མདོ་དབུས་མཐོ་སྒང་གི་འཁྱགས་ཀླུང་ཇེ་ཆུང་དང་ཇེ་ཉུང་ལ་འགྲོ་བཞིན་ཡོད་པ།
རྩོམ་པ་པོ།：དཔའ་རིས་བསོད་ནམས་ཚེ་རིང་།
ཡོང་ཁུངས།：མཚོ་སྔོན་པོ་དྲ་བ།
དུས་ཚོད།：2008-05-01
ཀློག་གྲངས།：
མདོ་དབུས་མཐོ་སྒང་གི་ཆུ་བོ་ཆེན་པོ་མང་ཆེ་བའི་མགོ་ཁུངས་ན་འཁྱགས་ཀླུང་དང་མཐའ་སྐོར་གྱི་གངས་རི་ལ་ཡུན་རིང་བོར་ཉི་ཟེར་ཕོག་པས་རང་བཞིན་དུ་ཞུ་སྟེ་ཆུ་ཐིགས་གཅིག་འཕྲོར་གཅིག་ཐིགས་བཞིན་ཡོད། གངས་ཆུ་དང་འཁྱགས་ཀླུང་གི་ཆབ་རོམ་ཞུ་བ་ལས་བྱུང་བའི་ཆུ། ཆུ་མིག་སོགས་ཕན་ཚུན་འདྲེས་ཏེ་ཆུ་བོ་མིན་ལ་རྐ་ཆུ་ཡང་མ་ཡིན་པའི་འབྲི་ཆུའི་མགོ་ཁུངས་ཀྱི་ཆུ་རྒྱུད་དུ་གྲུབ། དེ་ཡང་འདིར་བརྗོད་པའི་འཁྱགས་ཀླུང་དེ་མ་གཞི་ཆབ་རོམ་ལས་གྲུབ་པས་དེ་དག་ནི་གངས་རི་དང་འདྲ་ལ་ཆུ་ཡི་བང་མཛོད་ཆེན་པོ་ཡིན་པ་སྨོས་ཅི་དགོས། འོན་ཀྱང་ཉེ་བའི་ལོ་ཁ་ཤས་ཀྱི་རིང་ལ་བཞུར་ཆུར་ཁ་བསབ་ཀྱི་ནུས་ཤུགས་ཞན་པ་དང་གོ་ལ་ཧྲིལ་བོའི་གནམ་གཤིས་ཇེ་དྲོར་སོང་བའི་རྐྱེན་གྱིས1991ལོ་ནས2004ལོའི་བར་ལོ་བཅུ་གསུམ་གྱི་རིང་ལ་འབྲི་ཆུའི་མགོ་ཁུངས་ཏེ་རྒུ་ར་མདའ་མདུང་གི་འཁྱགས་ཀླུང་སྨི750ཞུ་བས་ཆ་སྙོམ་ཀྱིས་ལོ་རེར་སྨི57ཞུ་བ་རེད། ཨ་མྱེས་རྨ་ཆེན་གངས་རིའི་འཁྱགས་ཀླུང་གི་གཞི་ཁྱོན་990ལོའི་སྤྱི་ལེ་གྲུ་བཞི་མ166ཡོད་པ་དེ་འཁུམས་ནས2000ལོར་སྤྱི་ལེ་གྲུ་བཞི་མ134མ་གཏོགས་མེད། དོན་ལ་ལོ་བཅུའི་ནང་འཁྱགས་ཀླུང་དེ་ཞུ་ནས་སྤྱི་ལེ་གྲུ་བཞི་མ32ཇེ་ཆུང་ལ་སོང༌། འཁྱགས་ཀླུང་ད་དུང་ཇེ་ཆུང་དང་ཇེ་ཉུང་ལ་འགྲོ་བཞིན་ཡོད། ཡུལ་ལ་ལར་ཁ་བ་འབབ་པའི་མཚམས་ཐིག་དེ་སྤྱི་ལེ་གསུམ་ལྷག་ཇེ་མཐོ་དང་འཁྱགས་ཀླུང་ཞུ་ཚད་ཇེ་མགྱོགས་ལ་སོང༌། མཁས་པས་བསྟན་དོན་མདོ་དབུས་མཐོ་སྒང་ན་འཁྱགས་ཀླུང་ཆེ་འབྲིང་ཆུང་གསུམ4600ལྷག་ཁྱབ་ཡོད་པ་དེ་རྒྱལ་ཡོངས་འཁྱགས་ཀླུང་སྦྱིའི་རྒྱ་ཁྱོན་གྱི83.8%ཟིན་པ་དང༌། ཡ་གླིང་གི་རི་མའི་འཁྱགས་ཀླུང་སྤྱིའི་རྒྱ་ཁྱོན་གྱི40%ཟིན། གནས་མཆོག་འདི་ནི་འབྲི་ཆུ་དང་རྨ་ཆུ། རྫ་ཆུ། རྒྱལ་མོ་རྔུལ་ཆུ། ཡར་ཀླུང་གཙང་བོ། ཧིན་རྡུ་ཆུ་བོ་སོགས་རྒྱལ་ཁབ་ཕྱི་ནང་ལ་འབབ་པའི་ཆུ་བོ་ཆེན་པོ་བཅུ་ལྷག་གི་འབྱུང་གནས་དང་མགོ་ཁུངས་ཡིན། གལ་སྲིད་འབྲི་ཆུའི་མགོ་ཁུངས་ཀྱི་འཁྱགས་ཀླུང་ཞུ་ན་ཆུ་བོ་དེ་དག་ལ་གནོད་པ་ཆེན་པོ་ཕོག་ངེས་རེད། དུས་རབས་ཉི་ཤུ་བའི་ལོ་རབས་བདུན་ཅུའི་སྐབས་དེར་མདོ་དབུས་མཐོ་སྒང་གི་འཁྱགས་ཀླུང་གི་སྤྱིའི་རྒྱ་ཁྱོན་ལ་སྤྱི་ལེ་གྲུ་བཞི་མ48859.18ཡོད་མོད། འོན་ཀྱང་རྒྱུ་རྐྱེན་ཅི་རིགས་ཀྱི་དབང་གིས་ད་ལྟ་འཁྱགས་ཀླུང་གི་སྤྱིའི་རྒྱ་ཁྱོན་སྤྱི་ལེ་གྲུ་བཞི་མ44438.40མ་གཏོགས་མེད། ལོ་སུམ་ཅུའི་རིང་ལ་མདོ་དབུས་མཐོ་སྒང་གི་འཁྱགས་ཀླུང་གི་ཁྱོན་སྤྱི་ལེ་གྲུ་བཞི་མ4420.78ཇེ་ཉུང་ལ་སོང༌། ཆ་སྙོམས་ལོ་རེར་སྤྱི་ལེ་གྲུ་བཞི་མ147.36ཇེ་ཉུང་དུ་འགྲོ་བཞིན་ཡོད། གཞན་ཡང་ང་ཚོས་ཤེས་གསལ་ལྟར་རི་ཡི་རྒྱལ་པོ་ཧི་མ་ལ་ཡ་ས་ཁུལ་གྱི་སྐྱེ་ཁམས་ཁོར་ཡུག་གི་བཟང་ངན་དེ་མདོ་དབུས་མཐོ་སྒང་དང་ཐ་ན་ཨ་ཤེ་ཡ་ས་ཁུལ་གྱི་སྐྱེ་ཁམས་ཁོར་ཡུག་ལ་རག་ལས་ཡོད། འཁྱགས་ཀླུང་གི་གྲུབ་ཆ་གཙོ་བོ་ཆབ་རོམ་ཡིན་པས་ཧི་མ་ལ་ཡ་ས་ཁུལ་གྱི་སྐྱེ་ཁམས་ཁོར་ཡུག་ལ་གནོད་སྐྱོན་ཐེབས་ཏེ་ཆབ་རོམ་ཞུ་ནས་ཆུ་བོ་དེ་དག་བཞུར་རྒྱུན་ཆད་པའམ་ཆུང་ངུར་གྱུར་ཚེ་ཆུ་བོ་དེ་དག་འབབ་རྒྱུད་ཀྱི་སྐྱེ་ཁམས་ཁོར་ཡུག སྤྱི་ཚོགས་དཔལ་འབྱོར། མི་དམངས་འཚོ་བ། རྒྱལ་ཁབ་བར་གྱི་བདེ་འཇགས་སོགས་ལ་གནོད་པ་ཆེན་པོ་ཐེབས་སྲིད་པས་དེ་ནི་ང་ཚོ་ཁོ་ནའི་གྱོང་གུད་མ་ཡིན་པར་མིའི་རིགས་སྦྱིའི་གྱོང་གུད་ཡིན་པ་རེད། ཆབ་རོམ་ལ༌ཞིབ་འཇུག་བྱེད་པའི་ཚན་རིག་པ་འགའ་ཞིག་གིས་བརྟག་དཔྱད་བཏང་བ་ལྟར་ན་སའི་གོ་ལའི་གནམ་གཤིས་ཇེ་དྲོར་སོང་བས་ཧི་མ་ལ་ཡའི་ཆབ་རོམ་མགྱོགས་མྱུར་ངང་ཞུ་བ་དེས་ཀྲུང་གོ་དང་ཧིན་རྡུ། ནེ་པ་ལ། པཱ་ཅི་སི་ཐན། འབྲས་ལྗོངས། འབྲུག་ཡུལ་སོགས་རྒྱལ་ཁབ་ཀྱི་མི་དུང་ཕྱུར་མང་པོར་ཆུ་མི་འདང་བའི་འཇིགས་སྐུལ་ཐེབས་སྲིད་ཅེས་པ་དང༌། དོན་ལ་འབྱུང་ཁུངས་ཧི་མ་ལ་ཡའི་ཆབ་རོམ་ཡིན་པའི་ཡ་གླིང་གི་ཆུ་བོ་ཆེན་པོ་བདུན་ཏེ་ཧིན་རྡུ་ཆུ་བོ་དང་ཆུ་བོ་གང་གཱ། ཡར་ཀླུང་གཙང་བོ། འབྲི་ཆུ། རྨ་ཆུ། རྫ་ཆུ། རྒྱལ་མོ་རྔུལ་ཆུ་སོགས་འབབ་རྒྱུད་ཀྱི་མི་དང་སྐྱེ་དངོས་མཐའ་དག་ལ་ཆུ་དཀོན་པའི་འཇིགས་པ་ཐེབས་ངེས་རེད། ནང་སྒོས་སུ་ཧིན་རྡུའི་སྐམ་ས་ཆེན་པོ་ཕལ་ཆེ་བ་དང་ཀྲུང་གོའི་མི་དུང་ཕྱུར་མང་པོ་ཆུ་བོ་འདི་དག་ལ་བརྟེན་ནས་ཆུའི་ཐོན་ཁུངས་འདོན་སྤྲོད་བྱེད་བཞིན་ཡོད། ཧི་མ་ལ་ཡའི་ས་ཁུལ་ནི་འཛམ་གླིང་ཐོག་ཆེས་ཆེ་བའི་ཆབ་རོམ་འདུ་ས་ཡིན། འོན་ཀྱང་ཡུལ་དེའི་ཆབ་རོམ་ལོ་རེར་སྨི10ནས་5ཡི་མགྱོགས་ཚད་ཀྱིས་ཞུ་བཞིན་ཡོད་ཟེར། དེ་ཨ་ཤེ་ཡའི་ས་གནས་ཀྱི་མི་རྣམས་ལ་མཚོན་ན་ལྟས་ངན་པ་ཞིག་ཡིན་པ་སྨོས་ཅི་དགོས། མགོ་ཁུངས་ཧི་མ་ལ་ཡར་གཏུགས་པའི་ཡ་གླིང་གི་ཆུ་བོ་ཆེ་ཆུང་ཚང་མ་ཨ་ཤེ་ཡའི་དཔལ་ཡོན་གྱི་ཟུངས་ཁྲག་ཏུ་གྱུར་ཡོད་པས་གལ་ཏེ་ཧི་མ་ལ་ཡའི་ཆབ་རོམ་ཞུ་ནས་ཆུ་ཇེ་ཉུང་ལ་སོང་དུས་གོང་སྨོས་ཀྱི་ཆུ་བོ་ཆེན་པོ་དེ་དག་འབབ་ཡུལ་གྱི་སྐྱེ་ཁམས་ཁོར་ཡུག སྤྱི་ཚོགས་དཔལ་འབྱོར་ལ་གནོད་པ་ཕོག་པར་མ་ཟད། ཡུལ་གྲུ་དེ་དག་གི་སྤྱི་ཚོགས་བདེ་འཇགས་ལའང་གནོད་པ་ཆེན་པོ་ཐེབས་སྲིད་པས་ཧི་མ་ལ་ཡའི་ཆབ་རོམ་ལ་སྲུང་སྐྱོབ་གང་ཐུབ་བྱེད་པ་ནི་འཛམ་གླིང་ཡོངས་ཀྱི་འོས་འགན་ཡིན། ནང་སྒོས་སུ་ཨ་ཤེ་ཡ་ས་ཁུལ་གྱི་རྒྱལ་ཁབ་ཚང་མ་མཉམ་འབྲེལ་མཐུན་ཚོགས་བྱས་ནས་ཐབས་བརྒྱ་ཇུས་སྟོང་གིས་ཧི་མ་ལ་ཡའི་ཆབ་རོམ་ལ་སྲུང་སྐྱོབ་ཅི་ཐུབ་བྱེད་དགོས།
འབྲེལ་ཡོད་འོས་སྦྱོར།
