འདབ་ཆགས་རྩ་ཆེན་མང་པོ་གཙང་གསུམ་འབྱུང་ཡུལ་དུ“གཏན་སྡོད”བྱས་ཡོད།

        གཙང་གསུམ་འབྱུང་ཡུལ་ནི་མདོ་དབུས་མཐོ་སྒང་གི་ལྟེ་བའི་ས་ཆ་ན་ཡོད་ཅིང་། དེ་ནི་མཐོ་སྒང་གི་སྐྱེ་དངོས་སྣ་མང་རང་བཞིན་ཆེས་འདུས་པའི་ས་ཁུལ་ཞིག་ཡིན་སྟབས། མིང་ལ“མཐོ་གྲང་སྐྱེ་དངོས་རིགས་རྒྱུད་ཀྱི་ཐོན་ཁུངས་མཛོད་ཁང”ཞེས་འབོད་པ་ཡིན།

        ས་ཆ་འདི་རུ་ནགས་ཚལ་དང་རྩྭ་ཐང་། སྡོང་ཕྲན་ནགས་རྫོབ། མཐོ་གྲང་བརླན་ས་སོགས་ཀྱི་སྐྱེ་ཁམས་མ་ལག་ཡོད་པ་དང་། ས་བབ་ས་དབྱིབས་རྙོག་འཛིན་ཆེ་བ་ལས་ཕུན་སུམ་ཚོགས་ཤིང་ཁྱད་ཆོས་འབུར་དུ་ཐོན་པའི་རི་སྐྱེས་སྲོག་ཆགས་དང་རྩི་ཤིང་གི་རིགས་རྒྱུད་མང་པོ་གནས་ཐུབ་ཡོད། འདབ་ཆགས་རིགས་ནི་སྐྱེ་དངོས་སྣ་མང་རང་བཞིན་གྱི་གྲུབ་ཆ་གལ་ཆེན་ཞིག་ཡིན་པ་དང་། མཛེས་པའི་ཀྲུང་གོ་འཛུགས་སྐྲུན་གྱི་ནང་དོན་གལ་ཆེན་ཞིག་ཀྱང་ཡིན།

        ཉེ་བའི་ལོ་ནས་བཟུང་། རང་ཞིང་གིས་ཞི་ཅིན་ཕིང་སྐྱེ་ཁམས་དཔལ་ཡོན་གྱི་བསམ་བློ་ཕྱོགས་ཡོངས་ནས་དོན་འཁྱོལ་དང་། ནུས་ཤུགས་ཆེན་པོས་རི་ཆུ་ནགས་ཞིང་མཚེའུ་རྩྭ་ཐང་བྱེ་ཐང་འཁྱགས་ཀློང་ལ་གཞི་གཅིག་ཅན་སྲུང་སྐྱོབ་དང་མ་ལག་བཅོས་སྐྱོང་གི་གཅིག་གྱུར་འཆར་འགོད་བྱས་ཏེ་རང་བྱུང་སྲུང་སྐྱོབ་ཁུལ་སྣ་ཚོགས་ལ་ལེགས་སྒྱུར་གཅིག་བསྡུས་དང་སྐྱེ་ཁམས་མ་ལག་སྲུང་སྐྱོབ་སླར་གསོ་དོན་འཁྱོལ། སྤུས་ཚད་མཐོ་བའི་རྒྱལ་ཁབ་སྤྱི་གླིང་འཛུགས་སྐྲུན། སྟོངས་ཉེན་ཡོད་པའི་རི་སྐྱེས་སྲོག་ཆགས་དང་རྩི་ཤིང་། འཚོ་གནས་ས་ཆའི་སྲུང་སྐྱོབ་ཕྱོགས་ཡོངས་ནས་ཤུགས་སྣོན་བྱེད་པ་སོགས་ཀྱི་བྱེད་ཐབས་རབ་དང་རིམ་པ་སྤེལ་བ་བརྒྱུད། ཞིང་ཆེན་ཁོངས་གཏོགས་ཀྱི་སྐྱེ་ཁམས་མ་ལག་དང་རིགས་རྒྱུད་རྩ་ཆེན་སྟོངས་ཉེན་ཡོད་པ་ལ་སྲུང་སྐྱོབ་ནུས་ལྡན་བྱས་པ་དང་། སྤྱི་ཚོགས་ཡོངས་སྲུང་སྐྱོབ་བྱ་བར་ཞུགས་པ་དང་མི་དམངས་ཀྱི་སྲུང་སྐྱོབ་འདུ་ཤེས་མངོན་གསལ་སྒོས་ཇེ་ཆེར་ཕྱིན་ཡོད།

        མིག་སྔར། རང་ཞིང་དུ་ཟིན་ཐོར་བཀོད་པའི་རི་སྐྱེས་འདབ་ཆགས་རིགས་ལ་ཁྱོན་བསྡོམས432ཡོད་ཅིང་། སྡེ21དང་ཚན་པ65 རྒྱུད203བཅས་འདུག དེའི་ནང་དུ་རྒྱལ་ཁབ་ཀྱི་རིམ་པ་དང་པོའི་སྲུང་སྐྱོབ་འདབ་ཆགས་ཁྲུང་ཁྲུང་དཀར་མོ་དང་བཞད་ནག གླག་སོགས་རིགས26ཡོད་པ་དང་། རྒྱལ་ཁབ་ཀྱི་རིམ་པ་གཉིས་པའི་སྲུང་སྐྱོབ་འདབ་ཆགས་ངང་བ་དང་ཁྲུང་སྐྱ། ཤིང་རྟ་མོ་ནག་པོ། བོད་མཆིལ་སོགས་རིགས81ཡོད།

        མཚོ་སྔོན་གྱི་རྒྱལ་ཁབ་སྤྱི་གླིང་བྱ་གཟིགས་མཐུན་ཚོགས་བཙུགས་པ་ནས་བཟུང་། རང་ཞིང་གི་དཔེ་མཚོན་སྐྱེ་ཁམས་མ་ལག་དང་ཁྱབ་ཁོངས་གཙོ་བོའི་འདབ་ཆགས་ཀྱི་གྲུབ་ཚུལ་དང་ཁྱབ་སྟངས། རིགས་རྒྱུད་གྲངས་ཀ འཚོ་གནས་ཁོར་ཡུག་འགྱུར་ལྡོག་སོགས་ཀྱི་ཕྱོགས་ལ་རྟོག་ཞིབ་མང་པོ་བྱས་པ་ལས། རྒྱུ་ཆ་དང་པོ་མང་པོ་ཐོབ་ནས་འདབ་ཆགས་ཀྱི་ཐོན་ཁུངས་གཞི་གྲངས་ཕུན་སུམ་ཇེ་ཚོགས་སུ་གཏོང་བའི་ཞོར་དུ། བྱ་རིགས་གསར་བ་ཤེས་རྟོགས་བྱུང་བའི་ཟིན་ཐོ་ཡང་མུ་མཐུད་དུ་བཏོད་དེ་རི་སྐྱེས་སྲོག་ཆགས་ལ་སྲུང་སྐྱོབ་དང་དོ་དམ་བྱེད་པའི་རྨང་གཞིའི་རྒྱུ་ཆ་རྣལ་མ་འདོན་སྤྲོད་བྱས་ཡོད།