མདོ་དབུས་མཐོ་སྒང་གི་འཁྱགས་ཀླུང་འགྲམ་རྒྱུད་ཀྱི་རྩི་ཤིང་སྣ་ཚོགས།(༢)

ས་མཐོའི་ནའོ་ཡ་ལྷ་གྲུ།
མགོ་སྒུར་བ་ནི་ཤེས་རབ་ཅིག་ཡིན།        མེ་ཏོག་ནི་ངེས་པར་དུ་མགོ་བོ་ཡར་དགྱེས་ཏེ་འགྱིང་སྟབས་ཀྱིས་བཞད་དགོས་པ་ཞིག་ཡིན་ནམ། མེ་ཏོག་ཉི་དགའ་ཉི་མར་ཁ་གཏད་དེ་བཞད་པའི་གོམས་སྲོལ་གྱིས་ང་ཚོར་དེ་ལྟ་བུའི"ལྟ་ཚུལ་ཕྱོགས་རེ་བ"ཞིག་གྲུབ་ཡོད་སྲིད། ཡིན་ནའང་མེ་ཏོག་ཉི་དགའ་དང་འདྲ་བར་ལུག་མིག་གི་ཚན་ལ་གཏོགས་ནའང་། མཐོ་སྒང་གི་འཁྱགས་ཀླུང་འགྲམ་རྒྱུད་དུ་ལུག་མིག“མགོ་སྒུར”མང་པོ་ཞིག་གིས་ཐོག་མཐའ་བར་གསུམ་དུ་མགོ་བོ་བསྒུར་ཏེ་འཚར་སྐྱེ་འབྱུང་བཞིན་ཡོད། ཁོངས་གཏོགས་འདིའི་རྩི་ཤིང་དག་གི་དཔེ་མཚོན་རུང་བའི་ཁྱད་ཆོས་ནི་མེ་ཏོག་གི་འདབ་མར་བང་རིམ་མེད་པ་དེ་ཡིན་ལ། འདབ་མ་རྐྱང་བ་མཉམ་དུ་འདུས་ཏེ་མེ་ཏོག་ཆེན་པོ་ཞིག་གི་དབྱིབས་གྲུབ་ཡོད། མེ་ཏོག་དེ་དག་གི་མགོ་མར་བསྒུར་ཡོད་པ་དང་། དབྱིབས་འགྱེད་འཕྲོའི་ཁ་ཕྱོགས་ལྟར་ཕྱོགས་བཞིར་བརྐྱངས་ཡོད་པའམ་སྡེར་མའི་དབྱིབས་དང་འདྲ། མེ་ཏོག་མར་དཔྱངས་ཡོད་པས“མགོ་སྒུར་རྩི་ཤིང”ཞེས་འབོད།

སྦས་སྐུང་མཁན་པོ།        འཁྱགས་ཀླུང་འགྲམ་རྒྱུད་ཀྱི་རྩི་ཤིང་གི་ཁྲོད་དུ་རྩི་ཤིང་འཇིག་རྟེན་གྱི"རྫུ་སྤྲས་མཁན་པོ“ཡང་མང་དུ་ཡོད་དེ། དཔེར་ན་སྲོལ་གོང་སྨུག་པོ་དང་རྫ་སྐྱེས་དེ་ཝ། ཨ་བི་ཥ་སོགས་ལྟ་བུའོ། །དེ་ཚོའི་ཐུན་མོང་གི་ཁྱད་ཆོས་ནི་ལོ་མའི་ཁ་དོག་མཐའ་འཁོར་གྱི་བྲག་རྡོའི་ཁ་དོག་དང་འདྲ་བ་དེ་ཡིན་ལ། ཁོ་ཚོས་ཁ་དོག་ཉེ་འགྲམ་གྱི་དངོས་པོར་བརྫུས་ཏེ་རང་སྲུང་བྱ་དགོས་པའི་རྒྱུ་མཚན་ནི་གདུག་རྩུབ་ཆེ་བའི་ཁོར་ཡུག་ཁྲོད་རྒྱུད་སྤེལ་རྒྱུར་གནོན་ཤུགས་ཆེ་བས་ཡིན། དེའི་རྐྱེན་གྱིས་ཁོ་ཚོ་མང་ཆེ་བ་ལོ་མང་སྐྱེ་བའི་རྩི་ཤིང་གི་ཁོངས་སུ་གཏོགས། ཁོ་ཚོས་གཏན་འཇགས་མིན་པའི་རང་བྱུང་ཁོར་ཡུག་ལ་བསྟུན་ཐབས་བྱེད་པའི་ཐབས་ཇུས་ནི་སྐྱེ་དངོས་ནུས་ཚད་དང་འཚོ་བཅུད་མང་པོ་ས་འོག་གི་རྩད་པ་དང་གཞུང་རྟའི་ཁྲོད་མཁོ་སྤྲོད་བྱ་རྒྱུ་དེ་ཡིན་ལ། ས་ངོས་ཀྱི་ལོ་མ་ལྟོས་བཅས་ཀྱིས་ཉུང་། དཔེར་ན་ཨ་བི་ཥ་ལྟ་བུར་མཚོན་ན་ལོ༡པོར་མྱུ་གུ་འབུས་དགོས་པ་དང་། ལོ༢པ་ནས༤པར་འཚར་སྐྱེ་འབྱུང་དགོས་པ། ལོ༤པ་ནས༥པར་ད་གཟོད་མེ་ཏོག་བཞད་དེ་འབྲས་བུ་སྨིན་པ་ཡིན།

ང་མཛེས་ནའང་། ལུས་སུ་ཚེར་མ་ཡོད།        “སྤྲིན་གྱིས་གོས་འདོད་མེ་ཏོག་བཞིན་བཟང་འདོད”ཅེས་པ་ལྟར། མཐོ་སྒང་གི་རྩི་ཤིང་དག་ཀྱང་ཡག་བཏོད་པར་དགའ། རྒྱ་མེན་གྱི་ཚན་དང་ཚེར་སྔོན་གྱི་ཁོངས་སུ་གཏོགས་པའི་ཨ་བྱག་ཚེར་སྔོན་ལ“ཨ་བྱག་ཚེར་མ་བག་མ་གོས་གོན་འདྲ”ཞེས་ཡག་ལ་དགའ་བའི་དཔེ་རུ་བྱེད་ལ། ནུབ་གླིང་བས་འདི་ལ“ཧི་མ་ལའི་རྒྱ་མེན་སྔོན་མོ”ཞེས་ཀྱང་འབོད། མདོ་དབུས་མཐོ་སྒང་དང་འཕྲེད་བཅད་རི་ཁུལ། ཧི་མ་ལའི་རི་རྒྱུད་ཀྱི་མཚོ་འཕགས་མཐོ་བའི་སྤང་ས་དང་རྡོ་གསེང་སོགས་སུ་སྐྱེ། མེ་ཏོག་བང་རིམ་རྐྱང་བ་ཅན་འདབ་མའི་སྟེང་དུ་སྐྱེ་ལ། ལོ་རེའི་ཟླ༦པ་ནས༨པའི་བར་དུ་མེ་ཏོག་མདོག་སྔོ་སྨུག་ནས་དམར་སྨུག་ཅི་རིགས་བཞད། འཛམ་གླིང་གི་ས་མཐོའི་མེ་ཏོག་ཁྲོད་ཀྱི་གྲགས་སྐར་ལྟ་བུའི་སྐྱེ་དངོས་ཡིན་པར་མ་ཟད་བོད་སྨན་གྱི་ཐོན་ཁུངས་གལ་ཆེན་ཞིག་ཀྱང་ཡིན། དངོས་རིགས་འདིའི་ལུས་ཡོངས་ཚེར་མས་ཁེངས་པས་མིང་དེ་ལྟར་ཐོགས་པ་ཡིན།