མངའ་རིས་སུ་གཙོད་སོགས་རྔོན་པའི་ཁྲིམས་འགལ་གྱོད་གཞི་ཞིག་རྩད་ཆོད་པ།

ཟླ་3ཚེས་22ཉིན། གསར་འགོད་པས་བོད་ལྗོངས་མངའ་རིས་ས་ཁུལ་གྱི་སྤྱི་བདེ་ལས་ཁུངས་ནས་ཤེས་རྟོགས་བྱུང་བ་ལྟར་ན། ཉེ་ཆར། མངའ་རིས་ས་ཁུལ་སྒེར་རྩེ་རྫོང་གི་ཉེན་རྟོག་ཕྱོགས་ཀྱིས་རི་སྐྱེས་སྲོག་ཆགས་དང་འབྲེལ་བའི་ཉེས་དོན་གྱོད་གཞི་2མྱུལ་ཞིབ་རྩད་ཆོད་བྱུང་བ་དང་། སྲིད་འཛིན་གྱོད་གཞི་1ཞིབ་བཤེར་བྱས་པས་ཁྲིམས་འགལ་དོགས་ཡོད་ཉེས་ཅན་10འཛིན་བཟུང་བྱས་པ་དང་། གཙོད་ཀྱི་མགོ་3དང་། གཙོད་པགས་25 གཙོད་ཀྱི་པགས་ཧྲུག་45བཅས་ཞིབ་བཤེར་ཐུབ་ཡོད།

ཟླ་3པ་ནས་བཟུང་། མངའ་རིས་ས་ཁུལ་སྒེར་རྩེ་རྫོང་སྤྱི་བདེ་ཅུས་ཀྱིས་རི་སྐྱེས་སྲོག་ཆགས་ཐོན་ཁུངས་ལ་གཏོར་བཤིག་བཏང་བའི་གྱོད་གཞི་བསྟུད་མར་རྩད་ཆོད་པ་དང་། ཉེན་རྟོག་ཕྱོགས་ཀྱིས་ངོ་སྤྲོད་བྱས་པ་ལྟར་ན། མངའ་རིས་ས་ཁུལ་སྒེར་རྩེ་རྫོང་སྤྱི་བདེ་ཅུས་ཀྱིས་ཟླ་3ཚེས་12ཉིན་གཙོད་རྔོན་རྒྱག་པའི་ཁྲིམས་འགལ་ཉེས་གསོག་གྱོད་གཞི་ཞིག་རྩད་ཆོད་པ་མ་ཟད། ད་དུང་ཉེས་གསོག་དོགས་ཡོད་པ་རྒྱ་ཆེ་གེ་མོ་འཛིན་བཟུང་བྱས་ཡོད། འདྲི་རྩད་བྱས་པ་བརྒྱུད་ཤེས་པར། 2018ལོའི་ལོ་མཇུག་ནས་2019ལོའི་ལོ་འགོ་བར། ཉེས་གསོག་དོགས་ཡོད་པ་རྒྱ་ཆེ་གེ་མོ་ཡིས་སྒེར་རྩེ་རྫོང་བྲག་པོ་ཤང་སྨར་མོ་གྲོ་མ་གྲོང་ཚོའི་ནང་ཁོངས་སུ་སྦག་སྦག་བཞོན་ནས་གཙོད་ལ་རྡུང་སྟེ་གཙོད་3རྔོན་བརྒྱབ་ཡོད་པ་རེད།
དེ་དང་དུས་མཚུངས། སྒེར་རྩེ་རྫོང་ཉེན་རྟོག་ཕྱོགས་ཀྱིས་ནགས་ཚལ་སྤྱི་བདེ་སོགས་འབྲེལ་ཡོད་སྡེ་ཁག་དང་མཉམ་འབྲེལ་ཐོག བྲག་པོ་ཤང་བྲག་དམར་རིང་གྲོང་ཚོ་ནས་ཁྲིམས་འགལ་ངང་རྔོན་རྒྱག་པ་དང་། རྩ་ཆེ་ཞིང་སྟོངས་ལ་ཉེ་བའི་རི་སྐྱེས་སྲོག་ཆགས་ཉོ་ཚོང་བྱེད་པའི་ཉེས་གསོག་ཚོགས་པ་ཞིག་གྲུབ་འབྲས་ཐོབ་པའི་ངང་རྩད་ཆོད་བྱུང་ཡོད། ཞིབ་བཤེར་བྱས་པར་བརྒྱུད། ཉེས་གསོག་དོགས་ཡོད་པ་དབང་ཆེ་གེ་མོ་སོགས་མི་6གིས་གཙོད་རྔོན་བརྒྱབ་ནས་ཉོ་ཚོང་བྱས་པའི་ཉེས་གསོག་དོན་དངོས་ངོས་ལེན་ཞུས་ཡོད།
མིག་སྔར། གྱོད་གཞི་གཉིས་གོམ་གང་མདུན་སྤོས་མྱུལ་ཞིབ་བྱེད་བཞིན་ཡོད།