མཚོ་སྔོན་པོའི་ལྗོངས་ཁུལ་སྲུང་སྐྱོབ་དང་བེད་སྤྱོད་དོ་དམ་ཅུའུ་དང་ཀྲུང་གོ་ཚན་རིག་གླིང་སྲོག་ཆགས་ཞིབ་འཇུག་ཁང་གིས་ཚན་རིག་ཞིབ་འཇུག་གི་མཉམ་ལས་གྲོས་མཐུན་བཀོད།

       ཉེ་ལམ་མཚོ་སྔོན་པོའི་ལྗོངས་ཁུལ་སྲུང་སྐྱོབ་དང་བེད་སྤྱོད་དོ་དམ་ཅུའུ་དང་ཀྲུང་གོ་ཚན་རིག་གླིང་སྲོག་ཆགས་ཞིབ་འཇུག་ཁང་གིས་ཚན་རིག་ཞིབ་འཇུག་གི་མཉམ་ལས་གྲོས་མཐུན་བཀོད་པ་དང་། མཚོ་སྔོན་པོའི་བཞུར་རྒྱུད་ཀྱི་ཉེན་ཚབ་ཆེ་བའི་རྩ་ཆེའི་དངོས་རིགས་སྲུང་སྐྱོབ་དང་སླར་གསོ་ལ་སྐུལ་འདེད་བཏང་ནས་མཚོ་སྔོན་པོའི་སྐྱེ་ཁམས་མ་ལག་གི་སྣ་མང་རང་བཞིན་དང་གཏན་འཇགས་རང་བཞིན། རྒྱུན་མཐུད་རང་བཞིན་མུ་མཐུད་མཐོར་འདེགས་བཏང་།
       གྲོས་མཐུན་ལྟར་ན། ཕྱོགས་གཉིས་ཀྱིས་ཕན་ཚུན་གྱི་ལེགས་ཆ་གསབ་རེས་དང་འཕེལ་རྒྱས་མཉམ་རྒྱལ་གྱི་རྩ་དོན་ལ་གཞིག་ནས་ཀྲུང་གོ་ཚན་རིག་གླིང་གི་སྲོག་ཆགས་ཞིབ་འཇུག་ཁང་གི་རིག་གཞུང་དང་ཚན་རིག་ཞིབ་འཇུག འཇོན་མི་སོགས་ཕྱོགས་ཀྱི་ཆེད་ལས་ལེགས་ཆར་བརྟེན་པ་དང་། མཚོ་སྔོན་པོའི་བཞུར་རྒྱུད་ཕུན་སུམ་ཚོགས་པའི་བྱ་རིགས་དང་ཉ་རིགས། རི་སྐྱེས་སྲོག་ཆགས་སོགས་སྐྱེ་དངོས་སྣ་མང་རང་བཞིན་གྱི་ཐོན་ཁུངས་ཀྱི་ལེགས་ཆར་ཟུང་འབྲེལ་བྱས་ནས་ཚན་རིག་ཞིབ་འཇུག་གི་མཉམ་ལས་རྐྱེན་སྲོལ་བཙུགས། དུས་མཚུངས་སུ་ཕྱོགས་གཉིས་ཀྱིས་མཉམ་འབྲེལ་སྒོས་མཚོ་སྔོན་པོའི་གཙོད་སོགས་སྣེ་འདྲེན་དངོས་རིགས་སྐྱེ་ཁམས་རིག་པ་དང་རྒྱུད་འདེད་རིག་པའི་རྐྱེན་སྲོལ་ལ་ཞིབ་འཇུག་དང་། མཚོ་སྔོན་པོའི་བཞུར་རྒྱུད་ཀྱི་སྐྱེ་དངོས་སྣ་མང་རང་བཞིན་གྱི་སྒྲིག་གཞི་དང་བྱེད་ནུས་རྒྱུན་སྐྱོང་རྐྱེན་སྲོལ། ཉེན་ཚབ་རྒྱུ་རྐྱེན་སོགས་ཁྱབ་ཁོངས་གཙོ་བོའི་ཞིབ་འཇུག་སོགས་བྱ་བ་བསྒྲུབ་ནས་འབྲེལ་ཡོད་ལས་ཀའི་འགག་སྒྲོལ་དང་གྲུབ་འབྲས་ལ་མཉམ་དུ་སྐུལ་འདེད་བཏང་། མི་སྣའི་བརྗེ་རེས་རྐྱེན་སྲོལ་བཙུགས་པ་དང་སྐྱེ་དངོས་སྣ་མང་རང་བཞིན་ཁྱབ་ཁོངས་ཀྱི་མཐོ་རིམ་འཇོན་མི་དང་གྲ་སྒྲིག་འཇོན་མིའི་མཉམ་ལས་གསོ་སྦྱོང་ལ་ཤུགས་བསྣན་ནས་མཉམ་དུ་བས་མཐའི་གཙོད་ཀྱི་ལྟ་ཞིབ་གནས་ཁུལ་དང་གཙོད་ཀྱི་ཚན་ཞིབ་བཅོས་སྐྱོབ་ལྟེ་གནས་བཙུགས་ཏེ། མཚོ་སྔོན་པོའི་ཉེན་ཚབ་ཆེ་བའི་རྩ་ཆེའི་དངོས་རིགས་སྲུང་སྐྱོབ་དང་སླར་གསོའི་དཔེ་སྟོན་གནས་ཁུལ་འཛུགས་པ་དང་ཆ་འཕྲིན་ཕན་ཚུན་མཉམ་སྤྱོད་ཀྱི་གྲོས་མོལ་རྐྱེན་སྲོལ་འཛུགས་པ། ཆ་འཕྲིན་མཉམ་སྤྱོད་དང་ཐོན་ཁུངས་བརྗེ་རེས་ཀྱི་སྟེགས་བུ་བཙུགས་ནས་ཚན་རིག་ཞིབ་འཇུག་གི་གཞི་གྲངས་དང་གྲུབ་འབྲས་ཕན་ཚུན་ལ་སྒོ་འབྱེད་དང་མཉམ་སྤྱོད་བྱེད་རྒྱུ་རེད།