མུ་གེ་ཐང་དུ་ལྗང་མདོག་གི་ལྕགས་རི་བསྐྲུན།

       ཀོས་ནན་རྫོང་ནི་མཚོ་སྔོན་ཞིང་ཆེན་གྱི་བྱང་ཤར་རྒྱུད་དུ་གནས་པ་དང་། མདོ་ལ་རི་བོའི་མཐའ་མཚམས་ནས་ཁུ་ནུ་རི་བོའི་བར་གྱི་ཚྭ་འདམ་གཤོངས་སའི་རྒྱུད་དུ་གནས་ཤིང་། བྱེ་ཐང་ཅན་གྱི་ས་ཆ་ཁྱབ་རྒྱ་ཆེ་བ་དང་བྱེ་འགྱུར་གྱི་གནོད་འཚེ་ཚབས་ཆེ་ཙམ་ཡོད་པའི་སྐམ་སའི་དབུས་ཁུལ་གྱི་བྱེ་ཐང་ས་ཁུལ་ཞིག་ཡིན་ལ་རྒྱལ་ཡོངས་ཀྱི་བྱེ་འགོག་བྱེ་བཅོས་ཀྱི་གཙོ་གནད་དཔེ་སྟོན་རྫོང་གི་གྲས་ཤིག་ཀྱང་ཡིན།

       ཀོས་ནན་རྫོང་གི་ཏང་སྲིད་ཚན་པ་སོ་སོས་བྱེ་སྣ་དང་མུ་གེ་ཐང་གི་མཐའ་སྐོར་དུ་བྱེ་བཅོས་ནགས་བསྐྲུན་བྱ་རྒྱུ་དེ་བྱེ་ཐང་ཅན་བཅོས་སྐྱོང་བྱེད་པའི་གཙོ་གནད་ས་ཁོངས་དང་དོན་ཆེན་ཨང་དང་པོར་བཞག རང་འགུལ་ངང་འགན་འཁུར་བ་དང་།ཚན་རིག་དང་མཐུན་པའི་ངང་འཆར་འགོད་བྱེད་པ། “སྐྱེ་ཁམས་ལ་བརྟེན་ནས་རྫོང་འཛུགས་སྐྱོང་དང་སྐྱེ་ཁམས་ལ་བརྟེན་ནས་རྫོང་དར་རྒྱས་གཏོང་བའི”འཕེལ་རྒྱས་ཀྱི་འཐབ་ཇུས་ལ་གཡོ་འགུལ་མི་གཏོང་བ་མཐའ་འཁྱོངས་བྱེད་པ། རྫོང་ཡོངས་ཀྱི་རྒྱ་ཆེའི་ལས་བྱེད་མང་ཚོགས་དང་།བཅའ་སྡོད་དཔོན་དམག དེ་བཞིན་སྤྱི་ཚོགས་ལས་རིགས་ཁག་གི་མི་སྣ་བཅས་ལ་མཐུན་སྒྲིལ་གྱི་སྣེ་ཁྲིད་དང་རྩ་འཛུགས་བྱས་ནས། སྡོང་འཛུགས་ནགས་གསོའི་བྱ་འགུལ་སྤེལ་བ་རེད།

       བསྟུད་མར་ལོ་མང་བོའི་རིང་། ཀོས་རྫོང་གིས་རྒྱལ་ཁབ་ཀྱི་སྐྱེ་ཁམས་སྒྲིག་བཀོད་རྣམ་གྲངས་དང་དམངས་ཡོངས་ཀྱི་འོས་འགན་སྡོང་འཛུགས་ནགས་བསྐྲུན་གྱི་བྱ་འགུལ་ལ་བརྟེན་ནས། བྱང་གསུམ་འགོག་སྲུང་ནགས་ཚལ་དང་། རང་བྱུང་ནགས་ཚལ་སྲུང་སྐྱོབ། མཚོ་སྔོན་པོའི་འབབ་རྒྱུད་ཀྱི་སྐྱེ་ཁམས་བཅོས་སྐྱོང་། བྱེ་འགྱུར་ས་ཞིང་བཀག་སྡོམ་སྲུང་སྐྱོང་། ཚ་རྔ་ལ་མཚོ་དང་མཚེའུའི་མཐའ་འཁོར་གྱི་སྐྱེ་ཁམས་ཁོར་ཡུག་ཕྱོགས་བསྡུས་བཅོས་སྐྱོང་སོགས་སྐྱེ་ཁམས་ཀྱི་རྐང་འཛིན་འདུ་འགོད་འབོར་ཆེན་ཞིག་ལག་བསྟར་བྱས་ཡོད། རྨ་ཆུའི་འབབ་རྒྱུད་ཀྱི་ཀོས་ནན་ས་རྒྱུད་ཀྱི་ས་ཆུ་ཤོར་བ་བཀག་འགོག་ཅུང་ལེགས་པོ་བྱས་པ་དང་། ས་ཆ་ཁ་ཤས་ཀྱི་སྐྱེ་ཁམས་ཁོར་ཡུག་མངོན་གསལ་གྱིས་ཇེ་ལེགས་སུ་སོང་སྟེ། “བྱེ་མའི་མི་ཕྱིར་འདེད་པ”ནས“བྱེ་སྐྱོད་ལྗང་འགྱུར”གྱི་འགྱུར་ལྡོག་མངོན་འགྱུར་བྱུང་བ་རེད།