མདོ་དབུས་མཐོ་སྒང་གི་མཚོ་དང་མཚེའུ་བསྐམ་བཞིན་ཡོད་པ།
རྩོམ་པ་པོ།：དཔའ་རིས་བསོད་ནམས་ཚེ་རིང་།
ཡོང་ཁུངས།：མཚོ་སྔོན་པོ་དྲ་བ།
དུས་ཚོད།：2008-05-01
ཀློག་གྲངས།：
མདོ་དབུས་མཐོ་སྒང་ལ་མཚོན་ན་མིང་དུ་གྲགས་པའི་མཚོ་དང་མཚེའུ། ཆུ་མིག ཆུ་ཀླུང་ཆེ་ཆུང་བགྲང་གིས་མི་ལང་བ་ཞིག་མཆིས་པ་དག་ནི་ཆུའི་ཐོན་ཁུངས་ཕུན་སུམ་ཆོགས་པ་ཞིག་ཡིན་པས་བོད་ཀྱི་སྔོན་བྱོན་མཁས་པ་དག་གི་གསུང་ལས་དབུས་ན་རྨ་གཡང་ཕྱུག་མོ་ལས་བབས་པའི་ཆུ་གཏེར་རྨ་ཀླུང་ཉ་ཡི་ཆབ། །གསེར་འབྲུག་ས་ལ་འཁྱུག་པའི་ཉམས་མཚར་ཅན། །རིས་མེད་སྐྱེ་རྒུ་ངལ་གསོའི་རྟེན་དུ་འབབ། །ཅེས་རྨ་ཆུ་གཙོ་བྱས་པའི་ཆུའི་ཡོན་ཏན་ལ་བསྔགས་བརྗོད་མཛད་པའི་གཏམ་མང་པོ་བྱུང༌། འོན་ཀྱང་ད་ལྟ་རང་བྱུང་ཁམས་ཀྱི་འགྱུར་ལྡོག་དང་མིའི་རིགས་ཀྱིས་གཏོར་རླག་བརྒྱབ་པའི་དབང་གིས་སྔོན་བྱོན་མཁས་པ་དག་གིས་གསུངས་པ་དེ་གནའ་གཏམ་དང་ལྷ་སྒྲུང་དུ་གྱུར།མདོ་དབུས་མཐོ་སྒང་གི་ཁོངས་གཏོགས་མཚོ་སྔོན་ཞིང་ཆེན་མགོ་ལོག་ཁུལ་རྨ་སྟོད་རྫོང་གི་མངའ་ཁོངས་སུ་དུས་རབས་ཉི་ཤུ་བའི་ལོ་རབས་བདུན་ཅུ་བར་མཚེའུ་ཆེ་ཆུང4070ལྷག་ཡོད་པས་ངོ་མ་མཚེའུ་ཆེ་ཆུང་ནམ་མཁའི་སྐར་ཚོགས་ལྟར་བཀྲམ་པ་རེད། འོན་ཀྱང་ཉེ་བའི་ལོ་ཤས་རིང་ལ་རང་བྱུང་སྐྱེ་ཁམས་ཁོར་ཡུག་ལ་གནོད་སྐྱོན་བཏང་བ་ཐལ་དྲགས་པས་རྨ་སྟོད་རྫོང་ཁོངས་ཀྱི་མཚེའུ་50%མིང་ཡོད་ཤུལ་མེད་དུ་གྱུར། རྩྭ་ཆུར་རག་ལས་ཆེ་བའི་འབྲོག་པ་རྣམས་ཀྱིས་རང་གི་ཕ་མེས་ཡང་མེས་ནས་གཏན་སྡོད་བྱས་པའི་གཅེས་སུ་རུང་བའི་ཕ་ཡུལ་བསྐྱུར་ཏེ་ཡུལ་གྲུ་གཞན་ལ་མི་འགྲོ་ག་མེད་བྱུང༌། དཔྱད་གཞིའི་ཡིག་ཆ་འགའ་ལས་བརྗོད་པ་ལྟར1997ལོར་རྨ་ཆུའི་བཞུར་རྒྱུན་ཆད་ནས་ཉིན226འགོར་ཞིང་སྤྱི་ལེ704རིང་བའི་ཡུལ་དུ་རྨ་ཆུ་མ་བཞུར། དེས་ཀྱང་ཧྲན་ཏུང་ཞིང་ཆེན་གཅིག་པུར་དཔལ་འབྱོར་གྱི་གྱོང་གུད་དམངས་སྒོར་དུང་ཕྱུར135ཕོག 1998ལོར་རྨ་ཆུའི་ཆུ་མགོ་ནས་ཐེངས་དང་པོར་བཞུར་རྒྱུན་ཆད། མཚོ་དང་མཚེའུ་མང་པོ་བསྐམས་ཤིང་ཆུ་བོ་ཆེ་ཆུང་དུ་མའི་བཞུར་རྒྱུན་ཆད་པས་ཆར་ཆུ་འབབ་པ་མངོན་གསལ་དུ་ཇེ་ཉུང་ལ་སོང༌། རང་བྱུང་སྐྱེ་ཁམས་ཁོར་ཡུག་ཉམས་རྒུད་དུ་གྱུར་པའི་རྐྱེན་གྱིས་མཚོ་སྔོན་ཞིང་ཆེན་རྨ་ལྷོ་ཁུལ་གཅན་ཚ་རྫོང་གི་ཁ་གཡང་ཞེས་པའི་སྡེ་བའི་འགྲམ་ལོགས་སུ་སྔོན་ཆད་མིང་ལ་ཨ་འབྱུང་ཟེར་བའི་རྨ་ཆུའི་ཡན་ལག་གི་ཆུ་བོ་ཞིག་འབབ་བཞིན་ཡོད། ལོ་ངོ་ཉི་ཤུའི་སྔ་རོལ་དུ་ཆུ་བོ་དེ་ཧ་ཅང་ཆེ་ལ་ཤིན་ཏུ་ཟབ། ཕལ་ཆེར་ལོ་ངོ་བཅུ་ལྷག་གི་སྔ་རོལ་ནས་བཟུང་སྟེ་ཆུ་བོ་དེ་ཉིན་རེ་ལས་ཉིན་རེར་ཇེ་ཆུང་དུ་གྱུར་པ་དང1997ལོར་སླེབས་དུས་ཆུ་བོ་དེ་བསྐམས་ནས་བཞུར་རྒྱུན་ཆད། དེ་བཞིན་དུ་གཅན་ཚ་རྫོང་ཁུལ་ནས་རྨ་ཆུའི་ནང་འབབ་བཞིན་པའི་ཆུ་བོ་བཅུ་ལྷག་གི་འབབ་རྒྱུན་ཀྱང་རྩ་བ་ནས་ཆད། མཚོ་སྔོན་ཞིང་ཆེན་ཡུལ་ཤུལ་ཁུལ་ཆུ་དམར་ལེབ་རྫོང་དུ་དུས་རབསཉི་ཤུ་བའི་ལོ་རབས་ལྔ་བཅུ་བར་ཆུ་བོ500ལྷག་ཡོད་པ་དང་ས་འོག་ལ་སྨི་གཅིག་ཙམ་བརྐོས་ན་དྭངས་ཤིང་གཙང་བའི་ཆུ་མིག་འཕྱུར་ཡོང་བ་དང༌། དུས་རབས་ཉི་ཤུ་བའི་ལོ་རབས་དགུ་བཅུ་བར་རྫོང་ཡོངས་ཀྱི་ཆུ་བོ་ཕལ་ཆེར་བསྐམས་ནས་དུས་ཚིགས་རང་བཞིན་གྱི་ཆུ་མེད་པར་གྱུར། ས་འོག་གི་ཆུ་སྨི་ལྔ་ནས་དྲུག་མར་བབས། རྫོང་གི་གྲོང་རྡལ་དུ་དོང་ཆུ་བརྒྱ་ལྷག་བརྐོས་ནས་ཆུ་ལེན། ཡིན་ཡང་ལོ་གཉིས་ནང་དེ་ཡང་བསྐམས་ནས་འཐུང་ཆུ་ས་ལེ་དབར་བཅུ་ལྷག་ལ་སོང་ནས་ལེན་དགོས་བྱུང༌། ངག་རྒྱུན་དུ་མཚོ་སྔོན་པོའི་མཐའ་སྐོར་ན་ཆུ་མིག་བརྒྱ་རྩ་བརྒྱད་ཡོད་ཟེར། དུས་རབས་ཉི་ཤུ་བའི་ལོ་རབས་ལྔ་བཅུ་བའི་སྔོན་ལ་མཚོ་སྔོན་པོའི་སྟོད་སྨད་བར་གསུམ་ན་ཆུ་བོ78མཚོ་ནང་ལ་འབབ་ཀྱིན་ཡོད་ཟེར། ད་ལྟ་བུ་ཧ་ཆུ་དང་ཧར་དགེ་ཆུ། རིག་སྨོན་ཆུ། རྟ་ནག་མ་ཆུ། འོམ་ལུས་ཆུ་བོ་སོགས20ལྷག་མ་གཏོགས་གཞན་ཚང་མ་བསྐམས་ནསབཞུར་རྒྱུནཆད། མཚོ་སྔོན་པོའི་ནང་ལ་འབབ་པའི་ཆུ་ཡི་གྲངས་ཚད་དེ་ལོ་ལྔ་བཅུའི་སྔོན་ལས50%ཡན་ཇེ་ཉུང་ལ་ཕྱིན། མིག་སྔར་མཚོ་སྔོན་པོའི་ཆུ་ལོ་རེར་ལིས་སྨི་བཅུ་གཅིག་མར་འགྲིབ་ཀྱིན་འདུག མཚོའི་རྒྱ་ཁྱོན་ཇེ་ཆུང་དུ་གྱུར་པ་དང་མཚོ་ཞབས་ས་ཁར་བུད་པ་སྤྱི་ལེ་གྲུ་བཞི་མ་བརྒྱ་ལྷག་ཏུ་སོན། འབྲི་ཆུའི་མགོ་ཁུངས་ས་ཁུལ་གྱི་མཚེའུ་ཆུང་ཆུང་དུ་གྱུར། མཚེའུའི་གཞི་ཁྱོན་གསུམ་ཆ་གཉིས་ཇེ་ཆུང་ལ་སོང༌། རྨ་ཆུའི་མགོ་ཁུངས་ཀྱི་མཚོ་སྐྱ་རེངས་དང་མཚོ་སྔོ་རེངས་གཉི་ག་ལོ་བཞི་བཅུའི་རིང་ཆུ་མར་འགྲིབ་ཚད་སྨི་གཉིས་ཡིན། མིག་སྔར་གཙང་བོ་གསུམ་གྱི་མགོ་ཁུངས་ས་ཁུལ་གྱི་རང་བྱུང་སྐྱེ་ཁམས་ཁོར་ཡུག་ལ་བྱུང་དང་འབྱུང་བཞིན་པའི་གནད་དོན་ནི་མདོ་དབུས་མཐོ་སྒང་ཡོངས་ཁྱབ་ཀྱི་སྐྱེ་ཁམས་ཁོར་ཡུག་ལ་བྱུང་དང་འབྱུང་བཞིན་པའི་གནད་དོན་ཚང་མ་གཅིག་འདྲ་ཡིན། གཙང་བོ་གསུམ་གྱི་མགོ་ཁུངས་ས་ཁུལ་གྱི་སྐྱེ་ཁམས་ཁོར་ཡུག་ཉིན་རེར་ཇེ་སྡུག་དང༌། རྐྱེན་ངན་མང་པོ་བྱུང་བར་བརྟེན་ཡུལ་དེའི་སྐྱེ་ཁམས་ཁོར་ཡུག་ཧ་ཅང་གཉོམ། དེའི་མཚོན་རྟགས་གཙོ་བོ་ནི་མཚོ་དང་མཚེའུ་སྐེམ་པ་དང་རླན་ས་ཇེ་ཉུང་དུ་སོང༌། གཙང་བོའི་ཡན་ལག་གི་འབབ་རྒྱུན་ཆད་པ། རྩྭ་ས་ཞན་འགྱུར། མྱ་ངམ་ཐང་མང་བ། ས་ཆུ་ཤོར་དྲགས་པ། ནགས་ཚལ་སྐྲ་བཞར་བ་ལྟར་བཅད། སྐྱེ་དངོས་ཀྱི་སྣ་འཛོམས་རང་བཞིན་མེད་པ་བཅས་ཡིན། དེ་བས་གཙང་བོ་གསུམ་གྱི་མགོ་ཁུངས་ས་ཁུལ་གྱི་རང་བྱུང་སྐྱེ་ཁམས་ཁོར་ཡུག་ལ་སྲུང་སྐྱོབ་བྱེད་པ་ནི་ཧ་ཅང་གལ་ཆེ་བའི་བྱ་བ་ཞིག་ཡིན་པ་སྨོས་ཅི་དགོས། བོད་ལྗོངས་མངའ་རིས
འབྲེལ་ཡོད་འོས་སྦྱོར།
