བོད་མིའི་སྲོལ་རྒྱུན་འདུ་ཤེས་ལས་འཕྲོས་ཏེ་སྣོད་བཅུད་བདེ་སྲུང་སྐོར་གླེང་བ།

  སྣོད་ཀྱི་འཇིག་རྟེན་ཆེན་པོ་འདིར་འཚོ་བའི་བཅུད་ཀྱི་སྐྱེ་དངོས་འདི་རིགས་ཐམས་ཅད་འབྱུང་བཞི་ལས་གྲུབ་པའི་སྣོད་འདིར་མ་བརྟེན་པ་གཅིག་ཀྱང་མེད་ལ།   ཁྱད་པར་འབྱུང་བའི་རྒྱུ་གང་རུང་ཞིག་མ་ཚོགས་ནའང་མི་སྐྱེ་བའི་དངོས་པོ་ཉིད་དུ་གྲུབ་པ་ནི་རྟེན་འབྱུང་གི་ཆོས་ཉིད་དུ་ཆགས།  དཔེར་ན།  ས་བོན་ལ་བརྟེན་ནས་མྱུ་གུ་ཕུན་སུམ་ཚོགས་པ་ཞིག་གྲུབ་པ་ཉིད་དོ། །ལས་བརྒྱ་བར།  འགྲོ་བའི་ལས་ཀྱིས་འཇིག་རྟེན་དག །  སྣ་ཚོགས་རྟེན་འབྱུང་ཉིད་ཀྱིས་གྲུབ།  །གསུང་པ་ལྟར།  ལས་ཀྱི་མཐུ་མི་འདྲ་བའི་དབང་གིས་འགྲོ་བ་ལ་སོགས་སྐྱེ་བའི་དངོས་པོ་མཐའ་དག་དཔར་གཅིག་ལས་བྱུང་བ་ལྟ་བུ་ཞིག་མ་ཡིན་ལ།   ལས་ཀྱི་མཐུ་ཟེར་བ་ནི།  རྒྱུ་ལས་ཀྱི་མཐུ་སྟེ་ལས་ཀའི་བྱེད་རྩོལ་མི་གཅིག་པའི་དབང་གིས་ཡིན་པ་ལས།  གང་ལའང་རག་མ་ལས་པའི་ལས་ཡན་གར་བ་ཞིག་མེད་དོ། །སྔོན་ལས་ཟེར་བ་ད་ལྟའི་རང་ཉིད་དང་འབྲེལ་མེད་ཀྱི་སྔ་མ་སྔ་མ་ཞིག་བསམ་པའི་བོད་པ་མང་ཡང་དེ་རིགས་ལ《ནང་བསྟན་ཤེས་རིག་ཆེན་པོའི་གཞི་རྩའི་རྣམ་བཤད》ཅེས་པར་ཡང་ཡང་གླེང་བ་དེ་ལ་གཟིགས།  ཁ་ཅིག་བཅུད་ཀྱི་བསྡུས་པ་གང་ཡིན་པ་ཐམས་ཅད་སེམས་ལྡན་དུ་འདོད་པ་ཡོད་ལ།  བྱེད་པོ་སྨྲ་བ་ཚོས་དེ་བས་ཀྱང་གཞན་པ་ཞིག་འདོད་ཀྱི་ཡོད་པས་རང་རེའི་ལྟ་བ་དང་རྒྱབ་ཀྱིས་ཕྱོགས་སོ། །འོ་ན་བཅུད་ལ་གང་འཇོག་ཅེ་ན།  འགྲོ་བ་སེམས་ལྡན་གཙོས་སྣོད་ལ་བརྟེན་ནས་སྐྱེས་པའི་རྩྭ་རྩི་ཤིང་ཐམས་ཅད་འཇོག་དགོས་པ་སྟེ།  སྣོད་ཕོར་བའི་ནང་གི་ཆུ་དང་འོ་མ་གང་ཡིན་རུང་སྣོད་ཕོར་བ་དེར་བརྟེན་པ་ལ་འགལ་བ་མེད་པ་ལྟ་བུ་ཡིན། 

  བོད་མིའི་སྲོལ་རྒྱུན་ལ་ས་བདག་ཆུ་བདག་སོགས་སྣོད་བཅུད་ཐམས་ཅད་ལ་མི་ལས་ལྷག་པའི་གཉེན་པོ་གསང་བ་རེ་བདག་པོར་བསྐོར་ཏེ་བདེ་སྲུང་བྱེད་ཐབས་སྣ་ཚོགས་ཤིག་ཡོད་པ་ལ།  ཁ་ཅིག་བླུན་པོའི་གཏམ་དུ་འདོད།  ཁ་ཅིག་ཡིད་སྨོན་བྱེད།   ཁ་ཅིག་རྒྱུན་སྲོལ་དུ་ལྟ་བ་ལ་སོགས་ཡོད་ནའང་ངས་ཐབས་འདི་ཆེས་བླ་ན་མེད་པའི་བྱེད་ཐབས་ཤིག་རེད་བསམ་གྱི་ཡོད།  རྒྱུ་མཚན་ནི།   ནགས་དང་ཆུ་བོ་འཛོམས་སའི་སྡེ་བ་ཞིག་ལ་མཚོན་ན།   ནགས་དང་ཆུ་བོ་ཐམས་ཅད་ལ་བརྩེ་མདང་ཆེ་བ་ཞིག་ཏུ་ཆགས་ཡོད་པ་མ་ཟད།  དེར་འཚོ་བའི་བྱ་དང་བྱིའུ་རི་དྭགས་སོགས་ལའང་གནོད་པ་སྲུང་བའི་ཐབས་སྣ་ཚོགས་ཤིག་ཡོད།  དཔེར་ན།  འཇིག་རྟེན་པའི་ལྷ་མཐུ་བོ་ཆེ་གང་རུང་ཞིག་གནས་སའི་རི་དེ་ལ་ལྷ་རི་གནས་རི་ཞེས་མིང་གིས་འབོད་ཅིང་།  ལོ་རེའི་དུས་བཟང་ལ་རི་དེར་དར་མདུང་སོགས་ཀྱིས་རྒྱན་མཆོད་དང་།   གསར་སྐྱེས་ལྗོན་ཤིང་སྣ་ཚོགས་ཀྱིས་མཁར་རྫོང་ཆེན་པོ་བརྩིགས་སྲོལ་ཡོད།  འདི་མཆོད་པ་ཞིག་ཏུ་བསམ་ནས་གང་ལ་ཕུལ་བའི་མཐུས་གནས་འདིའི་མི་ཕྱུགས་ཐམས་ཅད་ལ་ནད་དང་གོད་ཁ་མི་འོང་བ་དང་།  ཀུན་གྱི་བསམ་དོན་ཡིད་བཞིན་དུ་འགྲུབ་པར་སྨོན་པ་བྱེད།  གསང་གཏོང་བ་དེ་ཡང་དེའི་ཆེད་ཡིན།  དེ་ཕྱིར་རི་དང་ཡུལ་ལུང་ཐམས་ཐད་ལྷ་དེའི་བཙན་རྫོང་དུ་བསམ་ནས་གནོད་པ་ཡེ་མི་བྱེད།  ས་རྐོ་རྡོ་སློག་ཙམ་བྱེད་དགོས་པ་བྱུང་ནའང་གནས་དེར་མཆོད་པ་ཕུལ་ཏེ་གནང་བ་སློང་བ་དང་།  ལྗོན་ཤིང་འདྲ་གཅོད་དགོས་ནའང་འབྲུ་གཟན་ལ་དཀར་གསུམ་དམར་གསུམ་གྱིས་ཞུགས་ཏེ་གནས་དེར་ལེགས་པར་གཏོར་ནས་སློང་དགོས་པའི་སྲོལ་བཟང་བོའི་མཐུས་ཉེ་རབས་པར་མ་འཛད་པར་ལུས་པ་ཡིན་ནོ། །གང་ལྟར་རྨོངས་པ་ཙམ་དུ་སོང་ནའང་ས་ཆུ་རི་ལུང་གཙང་མ་གཙང་རྐྱང་ཞིག་ས་སྒང་འདི་ནས་ལུས་ཐུབ་ཀྱི་ཐབས་རྨད་བྱུང་སྲོལ་བཟང་ཞིག་ཏུ་མཐོང་ངོ་།  །ཡུལ་འགའ་ཞིག་ཏུ་ཤིང་དང་ཤིང་རིགས་གང་ཞིག་ཡིན་རུང་རང་གིས་བཙུགས་པ་དང་རང་བཞིན་གྱིས་ཡོད་པ་གཉིས་ལ་ཁྱད་ཆེན་པོ་འབྱེད་ཅིང་།  རང་གིས་བཙུགས་པ་ཞིག་ཡིན་ན་ལོ་ཏོག་ལྟར་ལོངས་སུ་སྤྱོད་པ་ལ་སྐྱོན་དུ་མི་བརྩི།  གཞན་རྩྭ་ཕུང་ཤིང་རལ་སོགས་ལའང་མེ་གཏོར་མི་བྱེད་པར་དེར་འཚོ་བའི་འགྲོ་བ་ཆུང་ངུའི་རིགས་ཀྱིས་གནས་བཅའ་བར་འདོད།  འདི་ཡང་ཁོར་ཡུག་དེར་སྲུང་སྐྱོབ་བྱེད་ཆེད་ཀྱང་ཡིན་ལ།  གཏན་ཚིགས་དང་མཐུན་པའི་བདེན་ལུགས་ཀྱང་ཡིན།  ཆུ་འགོ་ཐམས་ཅད་ལ་ཧ་ཅང་རྩིས་ཆེ།  རང་བཞིན་གྱིས་ལག་བཟེད་ཙམ་ཡང་མི་བྱེད།  རྒྱུ་མཚན་ལག་པ་མི་གཙང་བས་ཀླུ་གྲིབ་བྱུང་བར་དོགས་པ་རེད།  ཐམས་ཅད་ཀྱི་ཁ་ན་ཀླུས་གནོད་པ་བྱུང་ན་ལུས་ལ་རྨ་དང་རྐང་ལག་གཟེར་བ་སོགས་འབྱུང་ཞེས་གླེང་ཆེ་སྟབས་ཀུན་གྱིས་གཟབ་གཟབ་བྱེད་པའི་རང་སྲོལ་ད་ལྟའང་མ་ཉམས་པར་ཡོད།  བྱིས་པ་བསམ་མ་ཤེས་པ་དག་ཆུ་འགོ་ལས་རྐང་ལག་བཀྲུ་བ་སོགས་གནོད་པ་བྱས་པ་རྒན་པོ་དག་ཤེས་ཚེ་ཀླུ་ཐབས་བཟང་བའི་དུས་ལ་བལ་དན་དང་མར་གྱིས་རྒྱན་མགུལ་གཏོང་བ་དང་ཚ་གསུར་ཕུད་པ་སོགས་ཀྱིས་མ་ཤེས་པ་ལ་འགྱོད་གཤགས་བྱེད།  དེ་བཞིན་ཆུ་འགོའི་འགྲམ་གྱི་ཤིང་གི་ཡལ་ག་ཙམ་ཡང་མི་གཅོག་པ་སོགས་རང་སྲོལ་ཐུན་མོང་མ་ཡིན་པ་ཤིན་ཏུ་མང་།

  བོད་ཀྱི་ཡུལ་གྲུ་ཀུན་ཏུ་རི་མཐོ་ས་རེར་མདུང་སྟོད་ལ་རྩེ་ཟེར་བ་ཞིག་དང་།   དམའ་སའི་ཆུ་འགོ་རེར་ཤིང་སྡོང་བལ་ཆག་གིས་བརྒྱན་པ་རེ་ག་ས་ག་ན་རིག་རྒྱུ་ཡོད་པ་ཚང་མ་གནོད་པ་སྲུང་བའི་ཐབས་སྐྲག་སྣང་སྤུ་གཟེང་བ་རེ