ཚྭ་འདམ་གཞོང་གི་ས་རྒྱ་ཆེ་ཞིང་བརྗིད་ཉམས་ལྡན་པར་མ་ཟད། ད་དུང་ཁུ་སིམ་འཇམ་ཐིང་ངེར་གནས་ཡོད། གཞོང་ས་འདི་ན་རང་བྱུང་གི་མཛེས་ལྗོངས་ངོ་མཚར་བ་མང་ལ། མཚོ་དང་མཚེའུ་ཡི་ཁ་དོག་དང་ཆགས་དབྱིབས་ཀྱང་རྣམ་པ་སྣ་ཚོགས་ཡིན། གཤམ་དུ་བརྗོད་པ་ནི་ཚྭ་འདམ་གཞོང་གི་ཤར་རྒྱུད་ཁོངས་སུ་ཡོད་པའི་ངོ་མཚར་གྱི་ཟུར་གསུམ་ཆུ་མིག་ཅིག་ཡིན།
ཚང་མས་ཤེས་པ་ཞིག་ལ། དབྱིབས་ཟུར་གསུམ་མ་ནི་སྒྲིག་གཞི་ཆེས་བརྟན་པོ་ཞིག་ཡིན། ཡིན་ནའང་། རང་བྱུང་ཁམས་ནས་དབྱིབས་ཟུར་གསུམ་མ་ཞིག་རང་བྱུང་དུ་ཆགས་པ་ནི་ཧ་ཅང་མཐོང་དཀོན་པ་ཞིག་ཡིན་སྟབས། མི་མང་པོས་དབྱིབས་ཟུར་གསུམ་མའི་ཆུ་མིག་འདི་ནི་མིས་བཟོས་པ་མིན་ནམ་ཞེས་དོགས་སློང་བྱེད་བཞིན་ཡོད།
ཕལ་ཆེར་ཟུར་མཉམ་ཟུར་གསུམ་དུ་སྣང་བའི་ཆུ་མིག་འདི་ལ། ཕྱི་ཚུལ་ནས་བལྟས་ན། ཅི་ནས་ཀྱང་མིས་བཟོས་པ་ཁོ་ན་ཡིན་པར་འདོད། འོན་ཏེ། རྟོག་ཞིབ་མི་སྣས་རྟོག་ཞིབ་ཟབ་མོ་བྱས་ན། དབྱིབས་ཟུར་གསུམ་གྱི་ཆུ་མིག་འདི་ནི་རང་བྱུང་ཁམས་ཀྱིས་བསྐྱེད་པ་ཞིག་རེད།
ཀྲུང་གོའི་ཚན་རིག་གླིང་མཚོ་སྔོན་ཚྭ་མཚོ་ཞིབ་འཇུག་ཁང་གི་ཆེད་མཁས་པས་དབྱེ་ཞིབ་བྱས་པར་གཞིགས་ན། ཆུ་མིག་ཉེ་འཁོར་གྱི་ས་འོག་ཏུ་བ་ཚྭའི་འདུས་ཚད་མཐོ་བའི་བཞུར་ཆུ་འགའ་ཡོད་ཅིང་། མུ་རྒྱུད་འདི་ནི་རླུང་ལ་བརྟེན་ནས་ཆགས་པའི་ཡ་ཏན་ས་དབྱིབས་ཡིན་སྟབས། ས་གཤིས་སབ་སོབ་ཏུ་གནས་ཞིང་། ཐན་པ་ཆེན་པོ་བྱུང་དུས། རླངས་འགྱུར་བྱུང་བ་ལས་ཚྭ་དང་བ་ཚྭའི་བ་མོ་ཆགས་པ་དང་། དེ་ནས་ཉིན་མོའི་ཉི་འོད་ཀྱིས་མུ་མཐུད་རླངས་འགྱུར་བྱེད་པ་དང་མཚན་མོའི་ཟླ་འོད་ཀྱིས་མུ་མཐུད་བརླན་འགྱུར་བྱེད་པའི་ནུས་པ་རྒྱུན་ཆད་མེད་པར་བྱུང་བ་ན། མུ་རྒྱུད་འདིའི་ཚྭ་ཡི་བ་མོ་ཧ་ཅང་གཙང་ལ་དཀར་པོ་ཡིན་པ་རེད།
ཟུར་གསུམ་ཆུ་མིག་གི་ཕྱིའི་མུ་རྒྱུད་ནི་ཁམ་སྨུག་གི་ཟླུམ་གཟུགས་ས་རྒྱུ་ཡིན་ལ། དེ་ནི་གྱེས་རྡུལ་ལྕགས་འཛོམས་པའི་ཆུ་གཟུགས་ཤིག་ཀྱང་ཡིན། ཆུ་རྣམས་ས་འོག་གི་གས་ཤུལ་བརྒྱུད་ནས་ཕྱིར་འཕྱུར་བ་དང་། དེའི་ཤུགས་རྐྱེན་འོག་ཚངས་ཐིག་ཕྱེད་ཙམ་གྱི་ནང་ལ་ཆུས་བཤལ་གྱི་ནུས་པ་ཐོན་པ་ལས། ཚྭ་ཡི་བ་མོ་མུ་རྒྱུད་འདི་རུ་ཆགས་ཐུབ་མེད་པ་རེད། ཡིན་ནའང་། གྱེས་རྡུལ་ལྕགས་འཛོམས་པའི་ཆུ་མང་པོ་ས་ངོས་སུ་འཕྱུར་རྗེས། འཕྲལ་མར་དབྱང་འགྱུར་བྱུང་བ་དང་། དེ་ནས་ལྕགས་ཀྱི་དབྱང་འགྱུར་དངོས་པོར་གྱུར་ཡོད། དངོས་པོ་འདི་དག་ལོ་མང་རིང་ལ་ས་རྒྱུའི་ངོས་སུ་ཆགས་པ་བརྒྱུད་ལྟོས་བཅས་སུ་ཅུང་སྲ་བར་སྣང་བའི་ས་ཤུན་འདི་བྱུང་བ་རེད།
ངོ་མཚར་བའི་ཟུར་གསུམ་ཆུ་མིག་འདིའི་གྲུབ་ཚུལ་ལའང་རྟོག་ཞིབ་མི་སྣས་ཕྱོགས་མང་པོ་ཞིག་ནས་རྟོག་ཞིབ་དང་དབྱེ་ཞིབ་བྱས་པ་རེད། ཆུ་མིག་གི་ལྟེ་བའི་ཁུལ་གྱི་ས་བབ་མཐོ་ཚད་ལ་སྨི་2776ཡོད་ཅིང་། ཤར་ལྷོ་ནུབ་ཀྱི་ཕྱོགས་གསུམ་པོ་ཅུང་མཐོ་ལ་བྱང་ཕྱོགས་གཅིག་པུ་དམའ་བ་ལས། གྲུབ་ཆ་མི་འདྲ་བའི་བཞུར་ཆུ་གསུམ་ཤར་ལྷོ་ནུབ་ཕྱོགས་གསུམ་གྱི་ས་འོག་ནས་ཆུ་མིག་ནང་དུ་བཞུར་ཡོད་ཅིང་། བཞུར་ཆུ་གསུམ་གྱི་བཞུར་ཤུགས་དང་ཆུ་ནང་གི་དངོས་པོའི་བར་ལ་རྫས་འགྱུར་བྱུང་བ་ལས། ངོ་མཚར་རྨད་དུ་བྱུང་བའི་ཟུར་གསུམ་ཆུ་མིག་འདི་གྲུབ་པ་རེད།
ཡིན་ནའང་། ཆུ་མིག་ནང་རོལ་གྱི་ཆུ་རྣམས་ས་ངོས་སུ་བཞུར་སྐབས། ཉེ་འཁོར་གྱི་ས་འོག་གི་ཆུ་རྣམས་ཆུ་མིག་གི་བཞུར་ཁུང་ཉེ་འཁོར་དུ་འཛོམས་པར་མ་ཟད། ད་དུང་བསགས་དངོས་མང་པོ་ཡང་ཆུས་བཤལ་ནས་ཞོར་དུ་ཐོན་པ་དང་། ཆུ་མིག་གི་ཆུ་དང་འདྲེས་ནས་ཕྱིར་འཕྱུར་བ་ན། ཆུ་མིག་ཁའི་སེར་མདོག་གི་དངོས་པོ་འདུས་པའི་ཆུ་གྲུབ་པ་རེད།
རྟོག་ཞིབ་མི་སྣས་དབྱེ་ཞིབ་བྱས་ན། རང་བྱུང་ཁམས་སུ་ཆུ་མིག་གི་ཆུ་ཡར་འཕྱུར་བ་ནི་ཧ་ཅང་མཐོང་དཀོན་པ་དང་། ཆུ་མིག་འདི་ལྟ་བུའི་ཟུར་གསུམ་ཅན་གྱི་རང་བྱུང་རྣམ་པ་ནི་དེ་བས་ཀྱང་དཀོན། ངོ་མཚར་གྱི་ཟུར་གསུམ་ཆུ་མིག་འདི་ནི་རྒྱུ་རྐྱེན་གང་མང་ཞིག་འཛོམས་ནས་སྟེས་དབང་གིས་གྲུབ་པ་ཡིན་ལ། དུས་མཚུངས་སུ་བརྟན་པོའང་མིན་པ་དང་། དུས་ཀྱི་འཕོ་འགྱུར་དང་བསྟུན་ནས། ཟུར་གསུམ་ཆུ་མིག་འདི་མེད་པར་འགྱུར་ཡང་སྲིད་པ་རེད།
གང་ལྟར་ཀྱང་། བདུད་ཀྱི་མིག་དང་ལྷའི་ཕོ་ཉ་ཡི་མིག་ཆུ། ད་དུང་ཁྱད་ཆོས་སྣ་ཚོགས་ལྡན་པའི་ཚྭ་མཚོ་དང་ཟུར་གསུམ་ཆུ་མིག་སོགས་ཀྱི་ཆགས་གྲུབ་དང་འཕེལ་རྒྱས་ནི་ཚྭ་འདམ་གཞོང་གི་ལོ་ངོ་དུང་ཕྱུར་མང་པོའི་རིང་གི་ས་གཤིས་འགུལ་སྐྱོད་ལ་འབྲེལ་བ་ཟབ་མོ་ཡོད། དེ་ཚོ་ས་འོག་ནས་ས་ངོས་སུ་ཐོན་པ་ལས། རང་བྱུང་ཁམས་ཀྱི་ངོ་མཚར་རེ་རེ་མཚོན་ཡོད་ལ། དེ་ཡིས་དེང་རབས་ཚན་རིག་པ་རྣམས་ཀྱིས་ཚྭ་འདམ་གཞོང་ལ་ཞིབ་འཇུག་བྱེད་པར་ཁུངས་སྣེ་དང་གཞི་འཇོག་ས་གལ་ཆེན་ཞིག་འདོན་སྤྲོད་བྱས་ཡོད།
