སྙོམས་བྱས་ན་སྨི4500ནས5000ཙམ་ཡོད།
ཤར་ཁུ་ནུའི་ལྷོ་ཕྱོགས་ནི་གཙང་གསུམ་འབྱུང་ཡུལ་ཡིན་ལ། ཤར་ནུབ་བྱང་གསུམ་གྱི་མཁའ་རླུང་རྒྱུ་བའི་དབང་གིས། ཨེ་ཤ་ཡ་ཤར་མ་དང་རྒྱ་གར་གྱི་དུས་རླུང་གིས་སྒུལ་བའི་ལྷོ་ནུབ་ཀྱི་དྲོད་རྒྱུན་མཁའ་རླུང་དང་ནུབ་ཕྱོགས་ཀྱི་མཁའ་རླུང་གཉིས་འཕྲད་པ་ལས། ཡུལ་འདིའི་ཆར་འབབ་ཚད་མང་སྟབས། རྨ་ཆུ་དང་འབྲི་ཆུ། རྫ་ཆུ་གསུམ་བྱུང་ཡོད། 
ཤར་ཁུ་ནུ་ཁུལ་གྱི་མཚོ་དང་མཚེའུ་ཡངས་ཤིང་ཆེ་ལ། མཚོ་སྐྱ་རེངས་ལྟ་བུ་ལ་རྒྱ་ཁྱོན་སྟོང་སྨི་གྲུ་བཞི་མ600ལྷག་ཡོད། རི་རྒྱུད་ནས་འཁྱགས་ཀླུང་ཆགས་པ་དང་གངས་རི་བཞུས་པ་ལས་གཙང་པོ་གྲུབ་ཅིང་། དེ་་དང་ཆར་ཆུ་ཟུང་གིས་རི་འདབས་ཀྱི་རྩྭ་ཐང་གསོས་ཡོད། རྩྭ་ཆུ་འཛོམས་པའི་རྩྭ་ཐང་དུ། སྲོག་ཆགས་མང་པོ་འཚོ་ཡོད་ལ། མཚོ་དང་མཚེའུ་རུ་གངས་རི་དང་སྤྲིན་པ་སོགས་འཆར་པ་ལས། ལྷང་འཇགས་ཞི་གནས་ཀྱི་རྣམ་པ་ཞིག་ཏུ་སྣང་།
དབུས་ཁུ་ནུ་ནི་ཁུ་ནུ་རི་བོ་ནས་ཁྱུང་རྩེ་ཐར་དགེ་ས་ཆའི་བར་གྱི་མཚམས་ཡིན་ལ། འདི་ནི་ཐ་ལི་མུའུ་གཞོང་ས་དང་མདོ་དབུས་མཐོ་སྒང་གཉིས་ཀྱི་བར་ནས་ཤར་ནུབ་ཕྱོགས་ལ་བསྲིངས་ཡོད་ཅིང་། ས་བབ་མཐོ་ཚད་ལ་ཆ་སྙོམས་བྱས་ན་སྨི5000ནས5500བར་ཡོད།
ཞིན་ཅང་དང་མཚོ་སྔོན་འབྲེལ་མཚམས་བར་གྱི་ཨར་དགེ་རི་བོའི་གཙོ་རི་ནི་མཐོ་ཚད་ལ་སྨི6800ཡོད་པའི་པུ་ཁ་སྟག་ཕུ་རི་བོ་ཡིན་ལ། རི་འདབས་སུ་ཉི་མ་མཚེའུ་ལས་སྔོ་རིགས་ཅི་ཡང་མེད་སྟབས། ས་རྒོད་ཁོ་ནར་སྣང་།
དབུས་ཁུ་ནུའི་ལྷོ་བྱང་ཕྱོགས་གཉིས་ཀར་ས་སྟོང་མང་ལ། བྱང་ཕྱོགས་ནི་ཨར་ཅིན་ཧྲན་མི་མེད་ཁུལ་ཡིན་པ་དང་། ལྷོ་ཕྱོགས་ནི་ཨ་ཆེན་གངས་རྒྱབ་ཀྱི་ས་ཆ་ཡིན། ཨ་ཆེན་གངས་རྒྱབ་ཀྱི་ས་ཆའི་རྒྱ་ཁྱོན་ལ་སྟོང་སྨི་གྲུ་བཞི་མ་ཁྲི60ཙམ་ཡོད་ལ། ས་བབ་མཐོ་ཚད་ལ་ཆ་སྙོམས་བྱས་ན་སྨི5000གི་ཡན་ཡོད་སྟབས། “མཐོ་སྒང་གི་མཐོ་སྒང”གི་བྱང་ཐང་ཞེས་འབོད། འཚོ་གནས་ཁོར་ཡུག་གི་ཆ་རྐྱེན་ཧ་ཅང་ཞན་པ་དང་མིའི་རིགས་སྡོད་མཁན་མེད་པའི་དབང་གིས། འོ་འཐུང་སྲོག་ཆགས་ཆེ་གྲས་རིགས་ནི་ཡུལ་འདིའི་བདག་པོར་གྱུར་ཡོད་ལ། གཙོད་དང་འབྲོང་། རྐྱང་སོགས་རང་དགར་འཚོ་ཡོད།
ནུབ་ཁུ་ནུ་ནི་རང་རྒྱལ་ནུབ་བྱང་གི་མཐའ་མཚམས་སུ་ཉེ་ལ། རི་བབ་ཀྱང་ནུབ་བྱང་ནས་ཤར་ལྷོའི་ཕྱོགས་ལ་བསྲིངས་ཏེ་ལྷོ་ནུབ་ཕྱོགས་ཀྱི་ཁ་ལ་ཁུ་ནུ་རི་བོ་ལ་གཤིབ་ནས་ཡོད་པས། ཀྲུང་གོའི་ནུབ་རྒྱུད་ཀྱི་ཆེས་བརྗིད་ཉམས་ལྡན་པའི་རི་བོའི་ཚོགས་ཤིག་གྲུབ་ཡོད།
ཡུལ་འདིའི་ས་བབ་མཐོ་ཚད་ལ་ཆ་སྙོམས་བྱས་ན་སྨི5500ནས6000ཙམ་ཡོད་ལ། རི་སྒང་མང་པོ་ཤར་ནས་ནུབ་ཏུ་བསྲིངས་པ་དང་རིམ་པར་ཇེ་མཐོ་ཡིན། དཔེར་ན་སྨི7509ཡི་དམུ་སྲི་ཐ་ཀེ་རི་བོ། སྨི7530ཡི་ཀུན་དགའ་དགུ་འཕེལ་གཙོ་རི། སྨི7649ཡི་གོང་དཀར་རི་བོ་སོགས་ཡོད།
བརྗིད་ཉམས་དོད་པའི་རི་བོའི་ཚོགས་འདི་ཡིས་ནུབ་ཕྱོགས་ནས་རྒྱུ་བའི་ཆུ་རླངས་ཚང་མ་རྡུལ་དུ་བརླག་པ་ལས། རྒྱ་ཁྱོན་ལ་སྟོང་སྨི་གྲུ་བཞི་མ21000ཡོད་པའི་འཁྱགས་ཀླུང་ཁུལ་གྲུབ་ཅིང་། རྒྱང་རིང་ནས་མཐོང་བ་ནི་གངས་རི་དང་དགུང་སྔོན་པོ་གཉིས་སྦྲེལ་བ་དེ་ཡིན།
ཁུ་ནུ་རི་བོ་ནི་ངོ་མཚར་རྨད་བྱུང་གི་ལྷའི་ཕོ་བྲང་ལྟ་བུ་ཞིག་མིན་ལ། དེ་ནི་དངོས་ཡོད་ཀྱི་རི་རྒྱུད་ཅིག་ཡིན། དེ་ན་ཡོད་པའི་རི་བོ་ཚང་མའང་གཅིག་ལས་གཅིག་མཐོ་བ་ཡིན། ཁུ་ནུ་རི་རྒྱུད་དུ། རྡོ་ཆེན་པོ་སྤུངས་ནས་ཡོད་ལ། འཁྱགས་ཀླུང་དང་གཙང་པོ་བཀང་ནས་ཡོད། གྲང་རླུང་འུར་འུར་དུ་ལྡང་ལ། གཅན་གཟན་རང་དགར་རྒྱུ། ཡིན་ནའང་། ཁུ་ནུ་རི་བོའི་གསང་བ་ངོ་མ་དེ་ནི། སྔར་བཞིན་ཁུ་ནུ་རི་རྒྱུད་ཀྱི་རི་བོའི་ཚོགས་ཀྱི་ཁྲོད་ན་ཡོད།