མཚོ་སྔོན་པོར་ཆུ་བྱ་དང་གསེར་ཉ་མཉམ་འཚོའི་ལྗང་མདོག་སྐྱེ་ཁམས་ཀྱི་རི་མོ་གྲུབ་ཡོད།

       ཟླ8པའི་ཚེས19ཉིན། བརྗོད་དོན་ལ་རྒྱལ་ཁབ་སྤྱི་གླིང། སེམས་ཅན་ཡོད་རྒུ་འཆམ་མཐུན་མཉམ་གནས་ཀྱི་མཛེས་སྡུག་ཁྱིམ་གཞིས་ཞེས་པའི་རྒྱལ་ཁབ་སྤྱི་གླིང་གླེང་སྟེགས་སྐབས་གཉིས་པ་དེ་མཚོ་སྔོན་ཞིང་ཆེན་ཟི་ལིང་གྲོང་ཁྱེར་དུ་བསྡུ་བ་ཡིན་པ་དང་། གླེང་སྟེགས་ཀྱི་དམིགས་ཡུལ་ནི་ཕྱོགས་ཡོངས་ནས་རྒྱལ་ཡོངས་སྐྱེ་ཁམས་ཁོར་ཡུག་སྲུང་སྐྱོང་ཚོགས་ཆེན་གྱི་དགོངས་དོན་ལག་བསྟར་དངོས་འབེབས་བྱས་ཏེ། ཀྲུང་གོའི་རྒྱལ་ཁབ་སྤྱི་གླིང་གི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་རྒྱུ་དེ་ཡིན་ལ། ཐེངས་འདིའི་གླེང་སྟེགས་ནི་མགོ་རྩོམ་མཛད་སྒོ་དང་གླེང་སྟེགས་གཙོ་བོ། བརྗོད་དོན་གླེང་སྟེགས3། རྒྱལ་ཁབ་སྤྱི་གླིང་གི་བརྗོད་དོན་གཙོ་བོའི་འགྲེམ་སྟོན་བཅས་ཀྱིས་གྲུབ་ཡོད།

       མཚོ་སྔོན་པོ་ནི་རང་རྒྱལ་ནང་ལོགས་ཀྱི་ཆེས་ཆེ་བའི་ཚྭ་མཚོ་ཡིན་པའི་ཆ་ནས། མཚོ་བོད་མཐོ་སྒང་ཤར་བྱང་ཁུལ་གྱི་སྐྱེ་ཁམས་བདེ་འཇགས་སྲུང་འཛིན་དང་རང་རྒྱལ་ནུབ་བྱང་ས་ཁུལ་གྱི་ཁོར་ཡུག་ཆེན་མོའི་སྐྱེ་ཁམས་དོ་མཉམ་གྱི་ཆུ་ཁོངས་གཙོ་བོ་ཞིག་ཡིན་ལ། རྒྱལ་སྤྱིའི་དུས་བྱ་གནས་སྤོར་གྱི་བརྒྱུད་ལམ་གཙོ་བོའི་ས་ཚིགས་ཅིག་ཀྱང་ཡིན་པས། ཁྱད་དུ་འཕགས་པའི་སྐྱེ་ཁམས་མ་ལག་གྲུབ་ཡོད།

       མཚོ་སྔོན་པོའི་བཞུར་རྒྱུད་དུ་ནགས་ཚལ་དང་རྩྭ་ས། ཆུ་ཁོངས་དང་རླན་ས། བྱེ་མ། འདུས་སྡོད་ཁུལ། ཞིང་ས་སོགས་རིམ་པ་དང་པོའི་སྐྱེ་ཁམས་མ་ལག6རིམ་བཞིན་ཁྱབ་ཡོད། རང་བྱུང་སྐྱེ་ཁམས་མ་ལག་གི་རྒྱ་ཁྱོན་གྱིས98.72%ཟིན་པ་དང་། དམིགས་བསལ་གྱི་མཐོ་སྒང་གི་རྩྭ་དང་ཆུ། མཚོ། ཉ། བྱ་བཅས་མཉམ་འཚོ་མཉམ་གནས་ཀྱི་སྐྱེ་ཁམས་ཕྲེང་འབྲེལ་ཆགས་ཡོད།

       2016ལོར། མཚོ་སྔོན་པོའི་ཆུ་བྱའི་ལོ་ཧྲིལ་བོའི་བསྡོམས་རྩིས་གྲངས་འབོར་དེ་ཆ་སྙོམས་ཀྱིས་ལོ་རེར་ཁྲི5ལྷག་ཇེ་མང་དུ་སོང་ནས། 2022ལོར་སྤྱི་འབོར་ཁྲི60.6ལྷག་ལ་སླེབས་ཡོད།

       བསྡོམས་རྩིས་ལྟར་ན། ལོ་ངོ་མང་པོའི་རིང་ལ་ཀླུང་རྒྱ་ཉ་གསོ་དང་མིས་གློད་གཏོང་བྱས་པ་དང་། ཕྱོགས་མང་པོའི་ཐུན་མོང་གི་སྲུང་སྐྱོང་འོག མཚོ་སྔོན་པོའི་གསེར་ཉ་དེ2002ལོའི་ལོ་མགོ་ཡི་ཏུན2600ལྷག་ནས2022ལོའི་ཏུན་ཁྲི11.41ལ་སླར་གསོ་བྱུང་ཡོད།

       སྟོངས་ཉེན་ཆེ་བའི་སྲོག་ཆགས་ཏེ་དགོ་བའི་གྲངས་ཀ་དེ2004ལོའི257ནས2020ལོའི2700ལྷག་ལ་ཇེ་མང་དུ་སོང་ཞིང་། རྩྭ་སའི་ཕྱོགས་བསྡུས་སྔོ་ཤུན་ཁེབས་ཚད59.7%ལ་སླེབས་པ་དང་། རྩྭ་ཐང་གི་སྐྱེ་དངོས་སྣ་མང་རང་བཞིན་གཏན་འཇགས་དང་ཕུན་ཚོགས་སུ་གྱུར་ལ། རླན་སའི་སྲུང་སྐྱོང་བྱེད་ཚད69%ལ་སླེབས་ནས། བཞུར་རྒྱུད་ཀྱི་སྐྱེ་དངོས་སྣ་མང་རང་བཞིན་དང་དངོས་རིགས་ཀྱི་འདུས་ཚད་མངོན་གསལ་གྱིས་མཐོར་འདེགས་བྱུང་ཡོད།

       2022ལོའི་ཟླ4པར་རྒྱལ་ཁབ་སྤྱི་གླིང་དོ་དམ་ཅུའུ་ཡིས་མཚོ་སྔོན་པོའི་རྒྱལ་ཁབ་སྤྱི་གླིང་གསར་འཛུགས་ཀྱི་བྱ་བ་སྤེལ་བར་ཆོག་མཆན་སྤྲད་དེ། མཚོ་སྔོན་པོ་རྒྱལ་ཁབ་སྤྱི་གླིང་དངོས་སུ་འཛུགས་སྐྲུན་གྱི་དུས་སྐབས་སུ་སླེབས་ཤིང་། 2023ལོར་འཛུགས་སྐྲུན་གྱི་ལས་འགན་ལེགས་འགྲུབ་བྱ་རྒྱུ་བརྩོན་ལེན་བྱས་པ་དང་། 2024ལོའི་ཟླ9པའི་ཚེས14ཉིན་ཞིང་ཆེན་ཏང་ཨུ་སྲིད་གཞུང་གི་མགོ་ཁྲིད་གཙོ་བོས་མཚོ་སྔོན་པོར་རྟོག་ཞིབ་གནང་ནས། གསར་འཛུགས་བྱ་བར་བྱེ་བྲག་གི་བླང་བྱ་བཏོན་པ་དང་། མཚོ་སྔོན་པོ་རྒྱལ་ཁབ་སྤྱི་གླིང་གསར་འཛུགས་བྱ་བ་མགྱོགས་བགྲོད་ཀྱི་ལམ་དུ་བསྐྱོད་པ་རེད།