ཀྲུང་གོའི་བོད་ལྗོངས་ཀྱི“ཧི་མ་ལ་ཡའི་མཐའ་སྐོར”གྱི་རྒྱལ་སྤྱིའི་མཉམ་ལས་གླེང་སྟེགས་སྐབས་གསུམ་པ།
རྩོམ་པ་པོ།：
ཡོང་ཁུངས།：ཀྲུང་གོའི་བོད་ལྗོངས་དྲ་བ།
དུས་ཚོད།：2023-10-11
ཀློག་གྲངས།：
སྟོན་དུས་ཀྱི་ཀླུ་ནང་རྒྱལ་སྤྱིའི་ཡུལ་སྐོར་གྲོང་རྡལ་ཆུང་ངུ་ནི་ཚོན་མདོག་རྣམ་པར་བཀྲ་ཞིང་། ནགས་ཚལ་རབ་ཏུ་སྟུག་པ། ཡུལ་ལྗོངས་ལྟ་ན་སྡུག་པས། མི་རྣམས་ཀྱིས་ཡིད་དབང་ཅིག་ཅར་འཕྲོག ཟླ10པའི་ཚེས4ནས6ཉིན་བར། ཕྱི་འབྲེལ་པུའུ་དང་བོད་རང་སྐྱོང་ལྗོངས་མི་དམངས་སྲིད་གཞུང་གིས་ཐུན་མོང་ཐོག་གཙོ་གཉེར་བྱས་པའི་ཀྲུང་གོའི་བོད་ལྗོངས་ཀྱི“ཧི་མ་ལ་ཡའི་མཐའ་སྐོར”གྱི་རྒྱལ་སྤྱིའི་མཉམ་ལས་གླེང་སྟེགས་སྐབས་གསུམ་པ་དེ་བོད་རང་སྐྱོང་ལྗོངས་ཉིང་ཁྲི་གྲོང་ཁྱེར་དུ་སྤེལ།
“འཕེལ་རྒྱས་དང་མཉམ་ལས་ཀྱི་གྲུབ་འབྲས་མཉམ་སྤྱོད”ཀྱི་རིམ་མཚུངས་གླེང་སྟེགས་འཚོག་ཡུལ།
སྐབས་འདིའི་གླེང་སྟེགས་ཀྱི་བརྗོད་དོན་གཙོ་བོ“མི་དང་རང་བྱུང་ཁམས་ཞི་མཐུན་མཉམ་གནས་དང་འཕེལ་རྒྱས་ཀྱི་གྲུབ་འབྲས་མཉམ་སྤྱོད་བྱེད”ཅེས་པ་ཡིན་ཞིང་། དེའི་ནང་འགོ་ཚུགས་མཛད་སྒོ་སྟེ་བརྗོད་དོན་གླེང་སྟེགས། རིམ་མཚུངས་ཡན་ལག་གླེང་སྟེགས་གཉིས་སོགས་བྱེད་སྒོ་ཚུད། རྒྱལ་ཁབ་དང་། ས་ཁུལ། རྒྱལ་སྤྱིའི་རྩ་འཛུགས40ལྷག་ཙམ་གྱི་འཐུས་མི་དང་། དེ་བཞིན་ཀྲུང་གོའི་ཕྱི་འབྲེལ་པུའུ་དང་། ཀྲུང་གུང་ཀྲུང་དབྱང་ཕྱི་ཕྱོགས་འབྲེལ་གཏུག་པུའུ། ཚོང་དོན་པུའུ། རང་བྱུང་ཐོན་ཁུངས་པུའུ། སྐྱེ་ཁམས་ཁོར་ཡུག་པུའུ་སོགས་ཀྱི་འབྲེལ་ཡོད་འགན་འཁུར་བའི་བློ་མཐུན་ཚོགས་འདུར་ཞུགས།གླེང་སྟེགས་ཡུལ་དངོས་སུ། སྐུ་མགྲོན་རྣམ་པས“མི་དང་རང་བྱུང་ཁམས་ཞི་མཐུན་མཉམ་གནས་དང་འཕེལ་རྒྱས་ཀྱི་གྲུབ་འབྲས་མཉམ་སྤྱོད་བྱེད”ཅེས་པ་བརྗོད་དོན་གཙོ་བོར་བྱས་ནས་ཧི་མ་ལ་ཡའི་མཐའ་སྐོར་གྱི་འཕེལ་རྒྱས་ཀྱི་མདུན་ལྗོངས་ལ་གླེང་མོལ། ཧི་མ་ལ་ཡའི་མཐའ་སྐོར་གྱི་འཕེལ་རྒྱས་ལམ་བུ་མཉམ་གྲོས། སྐྱེ་ཁམས་ཁོར་ཡུག་སྲུང་སྐྱོང་དང་། འཕེལ་རྒྱས་མཉམ་ལས། སྤྱི་ཚོགས་ཀྱི་རིག་གནས་སྣང་ཚུལ་སྣ་ཚོགས་སྤེལ་རེས། རྒྱལ་སྤྱིའི་ལས་དོན་སོགས་ཀྱི་གྲོས་གཞིར་གྲོས་བསྡུར་གཏིང་ཟབ་བྱས།
“མོང་གོལ་དང་ཀྲུང་གོའི་དབར་ལ་ཡུན་རིང་གི་སྲོལ་རྒྱུན་གྱི་འབྲེལ་བ་ཡོད་པ་ཞིག་ཡིན། རྒྱལ་ཁབ་གཉིས་པོའི་དཔལ་འབྱོར་མཉམ་ལས་རྒྱ་ཆེར་གཏོང་རྒྱུ་དེ་རྒྱལ་ཁབ་གཉིས་པོའི་ངོས་ནས་བརྗོད་ན་གལ་འགངས་ཤིན་ཏུ་ཆེ་བ་ཞིག་རེད།” “མ་འོངས་པར་ང་ཚོས་གཉིས་ཁེའི་རྩ་དོན་ཐོག རྒྱལ་ཁབ་སོ་སོའི་བལྟོས་བཅས་ཀྱི་ལེགས་ཆ་དང་ཐོན་ཁུངས་ལ་བརྟེན་ནས། ང་ཚོའི་འགྱུར་མེད་ཀྱི་ཁྱིམ་མཚེས་ཏེ་ཀྲུང་གོ་དང་འདྲ་མཉམ་གཉིས་ཕན་གྱི་མཉམ་ལས་བྱས་ཏེ། རྒྱལ་ཁབ་གཉིས་པོའི་འགོ་ཁྲིད་དབར་གྲོས་མཐུན་བྱུང་བ་དག་དོན་འཁྱོལ་ཡོང་བ་བྱེད་ཀྱིན་ཡིན”ཞེས་མོང་གོལ་རྒྱལ་ཁབ་ཀྱི་ཙུང་ལི་གཞོན་པ་ཨ་མའར་སའེ་ཧན་གྱིས་བཤད།
ཨ་ཧྥུ་ཧན་ནི་སི་ཐན་གནས་སྐབས་སྲིད་གཞུང་གི་ལས་ཚབ་ཕྱི་འབྲེལ་པུའུ་ཀྲང་མུའུ་ཐ་ཅི་ཡིས“ཀྲུང་གོ་ནི་ང་ཚོའི་ཁྱིམ་མཚེས་རྒྱལ་ཁབ་ཅིག་རེད། ཁྱབ་ཁོངས་མང་པོ་ནང་ང་ཚོ་དང་ཐུན་མོང་གི་ཁེ་ཕན་ཡོད་པ་མ་ཟད། ཕན་ཚུན་ཚོང་དོན་རོགས་ཟླ་བཟང་པོ་ཞིག་ཀྱང་ཡིན། རྒྱལ་ཁབ་གཞན་དག་དང་བསྡུར་ན། ང་ཚོས་ཀྲུང་གོ་ནས་ནང་འདྲེན་བྱེད་ཚད་དེ་བས་མང་བ་ཡོད། ང་ཚོས་དུས་ཡུན་རིང་པོའི་ནང་ཀྲུང་གོ་རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་བཏོན་པའི‘རྒྱུད་གཅིག་ལམ་གཅིག’གི་གྲོས་གཞིར་རྒྱབ་སྐྱོར་བྱེད་ཀྱིན་ཡོད། བྱེ་བྲག་ཏུ་བརྗོད་ན། ང་ཚོས་ཀྲུང་ཕའི་དཔལ་འབྱོར་བར་ཁྱམས་འཛུགས་བསྐྲུན་བྱེད་པར་རྒྱབ་སྐྱོར་བྱེད་བཞིན་ཡོད་པར་མ་ཟད། རྣམ་གྲངས་གལ་ཆེན་དེ་ནང་ཞུགས་འདོད་ཡོད”ཅེས་བཤད།
འགོ་ཚུགས་མཛད་སྒོ་སྟེ་བརྗོད་དོན་གླེང་སྟེགས་འཚོག་ཡུལ།
“འཕེལ་རྒྱས་ཀྱི་མཉམ་ལས་གྲུབ་འབྲས་མཉམ་སྤྱོད”ཀྱི་རིམ་མཚུངས་གླེང་སྟེགས་འཚོག་ཡུལ།
འཕེལ་རྒྱས་འགྲོ་བཞིན་པའི་རྒྱལ་ཁབ་ཚན་རིག་ཁང་གི་ཡོན་ཧྲི། རྒྱལ་སྤྱིའི་ཁོངས་གཏོགས་དང་ཚོད་འཛིན་ཚན་རིག་ཁང་གི་ཡོན་ཧྲི་ཡིན་པའི་ཝང་ཧྲོའུ་དབྱང་གིས“བོད་ལྗོངས་ཀྱི་ས་ཁུལ་གྱི་སྐྱེ་ཁམས་ཁོར་ཡུག་ཉམས་ཞན་ཡིན་པ་དང་མཐའ་འཁོར་གྱི་མཛའ་མཐུན་རྒྱལ་ཁབ་དང་མཉམ་འབྲེལ་ཐོག་ཁོར་ཡུག་སྲུང་སྐྱོང་གི་ཚན་ཞིབ། ཆུའི་ཐོན་ཁུངས་དོ་དམ། རྩྭ་ཐང་སྐྱེ་ཁམས་སྲུང་སྐྱོང་སོགས་ཀྱི་རྣམ་གྲངས་ལག་བསྟར་བྱས་ན། གནམ་གཤིས་འགྱུར་ལྡོག་དང་ཁོར་ཡུག་གི་འགྲན་སློང་ལ་ཁ་གཏད་པར་ཕན་པར་མ་ཟད། ས་ཁུལ་རྒྱུན་མཐུད་ངང་འཕེལ་རྒྱས་འགྲོ་བར་འགན་ལེན་བྱེད་ཐུབ་པ་རེད། རྒྱལ་སྤྱིའི་མཉམ་འབྲེལ་བྱས་པ་བརྒྱུད། ང་ཚོས་རྒྱལ་སྤྱིའི་ཐོག་གི་ཐོན་ཁུངས་རྟོག་ཞིབ་དང་ཞིབ་འཇུག་ཐད་ཀྱི་སྔོན་ཐོན་གྱི་ཉམས་མྱོང་དང་ལག་རྩལ་དཔྱད་གཞིར་བཟུང་ནས། བོད་ལྗོངས་ཐོན་ཁུངས་ཀྱི་ཚན་རིག་རྟོག་ཞིབ་ཀྱི་བྱང་ཚད་མཐོ་རུ་བཏང་ཆོག རྒྱལ་སྤྱིའི་མཉམ་ལས་རོགས་ཟླ་དང་ལྷན་དུ་ཐོན་ཁུངས་ཀྱི་ཚན་རིག་རྟོག་ཞིབ་ཀྱི་རྣམ་གྲངས་ཁ་ཤས་སྤེལ་ན། ཆ་འཕྲིན་མཉམ་སྤྱོད་དང་། ལག་རྩལ་སྤེལ་རེས། ཤེས་ལྡན་པ་གསོ་སྐྱོང་ལ་སྐུལ་འདེད་གཏོང་ཐུབ་ལ། བོད་ལྗོངས་ཀྱི་སྤུད་ཚད་མཐོ་བའི་འཕེལ་རྒྱས་ལ་འདེགས་སྐྱོར་ནུས་ལྡན་མཁོ་འདོན་བྱེད་ཐུབ”ཅེས་བཤད།
ཀྲུང་གོ་གཞི་ཆེའི་དཔལ་འབྱོར་ཞིབ་འཇུག་ཁང་གི་ཡོན་ཀྲང་གཞོན་པ་དང་ཞིབ་འཇུག་པ་ཡིན་པའི་ཝུའུ་ཞའོ་ཧྭ་ཡིས“བོད་ལྗོངས་ཀྱི་ཕྱོགས་བསྡུས་ཀྱི་འགྲིམ་འགྲུལ་དྲ་རྒྱ་དེ་ས་ཁོངས་ཀྱི་མཉམ་ལས་དང་རྒྱལ་སྤྱིའི་མཉམ་ལས་ཁྲོད་ཀྱི་ནུས་པ་འདོན་སྤེལ་གང་ལེགས་བྱེད་དགོས་ན། ཁྱད་ལྡན་ཐོན་ལས་སྐྱེད་སྲིང་སྟོབས་ཆེར་གཏོང་བ་དང་རྒྱལ་ཁབ་ས་ཆའི་བར་མཐོངས་ལེགས་སྒྲིག་གཏོང་བ་སྟེ་གནད་དོན་ཆེན་པོ་གཉིས་ལ་དོ་ཁུར་བྱེད་དགོས། བོད་ལྗོངས་ཀྱི་ས་ཁོངས་གནས་ཚུལ་དང་འཚམ་པའི་བླང་བྱ་དང་། འགྲིམ་འགྲུལ་གྱི་སྟོན་ཕྱོགས་འཕེལ་རྒྱས་ཀྱི(TOD)འདུ་ཤེས་མཚོན་པའི་བགྲོད་ལམ་དཔལ་འབྱོར། ས་ཚིགས་ཀྱི་དཔལ་འབྱོར། གླིང་ཁུལ་གྱི་དཔལ་འབྱོར། འགག་སྒོའི་དཔལ་འབྱོར་སོགས་དཔལ་འབྱོར་གྱི་རྣམ་པ་གསར་པ་སྐྱེད་སྲིང་དང་འཕེལ་རྒྱས་གཏོང་དགོས”ཞེས་བཤད།
“མི་དང་རང་བྱུང་ཁམས་ཞི་མཐུན་མཉམ་གནས”ཀྱི་རིམ་མཚུངས་གླེང་སྟེགས་འཚོག་ཡུལ།
“མི་དང་རང་བྱུང་ཁམས་ཞི་མཐུན་མཉམ་གནས”ཀྱི་རིམ་མཚུངས་གླེང་སྟེགས་འཚོག་ཡུལ།
ཧྲང་ཧའེ་མཉམ་ལས་རྩ་འཛུགས་ཀྱི་དྲུང་ཡིག་ཆེན་མོ་གཞོན་པ་ཉིའུ་ལན·ཉི་ཡ་ཀྲ་ལེ་ཡེ་ཕུའུ་ཡིས“སྐབས་འདིའི་གླེང་སྟེགས་ཀྱིས‘རྒྱུད་གཅིག་ལམ་གཅིག’གི་གྲོས་གཞིའི་སྒྲོམ་གཞིའི་ནང་གི་དཔལ་འབྱོར་དང་། ཚོང་དོན། རིག་གནས། མི་ཆོས་རིང་ལུགས་མཉམ་འབྲེལ་བཅས་ཀྱི་འཕེལ་རྒྱས་ལ་སྐུལ་འདེད་གཏོང་བར་དངོས་ཡོད་ཀྱི་དོན་སྙིང་ལྡན། ཧི་མ་ལ་ཡའི་མཐའ་སྐོར་གྱི་སྐྱེལ་འདྲེན་དྲ་བ་བཙུགས་ན་མདུན་ལྗོངས་རྒྱ་ཆེན་པོ་ལྡན་ཏེ། གོང་གསལ་གྱི་དམིགས་ཚད་དག་མངོན་འགྱུར་བྱུང་བར་ཕན་པ་རྒྱ་ཆེན་པོ་ཡོད་ཅིང་། རྒྱལ་ཁབ་སོ་སོའི་དབར་ཕན་ཚུན་སྦྲེལ་མཐུད་དང་གཉིས་ཁེ་མཉམ་ལས་བྱེད་ཤུགས་ཆེ་རུ་གཏོར་བར་ཕན”ཞེས་བཤད།
འབྲེལ་ཡོད་འོས་སྦྱོར།
