མཚོ་སྔོན་རྐང་ཚ་རུ་གཙང་བོའི་ཕྱེད་ཀ་ཆུ་དང་ཕྱེད་ཀ་ཉ་ཡི་ངོ་མཚར་རྣམ་པ་ཡང་བསྐྱར་མངོན།

       མཚོ་སྔོན་པོའི་བྱང་རྒྱུད་དང་མདོ་ལ་རི་བོའི་ལྷོ་རྒྱུད་དུ་མཚོ་སྔོན་ཞིང་ཆེན་མཚོ་བྱང་བོད་རིགས་རང་སྐྱོང་ཁུལ་ཆགས་ཡོད། ཟླ་དྲུག་པ་དང་བདུན་པ་ནི་མཚོ་སྔོན་པོའི་འགྲམ་ངོགས་ཆེས་མཛེས་པའི་དུས་ཚིགས་ཡིན་ལ། མཚོ་སྔོན་ཞིང་ཆེན་མཚོ་བྱང་བོད་རིགས་རང་སྐྱོང་ཁུལ་རྐང་ཚ་རྫོང་གི་མངའ་ཁོངས་སུ། ཁྱུ་དང་ཁྱུ་བྱས་པའི་གསེར་ཉའི་ཚོགས་ནི་མཚོ་སྔོན་པོར་འབབ་པའི་ཆུ་རྒྱུན་དེད་དེ་ཆུ་བོའི་མགོ་ཁུངས་སུ་རྐྱལ་ནས། ཚྭ་མེད་ཆུའི་ནང་ཉ་ཕྲུག་གསོ་བ་ཡིན་ཞིང་། གཙང་བོའི་ཕྱེད་ཀ་ཆུ་དང་ཕྱེད་ཀ་ཉ་ཡི་ངོ་མཚར་རྣམ་པ་ཡང་བསྐྱར་མངོན་ཡོད།

       གསེར་ཉའི་མིང་ལ་མཚོ་སྔོན་པོའི་ལུའོ་ཉ་ཟེར་ཞིང་། རྒྱལ་ཁབ་ཀྱི་རིམ་པ་གཉིས་པའི་སྲུང་སྐྱོང་སྲོག་ཆགས་ཡིན་ལ། མཚོ་སྔོན་པོའི་ཆུ་དང་བྱ། ཉ་བཅས་ཀྱི་སྐྱེ་ཁམས་ཕྲེང་སྦྲེལ་ཁྲོད་ཀྱི་ལྟེ་བའི་སྲོག་ཆགས་རིགས་ཡིན།

       མཚོ་སྔོན་པོའི་ཆུ་སྐྱེས་སྐྱེ་དངོས་ཀྱི་ཐོན་ཁུངས་ལ་སྲུང་སྐྱོང་ལེགས་པོ་བྱ་ཆེད། 2021ལོའི་ཟླ1པོར། མཚོ་སྔོན་ཞིང་ཆེན་གྱིས་དུས་བཅད་ལོ་བཅུའི་རིང་གི་ཐེངས་དྲུག་པའི་ཀླུང་རྒྱ་ཉ་གསོའི་ལས་དོན་སྤེལ་མགོ་བརྩམས་ལ། བསྡོམས་པས་མཚོ་སྔོན་པོར་གསེར་ཉའི་ཉ་ཕྲུག་དུང་ཕྱུར2ལྷག་གློད་གྲོལ་བཏང་ཡོད། ལོ་ངོ་མང་པོའི་རིང་གི་ཀླུང་རྒྱ་ཉ་གསོ་དང་གཞི་ཁྱོན་ཆེན་པོའི་ཉ་ཕྲུག་གློད་གྲོལ་བཏང་བ་བརྒྱུད། མཚོ་སྔོན་པོའི་གསེར་ཉའི་ཐོན་ཁུངས་དེ་ཏུན་ཁྲི11.41ལ་སླར་གསོ་བྱུང་ཞིང་། དེ་སྲུང་སྐྱོང་དུས་མགོའི་ལྡབ44ཡིན་པ་དང་། ལོ་རྒྱུས་ཀྱི་ཆེས་མཐོ་བའི་གསོག་ཚད་ཀྱི36%ལ་སླེབས་ལ། མཚོ་སྔོན་པོའི་མི་དང་རང་བྱུང་འཆམ་མཐུན་མཉམ་གནས་ཀྱི་སྐྱེ་ཁམས་མ་ལག་འཁོར་རྒྱུག་ལེགས་པོ་མགྱོགས་མྱུར་ངང་ཆགས་པར་བྱས་ཡོད།

       2023ལོའི་ཟླ7པའི་ཚེས7ཉིན། མཚོ་སྔོན་པོའི་གསེར་ཉའི་གློད་གྲོལ་གཏོང་བ་དང་ཉ་ལ་གཟིགས་པའི་བྱ་འགུལ་དེ་བོད་མཁར་རྐང་ཚའི་གསེར་ཉའི་གཞིས་ཁྱིམ་ནས་མགོ་བརྩམས། བྱ་འགུལ་གྱི་ཉིན་དེ་ལ། ཡུལ་དངོས་སུ་ཉ་ཕྲུག་ཁྲི100གློད་གྲོལ་བཏང་བ་དང་། ཟླ8པའི་ཟླ་མཇུག་བར་དུ་ཉ་ཕྲུག་ཁྲི1500ལྷག་སྔ་རྗེས་སུ་མཚོ་སྔོན་པོར་གློད་གྲོལ་གཏོང་རྒྱུ་རེད།

       རྒྱུས་ལོན་པ་ལྟར་ན། 223ལོར། མཚོ་སྔོན་པོའི་ཆུ་ངོས་རྒྱ་ཁྱོན་སྤྱི་ལེ་གྲུ་བཞི་མ4557.95ལ་སླེབས་པ་དང་དེ2012ལོ་ལས་སྤྱི་ལེ་གྲུ་བཞི་མ187.26ཇེ་ཆེར་སོང་ལ། ཆ་སྙོམས་ཀྱི་ཆུ་གནས་སྨི3ཇེ་མཐོར་སོང་ཡོད། གསེར་ཉའི་གསོག་ཚད་དེ་ལོ་བཅུ་ལྷག་གི་སྔོན་གྱི་ཏུན་ཁྲི3ལྷག་ནས་ན་ནིང་གི་ཏུན་ཁྲི11.41བར་ཇེ་མང་དུ་སོང་ཡོད། གསེར་ཉ་ཁ་ཟས་བྱེད་པའི་ཆུ་བྱ་རིགས་བརྒྱ་ལྷག་ཡོད་པ་དེའང་ཇེ་མང་དུ་སོང་ནས། མཚོ་སྔོན་པོ་ནི་རང་རྒྱལ་གྱི་དུས་བྱའི་ཁྱུ་ཚོགས་ཆེས་གཅིག་སྡུད་ཡིན་པའི་གསོ་སྤེལ་ས་ཁུལ་གྲས་ཤིག་ཏུ་གྱུར་ཡོད།