མདོ་དབུས་མཐོ་སྒང་ནས་སྤང་རྩིའི་ཁོངས་གསར་བ་རྙེད་དེ་ལོ་བརྒྱའི་སྤང་རྩིའི“རུས་མཛོད”ལ་བཟོ་བཅོས་གཏོང་དགོས་བྱུང་།

       ཉེ་ཆར། གསར་འགོད་པས་ཀྲུང་གོའི་ཚན་རིག་གླིང་ཁུན་མིང་རྩི་ཤིང་ཞིབ་འཇུག་སུའོ་ནས་རྒྱུས་ལོན་བྱུང་བ་ལྟར་ན། ཚན་ཞིབ་རུ་ཁག་འདིས་ཉེ་ལམ་མདོ་དབུས་མཐོ་སྒང་ས་ཁུལ་དུ་སྤང་རྩིའི་ཁོངས་གསར་བ་སྟེ“སྡེར་ལེབ་སྤང་རྩིའི་ཁོངས”ཞེས་པ་གསར་རྙེད་བྱུང་བར་མ་ཟད། ཁོངས་འདིའི་ནང་དུ་དངོས་རིགས་གསར་རྐྱང3དང་རིགས་དབྱེའི་ཚན་སྡེབ་གསར་བ5ཡོད་པ་ངོས་འཛིན་གཏན་ཁེལ་བྱས་ཏེ། “འཛམ་གླིང་ཡང་རྩེ”ཞེས་འབོད་པའི་མདོ་དབུས་མཐོ་སྒང་གི་སྐྱེ་དངོས་སྣ་མང་རང་བཞིན་གསལ་སྟོན་བྱེད་པར་བདེན་དཔང་གསར་བ་མཁོ་འདོན་བྱས།        མིག་སྔར་ངོས་འཛིན་གཏན་ཁེལ་བྱས་པའི་སྡེར་ལེབ་སྤང་རྩིའི་ཁོངས་གཏོགས་དངོས་རིགས་གསར་བའི་ཁྲོད། གསར་དུ་རྙེད་པའི་ཁམ་མཆིན་སྡེར་ལེབ་སྤང་རྩི་དང་ཕུབ་དབྱིབས་སྡེར་ལེབ་སྤང་རྩི། ལོ་སྲབ་སྡེར་ལེབ་སྤང་རྩི་བཅས་རིགས3ལས་གཞན། ཁ་གྱེས་སྡེར་དབྱིབས་སྤང་རྩི་དེ་ཡང་བསྐྱར་དངོས་རིགས5རུ་དབྱེ་ཡོད་ལ། སྤང་རྩི་འདི་དག་གཙོ་བོ་མཚོ་འཕགས་སྨི3000ཡན་གྱི་ཁོར་ཡུག་ཁྲོད་ཁྱབ་པ་དང་། སི་ཁྲོན་དང་ཡུན་ནན། མཚོ་སྔོན་བཅས་འབྲེལ་མཚམས་ཀྱི་རི་མཐོ་ས་དང་གྲོག་རོང་། ནགས་འདབས་སོགས་སུ་གཅིག་བསྡུས་ཆེ་ལ། རྒྱུན་པར་སྔོ་དྲེག་གི་རིམ་པ་དང་ས་རྒྱུའི་ངོས་སུ་འབྱར་ཡོད།
       གསར་རྙེད་འདིས་ལོ་ངོ་བརྒྱ་ལྷག་ལ་བརྒྱུད་པའི་སྲོལ་རྒྱུན་གྱི་རིགས་དབྱེའི་མ་ལག་ལ་བཟོ་བཅོས་བྱས་པར་མ་ཟད། མདོ་དབུས་མཐོ་སྒང་དེ་དངོས་རིགས་རིགས་དབྱེའི་ས་ཁུལ་ཚ་ཤོས་ཤིག་ཡིན་པའི་དམིགས་བསལ་གོ་གནས་ཀྱང་གོམ་གང་མདུན་སྤོས་ངང་འབུར་དུ་ཐོན་པར་བྱས་ཡོད། ཞིབ་འཇུག་རུ་ཁག་གི་འདོད་ཚུལ་ལྟར་ན། མཐོ་སྒང་མཐའ་མཚམས་ས་རྒྱུད་ཀྱི་སྐྱེ་ཁམས་མ་ལག་ལ་སྲུང་སྐྱོབ་བྱེད་པར་ཤུགས་སྣོན་བྱ་འོས་ཏེ། རྒྱུ་མཚན་ནི་ཁྱབ་ཁོངས་འདི་དག་དངོས་རིགས་གསར་བ་རིགས་དབྱེ་བྱེད་སའི“འགུལ་སླེ”གལ་ཆེན་ཞིག་ཏུ་འགྱུར་ཡང་སྲིད།