ནགས་ཚལ་དོ་ཁུར་གྱི་བྱ་འགུལ་དེ་ཁྲི་ཀ་རྫོང་དུ་སྤེལ།

        ཟླ7པའི་ཚེས25ཉིན། “ནགས་ཚལ་ལ་དོ་ཁུར་བྱེད་པ། ལྗང་མདོག་གི་མཁར་གྲོང་ནི་གཏན་སྡོད་ཀྱི་གནས་ཡིན”ཞེས་པ་བརྗོད་དོན་ཡིན་པའི་བྱ་འགུལ་དེ་ཁྲི་ཀ་རྫོང་དུ་སྤེལ་བ་དང་། རྒྱལ་ཡོངས་སྲིད་གྲོས་མི་འབོར་ཐོན་ཁུངས་ཁོར་ཡུག་ཨུ་ཡོན་ལྷན་ཁང་གི་ཀྲུའུ་རེན་གཞོན་པ་ནེ་ཝུའེ་ཀོ་ཚོགས་འདུར་ཕེབས་པ་དང་འབྲེལ་ཤིས་ཚིག་ཕུལ། ཞིང་ཆེན་སྲིད་གྲོས་ཀྱི་ཀྲུའུ་ཞི་མགོན་པོ་བཀྲ་ཤིས་ཀྲུའུ་ཞི་སྟེགས་བུར་བུད་ནས་གཏམ་བཤད་གནང་། ཞིང་ཆེན་སྲིད་གྲོས་ཀྱི་ཀྲུའུ་ཞི་གཞོན་པའམ་ཞིང་ཆེན་དོ་ཁུར་ནགས་ཚལ་བྱ་འགུལ་རྩ་འཛུགས་ཨུ་ཡོན་ལྷན་ཁང་གི་ཀྲུའུ་རེན་ཀྲང་ཝུན་ཁུའེ་ཡིས་མགོ་འཛིན་གནང་།

        “ནགས་ཚལ་ལ་དོ་ཁུར་བྱེད་པ། ལྗང་མདོག་གི་མཁར་གྲོང་ནི་གཏན་སྡོད་ཀྱི་གནས་ཡིན”ཞེས་པ་བརྗོད་དོན་ཡིན་པའི་བྱ་འགུལ་གྱི་དམིགས་ཡུལ་ནི་སྤྱི་ཚོགས་ལས་རིགས་ཁག་གི་ལྗང་མདོག་འཕེལ་རྒྱས་ཀྱི་ཐུན་མོང་ངོས་འཛིན་གཅིག་ཏུ་སྒྲིལ་ནས་ཧུར་ཐག་སྒོས་སྐྱེ་ཁམས་དཔལ་ཡོན་འཛུགས་སྐྱོང་ནང་ཞུགས་ཏེ་གྲོང་ཁྱེར་དང་གྲོང་གསེབ་ཀྱི་ལྗང་མདོག་ཐཱན་ཉུང་འཕེལ་རྒྱས་ལ་སྐུལ་འདེད་གཏོང་རྒྱུ་དེ་ཡིན་ལ། ཉེ་ཝུའེ་གོ་ཡིས་ཤིས་ཚིག་ཕུལ་སྐབས་བཤད་རྒྱུར། སྤྱི་ཁྱབ་ཧྲུའུ་ཅིས་མཚོ་སྔོན་གྱི་སྐྱེ་ཁམས་སྲུང་སྐྱོང་ལས་དོན་ལ་ཚད་མཐོའི་མཐོང་ཆེན་གནང་ནས་མཚོ་སྔོན་གྱི་སྐྱེ་ཁམས་ཁོར་ཡུག་སྲུང་སྐྱོང་ཡག་པོ་བྱ་རྒྱུ་ནི“རྒྱལ་ཁབ་ཀྱི་དོན་ཆེན་ཡིན་པའི”མཛུབ་སྟོན་གལ་ཆེན་གནང་བ་རེད། མཚོ་སྔོན་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གིས་སྤྱི་ཁྱབ་ཧྲུའུ་ཅིའི་མཛུབ་སྟོན་གལ་ཆེན་གྱི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱས་ནས་སྐྱེ་ཁམས་སྲུང་སྐྱོང་གི་ཆབ་སྲིད་འགན་འཁྲི་གལ་ཆེན་མཐའ་གཅིག་ཏུ་འཁུར་བ་དང་། རྒྱལ་ཡོངས་ཀྱི་སྐྱེ་ཁམས་དཔལ་ཡོན་སྔོན་སྐྱོད་དཔེ་སྟོན་ཁུལ་འཛུགས་སྐྱོང་ལ་སྐུལ་འདེད་བཏང་བས་སྐྱེ་ཁམས་དཔལ་ཡོན་འཛུགས་སྐྱོང་དང་སྐྱེ་ཁམས་ཁོར་ཡུག་སྲུང་སྐྱོང་ལ་ལོ་རྒྱུས་རང་བཞིན་གྱི་གྲུབ་འབྲས་ཐོབ་ཡོད། “ནགས་ཚལ་ལ་དོ་ཁུར་བྱེད་པའི”བྱ་འགུལ་ནི་རྒྱལ་ཡོངས་སྲིད་གྲོས་མི་འབོར་ཐོན་ཁུངས་ཁོར་ཡུག་ཨུ་ཡོན་ལྷན་ཁང་དང་རྒྱལ་ཁབ་ནགས་ཚལ་རྩྭ་ཐང་ཅུའུ་སོགས་པུའུ་ཨུ་ཡིས་དར་སྤེལ་གཏོང་བའི་སྤྱི་ཕན་བྱ་འགུལ་ཞིག་ཡིན་པ་དང་། དེའི་དམིགས་ཡུལ་ནི་ནགས་ལས་འཕེལ་རྒྱས་ལ་སྐུལ་འདེད་དང་རྒྱལ་ཁབ་ཀྱི་སྐྱེ་ཁམས་ཁོར་ཡུག་འཛུགས་སྐྱོང་ལ་སྐུལ་འདེད་གཏོང་རྒྱུ་དེ་རེད། མཚོ་སྔོན་ཞིང་ཆེན་གྱིས་ནགས་ཚལ་བྱ་འགུལ་གྱི་རྩ་འཛུགས་ཨུ་ཡོན་ལྷན་ཁང་གིས་རྒྱལ་ཁབ་ཀྱི་ཁྱོན་ཡོངས་ལ་ཞབས་འདེགས་ཞུ་བ་དང་བྱ་འགུལ་གྱི་ཕན་འབྲས་ཆེ་རུ་གཏོང་བ། བྱ་འགུལ་རྟེན་གཞི་ལས་སྟེགས་གསར་གཏོད་བྱེད་པ། ནགས་ཚལ་ལ་དོ་ཁུར་བྱེད་པའི་བྱ་འགུལ་གཏིང་ཟབ་དང་རྒྱུན་སྲིང་ངང་སྤེལ་བ་བཅས་བྱས་ཏེ་སྐྱེ་ཁམས་དཔལ་ཡོན་དང་མཛེས་སྡུག་ལྡན་པའི་ཀྲུང་གོ་འཛུགས་སྐྲུན་ལ་སྐུལ་འདེད་གཏོང་ཆེད་ལེགས་སྐྱེས་གསར་བ་འབུལ་རྒྱུའི་རེ་བ་ཡོད་ཅེས་བཤད་པ་རེད།　

        མགོན་པོ་བཀྲ་ཤིས་ཀྱིས་གཏམ་བཤད་གནང་སྐབས་བཤད་རྒྱུར། ཐེངས་འདིའི་བརྗོད་དོན་གཙོ་བོའི་བྱ་འགུལ་ནི་ང་ཚོས་སྐྱེ་ཁམས་དཔལ་ཡོན་དང་བསམ་བློ་སློབ་སྦྱོང་ལག་བསྟར་གཏིང་ཟབ་བྱེད་པ་དང་། ཏང་གི་ཚོགས་ཆེན་ཉི་ཤུ་བར་བསུ་མ་བྱེད་པའི་དོན་སྙིང་ལྡན་པའི་བྱ་འགུལ་ཞིག་རེད། མཚོ་སྔོན་ཞིང་ཆེན་གྱིས2021ལོར་ནགས་ཚལ་ལ་དོ་ཁུར་བྱེད་པའི་བྱ་འགུལ་རྩ་འཛུགས་ཨུ་ཡོན་ལྷན་ཁང་དངོས་སུ་བཙུགས་ནས་ལོ་གཅིག་ལྷག་ཙམ་གྱི་རིང་ལ་ཁོངས་མིའི་ཚན་པ་ཁག་གི་ཐུན་མོང་འབད་བརྩོན་གྱི་འོག་ཏུ་ཆེད་དོན་བྱ་འགུལ་རབ་དང་རིམ་པ་སྤེལ་ནས་མཚོ་སྔོན་གྱི་ནགས་ཚལ་རྩྭ་ཐང་དང་འདམ་ར། གཙང་བོ་དང་མཚེའུ་བཅས་ཀྱི་སྲུང་སྐྱོང་ཕན་འབྲས་དྲིལ་སྒྲོག་བྱས་པ་རེད།

        མཚོ་སྔོན་གྱི་སྐྱེ་ཁམས་གནས་བབ་གལ་ཆེན་ཡིན་པ་དང་སྐྱེ་ཁམས་ཀྱི་འགན་འཁྲི་ལྕི་མོ་ཡོད་པས་ཐོག་མཐའ་བར་གསུམ་དུ་བློ་ལ་བརྟན་པོ་ངེས་ནས་སྐྱེ་ཁམས་དཔལ་ཡོན་གྱི་བསམ་བློར་བརྟེན་ནས་ནགས་ཚལ་གྱི་བྱ་འགུལ་ལ་ཁྲིད་སྟོན་དང་དོ་ཁུར་བྱས་ཏེ། སྐྱེ་ཁམས་སྲུང་སྐྱོང་དང་འཛུགས་སྐྲུན་གྱི་དྲང་ནུས་ཆེན་པོ་རྒྱ་ཁྱབ་ངང་གཅིག་སྡུད་བྱ་དགོས། མཚོ་སྔོན་ཞིང་ཆེན་གྱིས་ནགས་ཚལ་གྱི་བྱ་འགུལ་ལ་དོ་ཁུར་བྱེད་པ་དང་འབྲེལ་རྩ་འཛུགས་ཨུ་ཡོན་ལྷན་ཁང་གིས་ཞིང་ཆེན་གྱི་གནས་ཚུལ་དངོས་ལ་དམིགས་ནས་ནགས་ཚལ་གྱི་གཙོ་གནད་ལས་དོན་ཁག་ལ་གཅིག་གྱུར་འཆར་འགོད་དང་དོ་ཁུར་བྱས་ནས་ནགས་ཚལ་བྱ་འགུལ་གྱི་དངོས་ཡོད་ཀྱི་ཕན་འབྲས་ལ་དོ་ཁུར་བྱས་ཡོད་ཅིང་། ཞིང་ཆེན་ཡོངས་ཀྱི་རིམ་པ་ཁག་གི་སྲིད་གྲོས་ཀྱིས་སྲིད་གྲོས་ཨུ་ཡོན་གྱི་ལེགས་ཆ་འདོན་སྤེལ་གང་ལེགས་བྱས་ནས་རྒྱལ་ཁབ་ཀྱི་སྤྱི་གླིང་དཔེ་སྟོན་ཞིང་ཆེན་འཛུགས་སྐྲུན་སོགས་བྱེད་པའི་ཞིབ་འཇུག་བྱ་གཞི་གལ་ཆེན་དང་། མི་དམངས་མང་ཚོགས་ཀྱི་འཚོ་བའི་ཁེ་ཕན་དང་འབྲེལ་བ་ཡོད་པའི་སྐྱེ་ཁམས་གནད་དོན་ལ་དམིགས་ནས་ཐབས་ཇུས་འདོན་སྤེལ་བྱས་ཏེ་སྤུས་ཚད་མཐོན་པོས་ནགས་ཚལ་ལ་དོ་ཁུར་བྱེད་པའི་བྱ་འགུལ་ལ་སྐུལ་འདེད་གཏོང་ཆེད་ཐུན་མོང་གི་ངོས་འཛིན་བཟང་བོ་ཞིག་ཆགས་པར་བྱ་དགོས།

        བརྗོད་དོན་བྱ་འགུལ་འདི་ནི་ཞིང་ཆེན་ནགས་ཚལ་དོ་ཁུར་བྱ་འགུལ་རྩ་འཛུགས་ཨུ་ཡོན་ལྷན་ཁང་དང་ཞིང་ཆེན་སྲིད་གྲོས་གཞུང་དོན་ཐིང་གིས་གཙོ་སྒྲུབ་གནང་ཞིང་། ཁྲི་ཀ་རྫོང་དང་རྨ་ལྷོ་བོད་རིགས་རང་སྐྱོང་ཁུལ་གཅན་ཚ་རྫོང་གིས་འགན་སྒྲུབ་གནང་བ་རེད། ཞིང་ཆེན་ནགས་ཚལ་དོ་ཁུར་བྱ་འགུལ་རྩ་འཛུགས་ཨུ་ཡོན་ལྷན་ཁང་གི་ཁོངས་གཏོགས་ལས་ཁུངས་ཁག་དང་ཞིང་ཆེན་སྲིད་གྲོས་གཞུང་དོན་ཐིང་། དེ་མིན་ཆེད་དོན་ཨུ་ཡོན་ལྷན་ཁང་ཁག དམངས་གཙོའི་ཏང་ཤོག་ཁག ཞིང་ཨུ་དང་ཞིང་ཆེན་བཟོ་ཚོང་མཉམ་འབྲེལ་ལྷན་ཚོགས། གྲོང་ཁྱེར(ཁུལ)དང་རྫོང(ས་ཁུལ)ཁག་གི་སྲིད་གྲོས་ཀྱི་འགན་འཁུར་བློ་མཐུན་བཅས་ཐེངས་འདིའི་བྱ་འགུལ་ལ་ཞུགས། མགོ་རྩོམ་མཛད་སྒོའི་སྟེང་མཚོ་ལྷོ་བོད་རིགས་རང་སྐྱོང་ཁུལ་ཨུ། ཁྲི་ཀ་རྫོང་ཨུ་དང་རྫོང་མི་དམངས་སྲིད་གཞུང་གི་འགན་འཁུར་བློ་མཐུན་གྱིས་རིམ་པ་བཞིན་ཤིས་ཚིག་ཕུལ་ཏེ་སྐྱེ་ཁམས་སྲུང་སྐྱོང་ལས་དོན་སྤེལ་བའི་གནས་ཚུལ་ངོ་སྤྲོད་གནང་བ་རེད། བློ་མཐུན3གྱིས་གཞི་རིམ་སྲིད་གྲོས་དང་དམངས་གཙོའི་ཏང་ཤོག་ཁག སྲིད་གྲོས་ཨུ་ཡོན་བཅས་ཀྱི་ཚབ་བྱས་ཏེ་གཏམ་བཤད་གནང་། བྱ་འགུལ་མཇུག་སྒྲིལ་རྗེས་ཚོགས་ཞུགས་མི་སྣས་རྨ་ཆུའི་སྟོད་རྒྱུད་ཀྱི་སྐྱེ་ཁམས་སྲུང་སྐྱོང་དང་ཞིང་སྡེའི་བཅོས་སྐྱོང་ལས་གཞིར་གཟིགས་ཞིབ་གནང་ཞིང་། ཞོར་དུ་རྒྱལ་ཁབ་ཀྱི་ས་གཤིས་སྤྱི་གླིང་ལའང་ལྟ་སྐོར་བྱས་པ་རེད།