སྒེའུ་ལྷ་མོ་སྤུན་གསུམ་ངོ་སྤྲོད་མདོར་བསྡུས།

        སྒེའུ་ལྷ་མོ་སྤུན་གསུམ་ནི་མཚོ་ལྷོ་བོད་རིགས་རང་སྐྱོང་ཁུལ་མང་རྫོང་སུམ་མདོ་གྲོང་རྡལ་སྲིད་གཞུང་གི་ཤར་ཕྱོགས་སུ་ཕལ་ཆེར་སྤྱི་ལེ50ཡི་མཚམས་ན་ཡོད་པའི་སྒེའུ་ལྷ་མོ་ཞེས་པའི་རྫ་རི་དེ་ཡིན་ཞིང་། རི་སྟོད་རྫ་བྲག་དང་རི་འདབས་སྤང་རི་ཡིན་ལ། གྲོང་རྡལ་འདིའི་མངའ་ཁོངས་ཀྱི་ཆེས་ཆེ་བའི་རི་རྒྱུད་ཅིག་ཡིན། ཤར་ནས་ནུབ་ཏུ་མཆེད་པ་དང་། འདི་ན་བསྟར་ཆགས་སུ་རི་རྩེ་གསུམ་ཡོད་པ་ལས་ཆེས་མཐོ་བའི་མཐོད་ཚད་ལ་མཚོ་ངོས་ལས་སྨི4868དང་། འབྲིང་བའི་མཐོ་ཚད་ལ་མཚོ་ངོས་ལས་སྨི4832དང་། ཆུང་བའི་མཐོ་ཚད་ལ་མཚོ་ངོས་ལས་སྨི4778ཡོད། སའི་གོ་ལའི་བྱང་གི་འཕྲེད་ཚད35°31"ནས་ཤར་གྱི་གཞུང་ཚད100°55"ཡི་མཚམས་ན་ཡོད།

        དེ་ནི་མཚོ་ལྷོའི་མང་རྫོང་སུམ་མདོ་གྲོང་རྡལ་དང་། ཁྲི་ཀ་རྫོང་། རྨ་ལྷོའི་རྩེ་ཁོག་བཅས་ཀྱི་འབྲེལ་མཚམས་སུ་གནས་པས། རྫོང་འདི་གསུམ་གྱི་རོང་འབྲོག་གི་སྡེ་བ་མང་པོས་མཆོད་ཅིང་། མཆོད་བསྟོད་ཀྱི་དུས་ལ་ངེས་པ་མེད། གནས་རི་འདིའི་རྟེན་མོ་ལྷ་ཡིན་པ་དང་། ན་ཆུང་མའི་ཆ་ལུགས་འཛིན་ཞིང་། སྐུ་མདོག་དཀར་ལ་དམར་པོའི་མདངས་ཆགས་པ། གོས་ལྗང་གསེར་རིས་ཅན་གྱི་ལྭ་བ་གསོལ་ཞིང་། སྐྲ་རྒྱན་ལ་མུ་ཏིག་དང་ཉ་ཕྱིས། གཡུ་བྱུར་གྱིས་མཛེས་པར་སྤྲས་པ། ཕྱག་མཚན་ལ་མདའ་དར་དང་ནོར་བུ་མནབས་ཤིང་། ཆིབས་སུ་ཤྭ་བ་ཡུ་མོ་རེ་བཅིབས་ཡོད། སྒེའུ་ལྷ་མོ་ཞེས་པ་ནི་ནམ་རྒྱུན་རི་དྭགས་དགོ་བའི་ཕྲུ་གུར་བདག་སྐྱོང་དང་སྲུང་སྐྱོབ་བྱེད་པས་དེ་ལྟར་ཐོགས་ཟེར། དེ་ཡང་ཡིན་སྲིད་དེ། སྔོན་དུས་སུ་གནས་འདིར་དོམ་དང་དྲེད། ཤྭ་བ། དགོ་བ། གནའ་བ། གླ་བ། སྤྱང་ཀི རི་བོང་། བྱ་ཝང་། དེ་བོ། གོང་མོ་སོགས་རི་དྭགས་དང་འདབ་ཆགས། གླིང་ལ་གླང་མ་དང་ལྕང་མ། སྤེན་མ། སུ་རུ། རྩི་ཏོ། རམ་པ། རི་སྒོག ཅ་རིལ་ལ་སོགས་ཡོད་མོད། ད་ལྟ་གནའ་དང་གླ་སོགས་ཉུང་དུ་འགྲོ་བཞིན་ཡོད་ཅིང་རི་དྭགས་དང་རྩི་ཤིང་གཞན་དང་། སོ་ལོ་དཀར་དམར་གཉིས་དང་། དབྱར་རྩྭ་དགུན་འབུ། མེ་ཏོག་གངས་ལྷ། གཡའ་ཀྱི་མ། ཧོང་ལེན་སོགས་ཀྱང་ཇེ་ཉུང་དུ་འགྲོ་བཞིན་ཡོད། རི་རྩེ་རྣམས་གོ་རོ་ཡིན་ཞིང་རྔམ་བརྗིད་ལྡན་ལ་ཡུལ་ལྗོངས་ཧྲིལ་བོ་ཉམས་དགའ་བ་ཞིག་ཀྱང་ཡིན།

        ངག་རྒྱུན་དུ་སྒེའུ་ལྷ་མོ་སྤུན་གསུམ་ནི་ཨ་མྱེས་རྨ་ཆེན་གྱི་སྲས་མོ་ཡིན་ཟེར་ཞིང་། བྲག་དཀར་སྤུན་གསུམ་གྱིས་ཁྲིད་དེ་བྲོས་ནས་ཡོང་སྐབས་ཟི་མའི་དམག་དཔོན་ར་མདར་ཡོང་ཞིང་། ཨ་མྱེས་བྭ་ཡན་གྱིས་བར་བཤོལ་བྱས་པ་སོགས་ཀྱི་གཏམ་རྒྱུད་མང་པོ་བཤད་རྒྱུ་ཡོད་པ་དང་། རི་རྒྱུད་འདིའི་རི་རྩེ་གསུམ་ལ་སྒེའུ་ཞེས་པའི་ལྷ་མོ་སྤུན་གསུམ་གནས་ཡོད་པས་མིང་ཡང་དེ་ལྟར་དུ་ཐོགས་ཟེར་སྲོལ་ཀྱང་ཡོད།