logo

༄༅། །གཏེར་ལམ་འབའ་ལུང་ཡུལ་ཚོར་ཁྲུང་ཁྲུང་སྐྱ་བོའི་ཁྱུ་ཚོགས་མཐོང་།

རྩོམ་པ་པོ།:བསོད་རྡོ། ཡོང་ཁུངས།:མཚོ་སྔོན་པོ་དྲྭ་བ། དུས་ཚོད།:2022-03-24 ཀློག་གྲངས།:
༄༅། །གཏེར་ལམ་རྫོང་འབའ་ལུང་ཡུལ་ཚོའི་ལྗོངས་ཁུལ་གྱི་བརླན་ས་རུ་ཁྲུང་ཁྲུང་སྐྱ་བོའི་ཁྱུ་ཚོགས་གནས་སྤོ་བྱས་ཏེ་ངལ་གསོའི་ཁྱིམ་གཞིས་གྲུབ།
 
        ཉེ་ཆར། གཏེར་ལམ་རྫོང་གི་རི་སྐྱེས་སྲོག་ཆགས་སྲུང་སྐྱོབ་པར་ལེན་ལ་དགའ་མཁན་གྱིས་འབའ་ལུང་ཡུལ་ཚོའི་བྱང་ཕྱོགས་ཀྱི་ལྗོངས་ཁུལ་དུ་རྒྱལ་ཁབ་རིམ་པ་གཉིས་པའི་སྲུང་སྐྱོབ་རི་དྭགས་རིགས་གཉིས་པ་སྟེ་ཁྲུང་ཁྲུང་སྐྱ་བོའི་ཁྱུ་ཚོགས་གནས་འདིའི་བརླན་ས་རུ་གནས་སྤོ་བྱས་ཏེ་མཛེས་སྡུག་གི་ཁྱིམ་གཞིས་གྲུབ་ཡོད་པ་མཐོང་།
        གསར་འགོད་པས་ས་དེ་གའི་ནགས་ལས་དོ་དམ་སྡེ་ཁག་གི་འགན་ཁུར་བ་ནས་རྒྱུས་ལོན་པ་ལྟར་ན། ཁྲུང་ཁྲུང་སྐྱ་བོ་འདི་དག་བསྟུད་མར་ལོ་ངོ་གསུམ་གྱི་རིང་ལ་གནས་འདིར་རྒྱུད་སྤེལ་བྱེད་དུ་གནས་སྤོས་ནས་འཕུར་ཡོང་ཤིང་། ལོ་རེའི་སྤྱི་ཟླ་བཞི་བའི་བར་ལ་སྔ་གཞུག་བྱས་ནས་འཕུར་འོང་ལ། གྲངས་ཀའི་ཐད་ནས་ལོ་རེར་ཡར་འཕར་བཞིན་ཡོད་པ་རེད།
        སྤྱིར་བཏང་ཁྲུང་ཁྲུང་སྐྱ་བོའི་ངལ་གསོ་བྱེད་གནས་ནི་ཡངས་པའི་བདེ་ཐང་དང་རྩྭ་ས། ན་འདམ་དང་ཆུ་ཐང་སོགས་ཀྱི་ས་རྒྱུད་ཡིན་ཞིང་། ཁོ་ཚོའི་གཟན་ཆས་གཙོ་བོ་ནི་སྐྱེ་དངོས་ཀྱི་ལོ་མ་དང་གཞུང་རྟ། རྩྭ་འབྲུ་སོགས་ཡིན། ལོ་རེར་སྟོན་དུས་ཀྱི་ཟླ་གསུམ་པའི་ཟླ་སྨད་ལ་རྒྱུད་སྤེལ་བྱེད་སར་གནས་སྤོ་བྱེད་པ་ཡིན་ལ། སྟོན་དུས་ཀྱི་ཟླ་དགུ་བའི་ཟླ་མཇུག་ནས་ཟླ་བཅུ་བའི་ཟླ་མགོར་དགུན་དུས་ཀྱི་གནས་མལ་བྱེད་སར་འཕུར་འགྲོ་བ་ཡིན་ཞིང་། གནས་སྤོ་འཕུར་སྐྱོད་བྱེད་དུས་བྱ་ཁྱུ་ཁྱིམ་རྒྱུད་བྱེད་པ་དང་ཁྱུ་ཚོགས་ཆེ་ཆུང་འགའ་ལ་དབྱེ་ནས་འཕུར་འགྲོ་བ་ཡིན་ལ། བྱ་ཁྱུ་གཅིག་ལ་ཁྲུང་ཁྲུང་སྐྱ་བོ་བཞི་ཅུ་ནས་ལྔ་བཅུ་བར་ཡོད་པ་རེད།
        ཁྲུང་ཁྲུང་སྐྱ་བོ་འདི་འདྲ་མང་པོ་ཞིག་བསྟུད་མར་ལོ་ངོ་གསུམ་གྱི་རིང་ལ་གནས་འདིར་གནས་ཚང་བཅས་ཏེ། གནས་འདི་ནི་ཁོ་ཚོའི་འཚོ་སྡོད་དང་གནས་སྤོར་ལྗོངས་རྒྱུ་རུ་བྱས་པ་ནི་ཁྲུང་ཁྲུང་སྐྱ་བོ་ལ་འཚམས་པའི་གནས་ཚང་ཡིན་པ་གདོན་མི་ཟ་ལ། ས་འདི་གའི་མང་ཚོགས་ཀྱིས་ཀྱང་རི་སྐྱེས་སྲོག་ཆགས་ལ་སྲུང་སྐྱོབ་བྱེད་པའི་འདུ་ཤེས་མཐོ་རུ་སོང་ནས། སྐྱེ་ཁམས་ཁོར་ཡུག་ལེགས་བཅོས་ཀྱིས་གནས་འདིའི་སྐྱེ་དངོས་དང་རྩུ་ཆུ་འཛོམས་པོ་ཡོང་ནས་སྐྱེ་ཁམས་དོ་མཉམ་གྱི་རྣམ་པ་ཡག་པོ་མངོན་བཞིན་ཡོད་པ་རྟོགས།
        རྒྱལ་ཁབ་ཀྱིས་ཕྱོགས་ཡོངས་ནས་ཆུ་བོ་དང་མཚེའུ་དཔོན་ལམ་ལུགས་ལག་བསྟར་བྱས་པའི་ཚུན་ལ། གཏེར་ལམ་རྫོང་གིས་སྐྱེ་ཁམས་དཔལ་ཡོན་འཛུགས་སྐྲུན་མུ་མཐུད་སྐུལ་འདེད་བྱས་ཤིང་། བརླན་སའི་ཐོན་ཁུངས་དང་ནགས་ཚལ་དང་རྩྭ་སའི་ཐོན་ཁུངས་མཉམ་སྡེབ་ལ་ཤུགས་བསྣན་ནས། རི་སྐྱེས་སྲོགས་ཆགས་སྔར་ལས་མང་པོ་ཞིག་གསོ་སྤེལ་དང་རྒྱུད་སྤེལ་བྱེད་པར་འབད་བརྩོན་བྱས་པར།སྐྱེ་དངོས་ཀྱི་སྣ་མང་རང་བཞིན་མངོན་གསལ་སྒོས་ཇེ་མཐོར་སོང་ནས། བྱ་རིགས་འདུས་སྡོད་བྱེད་སའི་ཁྱིམ་གཞིས་བཞེངས་སྐྲུན་བྱས།
འབྲེལ་ཡོད་འོས་སྦྱོར།