མདོ་དབུས་མཐོ་སྒང་གི་གསའ་སྲུང་སྐྱོབ་མནའ་འབྲེལ་མཚོ་སྔོན་ནས་བཙུགས།

       ཟླ10པའི་ཚེས23ཉིན་ནི་འཛམ་གླིང་གི་གསའི་ཉིན་མོ་ཡིན་ལ། ཉིན་དེར་མདོ་དབུས་མཐོ་སྒང་གི་གསའ་སྲུང་སྐྱོབ་མནའ་འབྲེལ་དེ་མཚོ་སྔོན་ཞིང་ཆེན་ཟི་ལིང་གྲོང་ཁྱེར་ནས་བཙུགས།
       མདོ་དབུས་མཐོ་སྒང་གི་གསའ་སྲུང་སྐྱོབ་མནའ་འབྲེལ་ནི་མཚོ་སྔོན་ཞིང་ཆེན་ནགས་ལས་རྩྭ་ཐང་ཅུས་དང་ཟི་ལིང་གྲོང་ཁྱེར་མི་དམངས་སྲིད་གཞུང་། གཙང་གསུམ་འབྱུང་ཡུལ་རྒྱལ་ཁབ་སྤྱི་གླིང་དོ་དམ་ཅུས། མདོ་ལ་རིང་མོ་རྒྱལ་ཁབ་སྤྱི་གླིང་དོ་དམ་ཅུས། པེ་ཅིན་ལུའུ་ཆའོ་སྐྱེ་ཁམས་ལྟེ་གནས་བཅས་ཀྱིས་མཉམ་དུ་བཙུགས་པ་ཡིན་ལ། རྒྱལ་ཡོངས་ཀྱི་སྲིད་གཞུང་ལས་ཁུངས་དང་སློབ་གྲྭ་ཆེན་མོ། ཚན་རིག་ཞིབ་འཇུག་ཁང་། སྤྱི་ཚོགས་རྩ་འཛུགས། ཁེ་ལས་སོགས་ལས་ཁུངས90ལྷག་མནའ་འབྲེལ་ལ་ཞུགས་ཡོད།
       མཚོ་སྔོན་ཞིང་ཆེན་ནགས་ལས་རྩྭ་ཐང་ཅུས་ཀྱི་ཅུས་ཀྲང་གཞོན་པ་ཀྲའོ་ཧའེ་ཕིང་གིས“མིག་སྔའི་ཚན་རིག་གི་བདེན་དཔང་ལྟར་ན། མདོ་དབུས་མཐོ་སྒང་ནི་གསའ་རིགས་ཀྱི་འབྱུང་ཡུལ་ཡིན་ལ། ད་སྐབས་མདོ་དབུས་མཐོ་སྒང་ནི་གསའ་ཡི་ཆེས་གལ་ཆེ་ཞིང་རྒྱུན་མཐུད་དུ་སྡོད་པའི་འཚོ་གནས་ས་ཁུལ་ཡིན”ཞེས་བཤད།
       རྔོན་ལས་དང་སྐྱེ་ཁམས་ཞན་འགྱུར་སོགས་ཀྱི་དབང་གིས། གསའ་ནི་དུས་ཡུན་རིང་བོ་ཞིག་ལ་འཛམ་གླིང་རང་བྱུང་མནའ་འབྲེལ་གྱིས་སྟོངས་ཉེའི་མིང་ཐོ་རུ་བཞག་ཡོད། ཉེ་བའི་ལོ་འདི་དག་ལ། མཚོ་སྔོན་ལ་སོགས་པའི་ས་ཆ་འགས་ཧུར་ཐག་གིས་གསའ་སོགས་སྟོངས་ཉེའི་དངོས་རིགས་ཁྱུ་ཚོགས་དང་སྐྱེ་ཁམས་མ་ལག་ལ་ཕྱོགས་ཡོངས་དང་ཆ་ཚང་བའི་སྲུང་སྐྱོབ་བྱས་པས། སྔོན་ཆད་མཐོང་དཀོན་པའི་གསའ་དེ་ད་སྐབས་དམར་ཕྱིའི་པར་ཆས་ཀྱིས་བླངས་པའི་པར་རིས་ངོས་སུ་ཡང་ཡང་མངོན་དེ། མདོ་དབུས་མཐོ་སྒང་གི་སྐྱེ་དངོས་སྣ་མང་རང་བཞིན་ལ་སྲུང་སྐྱོབ་ནུས་ལྡན་ཐོབ་པའི་དཔེ་མཚོན་དུ་གྱུར་ཡོད།
       ཀྲའོ་ཧའེ་ཕིང་གིས“མཚོ་སྔོན་གྱིས་རྒྱལ་ཁབ་སྤྱི་གླིང་བརྗོད་དོན་ཡིན་པའི་རྣམ་པ་གསར་བའི་རང་བྱུང་སྲུང་སྐྱོབ་ས་ཆའི་མ་ལག་དང་གསའ་ཡིས་སྣེ་ཁྲིད་པའི་སྐྱེ་དངོས་སྣ་མང་རང་བཞིན་གྱི་རྟོག་འཇལ་བརྟག་དཔྱད་མ་ལག་བཙུགས་ཤིང་། མིག་སྔར་མཚོ་སྔོན་གྱི་གསའི་ཁ་གྲངས1200ལ་སླེབས་ཡོད”ཅེས་བཤད། འཛམ་གླིང་རང་བྱུང་སྲུང་སྐྱོབ་མནའ་འབྲེལ་གྱི་དཔྱད་དཔོག་གསར་བ་ལྟར་ན། མཚོ་སྔོན་ཞིང་ཆེན་གྱི་གསའ་འཚོ་སྡོད་བྱེད་པར་འཚམ་པའི་ས་ལ་སྟོང་སྨི་གྲུ་བཞི་མ་ཁྲི47ཡོད་པ་དང་། དེས་མདོ་དབུས་མཐོ་སྒང་གི་གསའ་འཚོ་སྡོད་བྱེད་པར་འཚམ་པའི་སའི་རྒྱ་ཁྱོན་གྱི25%ཟིན་པ་རེད།
       མདོ་དབུས་མཐོ་སྒང་གསའ་སྲུང་སྐྱོབ་མནའ་འབྲེལ་བཙུགས་པའི་ཉིན་མོར་ད་དུང་མདོ་དབུས་མཐོ་སྒང་གི་གསའ་སྲུང་སྐྱོབ་ཞིབ་འཇུག་བགྲོ་གླེང་ཚོགས་འདུ་ཡང་འཚོགས་ཤིང་། ཆེད་མཁས་པ་སོགས་ཚོགས་ཞུགས་མི་སྣ་མང་པོས་མཉམ་དུ་གསའ་ལ་རྟོག་འཇལ་ཞིབ་འཇུག་བྱས་པའི་ཉམས་མྱོང་མཉམ་སྤྱོད་བྱས་ཏེ། གསའ་སྲུང་སྐྱོབ་ཀྱི་ལམ་བུ་འཚོལ་ཞིབ་བྱས།