ཚེ་སྲོག་འདྲ་མཉམ་དང་སྐྱེ་ཁམས་དོ་མཉམ།
ཇི་སྐད་དུ། “ལས་ལས་འཇིག་རྟེན་སྣ་ཚོགས་སྐྱེས”ཞེས་པའི་ནང་བསྟན་མཚན་ཉིད་རིག་པའི་ལྟ་བ་དེ་ཁས་ལེན་མིན་གྱི་གང་ཟག་སྣ་མང་ཡོད་ངེས་ཀྱང༌། གོ་ལ་འདིའི་སྟེང་གི་སྲོག་ལྡན་སེམས་ཅན་ཚང་མ་ཐུན་མོང་སྤྱི་མཐུན་གྱི་རྒྱུ་ཞིག་གིས་ལྷན་དུ་སྦྲེལ་ཏེ་འཚོ་གནས་བྱེད་དགོས་རྒྱུ་ནི་སུས་ཀྱང་བསྙོན་དུ་མེད་པའི་བདེན་དོན་ཞིག་ཡིན། ཐུན་མོང་གི་རྒྱུ་དེ་ནི་ད་ལྟ་ང་ཚོས་རྒྱུན་དུ་གླེང་བཞིན་པའི་སྐྱེ་ཁམས་དོ་མཉམ་ཞེས་པ་དེ་ཡིན་ནོ། །སྐྱེ་ཁམས་དོ་མཉམ་ཡོང་དགོས་ན། ཐོག་མར་ཚེ་སྲོག་འདྲ་མཉམ་ཡིན་དགོས་པས་འདིར་ཚེ་སྲོག་འདྲ་མཉམ་ཐད་ཀྱི་ལབ་གླེང་ཕྲན་བུ་ཞིག་བྱས་ན། དེ་ཡང་ནམ་མཁའ་མཐའ་མེད་པ་བཞིན་དུ་དབུགས་ལྡན་སེམས་ཅན་གྱི་གྲངས་ལའང་མཐའ་ཡོད་པར་མ་ངེས་ཏེ། སེམས་ཅན་ལ་ལ་མཁའ་ལ་བརྟེན་པ་དང༌། ལ་ལ་སྐམ་སར་འཚོ་བ། ལ་ལ་རྒྱ་མཚོར་གནས་པ། ལ་ལ་རིའི་ཁོང་གསེང་དུ་སྡོད་པ་སོགས་གནས་དང༌། རིགས་དང༌། དབྱེ་བ། སྡོད་ལུགས་སོགས་མི་འདྲ་བས་སེམས་ཅན་གྱི་གྲངས་ནི་དེ་ཙམ་ཞིག་གོ་ཞེས་སུས་ཀྱང་ཁ་ཚོན་གཅོད་དཀའ་བ་རེད། རྗེ་ཞབས་དཀར་ཚོགས་དྲུག་རང་གྲོལ་གྱི་ཞལ་ནས། “དེ་ཡང་སེམས་ཅན་འགའ་ཞིག་ས་གཞི་ལ། །ས་ལ་ས་ཡི་འདུ་ཤེས་སེམས་ཅན་ཡོད། །ས་ལ་མེ་ཡི་འདུ་ཤེས་སེམས་ཅན་ཡོད། །ས་ལ་ལོངས་སྤྱོད་འདུ་ཤེས་སེམས་ཅན་ཡོད”ཅེས་དང༌། “ཆུ་ལ་ཆུ་ཡི་འདུ་ཤེས་སེམས་ཅན་ཡོད། །ཆུ་ལ་མེ་ཡི་འདུ་ཤེས་སེམས་ཅན་ཡོད། །ཆུ་ལ་བདུད་རྩིར་འདུ་ཤེས་སེམས་ཅན་ཡོད། །ཆུ་ལ་གནས་ཁང་འདུ་ཤེས་སེམས་ཅན་ཡོད”ཅེས་པ་བཞིན་འབྱུང་བ་རང་མཚན་པར་མ་གྲུབ་པའི་སེམས་ཅན་གྱི་གྲངས་ནི་མཐའ་ཡོད་པ་མ་ཡིན་ནོ།།
སྲོག་ལྡན་སེམས་ཅན་ཞིག་གི་ལུས་རྟེན་བླངས་པ་ནས་བཟུང་རང་གི་སྲོག་ལ་ཕངས་སེམས་ཆགས་ཞེན་མི་ཆེ་བ་གཅིག་ཀྱང་ཡོད་པ་མ་ཡིན་ཏེ། ཕྲ་མཐོང་ཆུ་ཤེལ་འོག་གི་སྲིན་འབུ་ཕྲ་མོའི་རིགས་ཀྱང་ཁབ་ཀྱིས་གཙགས་ན་སྲོག་ལ་གནོད་པར་དོགས་ནས་འཁྱུག་འབྲོ་བྱེད་པ་མཐོང་ཆོས་ཡིན་པས་དབུགས་ལྡན་སེམས་ཅན་ཚང་མ་དེ་འདྲ་འབའ་ཞིག་གོ། སེམས་ཅན་སྲོག་ལྡན་ཞིག་ལ་མཚོན་ན་ཆེ་བ་གླང་ཆེན་ནས་ཆུང་བ་གྲོག་འབུ་ཡན་ཆད་ཚང་མར་གོ་ལ་འདིའི་སྟེང་དུ་རང་དབང་གིས་འཚོ་གནས་བྱེད་པའི་ཁེ་དབང་ཡོད། ང་ཚོས་རང་གི་མཛེས་དཔྱོད་ལྟ་བ་སོགས་ཁྱེར་ཏེ་སྲོག་ཆགས་དེ་དག་གི་གཟུགས་གཞིའི་ཆེ་ཆུང༌། རྩལ་ཤུགས་འདྲ་མིན་བཅས་ལ་གཞིགས་ནས་བློ་གྲོས་ཀྱི་མཐོ་དམན་འགེར་བ་དང༌། བཟང་ངན་རྣམ་དབྱེ་འབྱེད་པ། མིའི་རིགས་ལ་དགོས་མཁོ་ཡོད་མིན་སོགས་ཀྱི་ཁྱད་པར་གླེངས་ནས་སྲོག་ལྡན་དེ་དག་གི་སྲོག་འཕྲོག་པ་དང༌། དེ་དག་གི་ཐོབ་ཐང་བཅོམ་པ་ནི་ལུགས་དང་འགལ་བའི་རྩུབ་སྤྱོད་སྐྱུག་བྲོ་བ་ཞིག་ཡིན། ཚང་མས་ཤེས་གསལ་ལྟར། དུས་རབས་འདིའི་སྔོན་མ་ཞིག་ནས་མགོ་བརྩམས་ཏེ་ང་ཚོས་རང་ཉིད་ནི་འཇིག་རྟེན་ཁ་ལོ་སྒྱུར་བའི་བདག་པོ་དང༌། གོ་ལ་འདུལ་སྦྱོང་བྱེད་མཁན་གྱི་རྗེ་བོ་ཡིན་པར་འུད་བསྒྲགས་ཤིང་བརྣབ་སེམས་གནོད་སེམས་ཀྱིས་རྒྱུད་སྦོས་ཏེ་ཧམ་སེམས་དང་འདོད་པ་བག་མེད་དུ་རྒྱས་བཅུག་པའི་མཇུག་འབྲས་ནི། སའི་གོ་ལའི་མགོ་མཇུག་བར་གསུམ་ཀུན་ནས་ས་རྐོ་རྡོ་སློག་དང༌། ནགས་འཇོམས་རྨོན་འདེབས། གཏེར་འདོན་དུག་འཕེལ་ལ་སོགས་པའི་བྱ་སྤྱོད་ངན་པ་ཚད་ལས་འདས་པ་ཞིག་བགྱིས་པ་དེ་ཡིན་ནོ། །དེ་དག་གི་རྣམ་སྨིན་ད་ལྟ་ང་ཚོས་མི་འདོད་བཞིན་དུ་མྱོང་“་བཞིན་ཡོད་དེ། དྭངས་ཤིང་བསིལ་བའི་ཆུ་བོ་དུག་གིས་སྦགས། སྔོ་ལྗང་ཡངས་པའི་རྩྭ་ཐང་བྱེ་ཐང་དུ་གྱུར། ཚང་ཚིང་གཡུ་ལོའི་ནགས་ཚལ་ཤུལ་མེད་དུ་བཟོས། མཁའ་དབུགས་དྲི་མས་བསླད། བར་སྣང་རྡུལ་གྱིས་བསྒྲིབས། རྩ་ཆེན་སྲོག་ཆགས་ཁ་བཏགས་པས་ས་ཡི་བཅུད་ཉམས་ཤིང༌། སྐྱེ་འགྲོའི་གཡང་ཉམས། རང་བྱུང་མཛེས་པའི་ཡུལ་ལྗོངས་མང་བོ་ནམ་མཁའི་འཇའ་ཚོན་བཞིན་དུ་ཡལ། བདག་གཞན་གཉིས་ཕུང་སྡུག་བསྔལ་ཚད་མེད་བསྐྱེད་པའི་རྒྱུ་བསྐྲུན་ཡོད་ཕྱིར་གང་སར་ནད་ཡམས་དང་མུ་གེ་བྱུང༌། གངས་ཞོད་བབས། ཤྭ་འོད་བརྒྱུགས།བྲག་རི་ཉིལ། རྒྱ་མཚོ་འཁྱོམས། མེ་རི་འཕྱུར། ཚད་པས་གདུང་ཞིང་ཐན་པ་བྱུང་བ་སོགས་མིའི་རིགས་ལ་སྔ་ན་མ་བྱུང་བའི་རང་བྱུང་ཆགས་འཇིག་གི་གནོད་པ་ཡ་ང་བ་བྱུང་དང་འབྱུང་བཞིན་ཡོད། དེ་དང་ལྷན་དུ་ཐོན་ཁུངས་དང་བདག་དབང་རྩོད་པའི་ཆགས་སྡང་གི་གཡུལ་འཁྲུག་ལོ་རེར་ཇེ་དྲག་ཏུ་ཕྱིན་ཏེ། མི་ཤི་རྟ་འགྱེལ་གྱི་སྐྱོ་གར་ཉིན་རེར་བར་མེད་དུ་འཁྲབ།ཞེ་མེར་བའི་སྲིད་པ་འཇིག་རྟེན་འདི་ནི་བླ་འཁྱམས་པ་ཇི་བཞིན་གང་སར་སྡུག་བསྔལ་གྱིས་མནར་བཞིན་པས་ན།
དེ་དག་གིས་ང་ཚོ་ལ་བསམ་གཞིག་གི་ལམ་སྣེ་མང་བོ་ཞིག་བྱིན་དང་སྦྱིན་བཞིན་ཡོད་ལ། ཤེས་ནས་སྨྲ་བའི་ཁྱུ་མཆོག་ཀུན་གྱིས་སྔར་བྱས་ཚུལ་མིན་བྱ་སྤྱོད་ལ་ནོངས་འགྱོད་དང་མཐོལ་བཤགས་བྱེད་ཀྱིན་ཡོད།
ཚེ་སྲོག་ལ་གཅེས་སྤྲས་དང་ཚེ་སྲོག་ལ་བཀུར་སྟི་བྱེད་རྒྱུ། ཚེ་སྲོག་ནི་རྙེད་དཀའ་ཞིང་དོན་ཆེ་བའི་གལ་ཆེན་རང་བཞིན་རྟོགས་རྒྱུ་ནི་མིའི་རིགས་ཀྱིས་འཕྲལ་དུ་ཐག་གཅོད་དགོས་པའི་གནད་དོན་ཞིག་ཡིན་ལ། ཚེ་སྲོག་ལ་གཅེས་སྤྲས་བྱེད་ཤེས་ན་ཚེ་སྲོག་རྙེད་དཀའ་བ་རྟོགས་ཤིང༌། ཚེ་སྲོག་འདྲ་མཉམ་གྱི་འདུ་ཤེས་ཀྱང་ངང་ཤུགས་ཀྱིས་ཆགས་འགྲོ་བ་ཡིན། རྒྱུ་དེས་བསྐྱེད་དེ་སེམས་ཅན་ལ་བཏང་སྙོམས་སྒོམ་པ་དང་སེམས་ཅན་ལ་བྱམས་པ་སྒོམ་པ། སེམས་ཅན་ལ་སྙིང་རྗེ་སྒོམ་པ།སེམས་ཅན་ལ་ཕན་བདེ་སྐ
