མདོ་དབུས་མཐོ་སྒང་གི་ཆུའི་ཐོན་ཁུངས་ཉིན་རེ་བཞིན་ཉམས་དམས་སུ་འགྱུར་བ།
རྩོམ་པ་པོ།：དཔའ་རིས་བསོད་ནམས་ཚེ་རིང་།
ཡོང་ཁུངས།：མཚོ་སྔོན་པོ་དྲ་བ།
དུས་ཚོད།：2008-05-02
ཀློག་གྲངས།：
ཆུ་ནི་མིའི་རིགས་ཀྱི་ཚེ་སྲོག་སྐྱོང་བའི་ཉིང་ཁུ་དང་སེམས་ཅན་ཐམས་ཅད་ཀྱི་ཚེ་སྲོག་གི་འབྱུང་ཁུངས་ཡིན། བོད་མི་ཚོས་ཆུ་ལ་ཨ་མའི་བྲང་གི་འོ་མར་དཔེ་འཇོག་དང་འཇིག་རྟེན་དུ་ཆེས་གཙང་མ་ནི་ཆུ་དང་ཨ་མ་གཉིས་ཡིན་ཞེས་པའི་གཏམ་དཔེ་ཡོད། སྤྱིར་མདོ་དབུས་མཐོ་སྒང་ལ་ཆུའི་ཐོན་ཁུངས་ཧ་ཅང་ཕུན་སུམ་ཚོགས་པ༌ཞིག་ཡོད་ན་ཡང་སྐྱེ་ཁམས་ཁོར་ཡུག་གི་གནས་ཚུལ་ཇེ་སྡུག་ཏུ་སོང་བར་བརྟེན་ཆུའི་ཐོན་ཁུངས་ཀྱང་ཉམས་དམས་སུ་འགྱུར་བཞིན་ཡོད།ནང་སྒོས་སུ་སའི་གོ་ལ་ཡོངས་ཀྱི་གནམ་གཤིས་ཇེ་དྲོར་སོང་བས་ཆུ་དཀོན་པའི་ནུབ་བྱང་ས་ཁུལ་ལ་མཚོན་ན་ནད་ཀྱི་སྟེང་ལ་གདོན་ལྟ་བུ་ཡིན་ནོ། །མི་ལ་ལས་རང་གི་མདུན་དུ་ཆུ་གཙང་མོ་ཡོད་ན་འཇིག་རྟེན་དུ་ཆུ་གཙང་མོ་མང་འདོད་པ་དང༌། སའི་གོ་ལའི་སུམ་ཆ་གཉིས་ཙམ་ཆུ་ཡིས་ཟིན་པས་ཆུ་ལ་སེམས་འཁུར་དང་སེར་སྣ་བྱེད་དགོས་དོན་མེད་སྙམ་ནས་ཆུ་བཀོལ་སྤྱོད་སྐབས་སུ་གྲོན་ཆུང་བྱེད་པའི་འདུ་ཤེས་མེད། སའི་གོ་ལའི་སུམ་ཆ་གཉིས་ཙམ་ཆུ་ཡིས་བཟུང་བ་བདེན་ན་ཡང༌། དེའི་ཁྲོད་ཀྱི97.5%ནི་ཚྭ་ཆུ་ཡིན། འཕྲོ་མ2.5%ཙམ་ཟིན་པའི་ཚྭ་མེད་ཆུའི་ཁྲོད་ཀྱི87%ཡང་སའི་གོ་ལའི་བྱང་སྣེ་གླིང་དང་ལྷོ་སྣེ་གླིང་གཉིས་ཀ་དང་གྲང་ངར་ཆེ་བའི་མཐོ་སྒང་གི་འཁྱགས་རོམ་ཡིན། ང་ཚོས་ཤེས་གསལ་ལྟར་ཆུ་ནི་རང་བྱུང་ཁམས་ཆེན་པོའི་ཟུངས་ཁྲག་གི་དྭངས་མ་དང་དབུགས་ལྡན་སྐྱེ་འགྲོ་ཀུན་གྱི་ཚེ་སྲོག་གི་གྲུབ་ཆ་གཙོ་བོ་ཡིན། མི་ཞིག་གིས་ཟ་མ་མ་ཟོས་རུང་ཉིན་མང་པོར་འཚོ་ཐུབ། འོན་ཀྱང་ཆུ་མ་བཏུངས་ན་ཉིན་ཁ་ཤས་ཙམ་ལའང་འཚོ་མི་ཐུབ། ཆུ་དང་སྒོས་ཆུ་རླངས་ནི་ད་དུང་སྨུག་སྤྲིན་དང་ཆར་བ། ཟིལ་བ། སེར་བ། ཁ་བ། བད་ལ་སོགས་ཀྱི་འགྲུབ་བྱེད་ཡིན་པས་ཆུ་ནི་རླུང་ཁམས་ཆེན་པོའི་གྲུབ་ཆ་གཙོ་བོ་ཡིན།
འབྲེལ་ཡོད་འོས་སྦྱོར།
