བོད་ལྗོངས་ཀྱི་རི་སྐྱེས་སྲོག་ཆགས་ཆེ་འབྲིང་གི་གྲངས་འབོར་རྒྱལ་ཡོངས་ཀྱི་ཨང་དང་པོར་སླེབས་པ།

       བོད་ལྗོངས་ནི་མཚོ་བོད་མཐོ་སྒང་གི་དབུས་རྒྱུད་དུ་གནས་ཤིང་། སྣ་མང་ཕུན་སུམ་ཚོགས་པའི་ས་དབྱིབས་ལས་གནས་དེའི་ཐུན་མིན་གྱི་གནམ་གཤིས་གྲུབ་པ་དང་། ཐུན་མིན་གྱི་གནམ་གཤིས་དེ་ལས་ཡང་ཡུལ་དེའི་སྐྱེ་དངོས་སྣ་མང་རང་བཞིན་གྲུབ་ཡོད། སྲོག་ཆགས་དང་སྐྱེ་དངོས་ཀྱི་ཐོན་ཁུངས་ཤིན་ཏུ་ཕུན་སུམ་ཚོགས་པས་ལེ་ལག་ཚང་བའི་སྐྱེ་དངོས་སྦྲེལ་ཐག་གྲུབ་ཡོད་ལ། མིའི་རིགས་ཀྱི་འཚོ་གནས་དང་གོང་འཕེལ་གྱི་གཞི་རྟེན་ཡང་གྲུབ་ཡོད།

       བོད་ལྗོངས་ཀྱི་འབྱུང་ཁམས་མ་ལག་བརྒྱ་ཆ80ཡན་ལ་སྲུང་སྐྱོབ་ཐུབ་པ།

      ཤེས་རྟོགས་བྱུང་བ་ལྟར་ན། ཉེ་ལམ་ལོ་ཤས་རིང་། བོད་ལྗོངས་ཀྱིས་རི་སྐྱེས་སྲོག་ཆགས་དང་རྩི་ཤིང་ཐོན་ཁུངས་ལ་སྲུང་སྐྱོང་བྱེད་ཤུགས་རྒྱུན་ཆད་མེད་པར་ཤུགས་ཆེར་བཏང་བས། མིག་སྔའི་བར། བོད་ལྗོངས་སུ་རིམ་པ་ཁག་དང་རིགས་ཁག་གི་རང་བྱུང་སྲུང་སྐྱོང་ཁུལ103བཙུགས་ཡོད་པ་དང་། སྲུང་སྐྱོང་ཁུལ་དེ་དག་གིས་བཟུང་བའི་སྤྱིའི་རྒྱ་ཁྱོན་གྱིས་བོད་ལྗོངས་ཡོངས་ཀྱི་རྒྱལ་ཁོངས་ས་ཆའི་རྒྱ་ཁྱོན་གྱི་གསུམ་ཆ་གཅིག་ཡན་ཟིན་ཞིང་། འདི་ནི་རི་སྐྱེས་སྲོག་ཆགས་ཀྱི་འཚོ་སྡོད་ཁུལ་གཙོ་བོ་དང་རྩི་ཤིང་གི་ཁྱབ་གནས་གལ་ཆེན་ཞིག་ཡིན་པ་དང་། དེས་བོད་ལྗོངས་ཀྱི་བརྒྱ་ཆ80ཡན་གྱི་སྟོང་ཉེན་ཡོད་པའི་རི་སྐྱེས་སྲོག་ཆགས་དང་རྩི་ཤིང་དང་དཔེ་མཚོན་ཅན་གྱི་འབྱུང་ཁམས་མ་ལག་ལ་སྲུང་སྐྱོང་ནུས་ལྡན་ཐུབ་ཡོད།

       སྤྱི་ལོ2022ལོར་བོད་ལྗོངས་ནས་མེ་ཏོག་རྫོང་གི་ཕྱེ་ལེབ་ལན་ཧོ་མེ་ཏོག་དང་བོད་ལྗོངས་ཕོང་ཅུས་ལན་ཧོ་མེ་ཏོག་བཅས་རྩི་ཤིང་གི་རིགས་གཉིས་གསར་དུ་ཤེས་རྟོགས་བྱུང་བ་དང་། ད་ཡོད་ཀྱི་རི་སྐྱེས་རྩི་ཤིང་རིགས157ཡོད་པ་དེ་དག་ཚང་མ་རྒྱལ་ཁབ་རིམ་པའི་གཙོ་གནད་སྲུང་སྐྱོང་གི་རི་སྐྱེས་རྩི་ཤིང་ཁོངས་སུ་བཅུག་ཡོད། དེའི་ཁྲོད་དུ་རྒྱལ་ཁབ་ཀྱི་རིམ་པ་དང་པོའི་གཙོ་གནད་སྲུང་སྐྱོང་བྱ་ཡུལ་རིགས་དགུ་ཡོད་པ་དང་། རྒྱལ་ཁབ་ཀྱི་རིམ་པའི་གཉིས་པའི་གཙོ་གནད་སྲུང་སྐྱོང་བྱ་ཡུལ་རིགས148ཟིན་ཡོད། བོད་རང་སྐྱོང་ལྗོངས་ནགས་རྩྭ་ཅུས་ཀྱི་འབྲེལ་ཡོད་འགན་འཁུར་བས། བརྟག་དཔྱད་བྱས་འབྲས་ལ་བལྟས་ན། བོད་ལྗོངས་ཀྱི་རི་སྐྱེས་སྲོག་ཆགས་ཆེ་འབྲིང་གི་ཁྱུ་གྲངས་དེ་རྒྱལ་ཡོངས་ཀྱི་ཨང་དང་པོར་སླེབས་པ་དང་། གཙོད་ཀྱི་གྲངས་འབོར་ཡང་དུས་རབས་གོང་མའི་སུམ་སྟོང་ཙམ་ནས་མིག་སྔའི་ཆིག་ཁྲི་ལྷག་བར་འཕར་བ་དང་། དེ་སྔ་རྒྱལ་སྤྱིའི་སྤྱི་ཚོགས་ནས་སྟོངས་ཟིན་པར་ངོས་འཛིན་བྱེད་པའི་འབྲས་ལྗོངས་ཤྭ་དམར་ཡང་སླར་ཡང་མི་རྣམས་ཀྱི་མིག་ལམ་དུ་མཐོང་རྒྱུ་བྱུང་སྟེ་གྲངས་འབོར་ཡང་ཉིས་བརྒྱ་ལྷག་ནས་མིག་སྔའི་བརྒྱད་བརྒྱ་ལྷག་བར་འཕར་ཡོད་ཅེས་གསུངས་ཡོད།

       ཉེ་བའི་ལོའི་རིང་། བོད་ལྗོངས་ཀྱིས་རྒྱལ་ཁབ་ཀྱི་མ་འཇོག་བརྩོན་ལེན་དང་། ཚན་ཞིབ་ཚན་པར་མངགས་བཅོལ། དེ་བཞིན་ཚན་ཞིབ་སློབ་གླིང་དང་མཉམ་ལས་བཅས་བྱེད་པའི་བྱེད་ཐབས་ཐོག་ནས་རང་སྐྱོང་ལྗོངས་རིམ་པ་ཡན་གྱི་རང་བྱུང་སྲུང་སྐྱོང་ཁུལ17ལ་ཐོན་ཁུངས་མཐིལ་རྟོགས་བརྟག་དཔྱད་བྱས་པ་དང་། ཚན་ཞིབ་ཚན་པ་ནས་སྨར་ཁམས་ཀྱི་སྤྲེའུ་སྤུ་སེར་རང་བྱུང་སྲུང་སྐྱོང་ཁུལ་དང་། རྫ་ཡུལ་ཁྲི་པ་ལུང་པ་རང་བྱུང་སྲུང་སྐྱོང་ཁུལ་ སོགས་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་དུ་ཐོན་ཁུངས་ཀྱི་འགུལ་རྣམ་ལྟ་ཞིབ་ཚད་ལེན་བྱ་རྒྱུ་མངགས་བཅོལ་བྱས་ནས་གསའ་དང་ཁྲུང་ཁྲུང་སྐེ་ནག མེ་ཏོག་རྫོང་གི་ལན་ཁོའོ་རིགས་ཀྱི་རྩི་ཤིང་སོགས་ལ་ཆེད་དོན་བརྟག་དཔྱད་དང་ལྟ་ཞིབ་ཚད་ལེན་བྱས་ཡོད་པ་རེད།