མཚོ་སྔོན་གྱི་གཙོ་གནད་བྱེ་ཁུལ་དུ“ལྗང་མདོག་གིས་བྱེ་མ་ཕྱིར་སྤྲོད་པ”མངོན་འགྱུར་བྱུང་བ།

       ཉེ་ཆར། གསར་འགོད་པས་མཚོ་སྔོན་ཞིང་ཆེན་ནགས་ལས་དང་རྩྭ་ཐང་ཅུས་ནས་རྒྱུས་ལོན་བྱུང་བ་ལྟར་ན། མིག་སྔའི་བར་དུ། མཚོ་སྔོན་ཞིང་ཆེན་གྱིས་ཁྱོན་བསྡོམས་བྱེ་འགོག་བྱེ་བཅོས་ཀྱི་ལས་འགན་མུའུ་ཁྲི1123ལེགས་འགྲུབ་བྱུང་ཞིང་། དེའི་ནང་དུ“ལོ་ལྔའི་འཆར་འགོད་བཅུ་གསུམ་པའི”སྐབས་ཀྱི་བྱེ་འགོག་བྱེ་བཅོས་ཀྱི་ལས་འགན་མུའུ་ཁྲི861དང2021ནས2022ལོའི་བར་གྱི་མུའུ་ཁྲི262འདུས་པ་རེད། ཕྱོགས་ཡོངས་ནས་རྒྱལ་ཁབ་ཀྱི་བྱེ་འགྱུར་ས་ཆའི་བཀག་སྡོམ་སྲུང་སྐྱོབ་ཁུལ12བཙུགས་ཤིང་། བཀག་སྡོམ་སྲུང་སྐྱོབ་རྒྱ་ཁྱོན་མུའུ་ཁྲི874ཟིན་པ་དང་། བྱེ་འགྱུར་ས་ཆ་ལོ་རེ་ལ་ཆ་སྙོམས་མུའུ་ཁྲི31.8ཙམ་ཇེ་ཉུང་དུ་བཏང་བ། བྱེ་འགྱུར་ཚད་རིམ་སྟོན་གྲངས3.17ནས2.94ལ་ཆག་པ། གཙོ་གནད་བྱེ་ཁུལ་དུ“བྱེ་མས་མི་འུད་ཀྱིས་ཕྱིར་ཕུད་པ”ནས“ལྗང་མདོག་གིས་བྱེ་མ་ཕྱིར་སྤྲོད་པ”ཡི་རྩ་བའི་རང་བཞིན་གྱི་འགྱུར་ལྡོག་མངོན་འགྱུར་བྱུང་ཡོད།

       རྒྱལ་ཡོངས་ཀྱི་ཐེངས་དྲུག་པའི་བྱེ་འགྱུར་ས་ཆའི་ལྟ་ཞིབ་ཚད་ལེན་ལས་གསལ་བ་ལྟར་ན། 2020ལོའི་ལོ་མཇུག་བར་དུ། མཚོ་སྔོན་ཞིང་ཆེན་གྱི་ད་ཡོད་བྱེ་འགྱུར་ས་ཆའི་རྒྱ་ཁྱོན་ལ་མུའུ་དུང་ཕྱུར1.85ཡོད་ཅིང་། དེ་ཡིས་རང་ཞིང་གི་རྒྱལ་ཁོངས་ས་ཆའི་སྤྱིའི་རྒྱ་ཁྱོན་གྱི17.7%ཟིན་པ་དང་། ཟི་ལིང་དང་མཚོ་ཤར་གཉིས་མ་ཚུད་པའི་རང་སྐྱོང་ཁུལ་དྲུག་གི་རྫོང་བཅུ་བདུན་ཚང་མར་ཁྱབ་པ་རེད། དེའི་ནང་དུ་བཅོས་སྐྱོང་རུང་བའི་བྱེ་འགྱུར་ས་ཆའི་རྒྱ་ཁྱོན་ལ་མུའུ་ཁྲི5112.3ཡོད་པ་དང་། ནུས་ལྡན་བཅོས་སྐྱོང་གི་རྒྱ་ཁྱོན་ལ་ཁྱོན་བསྡོམས་མུའུ་ཁྲི770.64ཡོད་པ་དེ་ཡིས་བཅོས་སྐྱོང་རུང་བའི་བྱེ་འགྱུར་ས་ཆའི་རྒྱ་ཁྱོན་གྱི18.84%ཟིན་ཡོད།

       “ལོ་ལྔའི་འཆར་འགོད་བཅུ་གསུམ་པ”ནས་བཟུང་། མཚོ་སྔོན་ཞིང་ཆེན་གྱིས་དུས་དང་རྣམ་པ་ཀུན་ཏུ་བྱེ་འགོག་བྱེ་བཅོས་འདི་ཡུན་རིང་རང་བཞིན་དང་སྤྱི་ཡོངས་རང་བཞིན་གྱི་འཐབ་ཇུས་ལས་འགན་ཞིག་ཏུ་བརྩིས་ནས“སྔོན་འགོག་གཙོ་བོ་དང་ཚན་རིག་བཅོས་སྐྱོང་། ལུགས་མཐུན་བེད་སྤྱོད”བཅས་ཀྱི་བྱེ་བཅོས་བྱེད་ཕྱོགས་དང་རྒྱལ་ཁབ་གཙོ་གནད་སྐྱེ་ཁམས་ལས་གྲྭ་བྱེ་ཁུལ་དུ་ཕྱོགས་པའི་བྱ་བའི་བྱེད་ཕྱོགས་རྒྱུན་འཁྱོངས་བྱས་ཏེ་རྒྱལ་ཡོངས་ཀྱི་བྱེ་འགོག་བྱེ་བཅོས་འཆར་འགོད་དོན་འཁྱོལ་ནན་ཏན་དང་བྱེ་འགོག་བྱེ་བཅོས་ཀྱི་དམིགས་འབེན་འགན་ཁུར་ལག་བསྟར་ཚ་ནན་བྱས་ཤིང་། སྲིད་ཇུས་རོགས་སྐྱོར་དང་རྩ་འཛུགས་འགན་སྲུང་། མ་དངུལ་གཏོང་བ། དམིགས་འབེན་དཔྱད་ཞིབ་སོགས་ཀྱི་བྱེད་ཐབས་རབ་དང་རིམ་པའི་ལག་བསྟར་བྱེད་ཤུགས་ཇེ་ཆེར་བཏང་སྟེ་ཕྱོགས་ཡོངས་ནས་ཞིང་ཆེན་དང་རང་སྐྱོང་ཁུལ། རྫོང་བཅས་རིམ་པ་གསུམ་གྱི་སྲིད་གཞུང་གི་བྱེ་འགོག་བྱེ་བཅོས་ཀྱི་དམིགས་འབེན་འགན་ཁུར་ལེགས་འགྲུབ་བྱུང་བ་དང་ཁྲིམས་ལྟར་བྱེ་ཁུལ་གྱི་སྐྱེ་ཁམས་སྲུང་སྐྱོབ་དམར་ཐིག་ནན་སྲུང་བྱས་པ། བྱེ་ཁུལ་གྱི་གསར་སྤེལ་འཛུགས་སྐྲུན་བྱེད་སྒོ་ཚད་ལྡན་དུ་བཏང་བ་བཅས་ཀྱིས་བྱེ་ཁུལ་གྱི་སྐྱེ་ཁམས་མ་ལག་བཅོས་སྐྱོང་དང་དམངས་ཕྱུག་ཐོན་ལས་འཕེལ་རྒྱས་ལ་སྐུལ་འདེད་བཏང་ནས་རྒྱལ་ཁབ་ཀྱི་བྱེ་འགྱུར་ས་ཆའི་བཀག་སྡོམ་སྲུང་སྐྱོབ་ཁུལ་གྱི་ནུས་པའི་མ་ལག་འཛུགས་སྐྲུན་དང་སྐོར་ཞིབ་དོ་དམ་ལ་ཕྱོགས་ཡོངས་ནས་ཤུགས་སྣོན་བྱས་ཡོད།

       “ང་ཚོས་ནགས་ཚལ་དང་རྩྭ་ཐང་། རླན་ས། བྱེ་ཐང་བཅས་ཀྱི་སྐྱེ་ཁམས་སྲུང་སྐྱོབ་ཞིག་གསོ་ལ་གཅིག་གྱུར་འཆར་འགོད་བྱས་ཏེ་བྱེ་བཅོས་དང་ཆུ་བཅོས། རི་བཅོས་ཀྱི་གནད་ཆེའི་རྒྱུ་རྐྱེན་ཚང་མ་ལ་མཐུན་སྦྱོར་དང་དོ་དམ་ཤུགས་སྣོན་གྱིས་བྱེ་ཁུལ་གྱི་སྐྱེ་ཁམས་བདེ་འཇགས་འགོག་སྲུང་མ་ལག་སྔར་བས་ལེགས་སྒྱུར་དང་བྱེ་ཁུལ་གྱི་སྐྱེ་ཁམས་ཁོར་ཡུག་དང་དམངས་འཚོ་བསྟུད་མར་ཇེ་ལེགས་སུ་བཏང་ནས། རང་བྱུང་གི་ཆོས་ཉིད་ལ་མཐུན་ཞིང་ས་ཆའི་གནས་ཚུལ་དང་བྱེ་ཐང་གི་གནས་ཚུལ་ལ་འཚམ་པའི་མཚོ་སྔོན་གྱི་ཁྱད་ཆོས་ལྡན་པའི་བྱེ་འགོག་བྱེ་བཅོས་ཀྱི་ལམ་བུ་ཞིག་ཏུ་བསྐྱོད་རྒྱུ་ཡིན།” མཚོ་སྔོན་ཞིང་ཆེན་ནགས་རྩྭ་ཅུས་སྐྱེ་ཁམས་སྲུང་སྐྱོབ་ཞིག་གསོ་ཁྲུའུ་ཡི་ཁྲུའུ་ཀྲང་གཞོན་པ་ཝང་ཆིང་ཧྲུའེ་ཡིས“ལོ་ལྔའི་འཆར་འགོད་བཅུ་བཞི་པའི”སྐབས་སུ། མཚོ་སྔོན་གྱིས་ཕྱོགས་ཡོངས་ནས་བྱེ་འགྱུར་ས་ཆ་བཅོས་སྐྱོང་གི་ལས་འགན་མུའུ་ཁྲི570ཡོད་པ་ལེགས་འགྲུབ་བྱུང་དུ་བཅུག་ནས་ལོ་རེ་ལ་བྱེ་འགོག་བྱེ་བཅོས་ས་ཆ་མུའུ་ཁྲི120ལེགས་འགྲུབ་འབྱུང་བར་འགན་སྲུང་བྱ་རྒྱུ་ཡིན་ཞེས་བསྟན།