༄༅།།རྨ་ཆུའི་མགོ་ཁུངས་ཀྱི་སྐྱེ་ཁམས་སོ་ལྟ་བ།

       ལོ་ངོ་བཅུ་གསུམ་གྱི་ཡར་སྔོན་དུ་དགེ་ཆོས་ཀྱི་ཨ་ཕ་ཚེ་ལས་འདས་སྐབས་ཁོ་ལ་ཁ་ཆེམས་ཤིག་བཞག་ཡོད་དེ། རྨ་ཆུའི་ཆུ་མགོ་ལ་གནའ་ནས་ད་བར་དུ་རང་ཉིད་གཙོ་བྱས་ཏེ་མཐའ་འཁོར་གྱི་མི་ཚང་མས་བདག་སྐྱོང་བཟང་པོ་བྱས་པ་ཡིན་ལ། ཁྱོད་ལ་མཚོན་ནའང་གནས་འདིར་སྦག་བཙོག་ཐེབས་སུ་མ་བཅུག་པར་ཆུ་མགོའི་མཐའ་འཁོར་གྱི་རི་དྭགས་དེ་དག་ལ་སྲུང་སྐྱོང་བཟང་པོ་ཞིག་བྱེད་དགོས་ཞེས་བཤད་ཡོད། མཇུག་མཐའི་ཞལ་ཆེམས་དྲོན་མོ་དེས་བསྐྲུན་པའི་ཆོད་སེམས་བརྟན་པོ་ཞིག་གིས་དགེ་ཆོས་ཁོ་རང་ལ་མཚོན་ན་ཆུ་མགོ་དེ་ནི་རང་གི་དཔྲལ་བའི་མིག་དང་ཁོག་གི་སྙིང་ལྟར་གཅེས་སྐྱོང་བཟང་པོ་བྱེད་བཞིན་ཡོད།
      དེ་མིན་ལོ་འགའི་སྔོན་དུ་རྨ་སྟོད་ཤང་སྲིད་གཞུང་དང་དགུ་གཡང་སྡེ་དམངས་ཨུ་ཡོན་ལྷན་ཁང་གིས་ཀྱང་དགེ་ཆོས་ལ་རྨ་ཆུའི་ཆུ་མགོའི་སྐྱེ་ཁམས་ཁོར་ཡུག་ལ་སྲུང་སྐྱོང་བཟང་པོ་བྱ་དགོས་པར་མངགས་བཅོལ་བྱས་ཡོད་དེ། རྨ་ཆུའི་ཆུ་མགོ་ནི་ཁོའི་རྩྭ་སའི་ནང་དུ་ཡོད་ལ། དགེ་ཆོས་ཁོ་རང་ངོས་ནས་ཀྱང་ཆུང་དུས་ནས་བཟུང་ཆུ་མགོར་སྲུང་སྐྱོང་བྱེད་པའི་འདུ་ཤེས་བཟང་པོ་ཞིག་ཡོད་པས། རྗེས་སུ་འབྲེལ་ཡོད་སྡེ་ཁག་གི་རོགས་དངུལ་ལེན་ཞོར་དུ་རྨ་ཆུའི་མགོ་ཁུངས་ཀྱི་སྐྱེ་ཁམས་ལ་བདག་སྐྱོང་བཟང་པོ་བྱ་དགོས་པའི་རེ་བ་བཅོལ་གདམས་བྱས་ཡོད། དེ་བས། དགེ་ཆོས་ཀྱིས་རང་གི་ཕ་དྲིན་ཅན་གྱི་ཁ་ཆེམས་དང་ཤང་སྲིད་གཞུང་གི་བཅོལ་གདམས་དེ་རྒྱུད་ནས་མ་དོར་བར་ནམ་རྒྱུན་ཆུ་མགོ་ནས་བཟུང་སྟེ་ཆུ་བོའི་འབབ་རྒྱུན་གྱི་གད་སྙིགས་གཙང་སེལ་ལ་ནུས་པ་བླ་མེད་འདོན་བཞིན་མཆིས། གནས་དེར་ཕྱོགས་གང་ཡིན་གྱི་ལྗོངས་རྒྱུ་བ་སུ་ཞིག་ཐོན་ནའང་དེ་དག་རེ་རེའི་རྗེས་དེད་ནས་ཆུ་མགོར་གནོད་སྐྱོན་གཏོང་གིན་ཡོད་མེད་ལ་ལྟ་རྟོག་གང་ལེགས་བྱེད་བཞིན་ཡོད།       ཉེ་བའི་ལོ་འགའི་སྔོན་དུ་རྨ་སྟོད་ཡུལ་ཚོ་དང་དགུ་ཡང་སྡེ་དམངས་ཨུ་ཡོན་ལྷན་ཁང་གིས་རྨ་ཆུའི་ཆུ་མགོར་འགྲོ་མཁན་ལ་ཆེད་དུ་རླངས་འཁོར་གཉིས་བཀོད་སྒྲིག་བྱས་ཡོད་དེ། མི་སྒེར་གྱི་རླངས་འཁོར་བསྐོར་ནས་རྨ་ཆུའི་ཆུ་མགོའི་ཁྱིམ་ཚང་དང་པོར་སླེབས་རྗེས། ཆེད་སྤྱོད་ཀྱི་རླངས་འཁོར་ལ་བསྡད་ནས་ཆུ་མགོར་འགྲོ་ཆོག དགེ་ཆོས་ཀྱིས་བཤད་རྒྱུར། མི་སྒེར་གྱི་རླངས་འཁོར་བསྐོར་ནས་སོང་ན་མི་ལ་ལ་རྩྭ་སའི་ནང་གི་བགྲོད་ལམ་བརྒྱུད་ནས་མི་འགྲོ་བར་གང་འདོད་ལྟར་དུ་འགྲོ་བཞིན་ཡོད་པས། རྩྭ་སར་གཏོར་བརླག་ཚབས་ཆེན་ཐེབས་འགྲོ། རྗེས་སུ་གོང་རིམ་གྱིས་འདི་ལྟར་བཀོད་སྒྲིག་བྱས་པས་རྩྭ་སའི་བདག་དོམ་ལ་ནུས་པ་གལ་ཆེན་ཐོན་ཡོད་ཟེར།
      ཡུལ་སྐོར་བ་རྣམས་ཆུ་མགོ་ཡོད་སའི་གནས་དེར་ཐོན་ཚེ་སྐོམ་ཆུའི་རིགས་དང་ཟས་རིགས་ཀྱི་ཁུག་མ་གནས་དེར་གཡུག་མཁན་ཡོད་ཚེ། དགེ་ཆོས་ཀྱིས་ཐོག་མར་ཁོ་ཚོར་ཁོར་ཡུག་སྲུང་སྐྱོང་གི་དགོས་གལ་རང་བཞིན་བཤད་ནས་འཐུ་རུ་འཇུག་བཞིན་ཡོད་ལ། ཁོའི་སྐད་ཆར་མི་ཉན་མཁན་དང་འཕྲད་ཚེ་ཁོ་རང་གིས་འཐུས་ནས་གད་སྙིགས་གསོག་སའི་གནས་སུ་སྐྱེལ་བཞིན་ཡོད། དེར་མ་ཟད་ཆུ་མགོའི་ཁར་ཐོན་ཚེ་ཡུལ་སྐོར་བ་རྣམས་ཀྱིས་ཐ་མག་རྐང་གཅིག་ཀྱང་འཐེན་མི་ཆོག་པའི་སྒྲིག་ལམ་བཟོས་ཡོད། རྨ་ཆུའི་ཆུ་མགོའི་མཐའ་འཁོར་དུ་ཤིང་དྲས་བསྐོར་ཡོད་ལ། དེ་ལས་ཆུ་གཏེར་ལེན་པའམ་ཡང་ན་ཆུ་མཆོད་འཕེན་དགོས་ཚེ། ཤིང་དྲའི་ཕྱི་ནས་ལེན་རྒྱུ་མ་གཏོགས་ཤིང་དྲའི་ནང་ལོག་ཏུ་གཏན་ནས་འགྲོ་མི་ཆོག་སྟེ། དེའི་རྒྱུ་མཚན་ནི་ཆུ་མགོར་སྦག་བཙོག་ཐེབས་ཚེ་ཆུ་མགོ་སྐམ་འགྲོ་བའི་གནས་ཚུལ་འབྱུང་སྲིད་པས་དེའི་རིགས་བྱེད་མི་ཆོག་པར་བཟོས་ཡོད། དགུ་གཡང་སྡེ་དམངས་ཨུ་ཡོན་ལྷན་ཁང་གིས་ཁོ་ལ་འཕྲུལ་རྟ་ཞིག་བཀོད་སྒྲིག་བྱས་ཡོད་དེ། དེ་ནི་ཁོས་ནམ་རྒྱུན་ཁྱིམ་ནང་ནས་ཆུ་མགོའི་བར་དུ་འགྲོ་སྤྱད་ཡིན་ལ། ལན་རེར་ཡུལ་སྐོར་བ་ལམ་གཞན་དག་བརྒྱུད་ནས་ཆུ་མགོར་བུད་སོང་ཚེ། ཁོས་མགྱོགས་མྱུར་ངང་འཕྲུལ་རྟ་ཞོན་ནས་ཆུ་མགོའི་ཁར་སོང་ནས་ཁོ་ཚོས་གད་སྙིགས་འཕེན་པའམ། ཡང་ན་མཐའ་འཁོར་གྱི་རི་དྭགས་ལ་གནོད་པ་བཟོ་གིན་ཡོད་མེད་ལ་ལྟ་རྟོག་བྱེད་ཀྱིན་ཡོད། དེ་ལས་གཞན་པའི་དུས་ཚོད་ནང་དུ་ཁོས་ནམ་རྒྱུན་རྨ་ཆུའི་ཆུ་མགོའི་མཐའ་འཁོར་གྱི་རྩྭ་རྩི་ཤིང་གི་སྐྱེ་འཕེལ་དང་དེ་གར་རྒྱུ་བའི་རི་དྭགས་ཀྱི་གྲངས་ཀ གནམ་གཤིས་ཀྱི་དྲོད་གྲང་། ཁངས་ཆར་གྱི་འབབ་ཚད་སོགས་ཉིན་རེ་རེར་ཟིན་ཐོར་འགོད་ཞོར་དུ། ཆུ་མགོར་གནོད་སྐྱོན་མི་ཐེབས་པའི་ཆེད་དུ་རང་ནུས་ཅི་ཚོད་ཀྱིས་ནུས་པ་འདོན་བཞིན་ཡོད།
      ཡུག་གི་གཙང་ལེབ་ནས་འཚར་ལོངས་བྱུང་བའི་འབྲོག་པའི་བུ་དགེ་ཆོས་ཁོ་ལྟ་བུར་མཚོན་ན། སློབ་གྲྭར་འགྲིམས་ནས་ཤེས་རིག་སློབ་སྦྱོང་བྱེད་པའི་གོ་སྐབས་བཟང་པོ་ཞིག་མ་རྙེད་ནའང་། མེས་པོ་གོང་མ་དག་གིས་རྒྱུད་ལ་བཞག་པའི་ཁོར་སྲུང་གི་འདུ་ཤེས་བརྟན་པོ་དེ་ལྷན་སྐྱེས་ཀྱི་རྣམ་ཤེས་གསལ་པོ་དེས་རྒྱུན་བསྐྱངས་ནས། མ་ཡུམ་གཙང་པོའི་མགོ་ཁུངས་ལ་འདི་ལྟར་བདག་སྐྱོང་བྱེད་པ་ནི་ཀུན་གྱིས་སློབ་སྦྱོང་དང་ཡི་རངས་བྱ་དགོས་པའི་དམིགས་འབེན་ཉག་ཅིག་ཡིན་པ་སྨྲས་ཅི་དགོས།