སྒྲོམ་དུ་ཚུད་པའི་སྙན་ངག
རུས་མིང་། རི་ཕྱོར་སྟོབས་ལྡན་རྒྱལ།
འཛིན་གྲྭ། མི་ཆོས་སློབ་གླིང་གསར་འགྱུར་རིག་པ་འཛིན་གྲྭ།
ཕ་ཡུལ། མཚོ་ལྷོ་བྲག་དཀར་རྫོང་།
སྲོག་གི་འདུ་འགོད་དཀྲུགས་སའི་ས་ཆེན་གྱི་ངོས་ལ།།
གཟུ་བའི་མིག་གི་ཟུར་མདའ་རྡོག་རྡོག་ཏུ་ཕབ་སྟེ།།
སེམས་པའི་ཕྱི་ནང་སློག་པའི་སྐད་ཆ་ཡི་བཞུར་རྒྱུན།།
མ་ལུས་ཚོར་བའི་ཀློང་ནས་ཤམ་ཤམ་དུ་འཁྲུངས་ན།།
སྤྲིན་པའི་མིག་ཆུ་གཏོར་སའི་ནམ་མཁའ་ཡི་ཁྱོན་དུ།།
གཟུགས་མེད་རྣམ་ཤེས་འཁྱུག་འགྲོས་ཡང་ཡང་དུ་ལྡེམ་སྟེ།།
རུས་པའི་ལྷུ་རྐང་དབར་གྱི་ཚིལ་རྐང་གི་སྙིང་གཏམ།།
སྒལ་ཚིགས་ཞེ་དགུའི་དཀྱིལ་ནས་ལྷོག་ལྷོག་ཏུ་འཕྱུར་ན།།
རླུང་བུའི་ང་རོ་རྩུབ་སའི་གཞིས་ཁྱིམ་གྱི་དཔལ་དུ།།
དཔྱོད་ཤེས་བློ་ཕུག་མ་བཀག་རང་རྐྱལ་དུ་བཏང་སྟེ།།
དུངས་བའི་ཐག་པར་བརྒྱུས་པའི་མཐུན་སྒྲིལ་གྱི་རང་སྒྲ།།
ཆོལ་གསུམ་རྣ་བའི་རྒྱན་དུ་གསལ་གསལ་དུ་མཆེད་ན།།
རེ་བའི་རྨི་ལམ་འཁོར་སའི་བྲང་ཁོག་གི་གསེབ་ཏུ།།
གློ་སྙིང་མཆིན་གསུམ་དབང་རྩ་གྲིག་གྲིག་ཏུ་སྦྲེལ་ཏེ།།
སྣང་བརྙན་གསོན་པོའི་བདེན་གཏམ་ཆད་མེད་དུ་སྒྲིག་ནས།།
སྣང་ཚུལ་དངོས་མའི་བཤམས་སྟོན་རྗེན་རྗེན་དུ་འཁྲབ་ན།།
ཆུ་མོའི་ང་རོ་སྒྲོག་སའི་རྫ་ཁོག་གི་འཕྲང་དུ།།
ལུས་པོའི་སྟངས་སྟབས་དྲག་པའི་ཤུགས་སྒྲ་ལ་བརྒྱུས་ཏེ།།
རང་དབང་ལྟད་མོ་ངོམ་སའི་མི་ཡུལ་གྱི་ཁྲོམ་ནས།།
བྲོ་གར་རྩལ་དགུའི་སྒེག་ཉམས་ལྡེམ་ལྡེམ་དུ་བསྟན་ན།།
རྩི་ཏོག་ཤུགས་གླུ་འཕོ་སའི་རྩྭ་ཐང་གི་གཞི་རུ།།
སྦྲ་གུར་ཆེ་མ་ཆུང་གི་ཐོན་ཐག་རང་སྦྲེལ་ཏེ།།
ཕོ་གཞོན་མོ་གཞོན་སྡེ་ཆེན་རྩེད་ར་རུ་འཛོམས་ནས།།
རི་གླུ་མངར་མོ་ལྷང་ལྷང་བྲག་ཅར་རང་མཆེད་ན།།
རླུང་རྟ་སྡེ་བཞི་སྐྱོམ་སའི་རི་མགོ་ཡི་རྩེ་རུ།།
ངག་གི་ལྷ་རྒྱལ་མ་ཆད་ལྷུག་ལྷུག་ཏུ་བརྗོད་དེ།།
སྨོན་པའི་ཁ་གཡང་བསྐྱི་བསེར་རླུང་བུ་ལྷན་དུ།།
ལམ་གྱི་ཕ་རོལ་རྒྱབ་ཏུ་སྙན་སྙན་དུ་སྒྲོག་ན།།
བཟོད་པའི་བྱང་ཁོག་འཁྲུངས་སའི་ཕུང་བོ་ཡི་སྟེང་ལ།།
ལྷད་མེད་དྲང་བོའི་གཏམ་གྱི་རྒྱན་ཆ་རང་བཏག་ནས།།
མི་ཚེ་གཅིག་གི་དཀའ་སྡུག་ཟུང་འདུས་ཀྱི་ཉིང་ཁུ།།
མ་ལུས་ཆར་བ་བཞིན་དུ་ཤག་ཤག་ཏུ་བབས་ན།།
མིག་གི་གཟུགས་སུ་ཕབ་པ་ཆད་ཡོད་རང་བསྡུས་ཏེ།།
རྣ་བའི་དཔལ་དུ་སྨིན་པ་ལྷག་ཡོད་རང་དོར་ནས།།
མི་ཚེ་རིང་མོ་ཞིག་གི་གཏམ་རྒྱུད་ཀྱི་གོ་རིམ།།
མུ་འབྲེལ་ཟློས་གར་བཞིན་དུ་ཡང་ཡང་དུ་བསྟན་ན།།
