མཚོ་ལྷོ་ཁུལ་ཀྱིས་སྡོང་ཕྲུག་རྐང་ཁྲི220འཛུགས་འཆར་ཡོད།
རྩོམ་པ་པོ།：
ཡོང་ཁུངས།：མཚོ་ལྷོ་བོད་ཡིག་ཚགས་པར།
དུས་ཚོད།：2023-04-05
ཀློག་གྲངས།：
དཔྱིད་ཀྱི་རླུང་བུ་དལ་གྱིས་ལྡང་བ་དང་མཉམ་དུ། མི་རྣམས་ཀྱིས་དཔྱིད་མགོ་མའི་ལས་ཀ་ཐམས་ཅད་ཚགས་སུ་ལོངས་པར་བྱས་ཏེ། སྡོང་འཛུགས་ནགས་སྐྲུན་གྱི་ལས་སུ་བརྩོན་བཞིན་འདུག
ཟླ4བའི་ཚེས3ཉིན། གུང་ཧོ་རྫོང་ཆབ་ཆ་གྲོང་རྡལ་བདེ་སྐྱིད་ཐང་དུ་སྡོང་འཛུགས་ནགས་སྐྲུན་བྱས་ཏེ་རྒྱལ་ཁོངས་ལྗང་སྒྱུར་དང་སྐྱེ་ཁམས་སྲུང་སྐྱོང་གི་ལས་སུ་འབད་ཀྱིན་འདུག་ལ། ཡུལ་དངོས་སུ་ལས་བྱེད་དཔུང་སྡེ་ཡིས་སྟོབས་ཤུགས་གཅིག་ཏུ་སྒྲིལ་ནས་འཆར་འགོད་ཡོད་པ་དང་སྒྲིག་གཞི་ཡོད་པ། རང་རྟོགས་ཡོད་པ་བཅས་ཀྱི་སྒོ་ནས་ཆེད་ལས་མི་སྣའི་བཀོད་སྒྲིག་ལྟར་སྡོང་འཛུགས་ནགས་སྐྲུན་བྱེད་བཞིན་ཡོད།
ཉིན་དེར། ཁུལ་དང་རྫོང་རིམ་པའི་སྡོང་འཛུགས་ནགས་སྐྲུན་ཨུ་ཡོན་ལྷན་ཁང་གིས་ལས་བྱེད་མང་ཚོགས་རྩ་འཛུགས་བྱས་ཏེ་བདེ་སྐྱིད་ཐང་དང་དུམ་པ་སྡེ་བ་སོགས་ས་ཁུལ6ཏུ་དམངས་ཡོངས་ཀྱི་སྡོང་འཛུགས་ནགས་སྐྲུན་བྱེད་པའི་བྱ་འགུལ་སྤེལ།
ཁུལ་ནགས་ལས་དང་རྩྭ་ཐང་ཅུའུ་ནས་རྒྱུས་ལོན་བྱས་པ་ལྟར་ན། 2022ལོར་རང་ཁུལ་གྱི་ས་མུའུ་ཁྲི84ལ་སྡོང་ཕྲུག་རྐང་ཁྲི227.72བཙུགས་ནས་ཀྲུང་དབྱང་ནོར་སྲིད་ཀྱིས་རྒྱལ་ཁོངས་ལྗང་འགྱུར་གྱི་ཚོད་ལྟའི་དཔེ་སྟོན་ལས་གཞི་འཛུགས་སྐྲུན་གྱི་ལས་འགན་ཐོག་མ་ཁྱོན་ཡོངས་ནས་ལེགས་འགྲུབ་བྱུང་ལ། ད་ལོར་ས་ཁུལ6གི་ས་མུའུ1350ལ་གསོམ་སྡོང་དང་ལྕང་སྡོང་སོགས་རིགས་མི་འདྲ་བའི་སྡོང་ཕྲུག་རྐང་ཁྲི12.5འཛུགས་རྒྱུ་ཡིན་པ་དང་། རང་ཁུལ་དུ་ཁྱོན་བསྡོམས་སྡོང་ཕྲུག་རྐང་ཁྲི220འཛུགས་འཆར་ཡོད།
བྱ་བ་ལག་ལེན་བྱེད་པའི་གོ་རིམ་ཁྲོད«ཚན་རིག་དང་མཐུན་པའི་སྒོ་ནས་རྒྱལ་ཁོངས་ལྗང་སྒྱུར་ལ་སྐུལ་འདེད་གཏོང་བའི་ལོ་གསུམ་གྱི་འཆར་གཞི(2023-2025)»ཁྱོན་ཡོངས་ནས་ལག་བསྟར་བྱས་ཏེ། མ་དངུལ་སྒོར་དུང་ཕྱུར5.7བཏང་ནས2023ལོར་ཨ་མྱེས་རྨ་ཆེན་རི་རྒྱུད་ཀྱི་ཆུ་མགོ་དང་རྩྭ་ཐང་གི་སྐྱེ་ཁམས་སླར་གསོ། ཁྱོན་ཡངས་པའི་གུང་ཧོ་གཤོང་ས་དར་རྒྱས་དང་བྱེ་ཐང་འགོག་བཅོས་བྱེད་པར་མགྱོགས་མྱུར་སྒོས་སྐུལ་འདེད་བཏང་སྟེ་ས་མུའུ་ཁྲི14ལ་སྡོང་འཛུགས་ནགས་སྐྲུན་དང་ས་མུའུ་ཁྲི63ལ་རི་རྒྱ་ནགས་སྐྲུན། ས་མུའུ་ཁྲི3.11ལ་བྱེ་འགྱུར་བཅོས་སྐྱོང་བྱས་ཏེ། ཞིང་ཆེན་རིམ་པའི་ནགས་ཚལ་གྱི་ཤང་གྲོང་དང་ནགས་ཚལ་གྱི་ཤང་སྡེ་བསྐྲུན་རྒྱུར་ནུས་ཤུགས་ཡོད་རྒུ་འདོན་རྒྱུ་རེད།
འབྲེལ་ཡོད་འོས་སྦྱོར།
