མདོ་དབུས་མཐོ་སྒང་གི་རླན་སའི་གཞི་ཁྱོན་རིམ་གྱིས་ཇེ་ཆུང་དུ་གྱུར་དང་འགྱུར་བཞིན་པ།
རྩོམ་པ་པོ།：དཔའ་རིས་བསོད་ནམས་ཚེ་རིང་།
ཡོང་ཁུངས།：མཚོ་སྔོན་པོ་དྲ་བ།
དུས་ཚོད།：2008-04-30
ཀློག་གྲངས།：
མདོ་དབུས་མཐོ་སྒང་གི་སྐྱེ་ཁམས་ཁོར་ཡུག་གི་གྲུབ་ཚུལ་ལ་གཞིགས་ན་རླན་ས་ནི་མེད་མི་རུང་བའི་གྲུབ་ཆ་གལ་ཆེན་ཞིག་ཡིན། རང་རེའི་རྒྱལ་ཁབ་ནི་རླན་ས་མང་པོ་ཡོད་པའི་རྒྱལ་ཁབ་ཅིག་ཡིན་པས་རླན་སའི་གཞི་ཁྱོན་དེས་འཛམ་གླིང་རླན་སའི་གཞི་ཁྱོན་སྤྱིའི10%ཟིན། གླིང་ཆེན་ཨ་ཤེ་ཡའི་ཨང་དང་པོ་དང་འཛམ་གླིང་ནས་ཨང་བཞི་བ་ཡིན། རང་བྱུང་རླན་ས་སུམ་ཅུ་ལྷག་དང་མིས་བཟོས་རླན་ས་བཅུ་ལྷག་ཡོད། ང་ཚོས་ཤེས་གསལ་ལྟར་རླན་ས་ཞེས་པ་ནི་སྐམ་སའི་དབུས་ཁུལ་གྱི་ཆུ་ངོས་སམ་ཡང་ན་མཚོ་འགྲམ་གྱི་ཆུ་དང་སྐམ་སའི་འབྲེལ་མཚམས་ནས་ཕར་བསྲིངས་པའི་ས་ཁོངས་ངེས་ཅན་ལ་ཟེར། རང་ བྱུང་ཁམས་ཀྱི་རླན་ས་ཆེན་པོ་དེར་སེམས་ཅན་ཐམས་ཅད་དང་རྩི་ཤིང་རིགས་མཐའ་དག་ལ་མཁོ་བའི་ཆུ་འདོན་སྤྲོད་དང་མཁའ་དབུགས་ཀྱི་རླན་ཚད་སྙོམས་སྒྲིག་སོགས་ཀྱི་ཕན་ནུས་ཆེན་པོ་ཡོད་པས་སྐྱེ་ཁམས་རིག་པ་བ་རྣམས་ཀྱིས་དེར་སའི་གོ་ལའི་མཁལ་མ་ཞེས་འབོད་ཀྱིན་འདུག ང་ཚོས་མདོ་དབུས་མཐོ་སྒང་གི་སྐྱེ་ཁམས་ཁོར་ཡུག་ལ་སྲུང་སྐྱོབ་སྐབས་སུ་ངེས་པར་དུ་ཡུལ་གྲུ་དེའི་རླན་ས་སྲུང་སྐྱོབ་ལ་མཐོང་ཆུང་བྱེད་མི་རུང༌། རླན་ས་ཡོད་པའི་ས་ཆར་ཆུ་ལོག་བྱུང་དུས་ཆུ་ན་འདམ་དང་གཤོང་སར་ཐིམས་ནས་སྨད་རྒྱུད་ལ་ཆུ་ལོག་གི་གནོད་པ་ཆེན་པོ་མེད། ཆུ་ལོག་བྱུང་ཚར་རྗེས་རླན་སར་གསོག་ཉར་བྱས་པའི་ཆུ་དེ་རླངས་པར་འགྱུར་བའམ་ཡང་ན་མར་ཐིམས་ནས་ས་འོག་གི་ཆུ་རུ་གྱུར་ཏེ་བཞུར་འགྲོ་བ་དང༌། ཐན་པའི་ལོ་ལ་ཆུ་དཀོན་སེལ་བའི་ནུས་པ་ཡོད་ན་ཡང་རླན་ས་ཕལ་ཆེ་བ་ཐར་ཐོར་དུ་ཡོད་པས་ལོ་ཏོག་འདེབས་པ་དང་ནགས་འཛུགས་པའི་གོ་མི་ཆོད་པས། མི་རྣམས་ཀྱིས་རླན་ས་ནི་འབུ་སྲིན་གྱི་འབྱུང་ཁུངས་དང་སྐྱུག་བྲོ་བའི་ས་ཁུལ་བཙོག་སྦགས་ཅན་དུ་བརྩིས་ནས་སྲུང་སྐྱོབ་མི་བྱེད། དུས་རབས་ཉི་ཤུ་བའི་ལོ་རབས་དྲུག་ཅུ་བའི་སྐབས་སུ་མཛོད་དགེའི་རྩྭ་ཐང་ནི་གསེར་གཞོང་མར་ཁུས་གང་བ་ལྟ་བུ་ཧ་ཅང་སྣུམ་ལ་མཛེས་སྡུག་གི་རྣམ་པས་ཁེངས་ཤིང༌།རྩྭའི་རྫོང་མཐུག་ཅིང་རྩྭ་རྐང་རིང་བས་རྟ་བཞོན་ཏེ་སོང་ན་ཡོབ་མིག་གི་ལྷམ་ཡང་རྩྭ་ཡི་ཟིལ་བས་རློན་པར་བྱེད་ལ། མུ་མཐའ་མེད་པའི་ན་ཐང་ཆེན་མོར་མཚོ་དང་མཚེའུ་མང་པོ་ཡོད། ཡིན་ན་ཡང1965ལོ་ནས1973ལོའི་བར་རྩྭ་ས་ཇེ་ཆེར་གཏོང་དགོས་ཟེར་ནས་ན་ཐང་གི་རིང་ཚད་སྤྱི་ལེ300ཙམ་གྱི་ན་ཆུ་རྐ་ལ་དྲངས་པས་ན་ཐང་རིམ་གྱིས་བསྐམས་ཤིང་རི་དྭགས་དང་བྱ་རིགས་འཁོར་ས་མེད་པས་ཡུན་གྱིས་ཇེ་ཉུང་ལ་སོང༌། མཚོ་ཁྱ་ཁྲབ་དང་ལམ་ལུང་མཚོ་ཆེན་སོགས་ཀྱང་རིམ་གྱིས་ཇེ་ཆུང་དུ་སོང༌། ན་ཐང་གི་ཆུ་དང་སྒོས་ཆུ་ནག་རྣམས་ཀྱང་བསྐམས་ནས་སྐྱ་རྐང་ཅི་དགར་འགྲོ་ཐུབ། དེ་འདྲའི་གནས་ཚུལ་ནི་མདོ་དབུས་མཐོ་སྒང་གི་ན་ཐང་རླན་ས་མང་པོར་བྱུང་མྱོང༌། ཚན་རིག་པས་བརྟག་དཔྱད་བཏང་བ་ལྟར་ན་རླན་སར་གཏོར་རླག་བྱས་ན་མིའི་རིགས་ལ་ཐེབས་པའི་གནོད་འཚེ་ནི་ཁེ་ཕན་ལས་ཆེས་ཆེ་བ་ཡིན་ཟེར། མདོ་དབུས་མཐོ་སྒང་གི་མཚོ་སྔོན་པོ་ནི་འཛམ་གླིང་ཐོག་སྐད་གྲགས་ཆེ་བའི་རླན་ས་ཆེན་པོ་བདུན་ཡོད་པའི་ནང་གསེས་ཀྱི་གཅིག་ཡིན། ཐན་པ་མང་ཞིང་ཆར་ཆུ་ཉུང་བའི་མདོ་དབུས་མཐོ་སྒང་ལ་མཚོན་ན་མཚོ་སྔོན་པོའི་རླན་ས་དེས་སྐྱེ་ཁམས་ཁོར་ཡུག་ལ་སྙོམས་སྒྲིག་བྱེད་པ་དང་མཐོ་སྒང་གི་སེམས་ཅན་ཐམས་ཅད་ཀྱི་ཚེ་སྲོག་སྐྱོང་བ་རེད། སྐྱེ་ཁམས་རིག་པ་བས་བརྟག་དཔྱད་བཏང་བ་ལྟར་མཚོ་སྔོན་པོ་མེད་ན་ཚྭ་འདམ་གྱི་བྱེ་རླུང་གིས་རང་རྒྱལ་ཁབ་ཀྱི་རྒྱ་ཁྱོན་ཕྱེད་ཀ་བསྣུབ་པ་དང་མདོ་དབུས་མཐོ་སྒང་ནས་མིའི་རིགས་ཀྱིས་འཚོ་བ་སྐྱེལ་མི་ནུས། དེ་ལས་ང་ཚོས་མཚོ་སྔོན་པོས་རང་རྒྱལ་གྱི་ནུབ་རྒྱུད་ས་ཁུལ་གྱི་སྐྱེ་ཁམས་དོ་མཉམ་ཡོང་བར་གཞན་གྱིས་ཚབ་བྱེད་མི་རུང་བའི་ནུས་པ་འདོན་པ་གསལ་བོར་ཤེས་ཐུབ། མཚོ་སྔོན་པོའི་ཡུལ་དུ་རླན་སའི་གཞི་ཁྱོན་ཕལ་ཆེར་སྤྱི་ལེ་གྲུ་བཞི་མ780ལྷག་ཡོད།མཚོ་སྔོན་པོ་དང་མཚོ་སྔོན་པོའི་རླན་སའི་ས་ཁུལ་ལས་བྱུང་བའི་རླངས་པ་ལས་གངས་རི་དང་འཁྱགས་ཀླུང༌། སྐར་ཚོགས་ལྟར་བཀྲམ་པའི་མཚོ་དང་མཚེའུ་སོགས་གྲུབ། ཆུ་བོ་མང་པོ་ཡང་མཚོ་སྔོན་པོར་འབབ་པས་མཚོ་ཆུ་བསྐལ་བ་ནས་བསྐལ་བའི་བར་བསྐམ་རྒྱུ་མེད་ལ་མདོ་དབུས་མཐོ་སྒང་གི་དཔལ་འབྱོར་སྤྱི་ཚོགས་དང་མིའི་རིགས་སྤྱི་ཚོགས་དེ་མུ་མཐུད་ཅིང་ཡུན་བརྟན་ངང་འཕེལ་རྒྱས་བྱུང་བ་ཡིན། ཡིན་ན་ཡང་ཉེ་བའི་ལོ་དུ་མའི་རིང་མཚོ་སྔོན་པོའི་ཆུ་བསྟུད་མར་མར་འགྲིབ་པ་དང་རླན་སའི་གཞི་ཁྱོན་རིམ་གྱིས་ཇེ་ཆུང་དུ་གྱུར་དང་འགྱུར་བཞིན་པ་དེར་ང་ཚོས་མཉམ་འཇོག་བྱེད་དགོས།
འབྲེལ་ཡོད་འོས་སྦྱོར།
